Елордада медицина қызметкерлерінің төл мерекесі қарсаңында Оқушылар сарайында үздік дәрігерлерге арналған салтанаты шара өткізілді. Қаланың денсаулық сақтау саласының дамуына елеулі үлес қосқан 100 медицина қызметкеріне марапаттар табысталды.



Шара барысында Астана қаласы әкімінің орынбасары Ермек Аманшаев дәрігерлерді құттықтап, сөз сөйледі.

— Бідің өміріміздегі сиқыршылар – сіздер. Біздің тарапымыздан, мемлекет тарапынан, қала әкімдігімен денсаулық сақтау саласына баса назар аударылады, соңғы уақытта елордада аталған саланың қарқынды дамуы байқалады. Осы күні сіздерге еңбектеріңіз үшін алғыс айтып, төл мерекелеріңізбен құттықтаймын! – деді Е. Аманшаев.



Денсаулық сақтау саласында көп жылдар бойы табысты еңбек еткені, халыққа сапалы қызмет көрсету жөніндегі мәселелерді шешуге белсенді атсалысқаны үшін үздік медицина қызметкерлеріне «Денсаулық сақтау ісіне қосқан үлесі үшін», «Денсаулық сақтау ісінің үздігі» төсбелгілері, сонымен қатар, Астана қаласының әкімі Әділбек Жақсыбековтің және елордалық Денсаулық сақтау басқармасының басшысы Ерік Байжүнісовтың атынан құрмет грамоталары мен алғыс хаттар табысталды.



Биыл алғаш рет дәрігерлер бес номинация бойынша марапатталды. Әрбір марапаттаудың алдында жиналған қауым дәрігердің қызметі туралы толық баяндайтын бейнеролик тамашалады.

Медицина қызметкерінің асқан шеберлігін атап өтетін «Мамандығына адалдығы үшін» арнайы номинациясында Ольга Замолотова, «Бірегей операция өткізіп, адам өмірін құтқарғаны үшін» номинациясында №2 қалалық аурухана дәрігерлерінің командасы: Марат Жақсылықов, Баймаханбет Садуов, Болатхан Лепесбаев марапатталды.



Мұнымен қоса, «Диагностикалау мен емдеудің жаңа әдісін ойлап тапқаны үшін», «Мамандығына адалдығы үшін – отбасылық әулеттер» номинациялары белгіленді. «Жаңа өмір сыйлағаны үшін» номинациясында Астана қаласының әкімдігі №1 Перинаталды орталығының жаңа туған сәбилерді күту және патологиялар бөлімінің меңгерушісі Ирина Цубенко марапатталды.

Бүгінгі таңда Астанада 36 ұйым медициналық қызметтер ұсынады. Соңғы 5 жылда елордада 9 медициналық мекеме салынып, оларда 9 424 медицина қызметкері, соның ішінде 3 202 дәрігер жұмыс істейді. Елордалық клиникаларда емдеу мен диагностикалаудың жаңа әдістері ұдайы енгізіліп отырады, бұған дейін тек республикалық ауруханаларда ғана көрсетіліп келген жоғары мамандандырылған медициналық көмек көрсетіледі.

Материал Астана қаласы әкімдігінің ресми сайты astana.gov.kz деректері бойынша әзірленді.

Астана қаласының Дағдарыстық орталығы үш жылдан бері жұмыс істеп келеді. Мекеме 50 кереует-орынға есептелген, барар жері жоқ тұрмыстық зорлық-зомбылықтан зардап шеккен әйелдер көмек сұрап осында келеді.

Әйелдер мен балалар орталыққа құқық қорғау органдарының қаулылары бойынша және Астана қаласы Жұмыспен қамту, еңбек және әлеуметтік қорғау басқармасының жолдамасымен қабылданады.

