Астанадағы Орталық саябақ қала тұрғындарына тосын сый дайындауда. 1 мамырдан бастап есігін ашатын елордалық паркке жаңа аттракциондар орнатылды. Сонымен қатар, онда ашық бассейндер кешені пайдалануға беріледі.

Шырайлы шаһардың халқы мен меймандарына арналған тамаша демалыс орын­да­ры­ның бірі – саябақ екені белгілі. Әсіресе, жаз шыға салысымен республиканың түкпір-түкпірінен Астанаға қарай асығатын ұл-қыздар «Бәйтеректен» кейін аттрак­циондарды іздейді. Ондайда бүлдіршіндерді Есіл жаға­сындағы елордалық паркке ертіп апаруға болады. Бұрындары мұндағы әткеншектер саны аса көп емес-тін. Басыңды шыр көбелек айналдырып, жүрегіңді аспанға ататын экстремалды аттракциондар мүлдем жоқтың қасы еді. Бала біткеннің адре­налинді аңсап тұратын әдеті емес пе?! Енді бұл олқылық реттеліп, таңдау мүмкіндігі көбейе түсті. Атап айтсақ, саябаққа «Merry go round», «Сircus swing», «Aladin jet 6», «Balloon wheel», «Wonder Flight» секілді жаңа аттракциондар орнатылды. Ал парк аумағына құрылған тренажерларда ересектер мен балалар спортпен шұғылдана алады.
Қазір парктегі жөндеу жұ­мыстары аяқталды. Нәтижесінде «Уақыт өзені» субұрқағы бар аллея, «Сағат» стеласы, су шымылдығы бар үңгірлер, «Күннің көзі» композициясы, Олимпиада чемпиондары алаңы жасалып, қайта қалпына келтірілді. Сондай-ақ, саябақта үш тас көпір мен серпінді су­бұрқақтар салынып, тоғанның көлемі кеңейтілді.

Ең кереметі, Орталық парктің ішінде бассейндер кешені пайда болмақ. Астана қаласының Коммуналдық шаруашылық басқармасы берген ақпарат бойынша, хауыздардың ашылуы осы жылдың маусым айына тұспа-тұс келеді. Бассейндер кешенінің құрамына ауданы 708 шаршы метр, тереңдігі 0,4-1,8 метр болатын, SPA-ваннасы бар хауыздар кіреді. Сонымен қоса, онда спорттық жүзуге арналған, ұзындығы 25 метрлік 5 жолдан тұратын бассейн де табылады. Бұдан бөлек, кешен жерасты техникалық бөлмесі және жазғы дәмханасы бар би алаңқайларымен, «Са­ңырауқұлақ» балалар фонтанымен, трамплиндермен, төбешіктермен жабдықталған. Мұнымен бірге, бассейн аума­ғында ерлер мен әйелдердің киім бөлмесі, резеңке жабын төселген ойын алаңқайы, бадминтон мен жағажай волейболына арналған алаңдар, ағаш күркелер болады.
Коммуналдық шаруашылық басқармасының мәлімдеуінше, электрлік сужылытқыштардың арқасында бассейн кешені қыркүйек айына дейін қызмет көрсетеді. Ондағы судың температурасы шамамен 24-26 градус төңірегінде болмақ.

www.astana-akshamy.kz/?p=34050

Жаз жақындаған сайын Астана тұрғындары қаладағы субұрқақтардың іске қосылуын асыға күтеді. Биыл субұрқақтар маусымының ашылуы 1 мамыр – Қазақстан халқының бірлігі күніне орайластырылып отыр.

