Көпшілік тыңдау өткізу аясында қалалық мәслихат депутаттары Астанада сыртқы жарнама орналастыру тәртібі мен ережелерін сақтауға қатысты проблемалық мәселелерді көтерді. Шараға Астана қаласының сәулет және қала құрылысы басқармасының, кәсіпкерлер палатасы мен бизнес қоғамдастық өкілдері қатысты. Тараптар бірқатар маңызды мәселелерді талқылап, сыртқы жарнама орналастыру саласындағы бұзушылықтарды жою бойынша ұсыныстар жасады.

Қалалық сәулет және қала құрылысы басқармасының хабарлауынша, рейдтік іс-шаралар барысында бұзушылықтар анықталып, кәсіпкерлер әкімшілік жауапкершілікке тартылды.

Аталған ведомствоның мәліметінше, бүгінде Астанада 50 жарнамалық компания қызмет етеді. Бірақ «Сыртқы жарнаманы орналастыру туралы» заң талаптарын бәрі бірдей сақтамайды. Өрескел бұзушылықтарға жол беріліп, жарнамалар елорданың сәулеттік келбетіне сай келмей отыр. Депутаттар барлық мәселелерді ескере отырып, жарнама қызметін лицензиялау ережелерін енгізуді ұсынды. Бұзушылықтар тіркелген жағдайда, компания лицензиясынан айырылмақ.

Мұнымен қоса, жарнама мәтіндерінің мазмұнына, әсіресе қазақ тіліндегі аудармасына да ерекше назар аударылады. Тілдерді дамыту басқармасына жарнаманың идеологиялық және тәрбиелік мәнін естен шығармай, мағынасы мен аударманың сапасына қатаң бақылау жүргізу тапсырылды.

Көпшілік тыңдау қорытындысы бойынша елорда шегінде болашақта еліміздің барлық өңірлерінде қолдану мүмкіндігімен бірыңғай ережелер әзірлеу ұсынылды.

astana.gov.kz/kk/modules/material/11350

Риодағы Олимпиада және Паралимпиада ойындарының чемпиондары мен жүлдегерлері Ғашықтар саябағында ағаш отырғызды. Спорт жұлдыздарының жаңа аллеясына төртжылдықтың басты додасында олжалаған әр медальдің құрметіне 19 тянь-шань шыршасы егілді.

Шараға Олимпиада чемпионы Данияр Елеусінов, Риодағы Олимпиаданың күміс жүлдегерлері Әділбек Ниязымбетов пен Василий Левит, Гюзель Манюрова, қола жүлдегерлер Екатерина Ларионова, Дариға Шәкімова, Иван Дычко, Карина Горичева және Фархад Харки, сондай-ақ, паралимпиада чемпионы Зүлфия Ғабидуллина, күміс жүлдегер Раушан Қойшыбаева қатысты.

— Мен жеңіске жетуді армандағам, бірақ Астанада ағаш отырғызамын деп ойламаппын, осындай аллеяның ашылғанына қуаныштымын. Бұл жерде біз Олимпиада чемпиондарымен теңбіз, — дейді Рио-де-Жанейродағы Паралимпиада ойындарының чемпионы Зүлфия Ғабидуллина.

Олимпиада чемпионы Данияр Елеусінов ағашты күтіп-ұстайтынын айтты.

— Қолыма күрес ұстамағалы көп болды. Міндетті түрде қарап жүремін. Өзм осы жерге жақын тұрамын. Отбасыммен демалу үшін келіп тұрамын,- деді чемпион.

Ал жазғы олимпиада ойындарының күміс жүлдегері Василий Левит бірінші рет ағаш отырғызғанын айтты.

— Аллеяның ашылуына қатысу мен үшін құрмет. Тұрғындар бізден үлгі алып, ағаш отырғызсын, қаланы абаттандыруға, көгалдандыруға үлес қоссын, тазалық сақтасын, — дейді спортшы.

«Чемпиондар аллеясында» Серік Сәпиевтің де шыршасы бар. Былғары қолғап шебері шараға қатысуға қуана келісіп, барша қазақстандықтарды қоршаған ортаға қамқор болуға шақырды.

