Елордада қала аумағын абаттандыру мен жақсартуға ерекше назар аударылады. Күн сайын Астанада 1000 тоннадан астам қоқыс жиналады. Елорданы абаттандыру ережелеріне сәйкес ол көму үшін заңды полигонға шығарылады.

Арнайы құрылған жұмыс топтары Астанада тазалықтың сақталуын бақылайды. Бүгін қала аумағын тексеру аясында абаттандыру ережелерін бұзудың бірнеше фактісі анықталды.

Жұмыс тобының өкілдері «Құлагер» ЖШС құрылыс объектісі аумағында көмілген қалдықтарды тапты. «Есіл» аудандық табиғат қорғау полициясының инспекторы ҚР Әкімшілік құқық бұзушылық кодексіне сәйкес, «Құлагер» ЖШС басшылығын әкімшілік жауапкершілікке тартып, 100 АЕК мөлшерінде айыппұл салу туралы хаттама берді.

Экология департаменті ҚР экологиялық заңнамасының талаптарына сәйкес компания басшылығын әкімшілік жауапкершілікке тарту бойынша шараларды қабылдайды.

Сонымен қатар, абаттандыру ережелерін бұзғаны үшін «Арман құрылыс» ЖШС 30 АЕК мөлшерінде айыппұл төлеуі керек. Жұмыс тобының өкілдері жұмыстар жүргізіліп жатқан аумақтардың қоршалмағанын, бірақ белгілер қойылып, ленталар тартылғанын, құрылыс қалдықтары уақытылы шығарылмайтындықтан қоқыс орындары пайда болғанын анықтады.

Елорданы абаттандыру ережелерін сақтау бойынша рейдтер тұрақты түрде өткізіледі. 18 сәуір мен 18 мамыр аралығында өткен экологиялық айлық барысында заңсыз қоқыс орындарынан 10 мыңнан астам қоқыс шығарылды.

Еске салайық, өткен аппарат отырысында қала әкімі қалалық қызметтерге екі аптаның ішінде құрылыс және тұрмыстық қоқыс тастау орындарын тазалап, елорданы абаттандыру мен санитарлық нормаларды бұзуды жоюды тапсырған болатын.

astana.gov.kz/kk/modules/material/10678

3 маусымда Бейбітшілік және келісім сарайында сағат 15:00 «Мерейлі отбасы» ұлттық конкурсының қалалық кезеңінің жеңімпаздарын марапаттау салтанаты өтеді. «Мерейлі отбасы» ұлттық конкурсы осымен үшінші жыл қатарынан өткізіліп отыр.

Конкурсқа қатысушылар үш кезеңнен өтеді – аудандық, облыстық және республикалық.

«Мерейлі отбасы» ұлттық конкурсын өткізу Ережелеріне сәйкес, үстіміздегі жылдың сәуір айынан бастап Астана қаласының тұрғындарынан құжаттар қабылдана бастады. Аталған кезеңде қала әкімдігіне елордалық отбасылардан 94 өтініш келіп түсті. Кандидаттардың ішінде әр түрлі тарихы бар және отбасылық бақытқа қол жеткізудің ерекше жолдарын білетін әулеттер бар.

Конкурс қорытындысы бойынша үздік отбасыларды марапаттау салтанатында қазақстандық эстрада жұлдыздары өнер көрсетеді.

astana.gov.kz/kk/modules/material/10677

Медициналық туризмді дамыту аясында Астана мен Сеул дәрігерлері денсаулық сақтау саласындағы өзара түсіністік және ынтымақтастық орнату туралы меморандум жасасты. Кореялық дәрігерлер елордалық медицина қызметкерлеріне мемдициналық мекемелерді тиімді басқару әдістерін үйретеді. Сонымен қатар, биыл елордалық дәрігерлер Сеулдегі Корея денсаулық сақтау индустриясын дамыту институтында тағылымдамадан өтеді.

Өзара іс-әрекеттің бірінші кезеңінде корейлік тарап Астананың денсаулық сақтау саласындағы ағымдағы жағдайды зерттеп, талдау жасайды. Атап айтқанда, менеджмент, медициналық және ақпараттық технологиялар, ауруханалардың, емханалардың және перинаталдық орталықтардың жабдықталуы қаралады.

Кореялық менеджерлер мен докторлардан жұмыс тобы құрылады, олар елордалық медициналық ұйымдардың бас дәрігерлерін оқытатын болады.

