Қазақстан құрамасы жастар арасында жалпыкомандалық есепте бірінші және ересектер арасында екінші орын алды, деп хабарлайды астана әкімдігінің ресми сайты.

Түркияда армрестлингтен өткен Әлем чемпионатында Еркін Әлімжанов екі алтын жеңіп алып, екі дүркін әлем чемпионы атанды. Елордалық «Жігер» спорт клубының тәрбиеленушісі халықаралық додада ардагерлер арасында 75 кг салмақ санатында өнер көрсетіп, оң және сол қолмен күш сынасуда бірінші орын алды.

Армрестлингтен Әлем чемпионатында Қазақстан құрамасының сапында Астанадан «Толағай» жоғары спорт шеберлігі мектебінің спортшылары да өнер көрсетті. Олар қазақстандық команданың қоржынына төрт жүлде салды: 2 алтын, 1 күміс және 1 қола. ҚР еңбек сіңірген спорт шебері Георгий Дзеранов 100 кг салмақ санатында сол қолмен күресте бірінші орын алды. ҚР халықаралық сыныптағы спорт шебері Әлімжан Мұратов 80 кг салмақ санатында сол қолмен күресте бірінші орын, оң қолмен күресте екінші орын алды.

ҚР Спорт шебері Арман Рахманқұлов 85 кг салмақ санатында оң қолмен күресте қола жүлдені қанағат тұтты.

Армрестлингтен Әлем чемпионаты Түркияның Анталья қаласында 12-21 қазанда өтті. Жарыста әлемнің 40-тан астам мемлекетінен 1300 тарта спортшы бәсекеге түсті.

Қазақстан халқының сүйіктісі ҚазССР және СССР халық әртісі, ҚР Мемлекеттік сыйлықтың лауреаты, атақты тенор Әлібек Дінішев 28 қазан және 2 қараша күндері «Астана Операның» үлкен залында «Люблю тебя, мой край родной» атты концертін қояды. Шығармашылық кеш астананың 20 жылдығына арналған және ҚР Мәдениет және спорт министрлігінің қолдауымен өтеді.

Концертке Қазақстанның еңбек сіңірген қайраткері Александр Беляковтың басшылығымен «Астана Опера» хор театры мен Алматы қ. әкімінің эстрада-симфониялық оркестрі қатысады.

Әлібек Дінішев опера мен камералық классиканы, қазақ және орыс халқының әндерін, ұмытылмас ретро-шлягерлерді орындайды.

Айта кетейік, әншінің репертуары өте бай. Әсіресе Абай Құнанбаевтың «Желсіз түнде жарық ай», Жаяу Мұсаның «Ақ сиса»  т. б. ерекше орын алады. Оның талантын құрметтеушілер орыс композиторлары жазған «Лунная серенада», «Вечер на рейде», «Услышь меня хорошая» шығармаларын, батыс еуропалық Агустин Лараның Solamente una vez, Консуэло Веласкестің Besame mucho, Эрнесто Лекуонның «Сибонейін» сүйіп тыңдайды.

Әлібек Дінішев өзінің жеке бағдарламасымен Еуропаның үлкен залдарында концерт қойған. Ол әлемнің көптеген сахналарында Қазақстанды үлкен мақтанышпен таныстырады және Астананың да мәдени өміріне үлесін қосуда. Тәуелсіз Қазақстанның айтулы оқиғалары соның қатысуымен өтеді. Ол ЭКСПО-2017 ашылуында көптеген әлемдік көшбасшылардың алдында ән шырқады. Көрермендер оның асқан шеберлікпен орындайтын күміс даусын естуге асық.

Концерттің басталуы 18:00.

