Астанада жол көлік оқиғасы төмендеген, — деп хабарлады Астана қаласы әкімдігінің медиа орталығының тілшісі, Астана қаласы жергілікті полиция қызметінің басшысы Бақытжан Малыбаевқа сілтеме жасап.

«Қазіргі күнде қала бойынша жол-көлік оқиғасының төмендегенің көрудеміз. Өткен аптада 2 жол-көлік оқиғасы тіркелді, біріне жаяу жүргінші кінәлі. Қаза болғандар жоқ», — деп айтты Б.Малыбаев әкімдікте өткен аппаратты жиналыста.

Оның мәліметі бойынша, өткен жылдың осы кезімен салыстырғанда қала бойынша жол-көлік оқиғасынан зардап шеккендер саны төмендеген. Егер өткен жылы 18 болса, осы жылы — 8.

Жол-көлік оқиғасының төмендеуіне «Сергек» бейне-фото тіркеу жүйесі әсер еткен.

Еске салайық, «Сергек» бейне-фото тіркеу жүйесі бойынша Астана қаласында 3 435 әкімшілік құқық бұзушылық тіркелген.

Сонымен қатар, камералар көмегімен 1000 жуық жол жүру ережесін сақтамаған, қоғамдық орындарда 345 тәртіп бұзушылық, 299 алькоголді ішімдік ішу, 100 ұсақ бұзақылық жәнеде басқа 1 720 заң бұзушылық тіркеген.

Астана әкімі Әсет Исекешевке қысқы маусым алдында көшелерді тазалау шараларының барысы мен арнайы техниканың дайындық жағдайы баяндалды, деп хабарлайды елорда әкімдігінің медиа орталығы.

Елордада тазалау жұмыстарын екі мердігер ұйым жүзеге асырады. «Астана Тазалық» ЖШС-де қысқы маусымға арнайы техниканың 266 бірлігі, «Астана-Зеленстрой» АҚ-да 205 бірлігі дайын. Бұдан басқа, қыс мезгілінде «Алматы» ауданында техниканың 468 бірлігі, «Есіл» ауданында 487 бірлігі және «Сарыарқа» ауданында 414 бірлігі көшелерді жинауға әзір. Барлығы 1 840 бірлік.

Астана көшелері мен жолдарын 3 000-ға тарта жұмысшы тазаламақ.

Қазіргі таңда қалада пайда болған жаңа көшелер есепке алына отырып, қала жолдары мен көшелерін тазалау бағыттары, жұмыс тәртібі қайта қарастырылып жатыр. Қыс мезгілінде қаланың орталық көшелері мен Астананың әлеуметтік нысандарына кіретін жолдарға басымдық берілетін болады.

«Алдағы қысқы маусымға біз арнайы техниканы, тұз араластырылған құм қоспасының 27 мың куб метрін, көктайғаққа қарсы реагентті дайындап, аудандар бойынша маршруттарды анықтадық. «Есіл» ауданында 7 маршрут, «Алматы» ауданында 2 маршрут, «Сарыарқа» ауданында 5 маршрут бар. Сондай-ақ, қаладан шығу жолдарында және қалың қар жауып жатқан уақытта қолданылатын құмшашушы техниканың 27 бірлігі, 8 ротор бар. Мұнымен қоса, қарды ерітетін орындар келісіліп анықталды. Қалада мұндай 3 орын дайындалады. Олардың 2-уі стационарлық, 1-уі көшпелі орын», — деп мәлімдеді «Астана-Тазалық» ЖШС-нің бас директорының орынбасары Серік Жолымбетов.

Бұдан бөлек, Астанада тәулік бойы тұрғындардың тазалау жұмыстары мен қардан тазалау жұмыстары бойынша өтініштері қабылданатын кезекші «109» қызметі жұмыс істейді.

Жарық диодтарды өндірумен айналысатын «Led System Media» ЖШС бүгінгі күнге дейін 280 млн теңгенің өнімін шығарды, деп хабарлайды елорда әкімдігінің медиа орталығы.

2013 жылы іске қосылған кәсіпорын жылына жарықтандыру құрылғыларының 100 мың данасын шығарады. Алайда зауыт бұдан да артық өнім шығаруға қауқарлы.