Бүгінде бас шаһарда 40 субұрқақ кешені бар. Олар былтырғы 1 қазанда қысқы режимге ауыстырылған болатын. Қысқы мезгілде ондағы су толығымен сорып алынады. Сыртқы жабдықтары, қондырмалары бөлшектеледі. Сондай-ақ, су қоймаларының жабындары қар мен мұздан тазартылады. Бұдан бөлек, жер астына жылытқыш құралдар орнатылады. Осы жұмыстардың бар­лығын Астана қаласының Табиғи ресурстар және табиғат пайдалануды реттеу басқармасына қарасты «Астана көгалдандыру құрылысы» акционерлік қоғамы атқарады.
Әдетте фонтандардың сыртқы безен­дірілуі де ерекше маңызды. Бұл орайда Есіл ауданындағы субұрқақтардың бәсі биік. Небір креативті үлгіде салынып, алуан пішінде атқылайтын заманауи фонтандар елордалықтар мен шаһар қонақтарын таңғалдырудан әсте танар емес. Әсіресе, біздің редакция ғимараты алдындағы биші субұрқақтар жазғы кештерде жұртшылықтың серуендейтін сүйікті мекеніне айналған. Сонымен қоса, Министрліктер үйі, Астаналық цирк, «Арай» саябағы, Есіл өзені маңындағы фонтандар да көздің жауын алып, көңілге рақат сезім сыйлайтыны рас. Жалпы, Есіл ауданындағы 16 субұрқақ кешенінің 8-і декоративтік жарықтандырылу құралдарымен қамтамасыз етілген. Ал фонтандардың түгелі дерлік компьютер арқылы басқарылады.
Алматы ауданының әкімдігі ұсынған деректерге сүйенсек, мұнда 13 субұрқақ кешені жұмыс істейді. Ішіндегі ең үлкені – 2007 жылы Президент саябағында салынған субұрқақ. Ондағы су көлемі 17045 текше метрге тең. Ал белгіленген қуаттылығы 648 киловатты құрайды. Мұнда 88 электрсорғы, 243 прожектор қойылған. Ауқымы жағынан «Қазақ елі» алаңындағы субұрқақ кешені де бұдан кем түспейді. Аталған орында 2070 текше метр су бар. Қуат деңгейі 605 киловатқа жетеді. Кешен 118 электрсорғы және 808 прожектормен жабдықталған.
Сарыарқа ауданы әкімдігінің мә­лім­деуінше, аймақта 10 субұрқақ кешені салынған. Көктемгі уақытта он­дағы сорғылар, вентильдер, жабындар, бүріккіш құралдар, бекітпелер, қақ­пақшалар және шүмектер қайта жаңар­тылып, қалпына келтірілді. Сонымен бірге, жерасты сулары ағызылып, сылан­баған ағаш қаптамалар бөлшектелді. Жазғы маусымда субұрқақ кешендерінің гранит төсемдеріндегі тұз іздерін тазалау, қоқыстан арылту, судың химиялық құрамын тексеру жұмыстары жүргізіледі.
Қаладағы барлық фонтандар 1 мамырдан бастап таңғы сағат 8-ден түнгі 12-ге дейін қосулы тұрады. Техникалық ережелерге сәйкес, түскі 11 мен 12-нің, және кешкі 4 пен 5-тің арасында үзіліс қарастырылған.

www.astana-akshamy.kz/?p=34057

1 МАМЫР — ҚАЗАҚСТАН ХАЛҚЫНЫҢ БІРЛІГІ КҮНІНЕ, 7 МАМЫР — ОТАН ҚОРҒАУШЫЛАР КҮНІНЕ, 9 МАМЫР — ЖЕҢІС КҮНІНЕ АРНАЛҒАН МЕРЕКЕЛІК ШАРАЛАР

Астанада 9-шы мамыр күні «Жаужүрек полк» ауқымды шарасы өтеді. Үш мыңға жуық адам Ұлы Отан соғысы ардагерлерінің, тыл еңбеккерлерінің, партизандардың және соғысқа басқа да қатысушылардың портреттерін қолдарына ұстап, Тәуелсіздік даңғылындағы«Astana mall» сауда-ойын-сауық орталығынан «Отан Қорғаушылар» монументіне дейін жүріп өтеді.

Акцияға арнап шығарылған арнайы роликтен және ақпараттық баннерлерден шараға қатысу шарттарымен танысып, ұйымдастырушылармен байланысу жолдарын білуге болады. Акция 9-шы мамырда сағат 12:30-да басталады.

astana.gov.kz/kk/modules/material/10442

Қала әкімі Әділбек Жақсыбеков Рио-де-Жанейродағы Олимпиада ойындарының басталуына 100 күн қалғанына орай өткен спорттық шараға қатысты. Сонымен бірге, шараға мәдениет және спорт министрі Арыстанбек Мұхамедиұлы және Ұлттық Олимпиада комитетінің бас хатшысы Данияр Әбілғазин қатысты.

