Әсет Исекешев жаңа автобус бағдарларын іске қосу және аялдама кешендерін ашу бойынша жедел шаралар қабылдауды тапсырды. Оның айтуынша, елордада салынған жолдарды (800 км артық) ескерсек, 250-ге жуық аялдама орнату керек, оларды жобалау кезінде Астананың климаттық жағдайларын ескеру қажет. Сонымен қатар, қала басшысы жаңа аялдамалардың жайлы болуы тиіс екендігін атап өтті. Негізінен, бұл кешендер мемлекеттік-жеке меншік әріптестік есебінен салынатын болады, ал жоба 2017 жылдың бірінші жартысында жүзеге асырылмақ.

Айта кетейік, қаладағы жаңа аялдама павильондары мен автобус маршруттары көше-жол желісінің дамуына қарай пайда болады. 2016 жылдың соңына дейін Астанада 45 жаңа шыны және перфорацияланған аялдама абаттандырылады. Мұнымен қоса, жабық типті жаңа аялдамалар жобалануда. Олар жолаушылар ағыны тығыз жерлерде орнатылмақ. Сондай-ақ, көлемді жабық сауда және техникалық орынжайлардан, ашық алаңнан тұратын автостанциялар жасалады. Автостанция аумағында тез тамақтану пункті, қоғамдық дәретханалар, төлемдер қабылдау пункті, лайт-бокстар және т.б. болады.

Сонымен қатар, Әсет Исекешев автобус парктерін жаңарту, жолаушылар тасымалы қызметінің сапасын арттыру, автобустардың қозғалыс интервалын азайту және ескі машиналарды қолданыстан шығару мәселелеріне назар аударды. Астана әкімінің атап өтуінше, елорда халқының саны ұдайы өсіп отырады, сәйкесінше қоғамдық көлікке түсетін жүктеме артады. Қазіргі кезде күн сайын 700 аса қоғамдық көлік жолға шығады, олар 875 мың адамға қызмет көрсетеді.

Мұнымен қоса, 2017 жылы Астананың автобус парктері IVECO маркалы 210 заманауи жайлы автобуспен толықпақ. Жаңа жылжымалы құрамды сатып алу Еуропа қайта құру және даму банкінің инвестициялық қолдауының арқасында мүмкін болып отыр. Жаңа автобустар ақпараттандыру, ауа баптау, жылыту, бейнебақылау жүйелерімен, сондай-ақ, мүмкіндігі шектеулі жандарға және балалар арбасымен жүрген ата-аналар үшін арнайы пандустармен жабдықталады.

Анықтама: Жылжымалы құрамды толықтырудың нәтижесінде автобус маршруттарының қозғалыс сызбасы өзгереді. Жолаушылар олардың қозғалыс кестесіменASTRA Bus қосымшасынан және 2010 жылдың соңына дейін орнатылатын 110 ақпараттық таблодан таныса алады. Қазіргі кезде бұл жабдықтар тестілік режимді жұмыс істеп тұр. Жоспар бойынша 2017 жылы аялдамаларда тағы да 72 ақпараттық табло орнатылатын болады.

Еске салайық, 2015 жылы қарашада алғашқы 358 автобус сатып алынды, қыста бұл көліктердің сапалы әрі сенімді екендігіне көз жеткіздік.

Әсет Исекешев автобус маршруттарын ұйымдастыруға да баса назар аударды, сондай-ақ, қоғамдық көліктердің жұмысына қатысты азаматтардан келіп түскен сынға байланысты дереу әрекет етуге шақырды.

Айта кетейік, үстіміздегі жылы Көкарал және Бәйшешек көшелері тұрғындарының өтініштері бойынша №73 маршруттың қозғалысына жартылай өзгерістер енгізілді.

Осылайша, Көкарал көшесінде 3 аялдама пункті ұйымдастырылды, ендіаталған бағдардағы автобустар бастапқы пункттен Төлебаев көшесімен «Көкжелек к-сі» аялдамасына дейін өзгеріссіз, одан әрі Төлебаев көшесімен Көкарал, Бәйшешек, Шалкөде көшелерімен жүреді, соңғы аялдама «Промышленный т/а». кері бағытта өзгеріссіз, қазіргі сызба бойынша Шарбақты көшесі арқылы.

Үстіміздегі жылдың 28 қарашасынан бастап «Өндіріс» тұрғын алабының тұрғындарынан өтініш көп түскендіктен, №24 маршрут № 39 разъезді мен «Мұнайшылар» т/а дейін ұзартылды, және жолаушыларға ыңғайлы болуы үшін осы бағдар бойынша сыйымдылығы 110 адамды құрайтын Man маркалы автобустар шығарылды.