Соңғы жылдары жастардың Батысқа еліктеуі белең алып бара жатыр. Қоғамның рухани жұтаңдап, ұлттық құндылықтардан қол үзіп бара жатқанын осыған дейінгі мақаламда да айтып өткенмін. «Әр елдің салты басқа, иттері қара қасқа» демекші өзге елдің салты өз идеологиясын, өз құндылықтарын жастар санасына сіңіретінін есте сақтаған дұрыс.Сараланып келіп, салтымыздан орын алғысы келетін Хэллоуин мейрамы жайлы сөз қозғайық.
Қазанның 31-нен қарашаның 1-іне қараған түні әлемдегі барлық адамдар АҚШ пен Канаданың соңынан еріп, бүгінде мәні мен мағынасын көбі түсіне бермейтін Хэллоуин — пұтқа табыну мерекесін атап өтуге дайындалады. Хэллоуин АҚШ-та Рождестводан кейінгі орында тұрған, халық жаппай тойлайтын мейрамдардың бірі. Бұл мерекенің тарихына үңілсек, ол сонау христиандық дәуірге дейінгі кезеңнен қазіргі Англия мен Ирландияның, сондай-ақ Францияның аумағында өмір сүрген кельт атты халықтың ескі жылмен қоштасып, жаңа күнді қарсы алу түні екен. Хэллоуин сөзінің мағынасы «мереке қарсаңындағы күн» дегенге саяды. Олай дейтін себебі, ІХ ғасырда ІІІ Папа Григорий барлық әулиелер күнін тойлауды 13 мамырдан-1 қарашағаауыстырады. Мереке қарсаңындағы күн (31 қазан) деп аталған. Яғни, бұл күн қайта тірілетін әулиелерді қарсы алуға дайындық күні. Уақыт өте келе Хэллоуин жынойнаққа айналды. Ішіне жанып тұрған шырағдандар орнату арқылы асқабақтан түрлі бейнедегі шамдар жасап, сөйтіп қайта тірілген өлілер кейпіне еніп, үй-үйді аралап тәттілер сұрайтын дәстүр болып кеткен.
Ал енді біздің мемлекетіміздің тұрғысынан алып қарасақ, не діни мереке жатпайды, не ұлттық мерекеге жатпайды, не мемлекеттік мереке емес. Дегенмен, Хэллоуин мерекесін тойлау індет болып бара жатыр. Ал індет дегеніміз мысқалдап кіреді де, батпандап шығады. Кез-келген аурудың қалай кіргенін байқамай қаламыз, бірақ одан арылуымыз қиынға соғады. Бұл індеттің салдары ерекше ауыр, әсіресе ұрпақ тәрбиесі алдында. Өзімізден кейінгі ұрпақтың алдындағы жауапкершілік жат нәрсенің бәрін «жаңашылдық» демей, санамен саралауды қажет етеді. Сондықтан, бұл жынойнақ мейрамына қарсымын. Бірақ басқаның қалауына қарсы шыға алмаймын. Қынжылтатыны бір нәрсе, тек қана береке мен бірлікті, жақсылықты, сыйластықты уағыздайтын, оның үстіне ұллтық, мемлекеттік, діни дәрежесі бар мерекелердің осы шетелдік зұлымдық мейрамының көлеңкесінде қалып бара жатқаны…

27-28 қазанда Астана қаласы «Қазақстан» спорт кешенінің алаңында Ақмола облысы ауылшаруашылық тауар өндірушілерінің қатысуымен ауылшаруашылық жәрмеңкесі ұйымдастырылатын болады, деп хабарлайды Астана қаласы әкімдігінің ресми сайты.

Жәрмеңкеде Ақмола облысының 2 қаласынан және 17 ауданынан 100-ден астам ауылшаруашылық тауар өндірушілер мен өңдеуші кәсіпорындары бас қала тұрғындарына өз өнімдерін ұсынбақ.

