Астаналықтардың өмір сүру ұзақтығы75,4 жасты құрады, бұл республикалық орташа көрсеткіштен 3 жылға артық.

Бұл жайында қала әкімі Әсет Исекешев медициналық қызметкерлер күні қарсаңында елордалық докторлармен кездесу барысында айтты.

– Денсаулық сақтау еліміздегі ерекше басымдық беретін маңызды салаларының бірі. Үздік халықаралық стандарттарды кезең-кезеңімен енгізуді қамтамасыз ету үшін, медициналық қызмет көрсетудің сапасы мен қолжетімділігі, денсаулық сақтау жүйесінің тиімділігін арттыру, қаржыландыру және ресурстарды оңтайлы пайдалануға бағытталған Астана қаласының өз бағдарламасы қабылданған болатын. Елорда тұрғындарының өмір сүру ұзақтығы артқанын айтқым келеді: жыл қорытындысы бойынша астаналықтардың орташа өмір сүрулері 75,4 жасты құрап отыр. Бұл республикалық орташа көрсеткіштен 3 жылға артық. Бұған туу көрсеткішінің артуы мен жалпы өлім-жітімнің азаюы себеп. Былтыр рекордтық көрсеткішке қол жеткіздік: 27 244 астаналық сәби өмірге келді – бұл өткен жылмен салыстырғанда шамамен 5% көп, — деді Әсет Исекешев.

Соңғы екі жылда Елордада: медициналық жедел-жәрдем қызметінің қалалық станциясы, балалар инфекциялық ауруханасы, наркология және психотерапия орталығы, туберкулезға қарсы диспансер және № 12 қалалық емхана тұрғызылды. №4 қалалық емханада геронтологиялық орталық ашылды.

Интервенциялық және кардиохирургиялық мақсаттағы жоғары технологиялық қызмет түрлерінің көлемі артты. Емдеу-диагностикалық құрылғылармен толық жабдықталған өңірлік екі инсульт орталығы ашылды.

Халықтың қолайлығы үшін бірыңғай медициналық колл-орталығының жобасы іске қосылды, сондай-ақ, дәрігерлерді басы артық қағазбастылықтан арылтуға бағытталған «SMART-медицина» жобасы енгізілуде.

2015 жылы Астана қаласының денсаулық сақтау саласын қаржыландыруға республикалық бюджеттен 11 млрд теңге, 2016 жылы — 14 млрд теңге бөлінді. Жергілікті бюджеттен бөлінген қаржы көлемі 2015 жылы 10 млрд теңге болса, өткен жылы 12 млрд теңгеге жетті.

Астана экономикалық форумы аясында «Болашақтың «ақылды» әрі тұрақты қалалары» атты арнайы сессия өтті.

Шараны ұйымдастырушылар — ғаламдық экологиялық қор және Қазақстандағы Еуропалық одақ өкілдігінің қолдауымен Астана қаласының әкімдігі және ҚР-ндағы БҰҰ даму бағдарламасы.

Жоғары деңгейдегі сессия барысында Астана қаласы әкімдігі мен БҰҰ даму бағдарламасы меморандумға қол қойды. Маңызды құжат аясында қолайлы жағдайлар жасауға арналған бірлескен жобаларды құру көзделіп отыр. Нақтырақ айтсақ, энергия үнемдейтін іс-шараларды енгізу, «ақылды қала» технологиясы, басқару саласындағы инновациялар арқылы қала шаруашылығын орнықты дамытуға көшуді қамтамасыз ету сондай-ақ, табиғи сипаттағы төтенше жайттардың алдын алуға бағытталған жобалар.

