kaztv.kaztrk.kz/kz/news/portal/ggolovkin-men-dueidtin-kezdesuin-del-bolzhagan-zhankuierge-bagaly-syilyk-beriledi-video

Таңертеңнен бері қала тұрғындары керекті құрал-жабдықтармен жалпықалалық экологиялық сенбілікке шықты. Қалалық мемлекеттік мекемелер мен жеке меншікті кәсіпорындардың қызметкерлері көшелерді тазалап, 400 жуық ағаш отырғызды.

Ақыртас көшесінде ағаш отырғызуға «KEGOC» АҚ, Бірыңғай жинақтаушы зейнетақы қорының қалалық филиалы, «Алматы» аудандық соты, ҚР ІІМ қызметкерлерінен 50 адам қатысты.

Сенбілікке шыққандар елорданы жинап, көркейту әр тұрғынның борышы деп санайды.

— Сенбілікке қатысуға өзім ниет білдірдім, қоғамдық іс-шараларға қатысу, қаланы көгалдандыруға атсалысу әр тұрғынның борышы деп санаймын. Бұл өте маңызды, өйткені, біз осында тұрамыз, сондықтан қала көшелерінің таза және әдемі, ал ағаштардың көп болғанын қалаймыз. Көктем шыққанда әр сенбі сайын үйіміздің алдын тазалап отырамыз, — дейді «KEGOC» АҚ «Энергоинформ» еншілес компаниясының жетекші маманы Серікжан Жарболов.

«БЖЗҚ» АҚ Астана қаласындағы филиалы директорының орынбасары Олжас Баймағамбетовтың айтуынша, қор қызметкерлері қаланы жаппай жинауға қатысу бастамасын бірауыздан қолдады.

— Ағаш отырғызуға қатысқанымызға қуаныштымыз, біз жасыл қала үшін! Қаланың әр тұрғыны оны көркейтуге, жинауға, ағаш отырғызуға үлес қосуы керек деп санаймын, — деді ол.

Айта кетейік, жалпықалалық сенбіліктің мақсаты қоғам назарын қала көшелерінде тазалықты сақтауға аудару және экологиялық мәдениетті қалыптастыру болып табылады.

Бүгін Астанада экологиялық айлық аясында «Таза қала — бақытты қала!» жалпықалалық сенбілігі өтті.

Қалалық басқармалардың өкілдері, жеке меншікті ұйымдар мен кәсіпорындардың қызметкерлері, сондай-ақ, елорда тұрғындары таңертең қала көшелерін жинауға шықты.

«Алматы» ауданында тиісті жұмыстарға 47 493, «Сарыарқа» ауданында — 33 856, «Есіл» ауданында — 19 852 адам жұмылдырылды. Қаланы санитарлық тазарту жұмыстарына 191 тиегіш техника мен 431 жүк көлігі тартылды. Аудандар аумақтарында терек, тал, шетен, арша және т.б. ағаштар отырғызылды.

Сенбілік аясында 163 мыңға жуық ағаш сыланды, парктер мен саябақтар жиналды. Сонымен қатар, студенттер мен әскери бөлімшелердің әскери қызметкерлерінің күшімен Есіл, Ақбұлақ пен Сарыбұлақ өзендерінің арналарын тазарту бойынша экологиялық акциялар өткізіліп жатыр.

Нұрсұлтан Назарбаев «Таза қала – бақытты қала» жалпықалалық сенбілігіне қатысып, ағаш отырғызды. сондай- ақ сенбілікке шыққандармен және қала жастары өкілдерімен әңгімелесті.

Қазақстан Президенті бұқаралық ақпарат құралдарына арналған брифингте таяуда бірқатар шет мемлекеттерге жасаған сапары жөнінде айтып берді.



Сонымен қатар, Мемлекет басшысы елорданы көгалдандыру аясында қаланың айналасында 70 мың гектар ағаш отырғызылған, ал оның ішкі бөлігінде жыл сайын саябақтар мен гүлзарлар пайда болып жатқанын атап өтті.