Жәрмеңкеге Ақмола облысының агроөнеркәсіптік кешенінің субъектілері 373,5 млн теңге сомаға 730,5 тоннаны құрайтын түрлі өнім түрлерін әкеледі, барлық тауарлар қала базарларындағы бағалардан 15-20%-ға төмен болмақ, соның ішінде: ет және шұжық өнімдері – 174 тонна, балғын балық және балық өнімдері – 10,2 тонна. жұмыртқа – 2,5 млн дана, сүт және сүт өнімдері – 34,3 тонна, ұн – 50 тонна, өсімдік майы – 15 мың литр, картоп – 300 тонна; басқа өнімдер – 9,5 тонна.

Астана әкімі Бақыт Сұлтанов және Ресейдің Қазақстандағы Төтенше және Өкілетті елшісі Алексей Бородавкин 2019 жылға жоспарланған Санкт-Петербург пен Челябинск облысында өтетін Астана күндерін талқылады.

Бүгін Астана әкімдігінде қала әкімінің Ресейдің Қазақстандағы Төтенше және Өкілетті елшісімен кездесуі болып өтті.

Тараптар Астана және Мәскеу қалаларының үкіметі арасындағы 2018 жылдың желтоқсанында аяқталатын екі жылдық әріптестік бағдарламасының іске асырылу қорытындысын алдын ала талқылады.

Бородавкин мырза Ресейдің тарапынан екі астананың «жүйелі және жоспарлы әріптестіктің» жалғасуына мүдделі екендігін, таяу жылдарға өзара бірлесіп жұмыс істейтін жаңа бағдарлама әзірлеуді ұсынды.

«Елшілік Астана мен Мәскеудің арасындағы достық байланысты дамытып және нығайтуға бар күшін салады», — деп уәде берді Ресейдің Қазақстандағы Төтенше және Өкілетті елшісі.

Бақыт Сұлтанов елші мырзаның ұсынысын қолдады.

«Мемлекет басшысының тапсырмасымен біз Астананы 2050 жылға дейін дамыту Стратегиясын әзірлеуге кірістік, — деді қала әкімі. – Осы стратегияны іске асыру шеңберінде біз әлемнің түрлі қалаларының халықаралық урбанистикалық даму тәжірибесін зерттейміз. Бізге ірі мегаполис ретінде Мәскеудің тәжірибесі өте қызықты».

Әкім сондай-ақ заманауи әлемде бәсекелес елдер ғана емес, қалалардың да бәсекелесіп жатқан тенденциясының байқалатынын айта кетті.

«Бұл жерде тек бәсеке туралы емес, өзара екі жаққа да тиімді кооперация бар», — деді.

Мүмкіндігі шектеулі жандарды жұмыспен қамту мақсатында, олар үшін арнайы жұмыс орнын ашқан кәсіпкерлерге субсидия берілетін болды, деп хабарлайды Астана қаласы әкімдігінің ресми сайты.

«Елімізде мүгедектерді  әлеуметтік қорғау туралы» Қазақстан Республикасы Заңының 6-бабына және  «Халықты жұмыспен қамту туралы» Заңының 5-1-бабына сәйкес, аталмыш шара қолға алынып отыр.

Аталған ақпарат күшіне еніп, мүгедектерге жаңа жұмыс орнын ашқан кәсіпкерге  280 000 теңге  субсидия беріледі. 

Бұл қаржыға:

Тірек-қимыл аппараты зақымданған, оның ішінде кресло-арбамен қозғалатын мүгедектерге арналған арнайы жұмыс орындарына:

- Биіктікті өзгерту мүмкіндігі және жұмысқа бейімді беті бар үстел;

- Биіктікті өзгерту және отыру және арқа бейімді мүмкіндігі бар орындық;

— Компьютер;

— Қосымша аяқ салғыш;

— Қосымша шынтақ сүйеніші;

— Қозғалысты жеңілдетуге арналған қосымша таяныштар мен тұтқалар;

— Вертиколизатор;

— Заттар мен бөлшектерді қармауға және ұстауға арналған аспаптар, құрылғылар;

- Мүгедектің шектелуін өтеумен байланысты өзге де арнайы жабдықтар мен аспаптар.