Айта кетейік, Ғашықтар бағына қала тұрғындары мен қонақтары жиі баратындықтан, аллея осында жасалды. Алдағы уақытта аллея кеңейтіліп, танымал қазақстандық спортшылар, өткен олимпиадалардың жеңімпаздары ағаш отырғызатын болады.

Алдағы демалыста Астанада Шығыс Қазақстан және Қарағанды облыстарының ауыл шаруашылық тауар өндірушілері өз өнімдерін ұсынады. Елордалықтар өңірлердің мәдениетімен етене танысады.

8-9 қазанда ШҚО ауыл шаруашылық жәрмеңкесі «Хан шатыр» сауда ойын сауық орталығының жанындағы тұрақ алаңында өтеді. Облыстың тауар өндірушілері 300 тонна өнім әкеледі, барлығы 57 сауда орны жасалады.

Қала әкімдігінің алдында өтетін Қарағанды облысының жәрмеңкесінде 840 тонна өнім өткізіледі, 60 сауда орны жасалады. Шара барысында облыстық шығармашылық ұжымдардың қатысуымен мерекелік концерт және «Бауырсақ, қымыс фестивалі» қайырымдылық акциясы ұйымдастырылады. Сондай-ақ, «Шеберлер ауылы» сәндік-қолданбалы өнер көрмесі ашыладып, қала тұрғындары мен қонақтары зергерлік өнер, көркем тоқымашылық және қыш-құмыра шеберлігі бойынша шебер-сыныптарына қатысады.

8 қазанда сағат 12.00 — ҚР Тұңғыш Президенті кітапханасында Қарағанды облысынан «Сарыарқа кітапханасы» 100 томдығын сыйға тарту салтанаты, Әлихан Бөкейханның 15 томдық шығармалар жинағының тұсаукесер-көрмесі және Қарағанды облысы суретшілерінің «Сарыарқаның сырлы бояулары» атты көрмесі өтеді.

Сағат 18.30 Оқушылар сарайында С. Сейфуллин атындағы облыстық қазақ драма театрының У. Шекспирдің «Ромео мен Джульетта» спектаклінің қойылымы көрсетіледі.

9 қазанда сағат 11.00 Бейбітшілік және келісім сарайының фойесінде Қарағанды облысының Тәуелсіздік жылдарындағы жетістіктері көрмесі ашылады, «Нұр Әсем» сән үйінің ұлттық киімдер жинағы көрсетіледі. Ал сағат 16.00 Қарағанды облысы өнер майталмандарының гала-концерті көпшілік назарына ұсынылады.

8 қазанда сағат 9.00 «Көрме» орталығында ШҚО археологиялық артефактілер көрмесі, сағат 10.00 ҚР Ұлттық музейінде ҚР Тәуелсіздігінің 25 жылдығына арналған «Үлкен жолдың кезеңі» фотокөрмесі өз жұмысын бастайды. Сонымен қатар, сағат 10.30 «Шығыс Қазақстанның суретшілері. Уақыт портреттерінің ерекшеліктері» атты бейнелеу өнері көрмесі ашылады.

Сағат 15.00 ҚР Ұлттық академиялық кітапханасында «Тәуелсіздіктің жарқын жетістіктері: Шығыс Қазақстан» кітап көрмесі өтеді. Онда келушілер назарына тәуелсіздік жылдары экономиканың, әдебиеттің, мәдениет пен спорттың дамуына елеулі үлес қосқан танымал тұлғалар туралы кітаптар ұсынылады. Көрме аясында «Біздің Абай» электронды толық мәтінді кітапхана және «Қайым Мұхамеджанов» электронды библиографиялық көрсеткіші атты екі жобаның тұсаукесері өтеді. Бұдан басқа, сағат 15.00 Л.Н. Гумилев атындағы Еуразия ұлттық университетінде Өскемен қаласының драма театры К. Людвигтің «Жұлдызды сәт» спектаклін қояды. Сағат 18.30 «Жастар» театрында Семей қаласының Абай атындағы Шығыс Қазақстан облыстық театрының Ф.М.Достоевскийдің «Дядюшкин сон» спектаклі көрсетіледі. Ал жәрмеңкеге келушілер екі күн бойы Ә. Қашаубаев атындағы Шығыс Қазақстан облыстық филармониясының «Шұғылалы Шығыс» атты концертін тамашалайды.

astana.gov.kz/kk/modules/material/11334

Астана әкімі Әсет Исекешев бірнеше инфрақұрылым нысандарының құрылысымен танысты.