Төртжылдықтың басты спорт жарысының басталуына қалған 100 күнді бүкіл әлемде атап өтеді. Осы күні жүздеген елордалық тұрғын Риода ел намысын қорғайтын біздің спортшыларымызды қолдау үшін жиналды. Олар спортшылардың өнерін тамашалап, түрлі жарыстар мен шеберлік дәрістеріне қатысты. «Хан Шатыр» сауда-ойын-сауық орталығының маңындағы алаң нағыз спорттық алаңға айналды.

Елорда әкімі олимпиадашыларды төртжылдықтың басты додасының жақындауымен құттықтай отырып, оларға үлкен табыс тіледі, ал жиналғандарды спортпен айналысуға шақырды.

«Қазақстан спортшылары Олимпиада ойындарында жоғары нәтижеге қол жеткізе алатынына сенімдімін. Оларға сәттілік және денсаулық тілеймін. Бұл – әлемдегі ең елеулі және ауқымды шаралардың бірі. Бүгінде біздің спортшылар Олимпиаданың 82 жолдамасын жеңіп алды. Елімізде Президенттің тапсырмасымен спортшылар үшін барлық жағдай жасалған, сондықтан олар жақсы нәтиже көрсетеді деп сенеміз, ал біз, жанкүйерлер, оларды қолдап, демеу көрсетеміз», — деді Ә. Жақсыбеков.

Алаң бірнеше спорттық аймаққа бөлініп, онда велоспорт, бокс, күрес, таеквондо, дзюдо, ауыр атлетика, триатлон, теннис сияқты спорттың олимпиадалық түрлерінің ұлттық федерациялары шеберлік дәрістерін, түрлі жарыстар және автограф және фотосессиялар өткізді. Шараға келген әр адам олимпиадалық спорт түрінде күшін сынап, өзін нағыз спортшы ретінде сезінуге мүмкіндік алды. Сонымен қатар, елорда тұрғындары мен қонақтарының назарына урбан-спорттың стрит-воркаут және паркур сияқты түрлері де көрсетілді.

Рио-де-Жанейро Олимпиадасына дейін үш айдан асар-аспас уақыт қалғаны белгілі, және қазір отандық спортшылар жоғары нәтиже көрсету үшін жарысқа дайындықтарын пысықтай түскен.

Олимпиада жолдамаларының қоржынына елордалық спортшылардың қосқан үлесі де қомақты. Бүгінгі күні астаналықтар 2016-шы жылғы Ойындарға спорттың 8 түрі бойынша 13 лицензия жеңіп алған. Алайда қалалық дене шынықтыру және спорт басқармасының басшысы Берік Маржықпаевтың айтуынша, «лицензиялар әлі де болады».

Рио-де-Жанейрода өтетін спорт жарысында ел намысын қорғайтындардың бірі – бокстан Қазақстан құрамасының капитаны, әлем чемпионы және AIBA-ның үздік боксшысы Данияр Елеусінов.

— Мен, шынын айтатын болсам, жоғары нәтижеге – «алтын» алудан үміттімін. Риоға «алтын» үшін барамын, өйткені егер «күміс» немесе «қола» алам десем, қарсыласыма бірінші немесе екінші жекпе-жекте есе жіберуім мүмкін. Олимпиада «алтынын» жеңіп алып, барлығын, барша Қазақстан халқын, өз отбасымды және бірінші кезекте, өзімді бақытты еткім келеді, — деп пікір бөлісті Қазақстанның олимпиада құрамасының мүшесі және елордалық бокс мектебінің өкілі Д.Елеусінов.

Шараға сондай-ақ, белгілі қазақстандық спортшылар Юрий Мельниченко, Гюзель Манюрова, Асхат Житкеев, Арман Чилманов, Дариға Шәкімова, Ләззат Күнгейбаева, Юрий Щукин, Сәбина Әшірбекова және т.б. қолдау білдірді.