– Қазақстанмен бірге Астана да ажарланып келеді. Оны бүкіл әлем жұрты біледі. Келер жылы, «ЭКСПО-2017» халықаралық көрмесінің ашылуына қарай қаламыздың халқы 1 миллионға жетеді деп ойлаймын. Бұл – елорда ғана емес, бүкіл республика бойынша туу көрсеткішінің жоғары болуының нәтижесі. Астанада тұрғындар саны 3-4 миллионға жетсе, ғылым мен білімнің, технологияның, медицинаның одан әрі дамуына бұдан да зор үлес қосылады, – деді Қазақстан Президенті.

Сондай-ақ Нұрсұлтан Назарбаев барша қазақстандықтарды абаттандыру ісіне белсене қатысуға шақырды.

Егер әрбір азамат, әсіресе жастар елді мекендерді тазарту және ағаш отырғызу жұмыстарына қатысатын болса, онда әр ауыл, аудан, қала және олармен бірге бүкіл еліміз де көркейе түседі. Тұрмысы төмендер мен жетімдерге көмек көрсету де аса маңызды. Қазақстан Тәуелсіздігінің 25 жылдығын біз осындай нақты іс-қимылмен қарсы алуға тиіспіз. Біздің керемет байтақ еліміз бар, оның жеріне ағашты көп егуіміз қажет, ол халықтың денсаулығына оң ықпалын тигізеді. Өз елін сүйетін адам оның игілігі үшін жұмыс істеп, болашағын ойлайды, – деді Мемлекет басшысы.

***

Сенбілік қаланың санитарлық тазалық, абаттандыру және көгалдандыру жөніндегі экологиялық айлығы аясында өткізіліп отыр. Оған 4 мыңға жуық кәсіпорын мен ұйымнан, 200-ден аса денсаулық сақтау және білім беру мекемесінен, 130 мемлекеттік мекеме мен ведомстводан және ұлттық компаниялардан 100 мыңнан астам адам қатысты.

Сенбілік барысында 16 мыңдай ағаш егілді. Сонымен қатар Есіл, Ақбұлақ және Сарыбұлақ өзендері арналарын қоқыс пен тұрмыстық қалдықтардан тазарту мақсатымен экологиялық акция өткізілді.

Қаланы санитарлық тазарту, абаттандыру және көгалдандыру жөніндегі экологиялық айлық 18 сәуірден 18 мамырға дейін жалғасады.

Материал Астана қаласы әкімдігінің сайты astana.gov.kz деректері бойынша әзірленді.

Осы аптада Астана қаласының қорғаныс істері жөніндегі департаментінің жиын пунктінен Мемлекеттік күзет қызметі мен ҰҚК Шекара қызметі қатарында мерзімді әскери қызмет өткеру үшін 60-қа жуық жаңадан шақырылған бозбала жөнелтілді. Жаңадан шақырылғандарға өз туған жерін қорғаған аға буынның ерліктері дәріптелді, деп хабарлайды ҚР ҚМ баспасөз қызметі.

«Ұлы мереке қарсаңында біз дәстүр бойынша мемлекет қамқорлық көрсетіп жатқан Ұлы Отан соғысының ардагерлерін мадақтаймыз және сендер аға буынның даңқты дәстүрінің жалғастырушылары, ізбасарлары болып табыласыңдар. Себебі, отбасыңды, халқыңды қорғау — әрбір ер азамат үшін бастапқы міндет, абыройлы іс. Сендерге әскери антқа адал болып, туған өлкелеріне Отан қорғаушылар ретінде оралуларыңды тілеймін», — деді Астана қаласының ҚІЖД бастығы полковник Талғат Амангелдиев.

Жиын пунктінде жас бозбалаларды жеке тамақтану рационымен қамтамасыз етті және дәстүр бойынша ата-аналары, достары және туған-туысқандары жаңадан шақырылғандарды шығарып салуға келді.

«Мен борышымды өткергім келеді», — деп Астанадан шақырылған Жандос Жандарбек сеніммен айтты. Армияда ең алдымен мінез-құлық түзеледі. Мен жақсы көңіл-күймен конституциялық міндетімді атқаруға бара жатырмын. Отанымыздың су шекарасында қызмет етуге моральдық және физикалық тұрғыда дайынмын деп ойлаймын.