Елорда әкімі «Бәйтерек» қосалқы электрстанциясының құрылысымен танысты, оны 2017 жылы қаңтарда іске қосу көзделген. Шағын станция Жаңа вокзалды, №15, 16 сорғы станцияларын және әлемдік деңгейдегі «Кәсіпқор» колледжін электр энергиясымен жабдықтайтын болады.

Әсет Исекешев ғимаратының құрылысы аяқталған №15 сорғы станциясын да аралап көрді. Мұнда сорғыларды, құбырларды, инженерлік желілерді (су құбырын, кәріз, нөсер кәрізін) монтаждау жұмыстары жүргізілді. Электр және БӨҚжА, технологиялық процесті басқарудың автоматтандырылған жүйесін монтаждау, ішкі әрлеу жұмыстары жалғасуда.

Сорғы станциясын 2016 жылдың 15 қазанында іске қосу жоспарланған. Сондай-ақ, Астана әкімі ЖЭО-2 жаңғырту және қалпына келтіру барысымен танысты.

Сапар соңында Әсет Исекешев №9 қалалық емханаға ат басын тіреді. Емхананың жалпы ауданы 9935,1 шаршы м, мекеме заманауи емдеу-диагностикалау жабдықтарымен жабдықталған білікті мамандар қызмет ететін 11 бөлімнен тұрады. 2016 жылдан бастап емханада Қазақстан Республикасында денсаулық сақтауды дамытудың 2016-2019 жж. арналған «Денсаулық» мемлекеттік бағдарламасы аясында аурудың алдын алу мен басқаруға интеграциялық тұрғыдан қарау негізінде қоғам денсаулығын қорғау бойынша жаңа саясат қолға алынып, эндоскопиялық полипэктомия мен гистероскопиялық операциялар практикаға енгізілді.

astana.gov.kz/kk/modules/material/11349

Жыл басынан бері елордалық полиция қызметкерлері террористік тұрғыдан осал объектілерді тексеру жұмыстарын жүргізуде. Нәтижесінде, 30-дан астам террористік тұрғыдан осал объектінің жетекшілері Қазақстан Республикасының Әкімшілік құқық бұзушылық туралы Кодексінің 149-бабы 1-тармағы бойынша (өзiне сенiп тапсырылған объектiнiң терроризмге қарсы қорғалуын қамтамасыз ету және қауiпсiздiгiнiң тиiстi деңгейiн сақтау жөнiндегi мiндеттердi орындамауы және тиiсiнше орындамауы – 100-300 АЕК дейін айыппұл) әкімшілік жауапкершілікке тартылды. Салынған және өндірілген айыппұл көлемі 7 млн теңгеден асады.

Тексеру нәтижелері көрсеткендей, террористік тұрғыдан осал объектілерде инженерлік-техникалық қадағалау, бейнебақылау жүйесі мен дабыл қондырғыларының, басқаруды бақылау жүйесі, сондай-ақ, мамандандырылған күзет бомлаған.

Айта кетейік, ҚР Үкіметінің 2013 жылғы 28 тамыздағы № 876 қаулысында террористік тұрғыдан осал объектілерінің тізбесі бекітілген. Объектілерді терроризмге қарсы қорғалуын бақылау және террористік тұрғыдан осал объектілерді ұйымдастыру міндеті ішкі істер органдарына жүктелген.

astana.gov.kz/kk/modules/material/11323

Астанада 1 тамыздан 30 қыркүйекке дейін «Мектепке жол» жыл сайынғы республикалық акциясы өтті. Биыл шара «Бақытты балалық шақ мекені» ұранымен ел тәуелсіздігінің 25 жылдығына орайластырылып отыр. Акцияның мақсаты оқу жылы қарсаңында көп балалы және аз қамтылған отбасыларға, жетім және ата-анасының қамқорлығынсыз қалған балаларға материалдық және басқалай көмек көрсету, сондай-ақ, әлеуметтік себептермен балалардың мектепке бармауының алдын алу болып табылады.

Акция аясында 6 158 аз қамтылған және көп балалы отбасыларға 72 млн 473 мың теңге көлемінде көмек көрсетілді, оның ішінде 4 632 балаға 49 млн 338 мың теңге демеушілік қаржы жұмсалды.