Астанада өткізілген акцияның нышаны ретінде шара соңында аспанға 100 әуе шары салтанатты жағдайда ұшырылды.

astana.gov.kz/kk/modules/material/10441

Қазақстан Республикасы Ұлттық музейінде Ахмет Ахмедияровтың «Жалғыз да көп» көрмесі ашылды, деп хабарлайды Ұлттық музейдің ақпараттық-имидждік қызметі.
Көрменің салтанатты ашылуында сөз алған Ұлттық музей директоры Дархан Мыңбай Асхат Ахмедияровтың туындыларының ерекшелігіне тоқталып өтіп, оның өнеріне шығармашылық табыстар тіледі.
Асхат Ахмедияровты көркем сурет, фотосурет, видео, инсталляция және перформанс салаларында жұмыстанып жүрген танымал суретші ретінде білеміз. Оның туындылары біздің елімізде де, шет елдерде де жоғары бағаланып жүр. Себебі оның жұмыстарының өзіндік бояуы бар, өзіндік стильі қалыптасқан. Тиісінше сұраныс та жоқ емес. Автордың мән-мазмұны терең көрмесінің Ұлттық музейде өтуі еліміздің күллі көркемдік әлеміндегі маңызды кезеңі болмақ деп ойлаймын. Сондықтан да Асхатқа шығармашылық табыстар тілей отырып, өнердің биік шыңдарын бағындыруына тілектеспін, — деді Д.Мыңбай.
Асхат Ахмедияров өзінің авторлық көрмесі туралы айта келе, осыған дейін оның талантына қолдау көрсетіп келген өнер жанашырларына алғыс білдірді.
Ұсынып отырған жұмыстарымның көпшілігін осы көрмеге арнайы дайындадым. Әлбетте, өнердің жолы оңай емес. Осы уақытқа дейін көптеген сындардан өтіп, өмірімнің ең қиын сәттерін артта қалдырдым деп ойлаймын. Десе де мен қайта өнер жолын таңдадым. Белгілі бір деңгейге жету үшін көп еңбектену қажет болды. Бұл ретте мен Ұлттық музейдің директоры Дархан Мыңбай мырзаның, Халықаралық Өнерді дамыту ассоциациясының негізін қалаушы Дина Байтасованың ерекше қолдауларына ие болдым. Сол үшін де бүгін көпшілік алдында ол кісілерге үлкен алғысымды білдіргім келеді. Біздің қоғамда да өнерді жоғары бағалай білетін осындай жандардың бар екеніне қуаныштымын, — деді А.Ахмедияров.
Айта кетейік, Ұлттық музей бұл көрмені Қазақстан Республикасы Мәдениет және спорт министрлігі, Астана қаласы әкімшілігі және Халықаралық Өнерді дамыту ассоциациясының қолдауымен бірлесіп өткізді.
«Жалғыз да көп» көрмесі 2016 жылғы 17 маусымға дейін жұмыс істейді.