Астаналық дәрігерлермен бірлесіп жұмыс істей және пациенттерді емдеу үшін №1 қалалық аурухана базасында кореялық медициналық орталық құру жоспарланған. Сонымен қатар кореялық дәрігерлер қазақстандық әріптестеріне ауыр аурулардың салдарымен күреспеу үшін профилактикалық медицинаны дамытуды ұсынды. Кореялық сарапшылардың айтуынша, денсаулық сақтауды дамыту үшін Астананың әлеуеті зор, медициналық ұйымдар жоғары деңгейде жабдықталған, тек кадрлық саясатты және менеджментті ғана жақсарту керек.

astana.gov.kz/kk/modules/material/10662

Бүгін Астанада Халықаралық балаларды қорғау күні аталып өтуде.

«Жастар» сарайының алдындағы алаңда кішкентай елордалықтар үшін түрлі конкурстар мен мерекелік бағдарлама ұйымдастырылды. «Жастар» сарайындағы үйірмелер мен секциялардың тәрбиеленушілері сахнада өздерінің спорттық және музыкалық таланттарын паш етті. Сонымен қатар, қаланың басқа да мекемелерінен де балалар шақырылды.

Концертті ересектер де тамашалады. Елорда тұрғыны Дирия Аманбаева – зейнеткер, ол бүгінгі мерекеге немересімен бірге келген екен.

– Бүгін атаулы күн – немерем Ақмаржанның алғашқы Балаларды қорғау күні мерекесі. Ол бір жасқа толды, бұл ол үшін жаңа нәрсе, балалар көп, өте қуанышты. Менің жеті немерем бар, бәрі де талантты: бірі әнші, бірі биші. Балаларға қарап тұрып, болашақта немерем немен шұғылданады екен деп ойланып қалдым. Нақты айта алмаймын, бірақ меніңше, әнші болатын сияқты, — дейді Дирия Аманбаева.

Shami-NS білім беру және спорт орталығы шәкірттерінің өнері мереке қонақтарын тәнті етті. Олар каратэден өз машықтарын ортаға салды.

– Менің ұлым Никита 11 жаста. Ол 2015 жылдың тамыз айынан бастап жаттығады, осы уақыттың ішінде жақсы нәтижелерге қол жеткізді. Оның каратэге бар деп ешкім де мәжбүрлеген жоқ. Ол осы спорт түрін ұнатады, қазір көк белбеуі бар, қалалық жарыстарға қатысып, тәжірибе жинайды, – дейді қала тұрғыны Дмитрий Горбачев.

Мерекелік бағдарлама қанық болды, балалар концерт те тамашалады, интерактивті конкурстарға да қатысты.

– Бүгінгі концерттік бағдарламаға сарайдағы үйірмелерге келіп жүрген балалардан басқа, Астана қаласындағы вокалдық студиялардан, білім беру және спорт орталықтарынан, шығармаылық ұжымдардан да балалар атсалысуда. Қазіргі кезде «Жастар» сарайында 7 үйірме жұмыс істейді. Бүгін концерттік бағдарламадан басқа, көпшілікпен интерактив, асфальтқа сурет салудан конкурс өтеді, – деді «Жастар» сарайының директоры Сергей Солодовников.

Еске салайық, «Жастар» сарайы Балаларды қорғау күні қарсаңында балалар үйлерінің тәрбиеленушілері мен мүмкіндігі шектеулі жандарға арналған мерекелік шара ұйымдастырған болатын. 30 мамырда Есіл балалар үйінің тәрбиеленушілері және мүмкіндігі шектеулі 12 бала орталық парктегі аттракциондарға барды.

Бүгін қала бойынша концерттер мен ойын*сауық бағдарламалары ұйымдастырылып жатыр. Қаржы министрлігінің алдындағы алаңда кішкентай елордалықтар үшін қызықты ойындар, асфальтқа сурет салудан «Граффити» конкурсы мен флешмоб өткізілді.

astana.gov.kz/kk/modules/material/10661

Астанада көше баскетболынан ерлер мен әйелдер командаларының арасында әлем біріншілігі өтіп жатыр. Стритболдан «Астана Опера» театрының алдындағы ашық алаңдағы 3x3 форматындағы кездесулер 5 маусымға дейін жалғасады.

Халықаралық баскетбол федерациясының (FIBA) басқарушы директоры Алекс Санчестің атап өтуінше, Әлем біріншілігін өткізу үшін Қазақстанның таңдалуы кездейсоқ емес. Стритболды барша әлемде, соның ішінде біздің де елімізде дамыту көзделген. Оның айтуынша, арнайы турнир үшін доптың жаңа түрі жасалды, ол жабынымен және өлшемімен ерекшеленеді.