Есту қабілетінен айырылған жандарға:

— Жарық беру;

— Қауіпті жағдайда белгі беретін жанып-өшетін жарық құрылғысы;

— Жарықпен дыбыс шығаратын құрылғы;

және өзге де құрылғылар кіреді.

Субсидия алу тәртібі және қажетті құжаттар:

1.      Өтінім https://www.enbek.kz сайтына тіркеліп, электронды түрде беру;

2.      Заңды тұлғаны мемлекеттік тіркеу куәлігінің көшірмесі немесе сол туралы анықтама;

3.      Жұмыс орнындағы құрал-жабдықтарды сатып алуға кеткен шығын сметасы;

Аталмыш құжаттарды Астана қаласы әкімдігінің Халықты жұмыспен қамту орталығына өткізу қажет. Айта кетейік, уақытша жұмыс орнын ашатын жұмыс берушілерге субсидия берілмейді.

Астана қаласының 20 жылдығына арналған интеллектуалдар сайысын Тілдерді дамыту және архив ісі басқармасы мен Астана Интеллектуалдар Клубы бірлесіп өткізді.

18 команда, 72 адам қатысқан сайыстың басты тақырыбы Астана қаласының 20 жылдығы болды. Қатысушыларға Астана тарихы және қазіргі кезіне байланысты 20 сұрақ қойылды. Сайысқа мемлекеттік қызметкерлер, БАҚ өкілдері, студенттер, блогерлер және түрлі сала өкілдері қатысты. Тартысты өткен сайыс соңында үздік 3 команда мүшелеріне бағалы сыйлықтар берілді.

Шараны ашқан Тілдерді дамыту және архив ісі басқармасы басшысының орынбасары Сәкен Есіркеп «Астана қаласының әкімдігі, оның ішінде Тілдерді дамыту және архив ісі басқармасы мемлекеттік тілдің әлеуетін көтеру, ұлттық құндылықтарды нығайту бағытында бірқатар маңызды әлеуметтік жобаны қолға алып отыр. Бүгінгі шара да осының айғағы. Осы сайыс көпшілік арасында кеңінен танылып, сұраныс артып жатса алдағы уақытта тұрақты түрде ұйымдастырамыз деген жоспарымыз бар» деді.

«Мұндай сайыстарды 2 жылдан бері өткізіп келеміз. Басты мақсатымыз – Астана қаласында интеллектуал орта қалыптастыру, жастардың логикалық ойлау қабілеттерін жетілдіру және тілдің дамуына үлес қосу. Астана тақырыбына арналған ойынға қатысушылардың дені жастар болғанына қуаныштымыз», деді интеллектуалдық сайыс ұйымдастырушысы Аршат Оразов.

Астана қаласында интеллектуалдық жарыстарды тұрақты өткізу алдағы уақытта да жалғасын таппақшы. Жарысқа қатысушылар ауқымын кеңейту де негізгі жоспарлар қатарында. Бұл бағыттағы жұмыстар болашақта да жалғаса бермек.

Қала әкімдігі бұл мәселені жіті бақылауда ұстап отыр, деп хабарлайды «Хабар 24» арнасының тілшісі.

Өткен аптада бас шаһарға шамамен 4 мың тонна көмір жеткізілген. Ал соңғы 3 айда елорда тұрғындары 167 мың тонна қара алтынмен қамтамасыз етілді. Қала әкімдігі тұрғындарды көмірмен қамту үшін барын салып жатыр. Қара алтынды сататын 8 компаниямен меморандум жасалды. Ал көмір туралы ақпарат алу үшін iKomek байланыс орталығы ашылды. Енді 109 нөміріне хабарласып, қоймалардың қоры жайында білуге болады.