Бозбалалар мен олардың жақындары әскерде қызмет ету олар үшін абыройлы іс екенін атап өтті. Көбісі қуана-қуана Отанға қызмет етуге аттанғалы отыр.

ҚазАқпарат

Аспанмен ғимараты таласқан мынау қала-заманда көгі шексіз, шетсіз кең көрінген жәдігер қала. Көгілдір аспан осында ғана көз тартып, осында ғана ұшы-қиыры жоқ көлемін көрсетеді. Жастайымнан жадымда заманның сан қилы желінен атауы сан өзгерген, сонау ерте палеолиттің басынан бері орны бар, ғұндардың тұсында қала болып құлпырған қасиетті шаһар ретінде қалды.«Тараздың садағындай қиылған қас» деп тамсана тамылжытқан Фирдоусидің кезінен-ақ талайға көруге арман болған, топырағын қарауға желіктірген тарихы Таразды тамашалау бүгінгі ұрпақ үшін үлкен бақ, бабалардың үлкен сыйы. Блогқұрылтайдың осы шаһарда өткізілуіне орай, Intellect Incubator-лықтар болып көлік басын тіреп, барып қайттық.


20 ғасыр бойғы тарих, Керей мен Жәнібек хандардың желбірете байрақ тіккен топырағы, Қарахан ханның кезіндегі қой үстіне бозторғай жұмыртқалаған заман, Дәуітбек бабаның данагөйлігі, Тектұрмастың тектілігі, Айша бибідей арулардың асыл сезімі сіңген жер еріксіз елітпей қоймайды. Блогқұрылтайдың ұйымдастырушылары тарапынан болған тарихи қаланы аралату сапарында біраз жерге барып, біраз дүниелерге көз жеткіздік.

Тарихтың тағылымын сақтап, «бүгінгі күн – ертеңгі тарих» ұстанымын да ұмытпаған: «Әулие Ата» халықаралық әуежайы, «Баласағұн» концерт залы, «Көне Тараз» тарихи-мәдени орталығы, «Қазақ әлемі» тарихи-этнографиялық кешені, «Жәдігер» жылжымалы мұражай экспозициясы, «Төрткүл» керуен сарайы, «Әулие Ата» ат спорты клубтары әрбірімізге дәріптелген игі іс.



ЮНЕСКО-ның көлемінде 2000 жылдық талайғы тарихын тойлатып, бабалардың мұрасын мәңгі өшпестей, жүректе, есте сақтаттық. Елбасымыздың өзі: «Тараздың тойы – қара ормандай халқымыздың ежелден бергі ұзақ тарихымыздағы ұлан-асыр қуанышы, текті Тараз – біздің халқымыздың өткені мен бүгінін жалғап тұрған асыл арқау, мәңгіліктің алтын өрмегі», — деп баға берген алтын тойы тек Тараздықтар үшін емес, барша қазақстандықтар үшін ұлан-асыр мереке болған. Қазақ хандығының 550 жылдығына орай Тараз назардан тыс қалмай, басты рөлде болды.

Тарихтың алтын діңгегі ұлы адамдар — Таразадан шыққан тарландар да мені қызықтырған. Қайткенмен де, ойлайтынмын, осыншама тарихы терең жатқан топыратың баласы қандай болады екен деп. Жүсіп Баласағұн, Хайдар Дулати, Қашқари, Жалайрилар сынды текті ұрпақ тарихтың алтын әріп түсер дәптерін ашып берсе, Бөлтірік шешен, Жамбыл мен Кенен, Атанберділер жанындай жырлап өтті. Момышұлы Бауыржан сынды Халық Қаһарманын жаратқан топырақ, Шерхан Мұртаза, Әкім Тарази сынды тарландарға да ыстық ұя бола білген.