— 2015 жылы Қазақстан турнирді өткізу мәртебесіне ие болды. Бүгінде әлемнің түкпір-түкпірінен келген 200-ден астам ойыншыны көріп отырмыз. Балалар үшін арнайы ойын алаңдарын салдық, 8-10 жастағы балалар стритболға әуес болады, біз үшін осындай көше мәдениетінің ұйымдасқан және белгілі бір бағытта дамығаны, салауатты өмір салтын ұстану маңызды, — деді Қазақстанның стритбол лигасының вице-президенті Асхат Ағыбаев.

Елордада ерлер мен әйелдер құрамалары бас жүлдені сарапқа салуда. Жарыс төрт топта өткізіледі. Бүгін ерлер командасы Румыния құрамасымен алғашқы ойынын өткізеді. Ал әйелдер Нидерланды командасымен шеберлік байқасады.

Астанада өтіп жатқан әлемдік додаға Жаңа Зеландиядан өткен жылғы үздік ойыншы Тай Виньярд та келді.

— Осында қайтып келу мен үшін үлкен құрмет, айналадағының бәрі керемет, қала жақсы дамып келеді. Шын мәнінде, барлық командалар да мықты, бірақ Австрия, испан командаларын ерекше атап өтпекпін, олар күшті, бір топты бөліп айту қиын. Осында болғаныма қуаныштымын, меніңше, бұл тамаша бірлескен жұмыс болады, — деп спортшы өз ойымен бөлісті.

Чемпионатқа келушілер қызықты ойын-сауық бағдарламасын тамашалайды. Үлкен аумақта баскетболдан және стритворкауттан шеберлік сыныптары өткізіледі, алғаш рет фристайлерлер мен ұшатын баскетболшы-акробаттар өнер көрсетеді.

Айта кетейік, осы күндері жаппай көше турнирлері, соның ішінде Астана кубогы да ұйымдастырылады, оған 10 жастан асқандар қатыса алады.

astana.gov.kz/kk/modules/material/10660

Таңертеңнен бері қалалық парктерде балалардың сыңғырлаған күлкісі естіліп жатыр. Қала бойынша Балаларды қорғау күніне орайластырылған түрлі шаралар ұйымдастырылып жатыр. Мерекеге орай бүгін автобустарда 15 жасқа дейінгі балаларға жол жүру тегін. Мерекені атап өту үшін Студенттік және Астаналық парктерге жүздеген бала келді.



Студенттік паркте мереке таңғы жаттығудан басталды. Содан кейін кішкентай көрермендердің назарына мерекелік концерт ұсынылды. Түрлі көлемдегі батуттар, тәтті-дәмділер, аттракциондар балаларға жақсы көңіл күй сыйлады.



Мерекеге орай безендірілген бесік арбалар шеруі өткізілді. Парктен жедел жәрдем көлігі сияқты немесе ұлттық нақышта безендірілген арбаларды кездестіруге болады. Енді біреулері ертегідегі перінің қанатындай арбаға қанат бітірген. Алты айдан бір жасқа дейінгі балалар еңбектеп жарысты, одан үлкендеу балалардың арасында велосипедшілер чемпионаты ұйымдастырылды.



– Барлық кішкентай астаналықтарды, олардың ата-аналарын мерекемен құттықтаймын! Балаларға оқуда озат болуды, бақыт пен қуанышқа толы балалық шақ тілеймін! Ал біз, ересектер олардың бойында патриоттық сезімді тәрбиелеуге тырысамыз. Меніңше, бүгінгі шара отбасылық қарым-қатынасқа өз пайдасын әкелуі керек, – деді «Алматы» ауданы әкімінің орынбасары Қасымхан Сенғазыев.

Студенттік паркте балалар мерекесі қуыршақ театрының спектаклімен аяқталды.

Кішкентай елордалықтарға арналған мерекелік шара Астаналық паркте де ұйымдастырылды. Балалар мен ата-аналарды ҚР Мемлекеттік хатшысы Гүлшара Әбдіқалықова құттықтады. Паркте өнер көрмесі мен сурет байқауы өткізіліп, балаларға арналған шеберханалар, зияткерлік және спорттық ойындар ұйымдастырылды.

Саяси қуғын-сүргін құрбандарын еске алу күні қарсаңында «АЛЖИР» мұражайында тұтқындардың жеке заттары мен бірегей материалдарының көрмесі ашылды. Көрмеде ақтау туралы анықтамалар, тұтқындардың хаттары, олардың киімдері мен тұрмыстық заттары көпшілік назарына ұсынылған. Мұражай қызметкерлері үлкен зерттеу жұмысын жүргізіп, экспонаттарды Ақтөбе, Атырау, Екатеринбург және басқа да қалаларға іс сапарлары барысында жинаған.