– Аналар Орталықта бір айдан жарты жылға дейін, кейбір жағдайларда комиссияның шешімімен бір жылға дейін болады. Орталықта қызмет алушыларға арналған бөлмелер жасалған, әр бөлмеде душ бар, 50 адамға арналған асханада бес рет тамақ беріледі. Төсек-орын, жуынатын, жеке гигиена заттарын береміз, барлық жағдайлар жасалған, – дейді Астана қаласы әкімдігінің «Зорлық-зомбылық немесе зорлық-зомбылық қатерінің салдарынан қиын жағдайға тап болған тұлғаларға арналған дағдарыстық орталық» КММ директоры Нұрбол Зұлқарнаев.

Тұрмыстық зорлық-зомбылық көрген әйелдер орталыққа ешбір жолдамасыз кез келген уақытта келе алады. Оларға 72 сағат уақыт беріледі. Қазіргі кезде мұнда 26 адам тұрып жатыр, соның ішінде 9-ы 21 мен 58 жас аралығындағы әйелдер, қалғаны балалар.



– Көп жағдайда әйелдер шыдайды. Бір болғаннан қашып кететіндер аз, негізінен отбасын сақтап қалуға тырысады. Ал шегіне жеткен кезде көмекке жүгінеді. Басым бөлігі құқық қорғау органдарына барғысы келмейді, өйткені, біріншіден — сенбейді, екіншіден олар өзін ренжіткен адамды ашуландырып алудан қорқады, — дейді Н. Зұлқарнаев.

Орталықта әйелдерге психологиялық, құқықтық және медициналық қызметтер ұсынылады. Әлеуметтік қызметкер мекемеге түскен сәттен бастап әр әйелмен әңгімелеседі. Іс-әрекеттер жоспары әзірленіп, кеңестер беріледі, зорлық-зомбылықтың себептері анықталады.

– Бізге келген әйелдердің көбі жұмыс істемейді, арнайы білімдері жоқ, бұл да тұрмыста жанжалға себеп болады деп ойлаймын. Олар неге қайтып келеді, өйткені, барар жері, басар тауы жоқ. Туыстарында бір-екі күн ғана, одан артық болмайды, ешкім де осындай жағдай жасамайды, қонақ үйге бара алмайды – қалтасы көтермейді, – дейді әлеуметтік қызметкер Гүлнар Әлібаева.



Жұмыспен қамту орталығы да қол ұшын созуда. Алдымен әйелдер шаштараз, уқалаушы, аспаз және т.б. мамандықтар бойынша курстарға жіберіледі, содан кейін жұмысқа орналастырылады. Балалар қазақ және орыс тілдеріндегі жақын маңдағы мектептерде оқитын болады.

Материал Астана қаласы әкімдігінің ресми сайты astana.gov.kz деректері бойынша әзірленді.

Елордалық бесайысшы Павел Ильяшенко Рио-де-Жанейрода өтетін жазғы Олимпиада ойындарына жолдама алды деп хабарлайды Астана қаласы әкімдігінің ресми сайты astana.gov.kz. Халықаралық рейтингтің қорытындысы бойынша қалалық Мамандандырылған жоғары спорт шеберлігі мектебінің спортшысы төрт жылдықтың басты додасында бағын сынайтын болды.

Олимпиадаға дейін 50 күн қалды, қазіргі кезде еліміздің намысын қорғайтын спортшылар құрамасы жасақталып жатыр. Қазіргі заманғы бессайыстан елордалық атлеттер бұған дейін бір лицензияға қол жеткізген болатын. Бейжіңде өткен Азия чемпионатында Елена Потапенко жазғы Олимпиада ойындарына қатысу құқығын қорғап қалды.

Павел Ильяшенко Лондонда өткен Олимпиада ойындарына қатысқан. Спортшы қазіргі заманғы бессайыстан Қазақстан құрамасының мүшесі, халықаралық дәрежедегі ҚР спорт шебері, командалық біріншілікте Еуропа және әлем чемпионаттарының бірнеше дүркін күміс жүлдегері және Азия чемпионы.

