Мен оны #ЖАТырқамаймын

Себебі, жат қылығы жоқ. Барлығы өзіме — қазаққа тән. Тарихы да, сюжеті де. Себебі — бастан кешкенім. Тәнім сол тағдыр тезін тірнектеп жүріп өткермесе де, жаным сол қиын-қыстаудан қазір өткендей қансырайды. Қансырайды, өйткені жара жазылған жоқ. Көп сұраққа жауап алынған жоқ… Қансырайды, себебі тоқшылықта, күннің аманында қарным ашады алақаным тастай суып, қаным басыма шабады сол кезді елестетсем…

Блог - SaltanatOA: Мен оны #ЖАТырқамаймын

Тарихи маңызы бар туындының дүниеге келгеніне көңілім толып, Ермек ағаны құттықтауға асықтым. Қуанды, әрине, хабарласқаныма. Әйтсе де, көңіл-күйі түсіңкі. Күллі Елордада «Жат» фильмі бір-ақ кинотеатрда, бір-ақ мезгіл жүргеніне мен де таң қалдым!
Не өзің түсірмейсің, не түсіргенге мүмкіндік бермейсің… Себебі ақшада, басқада десең де, ұсақ-түйектен асып кете алмадық, биік мақсатты көздей алмадық…
Иә, фильм басынан аяғына дейін жылатып, жедел жәрдем шақыртып, қыспайды жүректі. Соңында ғана ҮЛКЕН? қояды. Бүкіл қазақты қыра жаздаған «аштықты» әсерлі ету керек еді. Жейтін бір жапырақ наны қалмай, төрт түлігі арам ауыздарды тойдырып, шегі бұратылды қазақтың. Баласы ботадай боздап ауқат сұрағанда, амалы таусылып, ақыры бас сауғалап, тарыдай шашылған ұлттың азабын арқаны бойлап шеге қаққандай қансыратып жеткізу керек еді. Неге десеңіз, беттерін секпілдеп боясаң да, жаны азап шеккен адамның жүзі басқа…
Блог - SaltanatOA: Мен оны #ЖАТырқамаймын

Дегенмен, бұл фильм — ЖОҚТАУШЫ! Ұлттың қасіретін, жазықсыз қырылған жандардың, желмен ұшты ма, құмға көмілді ме, әйтеуір тарих парақтарына да әділ түспей қалған «таза қасиетімізді» жоғалтқан қазақтың жоқтаушысы бұл. Бұл, бүгінде көптің санасына сіңіп, «парақорлықты», «жалқаулықты», «сауатсыздықты», «тойшылдықты», «кешігушілікті», «мақтаншақтықты», «еліктегіштікті» ұлтқа тән қасиет етіп жағып қоятын «космополит» туынды емес. Әсерлілігін былай қойғанда, қалайша «оп-оңай жойылатынымызды», өзіңе өзіңді сырттан қаратып қоятын ЕҢБЕК. Өзіңе сұрақ қоюға мәжбүрлейтін фильм.
Сюжеттің желісін шарбаққа көрпе жайғандай тізбей-ақ қояйын. "Ізденісте" жүрген адам, өзі-ақ тауып алар, тамашалар қызықтырған «тұлғасының» туындысын. Иә, тырнақша көп. Неге десеңіз — «тұлғалар» көп емес. Ой салатын, күллі халықтың атынан ұлтын жоқтайтын, іздейтін азамат көп емес.
Сүттің бетіндегі қаймақ қанша жерден дәмді болса да, сүт жоқта ол қайдан болсын? Сол себепті, біреуге баға беруге қаншалықты асықсаң, соншалықты бағаң "қою" – жан-жақты болсын, өз қаймағы өзімен араласқан қою сүттей. Сонда қарның ашпас «маңыз» болар.
Бөлісу:

22 пікір

asaubota
түсінгенімше сізге де ұнамаған сияқты бұл «оскарлық» фильм :)
SaltanatOA
Ұнамады деп айта алмаймын. Қуандым:*:*:*
bake
Өткен ғасырдың 30-шы жылдарындағы аштық жайлы және одан кейін өмір жайлы кішкентай кезімде азғантай ғана ақпаратты үлкендер аузынан естіп қалғанмын. Уақыт өте, есейе талай рет қайталанып іштей бірнеше сұрақ қойыла берді. Сұрақ қойылмау керек еді! Әлде сол жылдар туралы жеткен ақпарат жалған ба? Сену қиын. Олай болу мүмкін емес. Соны біле тұра бәрібір сұрақ қоясың. Тоқ қарынға сұрақ туындайтындай ойды іштей қозғау оңай, оғанда есеп беремін.
Тек жазбаның мына жеріне келіспеймін «Ой салатын» деп жазылған сөйлемге. Қаншалықты «ой салуға» болады? Меніңше ұлтты құраған әр адамның өміріне қауіп, ұрпақ жалғасы үзілгейі тұрғанын түсінбейтін азамат жоқ шығар. Ондай азаматтар жоқ болып, жүрегі қаңсырамаса онда ұлттың жер бетінен жойылғаны. Бірақ өзің бар емесің бе? Өзіңді қазақ ұлтының мүшесімін деп көп ұлттардың ішінен бөлініп шығып тұрсың. Соны өзіңде менсізде түсінесін. Жаз, айт, жеткіз… Қазақтан жаратылған сәби бала өсе келе өзін қазақ деп тани берсін.
SaltanatOA
Мәселе сонда, ұлттың болашағы ұлт ретінде үзілгелі тұрғанын қара көздің бәрі бірдей ұғына бермейді. Сол себепті, сіз ұлтына сүйсінген, жаны ашыған нағыз азамат болсаңыз, өзінің қазақ екеніне намыстанатындар барын ұмытпауымыз керек, және «Ой салатынын» дәл соларға қатысты айтып отырмын. Күнделікті тіршіліктің себебімен кете барған бүгінгінің азаматы, ғаламданудың соңынан еріп, бейқам жүре берсе, ертең ұлт ретінде өшетінін ойлай бермейді.
Gastarbaiter
Күнделікті тіршіліктің себебімен кете барған бүгінгінің азаматы, ғаламданудың соңынан еріп, бейқам жүре берсе, ертең ұлт ретінде өшетінін ойлай бермейді.