«Көктал-2» тұрғын алабында Наурыз көшесінде жол жөндеу жұмыстарын жүргізуге байланысты №4 және №34 маршруттардың қозғалыс сызбасы өзгертілді.

28 қарашадан бастап аталған маршруттардың қозғалысы қалпына келтірілді(жол жөндеу жұмыстарына байланысты аялдамаға дейін 1 км жаяу жүру қажет болды). Осыған байланысты қаладан Қосшы ауылы бағытында жолаушылар ағынының артуына байланысты қала маңына қатынатын № 303 маршрутына қосымша автобустар жіберілді, соның арқасында қарбалас сәттерде қозғалыс интервалы 5 минутқа дейін қысқарды.

Қала маңына қатынайтын №306 автобустың да интервалы қысқартылды, автобустар Талапкерден қарбалас сәттерде 15 минуттық аралықпен жүретін болды (бұған дейін интервал қарбалас сәттерде 25 мин болған).

Қоянды ауылында№ 307 маршрутта автобустар саны ұлғайтылды, ендіқозғалыс интервалы қарбалас сәттерде 8 минутты құрайды(бұған дейін қарбалас сәттерде 10 мин болған).

30 қарашадан бастап Қабанбай батыр ауылына дейін жүретін қала маңына қатынайтын №308 автобус енді Қызылжарға кіреді (бұған дейін бұл маршрут тасжолда тоқтайтын, бұл қызылжар тұрғындарына ыңғайсыздықтар келтіретін);

«Көктал-1» тұрғын алабында «Ансар қоғамы» ауданының тұрғындары автобустың кіруіне қатысты көп рет өтініш жолдаған. Қазіргі кезде аялдама пункті ұйымдастырылып, көше түзетілді. Осылайша, қоғамдық көліктің қозғалысын ұйымдастыру мүмкіндігі туындады.

30 қарашада №120 маршруттағы автобус көрсетілген аялдамаға дейін ұзартылады (қазір ең жақын аялдамаға дейінгі қашықтық орта есеппен 1,1 км құрайды, ал ұзартқаннан кейін орта есеппен 550 м болады).

Елордада 5 құзырет орталығы — алдынғы қатарлы әлемдік компаниялардың қатысуымен қалалық және аграрлық технологиялар, медициналық технологиялар, энергетика және fintech орталықтары құрылады. Осы орталықтардың айналасына стартап жобаларға қолдау көрсетіледі. Осы мақсатта Астананың жеке бағдарламасы құрылды. Аталған бағыттарда жұмыс істейтін үздік инновациялық компанияларға жыл соңына дейін 30 млн теңге бөлінеді. Бұл туралы бүгін Әсет Исекешев Астанада ХІ Инновациялық форумның ашылуында мәлім етті.

«Бүгінде әлем экономикасының дамуы жаһандық қалаларға байланысты, сол себепті біз Астананы Global Smart City-ге айналдырмақпыз. Жаһандық қалалар дамуының әлемдік үдерістеріне бейімделген қаланы дамытудың жаңа стратегиясы іске асырылуда. Біз қаланың орнықты экономикасын анықтайтын 10 секторды белгіледік. Соның ішінде девелопмент, туризм, қаржылық орталық, заманауи өндіріс, ақылды қала үшін шешімдер, медицина, логистика және т.б. бар», — деді Астана әкімі.

«Smart Astana» бағдарламасын іске асыру барысында қала басшылығы тұрғындардың қажеттіліктерін назарға алады — бұл білім, денсаулық сақтау, қоғамдық көлік және т.б. салалардағы ақылды технологиялар. Бұл технологиялар адамдарды жайлы өмір сүру жағдайларымен қамтамасыз етеді («ақылды» бағдаршамдар, көлік ағынын басқару, дәрігерге жазылу, электрондық денсаулық картасы, балабақшаға, мектепке кезек, тұрғынның бірыңғай картасы, экологияны жақсарту, нөсер канализациясы).

«Өткен аптада біз «Start Up Session» өткіздік, онда Назарбаев Университетінің қала міндеттерін шешуге бағытталған үздік жобалары таныстырылды. Біз мұндай кездесулерді тұрақты түрде өткізіп, ең жақсыларын таңдап, қалада енгізетін боламыз», — деді Астана әкімі.

