Beetle

Таң алдындағы өлара. Әлі қараңғы. Есік ашылады. Саңылаудан түскен жарықтан айналаны ақ қар көмкергенін көреміз. Қалың табанды етік омбы қарға малтығып кете барды. Әудем жерден соң етіктің иесі қараңғыдан сұлбасы танылмай тұрған автомобильге отырып жүріп кетті. Міне ол машинадан түсіп, қаңтарулы тұрған қар тазартатын көлік оталдырды. Кадр сыртындағы дауыс: «Қар тазалаушы өзінің жұмыс машинасына қалай жетеді?». Тазалағыш көлік қозғалғанда, тасада тұрған манағы автомобильді анық көреміз. Дауыс: «Әрине тек «Beetle».

Бұл өткен ғасырдың ортасында АҚШ-та түсірілген Volkswagen Beetle жарнамаларының бірі. Креатив деген төгіліп тұр. Оқып отырып-ақ видеосын көргендей әсер алуға болады. Осы және өзге де шедеврлерді «Қоңыз: Фольксвагеннің Америкадағы шытырманы» деп аталатын кітаптан кездестірдім. Авторы Дэвид Кайли.

Жарнаманың нағыз құдыретін осы кітапта көреміз. Фольксвагеннің америкаға лайықталған концепциясын жасаған жарнама агенттіктерінің шеберлігіне, авторлардың шексіз қиялына таңырқамасқа болмайды. Әрине бұл марканың автомобильдері әдетте жайлы, салыстырмалы түрде арзан әрі сапалы. Компанияның тасы өрге домалауының басты себебі де осы. Дегенмен, олардың АҚШ-тағы тарихын оқып шықсаңыз талай ауыр кезеңдерді де бастан кешкеніне куә боласыз.
Бірақ барлық қиындықты жеңіп, бизнес биігін бағындыруға басқарушылардың дер кезінде жасалған таңдауы мен жарнамашылардың аса сәтті идеяларының да ықпалы аз болмағаны анық.

Кітап бизнесмендерге, басқарушыларға, жарнамашыларға, БАҚ қызметкерлеріне қызық әрі пайдалы болады деп ойлаймын. Қысқасы, оқып шығыңыз. Өкінбесіңізге мен кепіл.
Бөлісу:

6 пікір

Beisek
Битлз тобының аты осы көлiкке арнап қойылған емес пе?
ken
прическалары қоңыздың бейнесіне ұқсас болғасын солай атаған. топтағы біреуінің құлағының үсті кесілген бе, бірдеме болған. соны жасыру үшін сондай шаш үлгісімен жүрген.
VKM
Мектепте жүргенде арманым болған,қызыл Beetle.Жалпы қыздарға келеді.
torgai
"Қоңыздың" жарнамасы, әдемі ой тастады. «Керек» кеңес екен.
Marco
«AdAge» журналы жасаған рейтингте кітапта көрсетілген жарнама кампаниясы ХХ ғасырдың үздік кампанияларының қатарында аталады.