Шара аясында Білім басқармасының өкілдері полиция қызметкерлері мен білім мекемелерінің мамандары 165 610 пәтер және жекеменшік үй, 1972 жылыжай нысаны, сонымен қатар сауда орындарындары мен көңіл көтеру орындары және тұрғын үй жертөлелелерін аралап, тексерді. Нәтижесінде білім алумен қамтылмай қалған 22 жасөспірім анықталды.

Сондай-ақ шара барысында «Жаннұр», «Евразия» сынды ірі сауда орындары мен орталық базар аумағында киім-кешек пен мектепке қажетті жабдықтарға арналған арнайы контейнерлер орнатылды.

Акция аясында қала әкімдігі алдындағы орталық алаңда мектеп жәрмеңкесі өткізіліп, оған 10 000 астам адам қатысты. Жәрмеңкеде мектеп формасы, кеңсе тауарлары мен оқу әдебиеті сатылды.

Айта кетейік, жәрмеңкеге қатысқан компаниялардың қатарында отандық өндірушілердің саны басым болған. Сонымен қатар 200-ден аса қала тұрғыны жас жеткіншектерді мектепке орналастыру, тиісті құжаттарды даярлау мен қалпына келтіру бойынша Білім басқармасы мен «Құқық» қоғамдық қорының өкілдерінен қажетті консультациялық көмек алды.

Барлық мектептерде «Бірінші сыныпқа бірінші рет» «Отбасыдан отбасыға жәрдем: баланы мектепке жинайық» және «Балаларға бірге көмектесейік» атты іс-шаралар ұйымдастырылды.

astana.gov.kz/kk/modules/material/11328

Тәуелсіздік сарайында Қазақстан мен Ресейдің ХІІІ аймақаралық ынтымақтастығы форумының жалпы отырысы өтті. Форум барысында Астана әкімі Әсет Исекешев елорданы дамыту жөнінде баяндама жасады.

— Мемлекет басшысы қаланы және оның инфрақұрылымын дамытуға ғана емес, жасыл белдеуге де баса назар аударады. Қала маңына 13 млн астам ағаш отырғызылды, жасыл белдеу аумағы 130 есеге ұлңайып, 86 мың га құрады. Астана өзінің бірегей келбетімен танымал, оны жасауға әлемнің жетекші сәулетшілері қатысқан. Қалада тұрғын үй құрылысы да дамып келеді. 18 жылда 20 млн шаршы м тұрғын үй салынды, биыл 2 млн шаршы метр баспана тапсырылады,- деді Әсет Исекешев.

Ресей аймақтарымен ынтымақтастық жөнінде айта келе, елорда басшысы қаланың тиімді географиялық ортада орналасқанын, ал жаңа теміржол және автомобиль жолдары Астананы Қазақстанның өңірлерімен ғана емес, Ресейдің шекаралас аймақтарымен де байланыстыратынын атап өтті, бұл физикалық және экономикалық қарым-қатынастарды қысқартуға мүмкіндік береді.

Оның айтуыша, Астана Ресей аймақтары үшін сенімді серіктес болып табылады, бүгінде екі ел арасындағы тауар айналымының 16% Астанаға тиесілі.

— Ең алдымен Орал және Сібір аймақтарымен сауда көлемін айтарлықтай арттыру көзделген, азық-түлік тауарларын жеткізу, соның ішінде Орталық азиядан көкөністер әкелінеді. Жалпы алғанда, соңғы екі жылда Астанада төрт ірі көлік-логистикалық орталық салынды, сондай-ақ, жаңа әуежай терминалының құрылысы жүргізіліп жатыр, бұл өткізу қабілеттілігін 6,5 млн жолаушыға дейін көбейтуге жол береді, ал жаңа теміржол вокзалының өткізу қабілеттілігі жылына 12 млн жолаушыны құрайды. Туризм үшін аталған инфрақұрылымның маңызы зор. ЭКСПО қарсаңында Астананы Ресейдің ірі қалаларымен байланыстыру қажет деп санаймын, сондықтан біз аймақтардың губернаторларымен бірге бәрін зерделеп, маршруттарды қолдау тетіктерін анықтаймыз,- деді Әсет Исекешев.