ҚР Тұңғыш Президенті күні қарсаңында Астанада 10-сынып оқушыларының арасында «Елордалық білім беру мекемелерінің көшбасшы оқушысы» V қалалық зияткерлік байқауының финалы өтті. Ол көшбасшылық қабілеттері мен ораторлық шеберліктері бар, қоғамдық өмірге белсенді араласатын 12 оқушының басын қосты.

Байқау алғаш рет 5 жыл бұрын өткізілген, ол кезде қазақстандық мерекелер күнтізбесіне Тұңғыш Президент күні енгізілді. Сол жарыстың тақырыбы ұлт көшбасшысының жолы деп белгіленген болатын. Зияткерлік байқаудың алғашқы қатысушыларын Нұрсұлтан Назарбаевтың өзі таңғы асқа шақырған еді.

Биылғы жылғы байқаудың тақырыбы тарихшы, публицист Әлихан Бөкейхановтың 150 жылдығына арналған.

«Астана дарыны» өңірлік ғылыми-тәжірибелік орталығы ұйымдастырған байқаудың мақсаты — жастардың білімге деген қызығушылығын ояту қазақстандық патриотизмге баулу.

Үш финалдық турдың қорытындысы бойынша («Бәйге», негізгі мектеп пәндері бойынша жан-жақты білім деңгейін анықтайтын сұрақтар; «Алаш арысы — Әлихан Бөкейхан» викторинасы; шешендік өнер) бірінші орын №64 мектеп-лицейдің оқушысы Алан Несіпбек иеленді, ал гран-при №8 мектептің оқушысы Дидар Сейітханға бұйырды.

Астана қаласы бойынша Мемлекеттік кіріс департаментінің мәліметтері бойынша, 2016 жылдың қарашасындағы жағдай бойынша 38 млрд 517 млн теңге соманың 8 224 нысаны заңдастырылған.

Азаматтардан жалпы сомасы 111 млрд теңге болатын 9 023 өтініш түсті. Соның ішінде 69 млрд 550 млн теңге соманың 11 016 тұрғын үй нысаны, 42 млрд 288 млн теңге соманың 11 725 тұрғын үй емес нысаны, 22 млрд 872 млн теңгенің 1 132 коммерциялық нысаны, 457 млрд 949 млн теңге соманың заңды тұлғалардың жарғылық капиталына қатысуының 5 үлесі бар.

Сонымен бірге, Астана қ. Мемлекеттік кіріс органдарына 1 млрд 054 млн теңгенің сомасына 16 нысан бойынша 17 арнайы декларация тапсырылды. Сондай-ақ, ҚР аумағынан тыс жердегі заңды тұлғалардың жарғылық капиталына қатысудың 6 млн 250 мың теңге соманың 3 үлесі заңдастырылды. Ақшаны заңдастыруға келсек, аталған кезеңде 584 млрд теңгенің 687 арнайы декларациясы тапсырылған, соның ішінде есепшотқа салмастан, 944 млн 230 мың теңге заңдастырылды, одан 94 млн 423 мың теңге көлемінде 10% алым жиналды. Сондай-ақ, 10 млрд 807 млн теңге соманың құнды қағаздары заңдастырылды.

Еске салсақ, елімізді мүлікті заңдастыру 2014 жылдың 1 қырқүйегінде басталып, 2016 жылдың 31 желтоқсанына дейін жалғасады.

ЭКСПО-2017 көрмесіне дайындық шеңберінде қоғамдық тамақтану саласында ағылшын тілін білу ерекше маңызға ие. Бизнес-қоғамдастықтың өкілдері халықаралық көрмеге өз үлестерін қосуда бастама көтерді.

«Астана Конвеншн Бюро» ЖШС тренингтік орталықтардың бірімен бірлесіп мейрамханалар мен кофеханалардың қызметкерлерін ағылшын тіліне тегін оқыту курстарын өткізді. Нәтижесінде қызмет көрсету саласының 56 қызметкері курстан өтті. Оқыту қызмет көрсету, қонақтарды қарсы алу, тапсырысты қабылдау, есеп айырысу, даулы мәселелерді шешу және т.б. жағдайларда қолдану үшін базалық грамматикалық және лексикалық конструкциялар бойынша жүргізілді.

Жоба әрбір нақты мейрамханадан бір даяшыдан оқытуға бағытталған. Бағдарламаның барысында мейрамханаларда болатын жағдайларға сәйкес ағылшынша сөйлемдердің негізгі құрылымдары талданады, арнайы сөз қоры мен диалогтар пысықталады, дейді ұйымдастырушылар.