— Астана – Қазақстанның саяси, мәдени, іскер орталығы, әлемдегі ең жас және тез дамып келе жатқан бас қалалардың бірі. Сол себептен, біз Мемлекет басшысының бірқатар тапсырмаларын ескере отырып Астананы жемісті, жаһандық қалаға айналдыру бағытында жұмыс істеп жатырмыз. Әлемдік сын-тегеуріндерді есепке ала отырып, жалпы елдің ғана емес, тұтас макроөңірлердегі экономиканың дамуына белгілі салалардың емес, осындай мегаполистердің ықпалы зор екенін байқаймыз. Капиталға, талант пен нарыққа деген жоғары бәсекелестік байқалған тұста экономиканы басқаша жасау қажет әрі қалалық басқару саясатын өзгерткен жөн. Нәтижесінде ең жақсы жағдай жасаған қалалар ғана жеңіске жетеді, — деді Астана қаласының әкімі Әсет Исекешев.

Өткен жылдың соңында әкімдік 2020 жылға дейінгі қаланың даму бағдарламасын әзірлеген болатын. Бағдарлама негізгі екі мақсатқа бағытталған: қала тұрғындарының әл-ауқатын арттыру және Астананы ғаламдық жемісті «ақылды» қалаға айналдыру.

БҰҰ даму бағдарламасына сай тұрақты дамуды қамтамасыз ететін 17 мақсат айқындалды. Солардың бірі – қол жетімді баспана, қауіпсіз көлік, урбанизация, табиғат және мәдениет ескерткіштері, халықты қорғау, ауаның сапасы, жасыл желек, «қала мен қала маңының байлалысы», климаттың өзгеруіне әсер етуді жеңілдету, жасыл құрылыс сынды 10 тапсырманы қамтитын қаланы орнықты дамыту.

БҰҰ даму бағдарламасы да бірқатар ұсыныстар жасады. Солардың маңыздысы – орнықты қала. Бағдарлама Қазақстанның 15 қаласында Елорда инфрақұрылымына жеке инвесторларды тартуға бағытталған қаржы инструментін құру. Бұл тізімге республиканың ірі және шағын қалалары: Астана, Шымкент, Қостанай, Лисаковск, Теміртау және т.б. өңірлер еніп отыр.

Биылғы жазда Елорданың 92 хостелі келушілерді қарсы алуға дайын. Оның 56-ы ЭКСПО көрмесі қарсаңында арнайы ашылды, деп мәлімдеді әкімдіктің медиа орталық тілшісіне «Астана Конвеншн Бюро» ЖШС-нің бас менеджері Марат Әлмағанбетов.

Қаладағы хостелдердің басым бөлігі бестен жиырма орынға арналған нөмірлерді ұсынып отыр. Тәуліктік бағалары үш мыңнан бес мың теңге аралығында. Кейбір хостелдерде екі орындық бөлмелер бар, алайда, бағалары да сәйкесінше жоғары, жеті мыңнан басталады.

Марат Әлмағанбетовтің айтуынша, хостелдердің стандарттық қызметтерден басқа да артықшылықтары бар. Ол — Елорданың көрікті жерлеріне жақын орналасуы, яғни Есілдің сол жағалауында. Қонақтардың ЭКСПО көрме орталығына тез жетуге де мүмкіндіктері мол.

«Жыл басынан бері халықаралық көрмеге орай 56 жаңа хостел ашылды. Қазақстан мен шетелден келетін меймандар үшін онда тұрақтау қолайлы әрі жайлы болады», — деп санайды М.Әлмағанбетов.

Бас менеджердің айтуынша, «Астана Конвеншн Бюро» ЖШС-нде қаладағы барлық хостелдер туралы ақпарат бар: орналасқан жері, орынның бағасы, көрсетілетін қызметтер және т.б. Қажет болған жағдайда «Конвеншн Бюро» мамандары тұратын жерді тауып бере алады.

Туристер Астана әкімдігінің брондау бөліміне 87751167174, 8-777-772-05-06 және қалалық 8(7172) 27-78-15, 8(7172) 27-78-21 нөмірлері бойынша, сондай-ақ, сall-орталықтың 8-800-080-38-38 нөміріне хабарласып мәлімет ала алады.