Қазіргі кезде ресейлік бизнесмендер өнеркәсіп, ШОБ салаларында жұмыс істейді. Жалпы Астанада 800 ресейлік компания қызмет етеді, бірқатар маңызды бірлескен жобалар жүзеге асырылды. Алдағы уақытта қала үшін маңызды басымдықтардың бірі қаржылық хабты дамыту болады.

Ғылым мен инновация саласында ынтымақтастықты белсендіру де маңызды. Бүгінде интеллектуалды инфрақұрылым құруға баса назар аударылады, ақылды қала технологиялары пайдаланылады.

Сөз соңында Әсет Исекешев ЭКСПО-2017 көрмесінің өтетінін айтып, ресейлік тарапты шараға белсенді қатысуға шақырды.

Қазақстан мен Ресей мемлекеттік органдарының, квазимемлекеттік сектор мен іскерлік ортаның 1300-ден астам өкілі қатысқан форум барысында инвестиция және сауда-экономика саласындағы екіжақты ынтымақтастық аясын кеңейту жолдары қарастырылды.

Қазақстан Президенті өз сөзінде Ресей Федерациясы еліміздің стратегиялық одақтасы және маңызды сауда-экономикалық серіктесі болып саналатынын атап өтті.

– Біз кең ауқымды бағыттар бойынша өзара тиімді іскерлік ынтымақтастықты жүзеге асырып келеміз. Оған осы өңіраралық форум да септігін тигізетін болады. Биылғы бірінші жартыжылдықта өзара сауда-саттықтың көлемі 6 миллиард долларға жуықтады. Сонымен қатар, дағдарысқа дейінгі кезеңмен салыстырғанда бұл көрсеткіштің 30%-ке төмендегені байқалады. Көп жағдайда оның қарқыны бәсеңдеуі сыртқы жаһандық ахуалдарға байланысты болып отыр, – деді Нұрсұлтан Назарбаев.

Осы орайда, Мемлекет басшысы екіжақты экономикалық ынтымақтастықты дамытуға серпін беру қажеттігін айтты.

– Бізде Ресеймен бірлескен 6 мыңнан астам кәсіпорын жұмыс жүргізуде. Мұнай химиясы, тау-кен металлургиясы кешені сияқты көптеген салада екіжақты инвестициялық жобалар іске асырылуда. Қазіргі уақытта бізде құны 20 миллиард доллар болатын 60-тан астам жоба бар. Олардың іске асырылуына қолдау көрсетілетін болады, – деді Қазақстан Президенті.

Бұдан бөлек, Нұрсұлтан Назарбаев өзара іс-қимыл аясын кеңейту үшін айтарлықтай әлеуеттің бар екеніне назар аударды.

– Біз Еуразиялық экономикалық одақ аясында жұмыс жүргізіп отырмыз. Еркін сауда жөнінде Вьетнаммен келісімге қол қойылып, осындай келіссөздер Қытаймен, Оңтүстік Кореямен және Сингапурмен жүргізіліп жатыр. ЕурАзЭО-мен ынтымақтасуға Үндістан, Мысыр, Иран, Оңтүстік Шығыс Азия елдері қауымдастығының мүшелері және басқа да елдер ниет білдіруде. Біз мақсатты түрде барлық өндірушілер мен инвесторлар үшін ортақ айқын ережелер қалыптастырудамыз. Қазақстанның экономикасына қаражат құя отырып, Ресей бизнесі мұнда өздерін «үйіндегідей» сезінетін болады. Еуропа мен Азия арасындағы қуатты көлік-логистика инфрақұрылымын қалыптастыру мәселесінде елдеріміздің ортақ мүддесі тоғысып жатыр, – деді Мемлекет басшысы.

Сондай-ақ, Қазақстан Президенті республикадағы инвестициялық ахуалдың жақсарып, экономиканың әртараптандырылуына күш-жігер жұмылдырылып жатқанына назар аударды.

Нұрсұлтан Назарбаев экономиканы жандандыру саласындағы, соның ішінде салық режімін ырықтандыру, ауқымды жекешелендіру ісінің келесі кезеңін жүзеге асыру және Астана мен Алматыда инновациялық екі кластер құру бағытында мемлекет қабылдап отырған шаралар туралы айтып өтті.