Генетика тұрғысында ешқандай ұлт өшпейді, тек дами түседі. Адамды тек физикалық қырып жоюға болады.
Ал ұлттық нышандар дегенің сол бір ген иелерінің белгілі бір жағдайда өмірге икемделу нәтижесінде пайда болған құндылықтары. Яғни қоршаған жағдай мен халықтың әрекеттесуінің нәтижесі.
Арабтар неге бет аузын тұмашалап алад? Еріккеннен емес. Күннің ыстығынан қорғануы, Қасиетті Құран түспей тұрып солай киінген, еркек бәдәуилеріне дейін қымтанған.
Қазақ неге көшпенді? Еншісіне күрт континенталдық климат бұйырған. Сондықтан, жазда солтүстікке, қыста оңтүстікке қарай ығысып отыруға мәжбүр болған т.с.с
ken
Генетика тұрғысында ешқандай ұлт өшпейді, тек дами түседі.
Толығырақ?
Gastarbaiter
ken
Оқымадым.
«Генетика тұрғысында ешқандай ұлт өшпейді, тек дами түседі. Адамды тек физикалық қырып жоюға болады» — дегеніңе қарағанда "ұлт" деп белгілі бір ортақ гендерден тұратын топтарды айтып отырған сияқтысың. Егер солай деп оцаң, онда бұның қате. Бір ортақ ұлт өкілдерінің өзі әртүрлі гендік топтарға жатуы мүмкін. Ұлтты біріктіретін ген емес, ұлтты біріктіретін — ортақ тіл, өзін "қазақпын", «орыспын» немесе тағы басқа деп атандыратын ұллтық сана-сезім, ортақ тарихи өткені, мәдениеті және т.с.с. Ұрпақтарың қытайша сөйлеп кетсе, одан сенің гендерің жойылып кетпейді. Бірақ олар өзінің ұлттық келбетін жоғалтады. Салтанатоа жоғарыда осыны айтып отыр. Сен басқа нәрсені айтып кеттің.
SaltanatOA
XXI ғасырда адамды — ұлтты физикалық тұрғыдан қырып-жоймай-ақ, санасын улау арқылы жоюға болады. Өзіңіз білетіндей, қазіргінің қаруы — ақпарат. Сол себепті, адамның бойында лабораториялық сараптамаға жарамды ұлттық гені болғанмен, санасы ЖАТ болып тұрса, ондай жерде ұлттық дүние іздеп әуре болудың өзі артық.
Gastarbaiter
Санасы жат деген не бәле? Қазіргі түріктер мен қазақтардың санасы баяғы қыпшақтар мен оғыздардың санасына жат. Ал қыпшақтар мен оғыздардың санасы баяғы ғұндар мен сақтардың санасына жат. Менікі коммунист нағашы атамдыкіне жат. Атамдыкі Патша кезінде ақсүйектерге жатқан арғы әжемдікіне
жат. Регламент қайда? Сызық қай жерден сызылуы қажет? Популяция өз жерінде бұрын өмір сүрген толқындарға қанша жылға дейін айнымай еліктеуі тиіс, қай жағдайға дейін, және қай аталарына? Исаның туылуы немесе «жетінші атасы» сияқты бір тірек нүктесі бар ма сіздің түсінігіңіздегі "ұлттық болмыс" ұғымының?
SaltanatOA
Алысқа — Исаның туылуына бармай-ақ, сіз "ұлттық болмыс" дегенде нені айтасыз?
asaubota
Салтанат, сіз Тұрсыновты жақсы танитын болғасын алдын ала фильмді де жақсы көрген сияқтысыз. яғни, бір психологиялық терроризмнің құрбаны сияқтысыз. өйткені, бұл жазбаңыздан нақты ештеңе көрмей тұрмын. тек жалпылай ұлт, руханият сияқты ұғымдармен ғана шектелгенсіз. мен мысалы өз рецензиямда не ұнағанын, не ұнамағанын анық жаздым. сізден соны байқамадым.