— Жердің тиімсіз пайдаланылуы деген не және ол қалай бақылауға алынады?
– Ауылшаруашылық жерлерін тиімсіз пайдалану жердің оның топырағының құнарлылығының біршама төмендеуіне әкелетін тәсілдермен пайдаланылуын немесе жердің мүлдем пайдаланылмауын білдіреді. Ауыл шаруашылығы мақсатына арналған жерлерді тиімді пайдалану Ұлттық эко­номика министрінің м.а. 2015 жылғы 27 наурыздағы № 268 бұйрығымен бекі­тілген Ауыл шаруашылығы мақсатындағы жерлерді ұтымды пайдалану ере­желері арқылы реттеледі. Ауыл шаруашылығы мақсатындағы жер­лерді ұтымсыз пайдалану деректері жерлерді пайдалану мен қорғауға мем­лекеттік бақылау жұмыстарын жүргізу кезінде анықталады. Мұндай фак­тілер анықталған жағдайда бұзушылықтарға жол берген тұлғаларға жер­ді алып қоюға дейінгі әкімшілік ықпал ету шаралары қолданылады.
–Ауыл шаруашылығына арналған жерлердің тиімсіз пайда­ланылуы анықталған жағдайда мемлекеттік органдар тарапы­нан қандай әрекеттер жасалады?
– Егер бір жыл ішінде жерді пайдаланушы жер телімін тиімсіз пайдаланатын болса, онда оған бұзушылықтарды жою туралы жазбаша ұйғарым жіберіледі. Егер жыл өткен соң жағдай өзгермесе, онда жергілікті атқарушы органдар сотқа аталған жер телімін қайтарып алу туралы талапарыз жібереді.
–Аукционға қатысуға кімдер құқылы? Сауда-саттыққа шетел­дік инвесторлар қатыса ала ма?
– Аукционға ел заңнамасында қарастырылған жағдайлар мен тәртіпте Қазақстан Республикасының барлық азаматтары мен заңды тұлғалары қатысуға құқылы. Шетелдіктер, азаматтығы жоқ тұлғалар мен шетелдік заңды тұлғалар ауыл шаруашылығы мақсатындағы жер телімдерінің сауда-саттығы бойынша аукциондарға қатыса алмайды. Шетелдік инвесторлар, сонымен қатар, шетелдік азаматтар тек ауыл шаруашылығы мақсатына арналған жер телімдерін 25 жылға дейінгі мерзімге жалға алу құқығы ұсынылатын конкурстарға ғана қатыса алады. Шекара маңы аумағында шетелдіктерге қандай да бір жер телімін сатуға мүлдем тыйым салынған.
– Неліктен шетелдіктерге жерді жалға беру мерзімі 25 жылға дейінгі уақыт аралығы деп белгіленді?
– Себебі, ауыл шаруашылығы табиғи факторларға тәуелді көп салымды қажет ететін өндіріс болып табылады және оның өндірісі маусымдық сипатқа ие. Өнеркәсіптік өндірістен айырмашылығы, жермен жұмыс істеу оған салынған қаржы салымдарының орнын аз толтырады және алғашқы 15 жыл оған жұмсалған шығындарды ақтауға кетеді. Сондықтан ауыл шаруашылығы мақсатына арналған жер телімдерінің жалға берілу мерзімі 25 жылға дейін деп белгіленді.
– Әрбір нақты жер телімінің құны анықталды ма?
– Әрбір нақты жер телімінің құны жер телімдері үшін базалық төлем ставкаларына сәйкес анықталады. Базалық ставкаларға жер телімінің сапалық жай-күйіне, оның орналасуына, сумен қамтылуына, қызмет көрсетілетін орталықтардан қашықтығына және т.с.с. байланысты түзету коэффициенттері (оны төмендететін немесе жоғарылататын) қолданылады. Мәселен, жер телімі елді мекеннен, инфрақұрылым нысанынан неғұрлым қашық болған сайын, оның төмендететін коэффициент соғұрлым төмен болады.  Бұлайша есептеу әрбір жер телімі бойынша жеке жүргізіледі.
Аукцион арқылы сату кезінде жер телімінің құны бірінші кезекте жер телімінің кадастрлық (бағалау) құнын көтеруді қарастыратын аукцион арқылы анықталады. Мұндайда егер екі аукцион қорытындылары бойынша жер телімі сатылмаған жағдайда, ол жер телімінің бағасын кадастрлық құнынан белгіленген ең төменгі шекке дейін (кадастрлық құнынан 50 %-на  дейін) төмендетуді қарастыратын аукционға қойылады.
– Жер телімдерінің сатылуынан түскен қаражат қайда келіп түседі және олар қалай жұмсалады?
– Мемлекеттің ауыл шаруашылығы мақсатына арналған жер телімдерін жекеменшікке сатудан түсетін қаражат Ұлттық қор есебіне аударылады және ол Қазақстан Республикасының заңнамасында, яғни бюджет заңнамасына сәйкес белгіленген тәртіппен пайдаланылады.
– Адал тер төгіп жүрген жалға алушының жерін бай инвесторлар тартып алып жүрмей ме?
– Ауыл шаруашылығы мақсатына арналған жерлер қазақстандық­тарға 49 жылға жалға беріледі. Егер жалға алушы жалға алған жер телі­мін сатып алғысы келсе, онда ол бұл жерді сатып алуға ең бірінші кезек­те құқылы болады. Мұндайда жерді сату аукционсыз – жеңілдікпен (50%-ға)  және оның құнын 10 жылға бөліп төлеумен жүргізіледі. Алайда, бұған жерді жалға алушы оны өз мақсатында пайдаланса ғана жол беріледі.
– Сатуға нақты қандай жер телімдері қойылады?
– Ағымдағы жылы жергілікті атқарушы органдар жекеменшікке сауда-саттық арқылы бүкіл республика бойынша 1,7 млн. гектар ауылшаруашылық жерлерін сатуға шығаруды жоспарлауда. Тек Астана және Алматы қалаларында бұлай емес, себебі, аталған қалалардың бас жоспарында ауыл шаруашылығын дамыту қарастырылмаған.
Қазіргі кезде барлық аймақтарда 1 шілдеден бастап ауыл шаруа­шылығы мақсатындағы жерлерді жер заңнамасына енгізілген жаңа түзетулер бойынша сатуға шығару үшін дайындық жұмыстары жүргізілуде.
–Шетелдік азаматтың ауыл шаруашылығы мақсатындағы жер телімін жекеменшігіне алуға мүмкіндігі бар ма?
– Ауыл шаруашылығы мақсатындағы жер телімдерін шетелдік азаматтардың жекеменшігіне иеленуіне жол берілмейді. Қазақстан Республикасының Жер кодексінің 24-бабының 1-тармағына сәйкес шетелдіктер, сондай-ақ, жарғылық капиталындағы шетелдік­тердің үлесі елу пайыздан асатын заңды тұлғалар ауыл шаруаш­ы­лығы мақ­сатындағы жер телімдерін 25 жылға дейінгі мерзімге жалдау шарт­тарымен уақытша жер пайдалану құқығымен ғана иеле­не алады.