«Өткен Олимпиадада Павелге тәжірибе жетпеді, ол дайын болған жоқ, әрі жас, оған бүкіл елдің атынан үлкен жауапкершілік жүктелді, бала абыржып қалды. Осы жылдардың ішінде Павелмен көп жұмыс істедік, нәтижелерді арттырдық, жақсарттық, бәйге алуға жігерлендірдік», – деді қазіргі заманғы бессайыстан ҚР мемлекеттік бапкері және спортшының жеке жаттықтырушысы Оксана Дмитриенко.

Айта кетейік, қазіргі заманғы бессайыс – бес дисциплинадан тұратын спорттық көпсайыс: конкур, семсерлесу, ату, жүгіру және жүзу. Спортшылар әр сайысқа қатысудың нәтижелері бойынша ұпайлар жинайды.

Спорт түрлері бойынша ұлттық құрамалар төрт жылда бір өтетін додаға дайындық кезеңдерін аяқтап қалды. Еске салайық, жазғы Олимпиада ойындары тамыздың 5-і мен 21-і аралығында Рио-де Жанейрода өтеді.

Тілдерді дамыту мен қолданудың 2011-2020 жылдарға арналған мемлекеттік бағдарламасын іске асыру аясында ақпан айында елордада қазақ тілін үйрету бойынша курстар ашылды деп хабарлайды Астана қаласы әкімдігінің ресми сайты astana.gov.kz. Тыңдаушылардың жалпы саны — 1500 адам. Оқу жыл соңына дейін жалғасады.

Қалалық Тілдерді дамыту басқармасы мемлекеттік қызметшілерге, бюджеттік ұйымдардың қызметкерлеріне, этномәдени бірлестіктердің өкілдеріне және қала тұрғындарына арналған қазақ тілінен тегін оқыту курстарын ұйымдастырады. Білікті мамандар сабақтарды «Іскер» оқу орталығында аптасына екі рет өткізеді.

Сонымен қатар, ЭКСПО-2017 халықаралық мамандандырылған көрмесіне дайындық аясында әлеуметтік сала қызметкерлері үшін ағылшын тілінен курстар ашылды. Тыңдаушылар саны – 600 адам. Сондай-ақ, 110 мемлекеттік қызметші де шетел тілін меңгеруде.

Қазақстан Республикасының 25 жылдығы аталып өтетін жылы Елорда күні ерекше мәнге ие. Қала әкімдігі әрбір елорда тұрғыны мен қонағына қызықты болатын әр алуан мәдени-спорттық шаралар бағдарламасын әзірледі деп хабарлайды Астана қаласы әкімдігінің ресми сайты astana.gov.kz. Мерекелік шаралар географиясы қаланы тұтастай қамтиды, соның ішінде қала маңын, гүлбақтар мен парктерді, сондай-ақ, қалалық алаңдарды.

Мерекелік бағдарламаның шымылдығы маусымның 20-нан 26-на дейін өтетін «Сахнадан сәлем» театр фестивалімен ашылады. Өнер сүйер қауым еліміздің өңірлерінен, сондай-ақ, Ресей мен Украинадан келген сахна майталмандарының үздік қойылымдарын тамашалайтын болады.

Эстафетаны AstanaArtFest 2016 қазіргі заманғы өнер фестивалі жалғастырады. Шара аясында Сулы-жасыл желекте би мен музыка фестивальдері, кітап пен поэзия мерекелері, суретшілер симпозиумы және т.б. қызықты шаралар ұйымдастырылады.

Биыл Астана тұрғындары мен қонақтары түрлі мемлекеттердің әртістерінің қатысуымен өтетін «Азия жаңғырығы» цирк өнері фестивалін, музыка индустриясының үздіктерінің қатысуымен өтетін «Астана Арқау» түркі музыкасыныңфестивалін көре алады.

Елорда күні аясында отандық сән индустриясының көрсетілімі меналғаш рет сән мен стиль саласындағыELLE журналының сыйлығымен марапаттау салтанаты ұйымдастырылады. Қазақстандықтардың назарына «Арқайым – Күннің қаласы» технологиялық 3D-шоуы ұсынылады. «Астана Әзіл Фест» және «Көңілді Астана» жобалары аясында әзіл-сықақ кештері көрермендерге көтеріңкі көңіл күй сыйлайды.