Мақсат Есмағұлов, қала әкімдігі отын-энергетикалық ресурстар бөлімінің басшысы:
— Биыл Астана қаласының әкімдігімен көмір көлемін арттыру бойынша көп жұмыс жүргізілді. 1 тамыздан бүгінгі күнге дейін 170 мың тонна көмір әкелдік. Жалпы, жылыту кезеңінде халықтың көмір тұтынуы 400 мың тоннаны құрайды. Бүгінгі күнде біз соның 170 тоннасын жеткіздік. Бүгінде астаналық қоймаларда 10 мыңнан астам көмір бар. 1 тоннасының бағасы 9 500 теңгеден басталады. Ең қымбаты 14 500 теңге тұрады.

Ерлан Қажкенов, көмір қоймасының меңгерушісі:
— Біз көмірдің түр-түрін сатамыз. Шұбаркөл көмірі халық арасында үлкен сұранысқа ие. Әрине, басында қала тұрғындары алаңдаушылық білдірді. Бірақ оған еш себеп жоқ. Көмір күнде жеткізіледі. Мәселен, бүгін 6 вагон әкелінді. 15 тоннасы қалды, әлі сатылған жоқ. Ертең де вагондар келеді.

Қала әкімдігінің өкілдері күнделікті баға мониторингін жүргізеді. Тексеріс нәтижесінде Көктал шағын ауданында көмірді 17 мыңнан сататындар анықталды. Бұл дерек бойынша бүкіл ақпарат жауапты органдарға жіберілді. Алақолдарға қатысты тиісті шешім қабылданады.

Елбасының бес әлеуметтік бастамасын жүзеге асыру мақсатында қалада «Астананы  газдандыру» бойынша мемлекеттік сараптама жүргізу үшін техникалық-экономикалық негіздеме жасалып, әзірленді және «Мемсараптама» РМК республикалық мемлекеттік кәсіпорнына жіберілді, деп хабарлайды Астана қаласы әкімдігінің ресми сайты.  

Қорытындыны алудың болжамды мерзімі – 2018 жылдың төртінші тоқсаны.  Астана қаласында газ тарату желілерінің құрылысы ТЭН-ге сәйкес үш кезекке бөлінген.  Қазіргі уақытта газдандыру процесін жеделдету үшін ТЭН мен әкімдік жобаның 1-ші кезектің 9 кешенін іске қосу мақсатында жобалау-сметалық құжаттама әзірленуде:

1-ші іске қосу кешені – АГРС-1 ден ЖЭО-1 және ЖЭО-3 газ беру қамтамасыз етіледі (су жылытқыш қазандықтар және мазут қазандары);

2-ші іске қосу кешені – АГТС-2 ден ЖЭО-2-ге газ жіберу, (су жылытқыш қазандар);

3-ші кешен мен 6-шы кешенге дейін іске қосу Көктал-1, Көктал-2 тұрғын үй алаптарына газ тарату желілері;

7-ші кешенді іске қосу – Железнодорожный тұрғын алабына газ тарату желісі.

8-ші және 9-шы кешенді іске қосу «Оңтүстік Шығыс» тұрғын алабына газ тарату желісі.

ЖСҚ 1 кезектің қорытындысын алудың болжамды мерзімі 2019 жыл бірінші тоқсаны.

«ЖСҚ-ның 1-кезекке мемлекеттік сараптаманың оң шешімін алған соң әкімдік Қазақстан Республикасының Бюджет кодексіне сай  Қазақстан Республикасы Энергетика министрлігіне  жобаны қаржыландыру үшін қажетті құжаттама бағытталатын болады. 2-ші және 3-ші кезектегі газ тарату желілерінің құрылысын іске асыру мерзімі 2021 мен 2023 жылдарға арналған жергілікті бюджет, республикалық бюджеттің, сондай-ақ жеке инвестицияларды тарту есебінен жүзеге асыру жоспарланған», делінген әкімдік ақпаратында.

Екінші кезектегі газ тарату желілерінің құрылысын іске асыру жобасы шеңберінде Мичурино, Интернациональный, Күйгенжар, Тельман, Пригородный, Garden Village және Family Village тұрғын алаптарына жеткізіледі.