«Жұмыспен қамту жол картасы — 2020» бағдарламасы аясында жұмыссыз жүргендер жұмыс істейтін болады. Бүгінгі таңда конкурстық процедуралар жүргізілуде, ал мамыр айының соңында жөндеу жұмыстарымен айналысатын компаниялар анықталады, содан кейін жұмыс берушілерге жұмысқа мұқтаж азаматтар жіберілетін болады.

— Мысалы, «Жұмыспен қамту жол картасы — 2020» бағдарламасы бойынша жол салуға өткізілген конкурста жеңіске жеткен компания Жұмыспен қамту орталықтарының жолдамасымен жұмыссыз жүргендердің ішінен жұмыс істеу үшін 50% қабылдауға міндетті. Азаматтар өз келiсiмін бергенде ғана тиісті жұмыстарға жіберіледі. Содан кейін жұмыс берушілер әңгімелесу кезінде олардың кандидатурасын қарастырады. Жұмысшы мамандықтар бойынша тәжірибенің болуы қажет емес, — деді Астана қаласы әкімдігінің Жұмыспен қамту орталығы талдау бөлімінің басшысы Марат Қадырбаев.

Жоспарға сәйкес, жұмыссыз жүрген 137 қала тұрғыны Иманбаева, Мұстафин, Отырар, Нәжімеденов көшелерінде және Абылай хан даңғылында ағымдағы және орташа жөндеу жұмыстарына тартылатын болады.

Жалпы, биыл жұмыссыз жүргендердің күшімен елордада 55 түрлі нысанды жөнделеді, сондай-ақ жол жөндеу жұмыстары да жүргізіледі, 1133 жұмыс орны құрылмақ. Салыстыру үшін, өткен жылы 10 жоба бойынша 144 жұмыс орны ашылды.

Астана қаласының әкімдігі Жұмыспен қамту орталығының мәліметінше, қазіргі кезде елордада 4597 жұмыссыз тіркелген, соның ішінде 1998 адам жұмысқа орналастырылды.

astana.gov.kz/kk/modules/material/10439

Дүйсенбіден бері№2 қалалық балалар ауруханасында Санкт-Петербургтен келген ортопед дәрігерлер астаналық әріптестеріне шеберлік дәрісін өткізуде. Хирургтар қолы мен аяғының дамуында туа біткен ауытқушылығы барбір жасқа дейінгі және одан асқан балаларға ота жасайды.

Шеберлік дәрісі хирургтардың бірлескен консультативтік қызметі түрінде ұйымдастырылды, бәрі бірге науқастарды тексеріп, дұрыс емдеу бағдарламасын таңдайды. Операциялық бөлмеде де бірге жұмыс істейді, ота жасау барысында процесс туралы егжей-тегжейлі айтылып, көмек көрсетіледі. Оның үстіне, қол жеткізген нәтижелер талқыланады.