– «АЛЖИР» мұражайының қызметінің негізгі бағыты – экспонаттар жинау, қызметкерлер Қазақстанның, таяу шетелдердің қалаларын аралайды. Сапар барысында қуғын-сүргінге ұшырағандардың, жер аударылғандардың ұрпақтарымен байланысты үзбеуге тырысамыз, ал олар өз кезегінде, бізге материалдар – туған-туыстарының құжаттарын, суреттерін, жеке заттарын береді. Жыл сайын Саяси қуғын-сүргін құрбандарын еске алу күніне орай мұражайда іс сапарлар барысында жиналған жаңа экспонаттардың негізінде көрмелер ұйымдастырылады. Көп жағдайда тұтқындардың ұрпақтарының өздері бізді интернет, сайт арқылы тауып, осында келіп жатады, – дейді «АЛЖИР» мұражайының жоғары санаттағы маманы Евгения Зеер.

Көрме залынан 30-шы жылдары атылып кеткен Мырзағұл Атаниязовтың, лагерь тұтқындарының бірі Ғайсина Ғайнижамалдың, Роза Цыпкинаның және т.б. фотосуреттері мен жеке заттарын көруге болады.



Келушілер инсталляцияларды тамашалап, өткен жылдарда орнаған атмосфераны сезінеді. Зал экспозициясы «Кісен» инсталляциясымен ашылады – бұл түрме камерасының имитациясы, одан кейінгі «АЛЖИР» диорамасында қыс және жылы кездердегі лагерьдегі өмір көрсетілген. Мұнда тігін фобрикасының, бесігі бар барактың фрагменттері мен көптеген тұтқындардан жауаптар алынған тергеушінің кабинеті жасалған.

Мұражай кешенінде терезелер жоқ. Жарық төбедегі атриумнан түседі.

«АЛЖИР» мұражайы 2007 жылы ашылды. Ол лагерь тұтқындары отырғызған алма бағының орнында орналасқан. Лагерьдің өзі, барактар, тігін фабрикасы және аурухана қазіргі Ақмол ауылының аумағында болған.

Лагерьде 18 мыңға жуық адам қамалған. Бүгінгі таңда бізге белгілі мәліметтер бойынша 7 мыңнан астамы өз мерзімдерін толық өтеген, олардың есімдері Еске алу қабырғасында жазылған. Кейбір мемлекеттердің елшіліктері түрлі ұлт өкілдерін есте сақтаудың құрметіне естелік плиталар орнатты. Лагерьде барша КСРО-дан 62 ұлт өкілдері жазасын өтеген.

Мұражайдың жанындағы кішкентай барактың көшірмесі келушілер мен туристердің үлкен қызығушылығын тудырады.

– Баракта «АЛЖИР» тұтқындарының балалаларын тартып алу» диорамасы жасалған, яғни әйелдерді қамауға алып, кішкентай балаларымен бірге лагерьге әкелген, ал үш жасқа толғанда оларды балалар үйіне берген. Әрине, бұл процедура аналар үшін өте ауыр болады. Өйткені, әуелде олар балалардың қайда жіберілетінін білмеген, хаттар, сұраулар жазып, оларды іздеп-табуға тырысқан, – дейді Евгения Зеер.

Сонымен қатар, мұражай аумағында «Қайғы қақпасы» монументі, шолу мұнарасы, «Күрес пен үміт» және «Ашыну мен дәрменсіздік» секілді екі мүсіндік композиция, сондай-ақ «Еске алу қабырғасы», ГУЛАГ картасы салынған «Жас» стелласы бар.

Ертең, 31 мамырда мұражайда саяси қуғын-сүргін құрбандарын еске алуға арналған салтанатты митинг өтеді, бір минут үнсіздік жарияланып, жазаланғандардың ұрпақтарының қатысуымен гүл шоқтары қойылады.

Материал Астана қаласы әкімдігінің ресми сайты astana.gov.kz деректері бойынша әзірленді.

DEMOSCOPE қоғамдық пікірге жедел-мониторинг жүргізу бюросы Қазақстан азаматтары арасында «ЭКСПО көрмесі-2017» тақырыбында сауалнама жүргізді.
Оған Астана, Алматы қалалары мен 14 облыс орталығынан 1760 адам қатысты. Сауалнамаға қатысқан қазақстандықтардың 73%-ы әйел және 27%-ы ер азаматтар.
Сауалнама әдісі – телефон арқылы жүргізілген сұхбат және онлайн-сауалнама.
Зерттеу 2016 жылы 6-18 мамыр аралығында жүргізілді.
Іріктеу ықтималдығы 95%, сондықтан статистикалық көрсеткіш қателігінің максималды мөлшері 0,5%-дан аспайды.