Айта кетейік, биыл қазақтың бай мұрасы мен мәдениетін насихаттайтын іс-шараларға баса назар аударылмақ. «Мыңжылдықтар тоғысындағы Астана» фестивалі аясында үлкен этноауыл орын тебеді, бұдан басқа, алғаш рет «Қымызмұрындық» этнографиялық қымыз фестивалі, халық аспаптары оркестрлерінің «Серпер» музыкалық фестивалі өтеді. Жаздың жарқын оқиғаларының бірі «Бағаналы ордам – басты ордам» республикалық ақындар айтысы болмақ. Қазақстандық композитор Сейдолла Бәйтерековті еске алуға арналған кеш пен «МузАрт» тобының шығармашылығының мерейтойына арналған концерт аншлагпен өтеді деп күтілуде.

Салауатты өмір салтын ұстанатындарға арналған спорттық бағдарлама Елорда күніне арналған шаралардың ажырамас бөлігі болып табылады. Көрермендер мен спортшылар халықаралық жауынгерлік өнер фестивалін, дуатлоннан қалалық турнир, ұлттық спорт түрлері — асық ату мен қазақ күресінен — «Қазақстан барысы» турнирін тамашалайды.

Биыл Елорда күнін мерекелеуге Қазақстанда аккредиттелген басқа елдердің елшіліктері де өте белсенді қатысады. Мысалы, АҚШ елшілігі Астанаға «Broadway Bound» мюзиклін әкелу бастамасын көтерді, ол Бейбітшілік және келісім сарайында және Бәйтеректің жанындағы ашық алаңда көпшілік назарына ұсынылады. Ал Италия елшілігі «Астана Самалы» үрмелі аспаптар оркестрлерінің фестиваліне қатысатын ту көтеріп жүретіндерді әкеледі.

Шаралардың толық бағдарламасымен, аңдатпалар мен алдағы оқиғалар туралы ақпаратпен www.astanaday.kz сайтында танысуға болады.

Концерт билеттері «Қазақстан» ОКЗ, «Mega Astana» СОО, «Сарыарқа» СОО, «Керуен» СОО, «Конгресс-холл», «Жастар» сарайы, Бейбітшілік және келісім сарайы, ҚазМедиа орталығы, Министрліктер үйі 11-ші кіреберісте орналасқан қалалық кассаларда, сондай-ақ, www.koncertyastany.kz сайтында онлайн режимде сатылады. Концерттердің жазбалары жетекші республикалық телеарналардан көрсетіледі.

Жиі кездесетін сұрақтар мен жауаптарды dintube.ru сілтемесі бойынша таба аласыздар.

✨✨✨ӘЛЕУМЕТТІК ЖЕЛІЛЕР✨✨✨

Вк (негізгі топ): vk.com/juregimde
Вк (әйелдер форумы): vk.com/juregimde1
Вк (ораза 2016): vk.com/juregimde_oraza
Твиттер: twitter.com/juregimde
Инстаграм: instagram.com/zhuregimde

Астана қаласының мәслихаты мен қалалық ардагерлер кеңесі ардагерлерді ұлықтаудың тамаша жолын ұсынды. Енді ардагерлер есімі олар тұратын үйлерге жазылады. Бүгін Астана қаласының Сарыарқа ауданы Ардагерлер кеңесінің өкілдері Ұлы Отан соғысы ардагерлерінің есімдері жазылған тақтайшаларды орната бастады. бұл шешім Ұлы Отан соғысындағы Жеңістің 71 жылдығын мерекелеу қарсаңында қабылданған болатын.

Қазіргі кезде ауданда 67 соғыс ардагері тұрып жатыр. Олардың үйлерінің іргесіне тегі, аты және әкесiнiң аты жазылған тақтайша орнатылады.