15 маусым күні Тәуелсіздік сарайында «Жаңа энергия – жаңа экономика» тақырыбында Х Астаналық экономикалық форум басталды.

— Сіздерді Астаналық форумда көргеніме қуаныштымын. Біз осымен 10-шы рет жиналып жатырмыз. Биыл «Астана ЭКСПО-2017» көрмесінің өтуімен тұспа-тұс келді. Осы уақыт аралығында біздің форум абыройын асқақтатты, өзекті мәселелерді талқылайтын алаңға айналды. Астаналық форум жұмысы оған қатысушыларға бігінгі уақыт талабына жауап табуға септігін тигізетініне сенеміз. Қазақстан Үкіметіне осы жерде көтерілетін сұрақтар аса маңызды. Біз бірлесе жұмыс істеуге, мәселелерді бірігіп шешуге дайынбыз, — деді ҚР Премьер министрі Бақытжан Сағынтаев «Қазақстан – елдің жүйелі диагностикасы» сессиясының ашылуында.

Екі күн ішінде форум алаңында 40 панельді сессия өтеді, оған 100 елден 4 395 адам қатысады.

«Болашақтың ақылды және тұрақты қалалары» арнайы сессиясы кезінде Астана қаласы әкімдігі мен БҰҰ Қазақстандағы даму бағдарламасы арасында меморандумға қол қойылады. Меморандум тараптарға «ақылды қала» технологиясын енгізу арқылы қалалық шаруашылықтың тұрақты дамуына көшуді қамтамасыз ету жобаларын жүзеге асыруға жағдай жасайды.

Астаналық экономикалық форум еуразиялық алаң болып табылады. Жылда Астанада Орталық Азия аумағының, сондай-ақ барлық әлемнің ғаламдық экономиканың өзгеруі жағдайында экономикалық даму мәселелерін талқылау үшін әлемдік экономикалық қауымдастықтың өкілдері, мемлекеттердің бұрынғы және бүгінгі басшылары, Нобель сыйлықтарының лауреаттары, ғылым әлемінің белгілі тұлғалары, кәсіпкерлер жиналады. Жыл сайын АЭФ-қа 80 елден 5 мыңнан астам адам қатысады

Көрмені өткізу аясында туристер ең көп келетін 17 күн анықталды, деп хабарлайды елорда әкімдігінің медиа орталығы.

-Көрмені өткізу кезінде 17 күнде келушілер саны көп болады. Бұл ауқымды мәдени бұқаралық шаралар өтетін күндер. Дәлірек айтсақ, Еуразиялық медиа форум, Димаш Құдайбергеновтың концерті, ТМД елдерінің ең үздік командаларының қатысуымен КВН ойындары өтеді. Әрине, осы күндері туристер легі көп болатыны сөзсіз, — деді медиа орталық тілшісіне берген сұхбатында «Астана Конвенш Бюро» ЖШС директорының орынбасары Асқар Адамбеков.

Ол Астанада ЭКСПО-ның ашылғанына аз күн өтсе де туристер легі тұрақты екенін атап өтті.

-Қай елдерден екенін нақты айта алмаймын. Бұл шекара қызметіне қойылатын сұрақ. Белгілісі, бес күн ішінде 10 мыңнан астам турист келді. Ал соңғы екі күндегі нақты санды айтсам – 5670 турист. Бұл 180 қонақ үйден алынған мәлімет. Дегенмен, қонақ үйлер мен хостелдерде бос орындар жеткілікті. ЭКСПО көрмесі енді басталды, сол себептен, алдағы уақытта туристердің ағынын күтеміз, — деді ол.

А.Адамбековтің айтуынша, қазіргі таңда Елордада 197 қонақ үй мен 91 хостел бар. Сонымен қатар, ЭКСПО-2017 көрмесінің қонақтарын орналастыратын 18 жатақхана қарастырылған. Олардың тәуліктік бағасы екі мыңнан бес мың теңгеге дейін.Жатақхана орындарын брондау үшін 8 (717 2) 277-815 немесе 8 777 772 05 06 ұялы байланыс нөмірлеріне хабарласуға болады.