фильмнің фиаскосын да мойындағыңыз келмейді, коммерциялық мақсатта да сәтсіз болды. оған кинотеатрлардағы көрсетілім санының күрт азайып кетуі де дәлел. ал сіз Тұрсыновпен бірге мұғаясыз, оны ешкім түсінбейді деп. егер шынымен жаныңыз ашыса ащы болса да қателерін айтуыңыз керек еді. мүмкін келесі де шынымен оскарлық дүние түсіріп қалар.

дегенмен пікіріңізге құрметпен қараймын, керекинфоға қош келдіңіз!
SaltanatOA
Құрметіңізге рақмет.
Бірге жұмыс істеп, ол кісінің мықты драматург қана емес, күшті менеджер екенін де жақсы білемін. Қазір кино режиссері ретінде тамашалап жүрміз. Мен өзімді ешқандай құрбан санамаймын, кемшілігін жоғарыда айттым, соқырсып құр мақтағам жоқ. Мен үшін ең бастысы — тарихи туындының дүниеге келгені, осы тұрғыда оны «жоқтаушы» деп бекер атамасам керек. Мен кемшілік пен қателіктен биік болғанымызды қалаймын, сонда асыл мақсаттарға жетуге, ортақ мүддені қозғауға болады.
Жалпы табиғатымнан: ақты — ақ, қараны — қара дейтін адаммын:))
Көптен бері қол үзіп қалып едім, енді қайта уақыт тауып келіп тұрамын.
Сізді де сыйлаймын. Мен үшін әрбір қазақ — жалғызым!
Рақмет
asaubota
бірақ Келін жақсы еді, иә? ;)
SaltanatOA
Иә:)))) Табиғаты дара фильм! Мен сол келінді ғой көрместен, депутаттардың айқай-шуына қарап, Ермек ағаны түсінбей, жағамды ұстағам — жек көргем:(((
ken
негізі, егер ішінде секс болмағанда шу шықпас еді. киноның атын шығаруға сол секстің де үлесі көп болды. өзім сол секс шудан соң барып көрдім. басқа бір де бір киносын іздеп жүріп көрмеппін. шалды теликтен беріп жатқанда көргем, кешкі шәйді ішіп отырып.
bake
«Биік» тұрыңдар деп айта-айта бергенде мынаны байқадым. Жеке басым қаншалықты «биік» тұр? Өзгенің алдында «Еш жағынан биік емес».
кемшілік пен қателіктен биік

1) Қаншалықты халық, ұлт мүддесі десе де жеке мүдде жоғары тұрады.
2) Кинофильм жеке жанр бойынша бағалынады, одан құтылмайды
PS: Ортақ мүдде -бағыттас қозғалғандардың әрқайсының жеке басынына ұтымдық әкелгеннің себебі.
SaltanatOA
Жеке басын сауғалап кеткен еврейді көрген жоқпын. Олардың мықты қасиеті — бір-біріне пікірі қарсы болса да, ұлттық мүддеге келгенде — барлығының басы бір жағада, сол себепті "өліп барып, тірілген ұлт". Және, бабаларымыз жеке мүддесін ғана ойласа — осынша жер, қадірсіз қалып бара жатқан ұлттық дәстүр де болмас еді.
Иә, қазір көпшілікте жеке мүдде басым, себебі — бізді біріктіретін ұлттық идеология жоқ, осыдан келіп «ортақ мүдденің» ғылыми түсініктемесіне жүгінесіз…
bake
Оқыс тақырып. Мұнда дін және 20 ғасырдың геосаясатының ролі баршылық. Қазіргі Израиль мемлекетінде құрдас тұрады. Соңғы рет елге қонаққа келгенде Қызыл теңіз жағалауында үй тұрғызып сол елді мекеннің мектептебінде мұғалім болып жұмыс істегенін айтқан. Ондада өз мәселері баршылық. Құрдас 90-шы жылдары көшіп кеткен сол жаққа, ұлты қазақ болғанымен… Балалары еврей… Өйткені анасы еврей…
SaltanatOA
Әрине, әр нәрсенің өз проблемасы бар. Дегенмен, еврейлерді мысал келтіргендегі мақсатым — ұлт мүддесі дегенде олардың жұмыла кететіндігін елеу. Ол ұлттың да өзіндік аласы бар, алайда сол алалықты дәл біздей шулатпайды, көрсетпейді, және ең маңыздысы — кез келген мүмкіндікті, мәселені өз мүддесіне қарай тартады, ырылдаспайды…
bake
Оффтоп: Бірде КерекИнфода фантастика жайлы пікірмен алмасқанмын. Басында "қазақ тілді фантастика жоқ" деп алып. Одан кейін алғашқы пікіріме қарама-қарсы пікір білдіргенмін. Қазақ тілде жаратылған дүние мол еместігін білгенмін, кейде әр салада жасалған дүние тек бір дана ғана бар болып шықты. Соның өзі осы дүние бар дегенге жеткілікті. Қайталап жасағаннан жалықпау қажет, сапа дана санымен және осы даналарды жасауға кеткен уақытпен келеді.
SaltanatOA
Оныңыз рас. Саны болмай, сапа түзелмейді.