Айғырдың жақсысы арық

Жақсы тамақ қалғанша, жаман қарын қақ жарылсын @ Авторитет жинаған жігіт.

Перзентхана. Гүлдер. Сәбидің іңгәсі. Бөбектің иісі. Әлди-әлди әуені.
Осы сәттер қиялында мың өріліп, үміт пен арман араласқан сезім билеген отбасылардың қатары осы күні көбеюде.
Көбіне-көп бала көтере алмадым деп, әйелдер дәрігерге қаралып, өзін кінәлі сезініп жүреді. Бірақ ол баланы күлге аунап көтере ме? Нашар бензин құйып, оталмай тұрған көлік секілді болды онда әйел де, яғни бұл мәселеде «еркек факторы» жиі себеп болып жүр. Ал Сексенбай, Тоқсанбайларды тудырғандар мүлдем Қызыл кітапқа еніп кеткелі қашан.
Біз «климаксты» тек әйелдерге қатысты, ал ерлерді кез келген жаста биені буаз қылып тастайтын айғырдай көреміз. Ал шындығында қалай екен? Дәрігерлердің ерлер климаксы, яғни «андропауза» туралы айтып, дабыл қағып жүргендеріне көп бола қойған жоқ.
Бедеулікті ерлерге диагноз қылып, түрлі пысықайлар миллиондап ақша тауып жатыр.

Бірақ ең бастысы, ерлер өз мүмкіндігінің шыңырау шегі 20-30 жас аралығында екенін естен шығармауы тиіс. Үй, көлік алып, жағдайымды түзеп аламын деп, балалы болуды кейінге қалдырғандар сол жиған-тергені үйде былдырлап жүрген бүлдіршінді шөпілдетіп сүю мезетіне тең келмейтінін кеш түсінеді.
Андропаузаның ең басты себебі – «авторитет».
— Үйленіп алып, семіріп кетіпсің ғой!
— Ее, авторитет жинап жүрміз ғой, хехехе!
Үйреншікті диалог, солай ма?
Біздің заманымыздың кеселіне айналған «авторитет» — метаболизм синдромы. Деректерге сүйенсек, МС-на еркектер бейім келеді, әйелдерде климакстан кейін байқалады.
Жұмысқа бара жатып көлікте отырады, жұмыста комптың алдында отырады, үйге келіп диванды сағалайды, сөйтіп майдың қалай жиналғанын байқамай да қалады. Қарын, бөксе, көтен үлкейген сайын, ең маңызды гормон тестостерон азая түседі. Орда бұзар жасқа жеткенде гормон жылына 1-2%-ға кеми береді. МС ерлер ағзасының қартаюын тездетіп, андрогеннің (ерлердің жыныстық гормоны) жетіспеушілігіне әкеледі, ақырында андропауза басталады.
Тестостерон деңгейі төмендер көбіне жыныстық қатынасқа ықыласы аз, жуас, буыны бос болады. Бірнеше кәсіп өкілдеріне жүргізілген зерттеу нәтижелері көрсеткендей тестостерон деңгейі діни (жыныстық қатынасқа тыйым салынған) қызметкерлерде төмен, ал актерлар мен футболистерде керісінше өте жоғары.
Орта бойлы дені сау еркектің белі 94 см болу керек, одан асса, тестостерон азайған болар.

Әрине, анропауза бедеулік деген сөз емес, бірақ жұбайыңызды ана бақытына бөлеу үшін ұзақ уақыт кетуі мүмкін. Сондықтан, ОТЫРМАҢЫЗ, ДИВАННАН ТҮСІҢІЗ ДЕ ҚИМЫЛДАҢЫЗ!

ПЫ.СЫ. КЕЛІНШЕКТЕРГЕ: Күйеуіңіздің ас тізімінен майлы, дүкеннің тағамдарын азайтыңыз. Қолдың айранын көбірек беріңіз. Жалпы даладан тамақтануына жол бермеңіз.
Пәтерде тұрсаңыз, жер үйге көшіп, бақша егіңіз. Су тартатын мотор қоймай, құдық қаздырып, бақшаны суарғанда жұбайыңызға шелекпен тасытыңыз суды. Ал қыста қар жаумаса да құдайдың құтты күні ауланы тазартқызыңыз.
Жер үйге көшуге көнбесе, саяжай алып, сонда сүйреңіз тестостерон иесін.
Үйіңіз әлі болмаса, үйді өздеріңіз салыңыз.
Жұ байыңыз темір тұлпар иесі болса, оған сыйға велосипед тартыңыз. Оны теппесе, «менің көңіліме тиеді» деп ренжіңіз.
Ал көлігінен мүлдем түспей қойса, оны ертіп күнде дүкенге, қонаққа барыңыз және дүкеннің қайда екенін жорта ұмытып, оны 20-30 минуттық жерден түсіріп алып, іздеген болыңыз. Және мұның бәрін орындағанда оны қайта-қайта мақтауды, еркелетуді ұмытпаңыз.