Зауыт өндіретін жарық диодты құрайтын жарықтандыру құрылғылары электр қуатын 3,5 есеге дейін үнемдеуге мүмкіндік береді. Бұл құрылғыларды пайдалну мерзімі 15 жылға дейін жетеді екен. Сонымен бірге, өнімдер экологиялық тұрғыдан қарағанда таза әрі қауіпсіз болса керек. Компания оларды «Semileds» (АҚШ) технологиясы бойынша өндіреді.

«Led System Media» ЖШС-нің бас директоры Амангелді Таукеновтың айтуына қарағанда, бұл жарық диодты құрылғыларды өндірумен айналысатын Қазақстанда баламасы жоқ кәсіпорын.

Онда қуаттылығы өте жарқын жарық диодтардың айына 1 млн данасын шығаруға қауқары бар корпустендіру қатары орналастырылған. Мұндай шамдардың жарамдылық мерзімі 50 мың сағатты құрайды. Кәсіпорында, сондай-ақ, сағатына 40 мың компонентті шығаратын сыртқы монтаж қатары мен дайын өнімді құрастыратын цех бар.

«Біздің өнім бірнеше деңгейге бөлінген. Олардың бірі – жоғары технологиялық бөлім. Мұнда жарық диодтардың өзі өндіріліп, дайын өнімдер тақтаға орнатылады, толымдауыштар жасалып, құрастырылады. Бүгінгі таңда мемлекет тарапынан көрсетілген қолдау мен ие болған гранттың арқасында біз өндірістің вертикалды түрде құрылымын құрдық», — деп атап өтті А.Таукенов.

Өткен жылы кәсіпорын «Ғылым қорының» грантына ие болған-ды. Жоба қоймаларға арналған нанофосформен жабылатын екінші буынды жарық диодты шамдарды дайындауға бағытталған. Аталмыш жобаның арқасында көкөністерді зауыт белсенді түрде агрофотникамен айналыса бастады. Қазіргі таңда қаржыландыру шаралары жүргізіліп жатыр.

Кәсіпорын жетекшісінің сөздерінше, қоймаларда жарық диодты шырағдандарды қолдану жобасының іске қосылуы өсімдіктерді өсіру жүйесін оңтайландыруға мүмкіндік береді. Мұндай шырағдандардың көмегімен бір жылдың ішінде мол өнім жинауға болады.

«Жоба келесі жылы іске қосылады деп жоспарланып отыр. Жарық диодты жарықтандырудың бірегей схемасы өсімдіктің өсу жеделдігін арттырып, жиналатын өнім көлемін ұлғайтып, екпе өсімдіктің сапасын жоғарылатуға ықпал етеді. Суық климаттағы қалалар мен ауылдардың маңайында азық-түлік базасы пайда болады. Біз жыл бойы өзімізді жасанды топырақта өсірілетін көкөністермен қамтамасыз ете аламыз», — деп атап өтті А. Таукенов.

Зауыттың бас директоры атап өткендей, аталмыш жоба кәсіпкерлер үшін зор мүмкіндік сыйлай алады. Франшизаны сатып алу арқылы кәсіпкерлер көкөністер өндірісімен айналыса алады.

«Бұл жобаны дайын бизнес жоспар деп атауға болады. Біз технологиялық тізбегі бар қоймаларға арналған кешенді шешімдерді ұсынамыз. Бұл автоматтандырылған жүйе болмақ. Дәлірек айтқанда, жарық пен су уақытында беріліп тұрады. Қазіргі таңда біз жобаның коммерциялық құрамдас бөлігін есептеп жатырмыз. Шамамен, 7000 шаршы метр болатын аудан үшін оның құны 1 млн АҚШ долларын құрайтын болады. Бүгін біз сынамалы қойманың қаңқасын дайындап қойдық, — деді А.Таукенов.

Айта кетейік, бүгінгі таңда зауытта 28 адам жұмыс істейді. Мамандар Ресей мен Қытайдың өндірістік орындарында біліктіліктерін арттырған.

Кәсіпорын әлемдегі ірі өндірушілермен ынтмақта жұмыс істейді. Үздіктердің тәжірибесін ескере отырып, серіктестік қызметкерлері Қазақстандағы инновациялардың дамуына өзіндік үлес қосуда.