Астана қ. ІІД Жергілікті полиция қызметінің қызметкерлері белгілі тұрағы жоқ тұлғалардың туыстық байланыстарын анықтауда. Қатты аязға байланысты учаскелік инспекторлар, жол-патрульдік қызмет полкінің инспекторлары қиын жағдайға тап болған, үй-күйсіздер табылуы мүмкін орындар — жылу құбырларын, жертөлелерді, иесіз қалған саяжайларды тексерді.

«Қаңғыбас» жедел-алдын алу шарасын өткізу кезеңінде қарашаның 18-інен 19-ына дейін Астана қ. Жергілікті полиция қызметі белгілі тұрағы жоқ 50-ден аса адамды полицияға жеткізген. Жеке тұлғалары анықталып, құқық бұзушылықтар мен қылмыстарға қатыстылығы тексерілген соң әрқайсысымен құқық бұзушылықтарды болдырмау бойынша әңгіме жүргізілді. Азаматтардың бір бөлігі Медициналық-әлеуметтік оңалту орталығына, қалғаны әлеуметтік, медициналық және заңгерлік көмек көрсету үшін және жұмыс тауып беру үшін Әлеуметтік бейімдеу орталығына жеткізілді. Елордаға жұмыс істеу үшін Теміртаудан және Қостанай облысынан келген екі азаматқа үйлеріне оралуда көмек көрсетілді.

Еліміздің облыстық достық үйлерінде Қазақстан халқы Ассамблеясының «Конституция -Қазақстан халқы бірлігінің кепілі» акциясы басталды. Ауқымды шараның шеңберінде Астанада еліміздің Ата заңын талқылау арқылы қазақстандық бірегейлікті насихаттауға арналған дөңгелек үстел отырысы өтті.

Дөңгелек үстел басындағы әңгімеге кәсіби және кәсіби емес медиаторлар, заңгерлер және елорданың этномәдени бірлестіктерінің өкілдері қатысты.

«Демократиялық қоғамның биік идеалдарына ұмтылу, ежелгі қазақ жерінде тұрып жатқан халықтар арасындағы өзара құрмет пен достық, мәдениеттердің өзара байланысуы осының бәрі Ата заңда көрініс тапқан», — деп атап көрсетті «Халықаралық құқық қорғау орталығы» ҚБ кәсіби медиаторы Фатима Ахмедова.

Елордада қолайсыз ауа райына байланысты негізінен төменгі буын оқушылары үшін мектептегі сабақтар өткізілмей жатыр. Бұл ретте оқушылар оқу бағдарламасынан қалып қоймайды, өтпей қалған тақырыптар резерв сағаттардың есебінен немесе қайталау сабақтарында меңгеріледі. Тиісінше, каникул уақыты да қысқартылмайды. Бұл туралы бүгін Астана қаласы Білім басқармасының жалпы орта білім беру бөлімінің басшысы Ботагөз Жүнісова мәлім етті.

Сабақтарды тоқтату ҚР Білім министрінің «Қолайсыз ауа райы метеожағдайларында орта білім беру ұйымдарында, сондай-ақ техникалық және кәсіптік білімнің білім беру бағдарламаларын іске асыратын білім беру ұйымдарында сабақтарды тоқтату қағидаларын бекіту туралы» бұйрығымен регламенттеледі. Оған сәйкес, әрбір мекемеде ішкі бұйрықтар шығарылады, және онда сабақтар тоқтатылған күндер, ол күндері сабақ өткізбеген мұғалімдер көрсетіледі.

Осы ретте әрбір мұғалім балалар өтпей қалған тақырыптарды интеграциялау есебінен күнтізбелік-тақырыптық жоспарлауға өзгертулер енгізеді.

«Сабақтардың тоқтатылуына байланысты өтпей қалған тақырыптарды мұғалім резерв сағаттар немесе қайталау мен жалпылау сабақтары есебінен осы тоқсанның ішінде балаларға түсіндіруге тиіс. Балалар каникул немесе қосымша сағаттар есебінен оқымайды. Бұдан басқа, егер балалар сабақ тоқтатылған күні мектепке келсе, олар күндерін сонда өткізуге тиіс, балаларды ешкім үйлеріне қайтармайды. Бір немесе екі оқушы келсе, мұғалім оған сабақ өткізуге міндетті, және егер сол сабақта баға қойылса, ол баға түзету енгізілген күні қойылады», — дейді Ботагөз Жүнісова.

Пән мұғалімі де балалардың өз бетімен жасайтын жұмыстарының түрін өзі таңдай алады, бұл тапсырмалар сынып жетекшілеріне беріледі, соңғылары оқушылар мен ата-аналарға хабарлайды. Оқушылар тапсырмаларды үйде орындап, сабақтар басталған уақытта тексеруге әкелуге тиіс.