— Ең бастысы — белгілі бір принциптерді үйрету. Өйткені, отаны барлығы бірдей жасайды. Бірақ жазу бір, ал істеу басқа. Адамдар отаның қалай жасалатынын көргенде, оны есінде сақтайды, бұдан кейін тек уақыт пен жеке тәжірибе ғана қажет, — дейді дейді Г.А.Альбрехт атындағы Санкт-Петербург қаласының медициналық-әлеуметтік сараптаманың ғылыми-тәжірибелік және мүгедектерді оңалту орталығының бас директоры Игорь Шведовченко.

Бұрын ата-аналар балаларды емдеу үшін ақша жинап, Ресейге баратын. Енді біз мұны өз қаламызда жасай аламыз. Астаналық хирургтар оқудан өтіп, үздік ресейлік әріптестерінің тәжірибесін үйреніп, біліктілігін арттырып, өз бетінше операция жасауға ниетті.

— Әр адам оң нәтижені әртүрлі елестетеді. Бұрынғы пациенттерімнің арасында паралимпиада чемпиондары көп. Адамдар үшін бұл үлкен жетістік. Менің арқамда олар толықтай қалыпты адамға айналған жоқ, бүгінде хирургия мүмкіндігі шексіз емес, белгілі бір тосқауылдар бар, біз қалыптасқан жағдайды түзете алмаймыз, бірақ адамды қоршаған ортаға бейімдеп, адам тағдырын өзгертіп, оның өмір сүру сапасын арттыру қолымыздан келеді, — дейді И. Шведовченко.

Жыл сайын аяғы мен қолының туа біткен ауытқушылықтары бар балалардың саны ұлғаяды. Өткен жылы Астанада 160 нәресте түрлі кемістіктермен дүниеге келген, соның ішінде алтауының қолы дұрыс дамымаған. Биыл қолы мен аяғының туа біткен ауытқушылықтармен 52 бала дүниеге келсе, оның алтауының қолында шағын ауытқушылық бар.

— Мен Қазақстан Республикасына балалар ортопедиясы мен травматологияның дамуын, пациенттерге әрқашан да ем-домның үздік нәтижелеріне қол жеткізуін тілеймін, — деді маман.

Елордалық дәрігерлер қолы мен аяғының ауытқушылығы бар балалардың ата-аналарына Қазақстанда тегін емдеу үшін квоталар алуға барлық жағдайды жасауға ниетті.

astana.gov.kz/kk/modules/material/10437

1 мамыр

10.00 «Татулықтың тал бесігін тербеткен» концерттік бағдарламасы
«Атамекен» Қазақстан Картасы»этно-мемориалдық кешені

11.00 А.Хайт «День рождения Кота Леопольда», ертегі
М. Горький атындағы мемлекеттік академиялық орыс драма театры

12.00,14.00 «Біз бәріміз, бір елміз!» концерттік бағдарламасы
Қуыршақ театры

18.00 «БІР ШАҢЫРАҚ АСТЫНДА!» мерекелік концерті
«Астана Опера» МОБТ

18.00 А.Цагарели «Ханума», музыкалық комедия
М. Горький атындағы мемлекеттік академиялық орыс драма театры

19.00 Қазақстан Республикасының еңбек сіңірген әртісі Саят Медеуовтың “Отаным менің” концерті
Конгресс-холл

Халықтық серуен форматындағы ашық алаңдарда өтетін шаралар


10.00-20.00 Қазақстан халқының бірлігі күніне арналған мерекелік концерт пен халықтық серуен
«Қазақ елі» монументінің алдындағы алаң

10.00-23.00 Ашық алаңдарда өтетін Қазақстан халқының бірлігі күніне арналған мерекелік шаралар
Қалалық алаң

10.00-23.00 Ашық алаңдарда өтетін Қазақстан халқының бірлігі күніне арналған мерекелік шаралар
«Бәйтерек» монументінің алдындағы алаң

10.00-18.00 Ашық алаңдарда өтетін Қазақстан халқының бірлігі күніне арналған мерекелік шаралар
«Студенттік» парк

12.00-15.00 Ашық алаңдарда өтетін Қазақстан халқының бірлігі күніне арналған мерекелік шаралар
Есіл өзенінің жағалауы

2 мамыр

09.00 «Сәлем Астана!» балалар шығармашылығының республикалық фестивалінің гала-концерті
«Жастар» сарайы