Сонымен бірге, Мемлекет басшысы алдағы уақытта «Астана» халықаралық қаржы орталығы ашылып, «ЭКСПО-2017: Болашақтың энергиясы» халықаралық мамандандырылған көрмесі өтетінін еске салды.

Соңында Қазақстан Президенті талқыланып жатқан бастамалардың тиімді іске асырылатынына сенім білдіріп, қатысушыларға табыс тіледі.

Астана әкімі Әсет Исекешев пен Татарстан президенті Рустам Минниханов өзара ынтымақтастық және мәдени-гуманитарлық, іскерлік және т.б. салаларда тәжірибе алмасу мәселелерін талқылады.

«Татарстан Республикасымен тарихи тамырымыз ортақ, бауырластық, сыйластық қарым-қатынас орнаған. Бүгінде осы дәстүрімізді табысты жалғастырып келеміз. Татарстан Астана мен Қазақстанның Ресей Федерациясындағы басты экономикалық серіктестерінің бірі болып табылады», — деді Әсет Исекешев.

Татарстан Президенті Қазақстанның астанасына қуана келетінін, сондай-ақ «ЭКСПО-2017» халықаралық мамандандырылған көрмесінің инфрақұрылымының құрылысының қарқынын ерекше атап өтті.

«Астана алдағы дүниежүзілік көрмеге шындап дайындалып жатыр, бұған көзім жетті. Мұнда озық технологиялар пайдаланылып жатыр. Астанада өтетін ЭКСПО-2017 көрмесі үздік көрмелердің бірі болатынына сенімдімін», — деді Рустам Минниханов.

Оның айтуынша, Татарстан салынып жатқан көрме кешендеріне қузығушылық танытуда. 2019 жылы Қазан қаласы кәсіпқой шеберліктен «World Skills Competition» әлем чемпионатына қатысады және оны өткізу үшін көрме кешенін салу керек. Рустам Минниханов осы салада тәжірибе алмасудың пайдалы екендігін атап өтті.

Тараптар 2017 жылы Астанада Татарстан күндерін өткізу мүмкіндігін талқылады. Қос республиканың астаналары бауырлас қалалар болып табылады.

Кездесу соңында Рустам Минниханов Қазақстан басшысына елімізде тұрып жатқан татарларға қолдау көрсеткені және мәдениетті сақтап, дамытуға жағдай жасағаны үшін алғыс айтты.

Астана мен РФ Челябі облысы аймақтар арасындағы көлік-логистикалық байланыс әлеуетін кеңейтуге ниетті. Бүгін Әсет Исекешев облыс губернаторы Борис Дубровскиймен кездесті. Бұл аймақ басшысының биыл Қазақстанның елордасына жасаған екінші сапары.Бұл жолғы сапары Астана мен Челябі облысының арасында жасалған ынтымақтастық жөніндегі бірінші келісімге 15 жылдығымен тұспа-тұс келіп отыр.

«Челябі облысы бізге жақын аймақ. Бүгінде ынтымақтастығымыз дамудың жаңа деңгейіне шықты деп сеніммен айта аламыз. Алдағы уақытта бірлескен жұмыстардың әлеуеті мен көкжиегін айтарлықтай кеңейтетін бірқатар жобалар жүзеге асырылады», — деді Әсет Исекешев кездесу барысында.

Кездесу барысында Астана – Челябі тікелей әуе рейсінің ашылуы талқыланды, ол «ЭКСПО-2017» көрмесі кезінде де, одан кейін де сұранысқа ие болмақ, аймақтар арасындағы іскерлік және гуманитарлық байланыстарды кеңейтуді қосымша ынталандырады. Борис Дубровскийдің атап өтуінше, Челябі облысы «ЭКСПО-2017» көрмесіне міндетті түрде қолдау көрсетеді.

Кездесу барысында Дубровский жас астанамыздың дамуына үлес қосқандығын жеткізді.

«Металлург болғанда, осы қаланы дамытуға қатысқам. Менің көз алдымда өзгеріп, әдемі заманауи қалаға айналды. Келген сайын сүйсіне қараймыз», — дейді губернатор.

Оның айтуынша, Челябі облысы екіжақты қарым-қатынастың одан әрі дамуына ықпал етуге ниетті.