«Өзіміздің жақында ғана ашылғанымызға қарамастан, біз ауыз толтырып айтарлықтай нәтижелерге қол жеткіздік. Біз елімізді үздік импорттық өнімдерге сапасы жағынан дес бермейтін отандық энергия үнемдейтін технологиялардың қол жетімділігімен қамтамасыз еткіміз келеді», — деп түйді А. Таукенов.

20 қазан күні хореграфиялық жауһар туынды – П. И. Чайковскийдің «Ұйқыдағы ару» балетімен «Астана Операның» V мерейтойлық театр маусымының шымылдығы түріледі, деп хабарлайды елорда әкімдігінің медиа орталығы.

Театр көрермен қауымға бірқатар жаңа опера және балет тұсаукесерлерін ұсынбақ.

«Мерейтойлық маусымды қазіргі заманның аты аңызға айналған хореографы Ю. Н. Григоровичтың қойылымындағы «Ұйқыдағы ару» балетімен ашуды жөн көрдік. Бұл мэтрдің біздің сахнамызда қойған алғашқы спектаклі болатын. Көрермен шынайы туындының жаңа редакциясын бірден жылы қабылдады, себебі музыка мен хореография керемет үйлесім тапқан еді. «Астана Опера» театрының қоржынында тыңдармандар үлкен қызығушылықпен қабылдаған көптеген қызықты қойылымдар бар. Алдағы маусымда да оларды тамаша тұсаукесерлер күтіп тұр. 17 және 18 қараша күндері Ж.Бизенің «Кармен» операсының алғашқы көрсетілімі өтеді», — деді «Астана Опера» театрының директоры Ғалым Ахмедьяров.

2018 жылдың наурыз айында ұжым жаңа редакцияда, сценография мен костюмдерде М.Төлебаевтың «Біржан-Сара» ұлттық операсының тұсаукесерін жоспарлап отыр. Сонымен қатар, мерейтойлық маусымда А.Аданның «Корсар», Т. Қажығалиевтың «Қозы Көрпеш – Баян Сұлу» балеттерінің, Дж. Пуччинидің «Турандот», Дж. Россинидің «Севильдік шаштараз» операларының тұсаукесерлері күтілуде.

Қазіргі таңда театрда сүйікті көрерменмен қайта қауышудың керемет атмосферасы орнаған. Дайындық залдары балет спектакліне қызу әзірленіп жатқан әртістерге лық толы. «Астана Опера» сахнасындағы «Ұйқыдағы ару» қойылымын атақты балетмейстер Юрий Григорович өзге балетмейстерлер ұсынған балалар ертегісі не болмаса ойын-сауық көрінісі ретінде емес, Чайковскийдің музыкасына сәйкес келетін рухты поэма ретінде көрсетпек. 20-22 қазан күні басты партияларда жетекші солистер мен талантты әртістер өнер көрсетеді. Нәзік Аврора рөлін Мәдина Басбаева мен Әйгерім Бекетаева ұсынса, Дезире ханзада партиясында Еркін Рахматоллаев, Таир Гатауов көрермен алдына шықпақ. Балеттің керемет музыкалық бейнесі Жақсылық пен Жамандықтың қарама-қарсылығы саналатын екі әуен – Мамыргүл Перісі (Әсел Шайкенова, Әнел Рүстемова) мен Карабос Перісі (Ильдар Шакирзянов) арасындағы шиеленістен өрбиді.

13 қазанда Оқушылар сарайында Астана әкімдігінің қолдауымен әкелердің қалалық форумы өтті, деп хабарлайды елорда әкімдігінің медиа орталығы.

Форумға Парламент депутаттары, қоғам қайраткерлері, халықаралық және үкіметтік емес ұйымдардың өкілдері, сондай-ақ, елорда мектептерінің бетке ұстар оқушылары қатысты.

Биыл шара еркін форматта өткізілген болатын. Қатысушылар өзін қызықтырған сұраққа бірден жауап алды.

«Біз өзекті деген бірнеше мәселені көтердік. Бұл — өскелең ұрпаққа тәрбие беру проблемасымен, әкелердің бала тәрбиесіне қатысуымен, жаңа технологиялардың балалардың дамуына әсер етуімен байланысты сұрақтар. Біздің басты мақсатымыз – тәрбие саласындағы біліммен, тәжірибемен бөлісу, -деді форум барысында сөз сөйлеген Астана қаласы білім беру басқармасы жетекшісінің орынбасары Дулат Жекебаев.