Назарбаев университетінің өкілдері «Стартап уик-энд» шарасы шеңберінде елорда басшылығына 12 смарт-жобаны таныстырды. Бұл — мүдделі тараптардың өзара қарым-қатынасының қолжетімді түрі, бір жағынан — жаңа идеяларды ұсынушылар, екінші жағынан — оларды іске асыру құралдарын беретін елорда әкімдігі.

24 жасар инженер-химик Ғалым Бәйтімбетов өзінің «Aqua Point» компаниясы әзірлеген технологияны ұсынды, бұл — сапалы ауыз суы бар аппараттар. Адамдар жиі баратын орындар — сауда үйлерінде, мектептерде, университеттерде осындай құрылғыларды орнату бірден бірнеше мәселені шешуге мүмкіндік береді.

«Біздің құрылғының ерекшелігі — Қазақстанда мұндай аппараттар жоқ, бірақ әлемде бұл технология бар және тәжірибе жүзінде халық үшін тиімділігі дәлелденген. Ол халыққа ауыз суды тегін береді және қоршаған ортаны пластик қалдықтармен ластау проблемасын шешеді және мектеп оқушыларын су тұтыну мәдениетіне баулиды. Бұл — қазақстандық өнім және ол шетелдік аналогтарынан арзанырақ», — дейді Ғалым Бәйтімбетов.

Бір рет пайдалануға арналған пластик құтылар бірнеше рет пайдаланғанда және белгілі бір температурада зиянды заттар бөлетінін атап көрсету керек. Жас инженердің айтуынша, оның компаниясы ойлап тапқан аппараттың өзінен ішуге ыңғайлы суағары бар, осының арқасында суды ыдыссыз тұтынуға мүмкіндік береді, ал аппараттың басқа түрі үшін арнайы стакан қарастырылған.

Балалардың дамуына әсер ететін ойындар, қауіпсіз жаяу жүргіншілер өткелі, амбулаториялық оңалту орталығы, білегі жоқ адамдарға арналған механикалық протез, ғимаратқа кілтсіз кіру, жас ғалымдардың әр түрлі тағы алты идеясы мен шешімі қала басшылығының қызығушылығын тудырды. Қала әкімі Әсет Исекешев стартапшыларға ойларын іске асыру үшін «Даму» желісі бойынша гранттарына қатысуды ұсынды.

«Бізде осы жобаларға қолдау көрсетуге болатын бірнеше құрал бар. Бұл жұмысты Назарбаев университетімен ынтымақтастықта қолға алдық, ЕҰУ-мен де жұмыс істемек ойымыз бар. Идеялары бар азаматтарды шақырамыз, «Астана Innovations» компаниясына хабарлассын, әкімнің сайтына, Кәсіпкерлік және өнеркәсіп басқармасына жазсын. Смарт-бастамалар жобалары әрқашан да өзекті, бірақ жақсы бастамалар бізге тікелей түскен кезде, және де біз ЭКСПО-ға дайындық жұмыстарын жүргізіп жатқандықтан, біз оларды көрменің өзінде ұсынуға және одан кейін ынтымақтастық орнатуға әзірміз», — деп қорытындылады Астана қаласы әкімінің орынбасары Малика Бектұрова.

Елорданың Жұмыспен қамту, еңбек және әлеуметтік қорғау басқармасы Астана қ. Дін істері жөніндегі басқармасымен бірлесіп мешітке келетін қауым арасындағы жұмыссыз азаматтарды жұмыспен қамтуда белсенді жұмыс жүргізуде.

Әрбір бейсенбі және жұма күндері сағат 12:00-ден 15:00-ге дейін елорданың үш мешітінде Жұмыспен қамту орталығының өкілдері мәліметтер базасындағы бос жұмыс орындарын ұсынады, «Жұмыспен қамту жол картасы 2020» бағдарламасына қатысу мәселелері бойынша кеңес береді және жұмыспен қамту саласындағы мемлекеттік қолдаудың басқа шаралары туралы ақпараттандырады.

Атап өтерлігі, Жұмыспен қамту, еңбек және әлеуметтік қорғау басқармасы жыл басынан бері 12 бос жұмыс орындары жәрмеңкесін өткізді, соның ішінде мүмкіндігі шектеулі адамдарды, әйелдерді және жастарды жұмысқа орналастыру бойынша жәрмеңкелер бар. Жұмыспен қамту орталығының мобильдік тобы халық көп жиналатын жерлерде мемлекеттік қолдау шаралары туралы ақпараттандыру шараларын өткізді.