Бұдан бөлек, ЭКСПО меймандарына Елорданың әр аудандарынан 10 мың қолайлы пәтер дайындалды.

2016 жылдың мамыры әлі есімде: қалтырап-дірілдеп, велосипед руліне жөнді ие бола алмай, біресе түсіп, біресе мініп бара жатқан едім.

Қазір 2017 жылдың маусымы: қазір ондай мандраж жоқ, автомобиль жолымен жүремін, тротуармен кетіп бара жатқан велосипедшілерге мұрын шүйіре қараймын. Әйтсе де биыл тротуармен жүруімді барынша азайтсам да, бәрібір айыппұл алып үлгердім [1].

Өзімнің басымнан өткен жағдайлар мен аздаған тәжірибемді басшылыққа ала отырып, қоғамдық көліктен немесе өз машинасынан велосипедке ауысқысы келіп жүргендерге аздаған кеңестер бергім келеді.

Алдымен велосипедпен жүрудің артық-кемшіліктеріне тоқталайын.

Сонымен плюстары (Кэптік танытсам кешірерсіңдер):
1. Шынығу. Велосипед тепкен кезде денеңнің көп бөлігі қимылға түседі, сәйкесінше велосипед кішігірім тренажер қызметін де атқарады.
2. Инфаркт мүмкіндігін азайтады. Біздің стресске толы заманда бұл маңызды. Байқаған шығарсыңдар, қазір жасы 30-дан асқан еркектер арасында жүрек талмасы көбейіп кетті. 40 жасында не операция жасау, не бақилық болып кету қалыпқа айналды. Білгірлер осындай жағдайдың алдын алуда велосипедтің рөлі ерекше дейді.
3. Таза ауа. Көпшілігіміз таңертеңнен кешке дейін офиста отырып жұмыс істейміз. Күнге аз шығамыз, көшеде нендей оқиғалар болып жатқанын интернеттен ғана көреміз. Жұмыстан шығып үйге жеткенше машинада қамалып отыратынымыз бар тағы. Ал велосипедпен келе жатсаң айналаңдағы құбылыстарға ерікті/еріксіз көз саласың, сыртта не болып жатқанын көресің, аздап даланың ауасын жұтасың, үйіңе серуендеп жетуге болады.
4. Жол ахуалына тәуелсіздік. Машина кептелісте тұрып қалуы мүмкін, жолда жөндеу жұмыстары жүріп жатуы мүмкін, не машинаң орта жолда бұзылып қалуы мүмкін. Ал велосипедте дөңгелек жарылғаннан басқа не бұзылушы еді? Сүйреп алып кете бересің.
5. Зиянсыздығы. Велосипед улы газ бөлмейді, жаяу адамдарға да қаупі азырақ. Кісі қағып кеттім дегеннің өзінде оны өлімге душар етпейтінің анық.
6. Мүліктік құнының төмендігі. Қазір велосипедтер бағасы 30-40 мың теңгеден басталады. Әрине, автомобильдің құнындай түрлері де кездеседі. Бірақ қала ішінде жұмысқа барып-келу үшін арзандары да әбден жарайды. Сәйкесінше жоғалтып/ұрлатып алған жағдайда да өкініштің ауқымы шамалы болады :)
7. Үнемділік. Бірден айтайын — нақты есебім жоқ. Өз жағдайымның мысалын ғана келтірейін. Мамыр-қазан аралығында жаңбыр жаумаған күннің барлығында дерлік велосипедпен жүруге тырысамын. Әрине кейде жұмыстан кейін бір алыстау жерге бару керек, не болмаса супермаркетке кіріп шығу керек — ондай кездері алдын-ала жоспармен машинаға отырып шығамын. Басқа уақытта машина үйдің алдында шаң басып тұрады.