— Өтіп бара жатқандардың барлығы мұнда кім тұратынын біліп жүрсін деген ниетпен тақтайшаларды қабырғаға ілеміз. Бұл ардагерлердің ерлігін ұмытпау үшін жасалады. Мұндай акциялар жастарды патриоттыққа тәрбиелеуге септігін тигізеді, — дейді Астана қаласының «Сарыарқа» ауданы Ардагерлер кеңесінің төрағасы Ебенғаппас Ахметов.

Ең бірінші атаулы тақтайша ардагер Фролов Алексей Федоровичтің тұрғын үйіне орнатылды. Қария өз үйінің ауласында қонақтарды қуана қарсы алды.



— Әуелі әкімдіктерге, мәслихат мүшелеріне және ардагерлер кеңесіне көрсеткен қамқорлықтары үшін алғысымды білдіремін. Елімізде «Ешкім де, ешнәрсе де ұмытылмайды» жобасы қолға алынған. Патриоттық тәрбие беруге баса көңіл бөлініп жатыр. Осы жағдайды пайдалана отырып, жастарға оқуға және жақсы әскери білім алуды тілеймін, ешқашан да сағымыз сынбасын, — деді ҰОС ардагері Алексей Фролов.

Қалалық және аудандық Ардагерлер кеңестері Ұлы Отан соғысы ардагерлеріне белсенді қолдау көрсетуде. Атаулы тақтайшалар ардагерлер тұрып жатқан барлық тұрғын үйлерде орнатылады. Егер сіз кетіп бара жатып, осындай тақтайшаны көрсеңіз, аулада отырған ақсақалдарға сәлеміңізді беріп, ардагерлер ізетіңізді білдіре жүріңіз.

Материал Астана қаласы әкімдігінің ресми сайты astana.gov.kz деректері бойынша әзірленді.

Елордада М. Өтемісов атындағы Оқушылар сарайында Қазақстанға поляктардың жер аударылғанына 80 жыл толуына орай шара өтті. Бұл шараны қалалық Қазақстан халқы Ассамблеясының қолдауымен және Польша Республикасының Қазақстандағы Елшілігінің қолдауымен Астана қаласындағы «Polacy» қоғамдық бірлестігімен ұйымдастырылды.



Шараға Қазақстан халқы Ассамблеясының мүшелері, мемлекеттік орган өкілдері, этномәдени бірлестік, ғылыми және зиялы қауым өкілдері, белгілі қоғам қайраткерлері қатысты.

«Бүгін Қазақстан Республикасы Тәуелсіздігінің 25 жылдығын атап өту барысында біз сенімді түрде поляктардың Қазақстан халқымен біте қайнасып кеткенін айта аламыз, — деді Астана қаласы Қазақстан халқы Ассамблеясы хатшылығының меңгерушісі Ляззат Құсайынова.

Польша Республикасының Қазақстандағы Елшісі Мачей Ланг қиын қыстау кезде барша ұлтқа қонақжайлылық танытқан елімізге ризашылығын білдірді. Оның айтуынша, Қазақстан өз басынан өткерген ауыр кезеңдегі жағдайға қарамастан, жер аударылғандарға барынша қамқорлық көрсеткен. Кімнің тірі қалуы белгісіз кезеңдегі азапты тірлікте көмегін аямаған халқымызға жылы лебізін жеткізді.

«Сол кездегі сұрапыл уақытта қол созған қазақтардың іс-әрекетін ең жоғары адамгершіліктің белгісі ретінде бағалаймын. Бұл ақиқаттың куәгеріне айналған қайырымдылықты ешкім ұмытпайды. Әрқашан қазақтардың көрсеткен көмегін есімізде сақтап, оларға алғыс білдіруді абзал борышымыз деп білеміз», — деді ол.

Шараға қатысушылар арасында болған жер аударылғандар сол кездің ауыр зардаптарын әңгімелеп берді. Сонымен қатар, Қазақстан тарапынан жер аударылғандарға жасалған үлкен көмекті жылы ілтипатпен айтты.