Қазақ жерінде пайда болған алғашқы қалалардың бірі қасиетті Тараз мен үшін жәдігер қала. Елімнің елдік алғанға дейінгі хандық дәуірдегі басынан кешірген оқиғалары осында ғана көз алдыңда кескінмен көріне алады. Кіріп келген шақтан-ақ бейнелік әсер етуі жағынан болсын, аурасының тарихилығы, әрбір дүниеге аса мән беріле әспеттеген ұлттық бейнелері құдды бір халық тұрмыс құрып, тіршілік етіп жатқан қала емес, мұражайдағыдай дәріптеп, қастерлеп, көздің қарашығындай сақтап отырған жәдігеріміз сияқты.

#bagiagaidar

Блогқұрылтай үшін Таразға келіп, орналасқан күннен бастап хабарласқан тараздықтар жайлы жазғым келді. Олар – Тараздың белсенді жастары, пікірсайысшылары. Олардың жете таныс болмаса да, хабарласып, Тараз қаласын аралатып, жағдайымызды сұрап, қасымызда жүргендігі олар туралы жазуға итермеледі. Сіздерге баршаға белгілі Тараз қаласының тарихы мен тарихи жерлері туралы жаза бермей, көпшілікке беймәлім пікірсайысы мен пікірсайысшыларын таныстыратын боламын.

ПІКІРСАЙЫС ОРТАЛЫҒЫ

Осыдан 6 жыл бұрын, 2010 жылы барлық Жамбыл облыстық пікірсайысшыларды жинаған «Еркін пікір» Жамбыл облыстық пікірсайыс орталығы құрылған. Әкімшілікпен тікелей байланыста болып, пікірсайысты дамыту жұмыстарымен айналысуда. Облыс әкімдінің жастар саясаты мәселелері басқармасының «Жастар арасында пікірсайыс ойындарын ұйымдастыру және өткізу» тақырыбындағы әлеуметтік маңызы бар жобасын ұтып алған. Жастар арасында пікірсайыс ойынын насихаттау мақсатында кездесулер, семинар, тренингтер мен оқыту курстарын өткізумен айналысады. Облыстың барлық аудандары мен Тараз қаласында шешендік өнерге баулу мақсатында семинарлар мен жергілікті іріктеу турнирлерін өткізеді.

ТАРАЗ ПІКІРСАЙЫСШЫЛАРЫ

Пікірсайыста аға буын, орта буын, жас буын деген ұғымдар бар. Бұл ұрпақтар сабақтастығы десе де болады. Өзінен кейінгі буындарға үйретіп, жол көрсететін, өз орнын қалыптастыра білген тараздық аға буын пікірсайысшыларының алдыңғы қатарлы үштігімен таныстыру:

1. 1991 жылы дүниеге келген Ернұр Мадияров 6-сыныптан бастап пікірсайыс ойындарын ойнаған. Мектеп лигасында көптеген жетістікке жетіп, колледжде студенттік лигада ойнай бастайды. Жамбыл облысының абсолют чемпионы болып табылады. «Нұр Отан» партиясының кубогына арналған турнирдің 2 рет финалисті болған және 2014 жылы чемпионы атанып турнирді Тараз қаласына алып келген болатын. Линкольн-Дуглас форматы бойынша да чемпион және мықты ойыншысы. Ерекшелігі – қарсыластың айтқан әрбір сөзіне қарсылық білдіреді. Саяси білімі, логикасы мықты ойыншы қазіргі тараздық ойыншылардың кумирі болып табылады. Қазіргі таңда Байзақ аудан әкімдігі ішкі саясат бөлімінің «Жастар орталығы» мекемесінің директоры болып қызмет атқарады.

2. Келесі тараздықтардың үлгі тұтар ағалары – Әлімжан Шырынбеков. Республикалық турнирлардың бірнеше дүркін жеңімпазы Әлімжан мырза Линкольн-Дуглас форматының шебері. Қызылорда қаласының турнирында АПФ(Америкалық парламенттік формат) форматында да, ЛД форматында да, фан дебатта да чемпион атанған. Өзіндік стилі бар Әлімжан мырзаның ерекшелігі – фан дебатының патшасы. Қазіргі уақытта пікірсайыстан алыстаған.