Енді минустары (көп минустар автомобильмен қарым-қатынасына байланысты):
1. Автосүйерлердің көзқарасы. Олар велосипедшілерді ұната бермейді. Алдыңды орағытып, жаныңнан жарқ етіп пайда бола кететін тосын әрекеттері үшін шығар. Жалпы велосипедшінің ниетін аңғару қиын: великте бұрылыс, тоқтау сигналдары жоқ, көпшілігінде түнде қосатын жарық шамдары да болмайды. Сондықтан көшелерімізде велосипед пен автомобильдің соғысу оқиғаларын кездестіріп жүрміз, кездестіре де бермекпіз. Автожүргізушілер реті келсе терезесін ашып боқтап қалуды, айқайлап ұрысып қалуды, сигналдатып шошытуды, тіпті жол жиегіне қысып тастауды міндеті санайды. Бұған бір жағынан велосипедшілердің жол ережесін сақтамауы да өз үлесін қосып жатса керек.
2. Жол жиегіне тұрақтаған автомобильдер. Велосипедшілердің жарақат алуы, тіпті өліп кетуі осы жағдайлардан болып жатады. Велосипедші жоғары жылдамдықпен келе жатыр делік. Жол жиегіндегі машиналардың біреуі есігін ашып қалса бітті дей беріңіз. Аман қалса рахмет айтыңыз. Сондықтан жиегінде машиналар қойылған жолдарда аса сақтық танытқан жөн.
3. Шаң мен газ. Көлік ағынында келе жатқан өзге машиналардың түтінін жұтуға, олардың дөңгелегінен көтерілген шаңмен демалуға мәжбүр боласың.
4. Қазақстан қалаларының велосипедшілерге бейімделмегендігі. Біздің қалаларымыз автомоболистердің жағдайын қатты ойлайды: оларға арнап паркингтер салады, жолдарды кеңейтеді, жыл сайын жаңа асфальт төсейді — бәрі солар үшін. Соңғы жылдары Алматы мен Астанада ғана велосипедшілерге арнап жолдар салына бастады. Бірақ бұның бәрі бір жүйеге бірігіп, велосипедші жолшыбай бөгелместен, ештеңені айналып өтпестен тиісті жеріне жететіндей жағдай жасалғанша әлі талай заман ауысады деп ойлаймын.
5. Жыл мезгіліне тәуелділік. Қазақстан жылдың төрт мезгілінің белгілері толықтай көрініс табатын сирек елдердің бірі. Күз бен көктем — көбінесе нөсермен өтеді, қыста — міндетті түрде қалың қар және суық. Сонда жазда ғана еркін серуендай аламыз. Мысалы Алматыда велик үшін ең оңтайлы айлар: мамыр, маусым, шілде, тамыз, қыркүйек.