Кеш барысында көпшілік назарына елордалық мәдени бірлестіктердің қатысуымен концерттік бағдарлама ұсынылды. Сондай-ақ, Оқушылар сарайының фойесінде тақырыптық көрме өткізілді.

Еске сала кетейік, 1936 жылғы 28 сәуірде «Украинадан қоныс аударушылар туралы» КСРО ҰКО қаулысы қабылданған болатын. Құжатқа сәйкес, Украинада тұратын поляктар Қазақстанға көшірілді.

Материал Астана қаласы әкімдігінің ресми сайты astana.gov.kz деректері бойынша әзірленді.

Апта сайын жұмадан жексенбіге дейін Қ. Мұңайтпасов атындағы орталық стадион (Кенесары, 14) мен «Думан» ойын-сауық орталығының тұрақтарында Астана қаласы, Ақмола және Қарағанды облыстары тауар өндірушілерінің қатысуымен ауыл шаруашылық жәрмеңкелері өткізілуде.

22 сәуірд — 5 маусым аралығында 24 жәрмеңке өткізілген, осы кезеңде жалпы құны 222,7 млн теңгелік 434 тоннадан артық өнім, соның ішінде өткен демалыс күндері 39 тонна өнім сатылды.



Жәрмеңкеге 15 жеткізуші мен өндіруші қатысады. Қала тұрғындары мен қонақтарына тауардың 500 астам түрі ұсынылады: ет, балық, сүт өнімдері, шұжық өнімдері, жемістер мен көкөністер, ұн, жарма, май және т.б. Жәрмеңкедегі бағалар базардағыдан төмен, мысалы, картоптың келісі 95 теңге, пияз – 80 теңге, қырыққабат – 60 теңге, қияр мен қызанақ 400 теңге, сүттің литрі – 160 теңге, он жұмыртқа – 210 теңге тұрады.

Материал Астана қаласы әкімдігінің ресми сайты astana.gov.kz деректері бойынша әзірленді.

Елордада өнеркәсіптік өндіріс қарқынды өсіп келеді. Жыл басынан бері өңдеуші өнеркәсіптік, құрылыс индустриясы, тамақ өнімдерін шығару, электр қуатымен және сумен жабдықтау салаларында өнімнің нақты көлемі ұлғайды.

Өңдеу өнеркәсібіндегі өнімнің нақты көлемі 2015 жылғы қаңтар-мамырдағы деңгеймен салыстырғанда 2,1%-ға өсті және қолданыстағы бағамен 113,1 млрд. теңгені құрады. Өңдеу өнеркәсібіндегі өндіріс көлемінің өсуі машина жасауда, машиналар мен жабдықтардан басқа дайын металл бұйымдарын жасауда, резеңке және пластмасса бұйымдары өндірісінде байқалады.



Тамақ өнімдері өндірісінде нақты көлем индексі 113,4%-ды құрады. 2015 жылғы қаңтар- мамырдағы деңгеймен салыстырғанда ұн өндіру 26,7%-ға өсті.

Құрылыс индустриясы кәсіпорындарымен металл есіктер мен есік босағалары, терезелер және олардың жақтаулары (190,3%), құрылыс ерітінділері (150,7%) өндірісінің өсімі қамтамасыз етілді. Машина жасауда өнімнің нақты көлемінің өсуі негізінен өзге де көлік құралдарын шығаруға қатысты (129,9%) орын алды.

Электр қуатымен жабдықтау, газ, бу беру және ауа баптауда өнім көлемі 27,7 млрд. теңгені құрады.

Сумен жабдықтау, кәріз жүйесі, қалдықтардың жиналуын және таратылуын бақылауда қызмет көлемі 2015 жылғы қаңтар-мамырмен салыстырғанда 23,2%-ға өсті және 4,7 млрд. теңгені құрады.

Материал Астана қаласы әкімдігінің ресми сайты astana.gov.kz деректері бойынша әзірленді.