3. Аға буындар үштігін аяқтайтын – Серікбол Берікқожа.
Тараздағы барлық клубтың басын қосушы ұйым Еркін Пікірдің негізін қалаушы. Республиканы толық мойындатқан өте білімді ойынша "Құбыжық" деген лақап атқа ие болған. Қəзіргі таңда маслихат депутаты. Өте мықты дебатер, ұйымдастырушы, «ЖаңаРУ» жастар коалициясы» заңды тұлғалар бірлестігінің президенті, заң ғылымдарының магистрі.

Осы мықты тараздық пікірсайысшылардың ізін жалғастырушы, қазіргі пікірсайыс ортасында есімдері таныс ойыншылар қатарына кезінде «Еркін пікірді» басқарған Асхат Олжабаевты, қазіргі «Еркін Пікірдің» басшысы Ақнұр Сәрсенбекті, Дулат Тұрсыналы, Сағат Жаналиев секілді ойыншыларды атауға болады.

ФОРМАТ

Формат барлық жердегідей АПФ (Америкалық парламенттік формат) форматы бойынша амандасудан қорытынды немесе нəтижеге дейін толық сақталу керек. Ерекшеліктері:
• Философия соңында емес, міндетті түрде дефиницадан кейін айтылуы тиіс, болмаса жоқ деп есептеледі.
• Тек қана идея жеткіліксіз, аргументте факт болу міндетті.
• Үшінші сұрақты қабылдау міндетті
Сіздерге тараздықтар, оның ішінде пікірсайысшы жастары туралы кішкене болса да ақпарат бере алдым деп ойлаймын. Оқығандарыңыз үшін рақмет! Толықтыруларыңыз бен пікірлеріңізді күтемін!))

Сәуір айының 22 күні «Гүлдене бер, Туған ел!» жалпыұлттық жастар марафон-эстафетасы басталды. Белсенді жастардың 300 жуық өкілі «Жасыл ел» жастар еңбек жасақтары маусымының ашылуына қатысты. Аптасына екі рет еріктілер қаланы тазарту және абаттандыру жұмыстарын жүргізеді, ағаш отырғызып, жасыл көшеттерге күтім көрсетеді, сондай-ақ, соғыс ардагерлеріне тұрмыста көмектесетін болады.



Акцияға «Жас Отан» жастар қанатының мүшелері, «Жасыл ел» жасағының және студенттік құрылыс отрядтарының өкілдері, ЖОО, колледж студенттері, орта мектеп оқушылары қатысатын болады.

– Біздің басты мақсатымыз Астананы сүйетін, елін сүйетін жастарды біріктіру, оларды қаланы абаттандыру жұмыстарына өз үлесін қосуға тарту. «Гүлдене бер, Туған ел!» акциясына жастар өз еркімен қатысады. Қазіргі жастар белсенді, бастаманы қуана қолдауда, тазалықта тұрып, еңбек еткенді қалайды, — дейді «Нұр Отан» партиясы «Жас Отан» жастар қанатының төрағасы Шахмардан Байманов.

Жастар жасағы тұрақты түрде сенбіліктер өткізбекші. Жастар елорда көшелерін, аулалардағы ашық алаңдарды тазартып, ретке келтіреді, сондай-ақ, көгалдандырумен айналысады. Оның үстіне соғыс ардагерлері мен қарт адамдарға жәрдемдеседі.

– Осындай акцияға алғаш рет қатысып отырмын. Мен мұны қала алдындағы борышым деп санаймын. Елорданы абаттандыруға үлес қосып, адамдарды қоқыс тастамауға, тазалықты сақтауға, ардагерлерге көмектесуге шақырамын, – дейді Л.Н. Гумилев атындағы Еуразия Ұлттық университетінің студенті Аслан Асылбеков.

Қолайсыз ауа райына қарамастан «Жасыл ел» жастар еңбек жасақтарының 11-ші маусымы сәтті басталды. Жастар парк аумағын жинап, көшеттер отырғызды.