Кездесу балаларды тәрбиелеу ісіндегі әкелердің мәртебесі мен жауапкершілігін жоғарылатып, отбасылық құндылықтардың дамуы мен нығаюына септігін тигізді. Әкелер одағының төрағасы Қуаныш Жұматаевтың атап өтуінше, тәжірибе жүзінде өткізілетін мұндай форумдар әкелер үшінғана емес, аналар үшін де маңызды.

«Бүгінгі күні біздің Одақта 17 белсенді әке бар. Алайда ел бойынша қатарымыздағы әкелердің саны бұдан бірнеше есе артық. Республиканың 8 қаласында біздің Одақтың өкілдері бар. Қазір біз 15 мыңға тарта адамды қамтып отырмыз. Олар бізді біледі де, қолдайды да», – деді Қуаныш Жұматаев.

Қалалық әкелер форумы Білім беру басқармасымен 2015 жылдан өткізіліп келеді. Оны өткізу жөніндегі негізгі идея осыдан 5 жыл бұрын Астана қаласының №59 мектептің базасында туған еді.

Астана тұрғындары қазақстандық аграрийлерден шамамен 8 млн теңгеге өнім сатып алды. Бұл – былтырғы көлемнен екі есе артық көрсеткіш, деп хабарлайды елорда әкімдігінің медиа орталығы.

8 айдың қорытындыларына сәйкес, жәрмеңкелерде өнімнің 25 мыңнан астам тоннасы өткізілген.

Қаңтар мен тамыз айларының аралығында Жамбыл облысы Астанаға өнімнің 3400, ОҚО – 2315, Атырау облысы – 280, БҚО – 530, Қызылорда облысы – 612, Алматы облысы – 1 1761, Ақтөбе облысы – 615, Қарағанды – 435, Қостанай – 1800, ШҚО – 720, Павлодар – 1357, СҚО – 500 және Ақмола облысы – 1435 тоннасын әкелді.

Қазан айының соңына дейін өз өнімдерін елорда тұрғындары үшін Атырау, СҚО, Павлодар және Ақмола облыстарының ауылшаруашылығы тауарларын өндірушілері екінші мәрте ұсынатын болады.

Қазақ экономика, қаржы және халықаралық сауда университетінің студенттері «Әке балаға сыншы» лекциясына қатысты, деп хабарлайды Астана қаласы медиа орталығы.

Мемлекет басшысының «Болашаққа бағдар: рухани жаңғыру» атты бағдарламалық мақаласын жүзеге асыру бойынша жастармен кездесу өтті. Шараны Астана әкімдігімен бірлесіп «Фонд Мира и Согласия «Алтын өркен» қоғамдық қоры ұйымдастырды.

«Мұндай кездесулердің мақсаты әкенің рөлін арттыру, өскелең ұрпақты тәрбиеге, отбасылық, мәдени, рухани құндылықтарды дәріптеу, дәстүрлі адамгершілік нормаларын, принциптерін, балаларды тәрбиелеу, дәстүрлі отбасын «Табысты отаға – табысты адам», «Бақытты ата-ана – бақытты балалар» ұстанымын насихаттау», деп хабарлады жоба менеджері Марат Мұхамеджанұлы.

Елордалық ЖОО мен колледждерде мәдени және отбасылық құндылықтар туралы дәрістер жүргізіледі. Жастарға ұлттық дәстүрді сақтау, қойылған мақсаттарға жету туралы табысты қазақстандықтар әңгімелейді: белгілі тарихшылар, филологтар, спортшылар мен мәдениет қайраткерлері. Осы кездесулерде Несіпбек Айтов, Омар Жәлел, Жұмамұрат Шәмші, Аманжол Әлтай, Серікзат Дүйсенғазин сөз сөйледі. Қазан айында қаламыздың жастарымен 20-дан аса кездесу өтті.

Жалпы шараларға 1 700 астаналық тыңдаушы қатысқан.

Астана әкімі қаланың тыныс-тіршілігіне қатысты мәселелер көтерілген жиналыс өткізді. Жиын барысында Әсет Исекешев қала басқармаларының жетекшілеріне бірқатар тапсырма берді, деп хабарлайды елорда әкімдігінің медиа орталығы.

Энергетика басқармасының жетекшісі Бақтыбек Жапаев қала әкіміне елордадағы жылыту маусымы барысының жайын баяндап берді. Оның айтуына қарағанда қазіргі таңда қаланың барлық нысандары мен тұрғын үйлеріне жылу беріліп жатыр.