Енді велосипедшінің тәртібіне қатысты. Бұны барлығы біліп жүруі керек:
— Тротуармен жүруге болмайды. Бір қызығы сол — көпшілігі бұны білмейді. Велосипед тротуармен жүруі тиіс деп ойлайды. Жоқ! Бұл заңмен тыйым салынған. Жаяу адамдар мені жақсы түсінеді деп ойлаймын: артыңнан ұшып келіп сигналын шырылдатқанда бір теуіп, велосипедімен бірге омақастырғың келеді. Жалпы жаяу жүруге арналған аймақтардың барлығында велосипедке тыйым салынған.
Мен де бастап үйреніп жүргенде тротуармен жүрдім. Аздап тәжірибе жинаған соң автомобиль жолына ауыстым.
— Велосипедші велосипедке мініп орнынан қозғалған сәттен бастап жол қозғалысының тең құқылы мүшесі. Яғни, ол да өзгелер секілді жол ережесін сақтауы керек, ешкімге кедергі болмауы керек, тиісті белгілер беруі керек.
— Велосипедші тек жолдың жиегімен ғана жүреді. Жолақтың ортасына түсіп алып, артыңа автомобильдерді тізіп қоюға болмайды. Жалпы кез келген көлік түрі жылдамдығы 40 км/сағаттан төмен болса жолдың жиегімен, ешкімге кедергі келтірмей қозғалуы керек. Жиекпен ғана жүру велосипедшінің қауіпсіздігі үшін де маңызды.
— Бұрылу алдында тиісті бағытқа орай тиісті қолыңды көтеру керек. Оң жаққа — оң қол, сол жаққа — сол қол. Жалпы өзгелер үшін предсказуемый болу керек (қазақша қалай?) — өзгелер сенің не істейін деп тұрғаныңды алдын ала білетіндей болған дұрыс. Кенеттен, оқыс маневр жасауға болмайды.
— Көзге көрінетіндей болу керек: ол дегеніміз — айқын түсті киімдер (қызыл, көгілдір, жасыл футболка), түнде артқы бөлікке қызыл шам, алдыңғы жаққа жарығы жақсы түсетін фара. Бұлар жыпылықтап тұрса тіптен жақсы — көзге тез шалынады. Сосын, әрине, сәуле қайтаратын жолақтар да болғаны дұрыс.
— Жолдың арғы бетіне өту — жаяу өткелі арқылы ғана. Кәдімгі жаяу адам ретінде, великтен түсіп, көлігіңді қолыңмен сүйреп өту керек. Жолдың бойымен келе жатып солға бұрылуға (1 жолақты жолдан басқа кезде), кері айналуға болмайды.
— Қауіпсіздік: Басқа шлем міндетті түрде керек. Қажет деп тапсаң басқа да қорғау құралдары.

Тағы бір маңызды нәрсе бар: игнор мен сабыр. Автожүргізушілер сигнал беріп шошытуды, боқтағанды жақсы көреді. Ондайларға мән берме, оларға қайтара боқтама, ұрыспа. Елемеген болып күліп қойып баса бер. Конфликтінің соңы қашан да жақсылыққа апарамайды. Дурактарды жібере салған екі жаққа да тиімді.

[1]: Жұмыстан шыққан кезде бірден автомобиль жолына түсіп кету қиындау — сондай бір ыңғайсыздау аймақ. Сол бір 300-400 метр жерде ғана тротуармен жүретінмін. Жақында біреу видеоға түсіріп алып шағымданыпты. 5 АЕК мойныма ілінді. Бір қызығы — шағымданушы менің кім екенімді біледі, арызда менің аты-жөнім, туған күнім көрсетілген. Арызданушының кім екені өзіме де қызық енді :)

Елорда әкімдігінде қала әкімі Әсет Исекешев Осака қаласының мэрі Ёсимурой Хирофуми бастаған жапон делегациясымен кездесті.

Астана әкімі күн шығыс елінің меймандарын қарсы алып, қос тараптың өзара тиімді ынтымақтастығы үшін алғыс білдірді.

– Астана қаласының медициналық және жедел жәрдем қызметі автомобильдерінің паркі, сумен жабдықтау жүйесін жаңғырту, логистикалық желіні жетілдіру сынды көптеген бірлескен нәтижелі жұмыстар жүргізілді. Бұл жапондық тараптың Астананың дамуына қосқан аз ғана үлесі. Сіздің бүгінгі сапарыңыз қалалар арасындағы ұзақ мерзімді серіктестіктің кепілі боларына сенімдімін, — деді Әсет Исекешев.

Бұдан басқа, көптеген елордалық компаниялар Кайдзен жүйесіне көшуде, дәстүрлі жапон асханасы бар мейрамханалар көптеп ашылуда, ал жапон жекпе-жегінің жанкүйерлері қаланың көптеген спорт залдарында шеберліктерін сынай алады.