Астана қаласының қалалық ортаның сапасын қадағалау басқармасы өкілдері үлестік құрылысқа қатысудың өзекті мәселелеріне жауап берді, деп хабарлайды Астана қаласы әкімдігінің ресми сайты.

Тұрғын үй құрылысына үлестік қатысу дегеніміз не?

2016 жылдың 7 сәуіріндегі ҚР «Тұрғын үй құрылысына үлестік қатысу» заңына сәйкес тұрғын үй құрылысына қатысу кепілдік қордың кепілдігін немесе екінші деңгейлі банктың қатысуы не салынатын тұрғын үйдің қаңқасын көтергеннен кейін үлескерлердің қаржысын тарта алады. Құрылыс компанияларына жеке азаматтарға басқа жолмен үлескерлердің қаржысын тартуға қатаң тыйым салынады. 

Тұрғын үй құрылысына үлестік қатысу келісімшарты қалай жасалады?

Тұрғын үй құрылысына үлестік қатысу туралы келісімшарт жазбаша түрде жасалады және жергілікті атқарушы органында оның есепке алу сәтінен бастап жасалған деп есептеледі. Уәкілетті компания тұрғын үй құрылысына үлестік қатысу мақсатында келісімшарт жасасуға ниетті жеке және заңды тұлғаларға құрылыс объектісі туралы толық ақпарат беруге міндетті. Құрылыс салушы компания уәкілетті органның рұқсатын алған соң ғана үлескердің қаржысын тарта алады.

Үлескер мен құрылыс салушы компанияның келісімшарт бойынша міндеттері қандай?

Үлескер құқығы:

— үлескер құрылыс салушы компаниядағы келісімшартта көрсетілген міндеттемелердің тиісті деңгейде орындалуын талап ете алады.

— ҚР азаматтық заңнамасында белгіленген тәртіппен тұрғын үй құрылысына үлестік қатысу құқығы туралы шарт талап етуге;

— құрылысқа жауапты компаниядан тұрғын үй құрылысына үлестік қатысуға жасалған келісімшарттың талаптарын орындалуын талап ете алады

Үлескер міндетті:

— үлескердің тұрғын үй құрылысына үлестік қатысу туралы шарттың бағасын төлеуі шартта белгіленген мерзімде төлемдерді құрылыс салушының және (немесе) уәкілетті компанияның банктегі банк шотына енгізу арқылы жүргізіледі;

— келісімшартта көрсетілген міндеттерді орындау;

— уәкілетті компаниядан тұрғын үй үлесіндегі пәтер немесе нысанды қабылдап алу актысы толтырылғаннан кейін 30 күн ішінде құрылыс компаниясы тарапынан ескертпе алған соң үлесін беру туралы келісімшартқа қол қойылады;

— егер мекенжайы немесе тағы да басқа мәліметтері өзгерген жағдайда уәкілетті ұйымды 30 күн ішінде жазбаша түрде ақпарат беру.

Ал құрылыс компаниясы өз кезегінде нысанның уақытылы аяқталуын және сапасының келісімшартта көрсетілген талаптарға сай болуын қамтамасыз етеді.

Құрылыс компаниясы немесе жауапты компания Кепілдік беру қорының немесе жергілікті атқарушы органның үлескерлердің ақшасын тартуға рұқсат бергені туралы айта отырып тұрғын үй құрылысының немесе басқа да нысанның жарнамасын жүргізе алады. Жарнамада құрылыс компаниясы және жауапты уәкілетті орган туралы ақпарат болуы тиіс.

Қандай жағдайда үлескер құрылыс компаниясымен келісімшартты үзе алады?

Уәкілетті компания толық емес және дұрыс емес ақпарат берген жағдайда үлескер тұрғын үй құрылысына үлестік қатысу туралы шартты жарамсыз деп тану үшін сотқа жүгіне алады.