Ол, Астанада жылыту маусымы 27 қыркүйекте басталғанын еске салды. Бүгінге дейін жылумен қамту қызметіне нысандардың көп бөлігі қосылған.

«Жылыту маусымы штаттық кестеге сай жүріп жатыр. Температуралық режим бекітілген режимдік картаға сәйкес сақталуда. Қуат көздері отынның нормативті қорымен қамтылған, — деп хабарлады Бақтыбек Жапаев.

Қазіргі таңда денсаулық сақтау, білім беру, мәдениет нысандары мен көппәтерлі үйлердің 100 % жылумен қамтамасыз етілді. Жеке үйлердің жылумен қамтылуы 98%-ды құрайды.

Жылыту маусымы басталғаннан бері Астананың жылу және электр желілерінде I және II дәрежелі апаттар мен тоқтап қалулар тіркелген жоқ.

Сонымен қатар, ведомство жетекшісі, өткен екі жылыту маусымы кезінде қалалық билік өкілдері 1262 өтініш берушіге көмірді сатып алуға жәрдемдескенін атап өтті. Отынның жалпы құны 21,33 млн теңгені құрады.

Биыл да зейнеткерлер мен халықтың әлсіз топтарына көмірді сатып алуға көмек көрсетілетін болады. Қатты отынның сатып алу мақсатында әлеуметтік көмек зейнет жасына жеткен азаматтарға, пешпен жылытылатын жеке үйлерде тұратын мүгедектер мен мүгедек балаларға көрсетіледі. Кіріс көлемі 3 төменгі күнкөріс деңгейінен (73 мың теңге шамасында) аспауы керек.

Мұнымен қоса, 1 қыркүйек пен 11 қазан аралығында Астана станциясында көмірдің 46 726 тоннасы түсірілді. Жалпылай алғанда көмірдің 667 вагоны жеткізілді. Бұл өткен жылдың сәйкес кезеңіндегі көрсеткіштен 30%-ға артық.

Осы жылы Астанаға көмірдің жыл сайынғы көлемінен басқа 25 тонна көмір жеткізілді.

Елордада көмір тапшылығы жоқ.

Осы ретте Ә. Исекешев табиғи монополияларды реттеу департаментінің жетекшілігіне қатты отын мен азық-түлік бағасының негізделмеген көтерілуін болдырмау мақсатында қажетті шараларды қолға алуды тапсырды.

Жиында Әсет Исекешев, сондай-ақ, денсаулық сақтау саласына ерекше көңіл бөлді. Нақтырақ айтқанда, ол халықтың санитарлық-эпидемиологиялық жағдайы мәселесіне баса назар аударды.

Оның айтуынша, 2017 жылы тұмауға қарсы егу жұмыстарымен жалпы халық санының 3,2%-ын қамту үшін қаражат бөлінген. Алайда, тұмауға қарсы егілетін азаматтардың үлесі жалпы халық санының кем дегенде 10%-ын құрауы тиіс.

Өз кезегінде, денсаулық сақтау басқармасының жетекшісі Қамалжан Надыров қала әкіміне 2017-2018 жылғы эпидемиологиялық маусымға арналған тұмауға қарсы халықты егу шараларына Қазақстан астанасында 64 млн теңге бөлінгенін жеткізді.

Елорда әкімдігінің медиа орталығы таратқан ақпаратқа қарағанда, мемлекеттік бюджет есебінен Астананың 74 мың тұрғыны егіледі.

Бұл тұрғыда, халықтың әлсіз топтары тұмауға қарсы тегін егілетіндігі айтылған.

Сондай-ақ, бас қаланың тұрғындар тұмауға қарсы ақылы түрде де егіле алады. Егу науқаны 1 қазанда басталып, айдың ортасына дейін жалғаспақ.

Осы орайда, елорданың денсаулық сақтау басқармасының жетекшісі Қамалжан Надыровқа әкім аталмыш мәселені өзінің жеке бақылауына алып, халықты тұмауға қарсы егу шараларының қорытындылары туралы есеп беруді тапсырды.

Жиналыс барысында Әсет Исекешевке «Сергек» бейнетіркеу жүйесі жұмысының аралық нәтижелері жайынан ақпараттандырды.