Еске салайық, 2015 жылдың 27 қазанында Астанада Қазақстан Президенті Нұрсұлтан Назарбаев пен Жапонияның Премьер-министрі Синдзо Абэнің қатысуымен Қазақстан-Жапон бизнес форумы өткен болатын. Онда Мемлекет басшысы жапондық іскер топты инвестициялық жобаларға қатысуға шақырды. Маңызды жобалардың бірі ретінде ЭКСПО-2017 мамандандырылған халықаралық көрмесі.

– Екі елдің арасын байланыстыратын тағы бір дәлел – бұл біздің бейбіт қатар өмір сүрудегі ортақ ұстанымыз және мемлекеттер арасындағы ықпалдастық. Жапония мен Қазақстан арасын ядролық қару мәселелері бойынша өзара түсіністікке негізделген тарихи тәжірибе біріктіретіні сөзсіз, — деді әкім Осака қаласының мэріне.

Бұдан басқа, қала әкімі Астана мен Осака арасындағы серіктестікті одан әрі дамытуға қызығушылық танытып, Осакада тұрғызылған жасанды арал үстіндегі «Кансаи» халықаралық әуежайы сынды қала құрылысындағы шешімдер бойынша тәжірибе алмасуға шақырды.

Әсіресе, туризм индустриясын дамыту бойынша ықпалдастыққа аса көңіл бөлінді әрі Осака қаласындағы тарихи бекініс сияқты Астанада да көрікті жерлер құру мәселесі, Universal Studio көңіл көтеру паркі, келушілер арасында аса танымалдыққа ие «Каюкан» океанариум сынды ерекше жобалар мәселесі талқыланды.

– Астанада ЭКСПО-2017 көрмесін өткізу қаладағы инфрақұрылымды одан әрі дамытуға ықпал етеді, «жасыл» экономикаға көшуге мүмкіндік ашады, сондай-ақ, жалпы елдің экономикасы үшін қуатты мультипликативті нәтиже береді. Осындай маңызды шараның өткізілуі біздің екі тарапты ықпалдастығымыздың тарихына жаңа серпін беріп, қалалар арасын барлық тараптан жақындастыра түсетініне кәміл сенемін, — деді әкім.

Есту қабілеті төмен жандар қазақ қоғамының бастамасымен Астана қаласының орталық саябағы мүмкіндігі шектеулі жандарға арналған жаттығу құрылғыларымен толықты. Енді мүгедек адамдар таза ауада бос уақыттарын жаттығу жасап, пайдалы өткізе алады.

Естеріңізге салайық, 12 мамыр күні Астана қаласының әкімі Әсет Исекешевпен кездесу жиынында үкіметтік емес ұйымдардың өкілдері мүмкіндігі шектеулі жандар үшін қалада жаттығу құрылғыларын орнатуға уәде берген болатын. Міне, сол уәделерінде тұрып, жоспарларын жүзеге асырды.

Айта кету керек, жаттығу құрылғылары елордалық есту және сөйлеу қабілеттері төмен қоғамы мүшелерінің қолдарымен жасалған. Бұл сыйлықты тарту етудегі мақсат – мүмкіндігі шектеулі жандар арасында бұқаралық спортты дамыту, дейді жақсылық жасаған жандар.

— Мүгедектік – бұл үкім емес, өз ағзаларын қалпына келтіруге талпынғандар үшін тіпті өмірінің соңы емес. Сенімділік пен өмір сүруге деген құлшынысы бар мүмкіндігі шектеулі жандарға спортпен шұғылдануға мүмкіндік те мол, — деп санайды мамандар.

Функционалдық жағынан бұл құрылғылар әдеттегіден еш кем емес, тек айырмашылығы сол ерекше тағдыр иелеріне икемделіп жасалған. Осындай құрылғылармен шұғылдану төзімді болуға, күш-қуатыңды арттыруға әрі өз-өзіңе деген сенімділікке жетелейді.