Есіңізге саламыз, ертең, 23 сәуірде қалада «Таза қала – бақытты қала» жалпықалалқ сенбілігі өтеді. Игі шарадан сіз де сырт қалмай, қаламыздың көркеюіне үлесіңізді қосыңыз.

Материал Астана қаласы әкімдігінің ресми сайты astana.gov.kz деректері бойынша әзірленді.

«Нұр Отан» партиясының Астана қалалық филиалының төрағасы, Астана қаласының әкімі Әділбек Жақсыбеков Қазақстан Республикасы Парламенті Мәжілісінің кезектен тыс сайлауын ұйымдастыруға және өткізуге атсалысқан партияның белсенді мүшелеріне Елбасының атынан алғыс хаттар табыстады.



Ә. Жақсыбеков қалалық штабтың сайлауалды науқанда атқарған жұмысын, оның маңызын айта келіп, партия мүшелерін осы мәртебелі істі абыроймен өткізгенімен құттықтады. Сондай-ақ, елорда басшысы «Нұр Отан» партиясын қолдау бойынша сайлаушылар дауысының 85,18% жинап, Астананың мемлекеттегі ең үздік нәтижеге қол жеткізгеніне тоқталды.

«Бұл маңызды және жауапты жұмыстың объективті қорытындысы. Астанада партияға теңдессіз қолдау көрсетілді. Халық Елбасын және еліміздің қазіргі саяси бағытын құптайды. Адал еңбектеріңіз үшін алғыс айтамын», — деді Ә. Жақсыбеков.

Азаматтарға «Нұр Отан» партиясының сайлауалды бағдарламасының басым бағыттарын түсіндіруге белсенді қатысқан қоғам қайраткерлері, сайлауалды штаб мүшелері, жас белсенділер алғыс хаттармен марапатталды.

Материал Астана қаласы әкімдігінің ресми сайты astana.gov.kz деректері бойынша әзірленді.

Астанада «Тілдарын — 2016» қалалық олимпиадасының және «Тіл шебері — 2016» мемлекеттік қызметші жастар арасындағы қалалық байқау жеңімпаздарын марапаттау салтанаты өтті. Бұл шараның мақсаты үш тілді – қазақ, орыс және ағылшын тілдерін жетік меңгерген қабілетті жастарды анықтау және қолдау, тілдік қарым-қатынас мәдениетін қалыптастырып, көп тілді меңгерген тұлғаны тәрбиелеу, қазақстандық патриотизмді нығайту, өзге халықтардың мәдениеті мен тілін құрметтеу.

Биыл ҚР Тәуелсіздігінің 25 жылдығына арналған «Тілдарын-2016» қалалық олимпиадасы «Тілеп» қобыз сарайында өтті. Конкурс үш кезеңмен өткізілді. Бірінші кезеңде қазақ тілін, екінші кезеңде ағылшын тілін меңгеру деңгейі тексерілді. Қатысушылар 15 минуттың ішінде тақырыпты ашып беруге тиіс болды. Ал үшінші турдың шарты бойынша қазақ тіліндегі мәтінді синхронды түрде орыс тіліне аудару қажет. Олимпиада нәтижесі бойынша «Тілдарын-2016» жүлдегері Ержан Орынбасаров атанса, «Тіл шебері – 2016» конкурсында Тұрар Мықтыбаева үздік болып танылды.

Шара барысында олимпиада мен байқау жеңімпаздары Астана қаласы әкімінің атынан дипломдармен және бағалы сыйлықтармен марапатталды.

– Мен байқауға қатысуға қуана келістім, өйткені, лингвистикалық гимназияда оқып, үш тілді де еркін меңгергем. Бірінші кезеңнен кейін жеңілдім деп ойладым, ал екінші турға өткенде өзіме деген сенімім арта түсті. Жүлдеге қол жеткіземін деп ойламаған едім, — дейді Нұрсұлтан Бекмұрзаев.



Шара барысында «Бәйтерек» тобы, Маржан Арапбаева, Құрмаш Маханов т.б. қазақ эстрадасының жұлдыздары өнер көрсетті.

Материал Астана қаласы әкімдігінің ресми сайты astana.gov.kz деректері бойынша әзірленді.