«15 қыркүйектен, «Сергек» камералары жұмысын бастағаннан кейін, Астанада ЖКО саны, былтырғы жылдың сәйкес кезеңімен салыстырғанда, орташа есеппен алғанда 10% азайған» — деп атап өтті Ә.Исекешев.

Аппараттық кеңестің қорытындылары бойынша Астана әкімі қысқа дайындық шараларының барысында аумақтарды тазалау мен абаттандыру бойынша қаладағы 3 ауданның әкіміне тапсырма берді.

Астана әкімдігі республиканың Ауылшаруашылығы министрлігіне маусымдық бағалардың көтерілу үрдісіне ие елорданың ішкі нарығын көкөніс өнімдерімен қамту үшін Жоспар-тапсырманы құру және бекіту жөніндегі ұсынысты енгізді, деп хабарлайды елорда әкімдігінің медиа орталығы.

Елорда нарығы республика өңірлерінен келетін тауар жеткізілімдеріне тікелей байланысты.

«Қаланың айлық тұтынушылығы ескеріле отырып, өнім көлемі мен түрлерін, азық-түлік белдеуі аумағына кіретін және басқа да жеткізуші өңірлерді анықтау және нарықтағыдан төмен бағамен ішкі нарықта тауар сатылымын ұйымдастыру ұсынылады. Жеткізуші өңірлерге, сонымен қатар, «Азық-түлік белдеуінің қатысушысы» мәртебесі беріледі, — делінген әкімдіктің хабарламасында.

Өнімдерді сатудың негізгі орны болып «Шапағат» коммуналды базары белгіленді. Бұдан басқа, қала аудандарының аумағында қосымша сату орындары анықталатын болады. Олардың ішінде «Шарын» базары, «Кенмарт» ЖШС, «Қазақстан» СК бар.

Өнімдер бағасы логистика мен алдағы қысқы-көктемгі кезеңде сақтау есепке алына отырып, «Шарын» базарында қалыптасқан қазіргі көтерме бағасының дәлізінде анықталатын болады.

Аталмыш шаралардың барлығы әлеуметтік маңызы бар тағамдық өнімдердің бағасын сақтау мен отандық өндірушілердің ішкі нарыққа деген қолжетімділігін ұйымдастыруға бағытталған.

Үйлерін көмірмен жылытатын тұрғындар қаламызға қатты отыннын қай кезде жеткізілетінін және қай жерде сатылатыны туралы ақпаратты мына телефон номерлері арқылы біле алады: +7-778-794-97-88, +7-702-800-77-37, 55-69-17, 55-68-99,-деп хабарлайды Астана қаласы әкімдігінің медиа орталығы.

Қыркүйек айында Астана қаласына 46,7 мың тонна қатты отын жеткізілген.

Алды күні қаламызға 5 600 тонна «Шұбаркөл» көмірі жеткізілді. Осы күндері тағы 5 мың тонна жеткізіледі.

1 қыркүйек пен 11 қазан аралығында қалаға 46 726 тонна қатты отын жеткізілген (Шұбаркөл – 8 349, Қаражыра – 16 704, Майкөбе – 21 673 тонна). Жалпы алғанда 667 вагон көмір жеткізілген, өткен жылдың ұқсас кезеңімен салыстырғанда 30% жоғары.

Астана қаласы кәсіпкерлік және өнеркәсіп басқармасының басшысы Рысгүл Қауғабаеваның айтуынша, Астана қаласында көмір тапшылығы жоқ.

«Қазіргі күні кен орнынан артылған 7 мың тонна көмірдің 5 600 таннасы Астанаға жеткізілді. Жәнеде осы екі күн ішінде тағы 5 мың тонна көмір жеткізіледі. Күн сайын тек осы «Шұбаркөл» көмір түрінен қалаға 1,5 мың тонна жеткізілетін болады. Біз апта сайын мониторинг жүргізіп отырмыз. Жалпы алғанда қаламызда көмір тапшылығы жоқ», — деді Рысгүл Қауғабаева.

Айта кетейік, қала бойынша көмір сататын 15 орын бар. Оның ішінде 7-і ірі сатылым орындары. Сондай-ақ, елордада коммуналдық-тұрмыстық мұқтаждық үшін көмір қабылдайтын 20 шақты орын бар.

Көмірдің бір тоннасы орта есеппен 11 800 теңге.