Мұндай спорттық алаңдар арқылы мүмкіндігі шектеулі жандар жаңа мүдделес достармен танысуға мүмкіндік беріп, салауатты өмір салтын берік ұстануға ықпал етері сөзсіз. Мәдениет және демалыс саябақтары мен аула алаңдарында да осынай құрылғыларды орнату аса қажет әрі өзекті. Жаттығу құрылғылары орталық саябақтағы теннис кортының маңында орнатылды әрі олармен шұғылдану тегін.

Астанада Bookdating жобасының төртінші кездесуі өтті. Шараны «Астана жастары» жастар ресурстық орталығы ұйымдастырды.

Мұндай шаралар ай сайын Multispace коворкингінде жаңа тұлғалардың қатысуымен өткізіледі. Бұл жолы жиналғандар алдында қалалық Astana Invest инвестицияларды дамыту орталығы бас директорының орынбасары Тілектес Адамбеков, саяхатшы Қуат Болатов және белгілі алматылық блогер Ержан Рашев сөз сөйледі.

Жобаның басты мақсаты – жас буынды өмірі өнегелі адамдармен таныстыру. Сонымен қатар, қонақтар олардың жетістіктері мен табыстары туралы сұрап білді, пікір алмасып, қызықтырған сұрақтарын қойды.

Әр қатысушы жиналғандарға өздері сүйіп оқитын үш кітапты ұсынды. Олардың ішінде Абай Құнанбаев, Грег Мортенсон, Александр Бек, Ермек Тұрсынов және басқалардың кітаптары бар.

Қатысушылар өз ойларын білдіріп, көрермендерге жеке өмір тарихтары туралы айта отырып, осындай кездесулердің интернет жауабын бере алмайтын өмірлік жағдайларда қандай шешім шығаруға септігін тигізетінін дәлелдегендей.

Су қоймасындағы тазалау жұмыстары толығымен жағымсыз иісті жойып, аққулар мекеніне айналды, деп хабарлады Астана қаласы әкімдігінің медиа-орталығы тілшісіне коммуналдық шаруашылық басқармасы.

Талдыкөлді тазалау жобасы ерекше тәжірибе болды, деп санайды басқарма мамандары. Алғаш рет елімізде жағымсыз иісі бар көл кіршіксіз тазаланып, құстар қайтып оралған орынға айналды.

Қазақстан ТМД елдері ішінде ағынды суларды тазалау бойынша заманауи әдіс-тәсілдерді қолданған алғашқы ел.

Су тазалаудың классикалық технологиясы бірнеше кезеңнен тұрады: механикалық, биологиялық, флотофильтрация, ультракүлгін, залалсыздандыру.Барлық кезеңнен кейін мөлдір залалсыздандырылған су Есілге құйылады.

Жер жұмыстары мен су түбіндегі сазды сору жұмыстарын коммуналдық шаруашылық басқармасының тапсырысымен «Алсим Аларко» ЖШС жүргізуде.

Екі жыл бұрын Талдыкөлге қалдық суларды құю тоқтатылды. Елорда басшылығы аумақты қалпына келтіру бойынша ауқымды жұмыстарын бастап, ағынды су жинақтаушыны ретке келтіру мәселесін шешті.

Жер жұмыстары 3 кезеңмен жүргізілуде. Бес балшық сорғыш кеме түбін тереңдету жұмыстарын жүзеге асыруда. Қазіргі таңда көл түбінен алынған құрғатылған соркәдімгі топырақпен араластырылып, қайта қалпына келтіру жұмыстарына пайдаланылуда,

Қазір көл көлемінің табиғи шекарасын қалыпқа келтіру жұмыстары жүргізілуде, су айдынының ауданы 4 есе кішірейеді – 2 мыңнан 450 гектарға дейін.

Екі жылдан кейін ағынды су ауданын көріктендіру және аббатандыру жоспарланған. Бұл Талдыкөлді тұрғындардың уақытын өткізетін орынға айналдырады.