Ел өміріндегі айтулы оқиға ЭКСПО халықаралық көрме жайлы қазақстандықтардың пікірі бір жақты. Жалпы, халықтың көзқарасы дұрыс. Бұл түйін зерттеу нәтижесінде белгілі болды.
Сауалнамаға қатысқан азаматтардың 64%-ы көрмені өткізу мүмкіндігіне ие болған ел үшін
ЭКСПО-ң пайдалы тұсы – елімізде және әлемде ғылыми-техникалық прогресс дамиды, еліміздің халықаралық аренадағы беделі артады, үлкен кірістер, әрі инвестиция тартуға мүмкіндік туады және өзге елдермен тиімді байланыс орнатамыз дейді.

3-5 маусым аралығында «Қазақстан» спорт сарайының жанындағы Студенттік паркте алғаш рет «Гүлдене бер, менің Қазақстаным» атты гүлдер фестивалі өтеді. Мерекелік шара барысында гүлдердің 32 мыңнан астам түрі көпшілік назарына ұсынылады, оның ішінде шырайгүл, лобелия, алиссум, цинерария, дельфиниум және т.б. бар.

— Гүлдер фестивалінің мақсаты гүл өсіру дәстүрін жаңғырту, мәдени кеңістік мүмкіндіктерін кеңейту, елорда тұрғындары мен қонақтарын қаланың экологиялық дамуына тарту болып табылады. Фестивальді жыл сайын өткізіп, жаңа дәстүр қалыптастыруға ниеттіміз,- дейді «Астана-Зеленстрой» Басқарма төрағасы Әділхан Әбілдинов.

Бұл ретте ұйымдастырушылар көрермендер үшін қызықты бағдарлама әзірлемек. Шара барысында «Гүлден сабын жасау» тұжырымдамасына қатысуға болады, онда ересектер мен балалар өз қолымен гүлдің хош иісі бар сабындар мен балауыздар жасауды үйренеді. Бір жылдық гүлдер отырғызу бойынша шеберлік дәрістері өтеді, гүлдер базарынан жергілікті және отандық өндірушілердің өнімдерін сатып алуға болады, гүлдерден басқа түрлі ағаштар мен бұталар да сатылады. Сонымен қатар, парк аумағында «гүлдер» аспаздығынан дәм тату мүмкіндігі туады.

Фестиваль 3-5 маусым аралығында сағат 10:00 — 13:00 дейін өз қонақтарын күтеді.

astana.gov.kz/kk/modules/material/10628

Астанада 28 мамырдан бастап 15 қалалық маршруттың қозғлыс сызбасы уақытша өзгеретін болады. Астана қаласының Жолаушылар көлігі басқармасының хабарлауынша, маршруттардың өзгеруіне Қабанбай батыр даңғылы мен А. Бараев көшесінде Қорғалжын тасжолынан Иманбаева көшесіне дейін жол жабынын жөндеу жұмыстары себеп болып отыр. Төменде
қозғалыс сызбасы өзгертілген қалалық маршруттар көрсетілген:

№1, 20 маршруттар: Уәлиханов к-сі – Кравцов к-сі – Ташенов к-сі – Республика даңғылы, одан әрі бұрынғы қозғалыс сызбасы бойынша;




№3, 23, 25 маршруттар:
Тәуелсіздік даңғылы – Ташенов к-сі – Республика даңғылы, одан әрі бұрынғы қозғалыс сызбасы бойынша;






№18, 28 маршруттар: Тәуелсіздік даңғылы – Ташенов к-сі – Орынбор к-сі, одан әрі бұрынғы қозғалыс сызбасы бойынша;



№ 27 маршрут: Республика даңғылы – Кенесары к-сі – Тұран даңғылы – Қорғалжын тасжолы – Қабанбай батыр даңғылы, одан әрі бұрынғы қозғалыс сызбасы бойынша;



№ 32 маршрут: Абай даңғылы – Сарыарқа даңғылы – Тұран даңғылы, одан әрі бұрынғы қозғалыс сызбасы бойынша;

№ 44 маршрут: Тәуелсіздік даңғылы – Ташенов к-сі – Орынбор к-сі – Сарайшық к-сі – Қабанбай батыр даңғылы – Қорғалжын тасжолы, одан әрі бұрынғы қозғалыс сызбасы бойынша;


№52 маршрут: Республика даңғылы – Кенесары к-сі – Тұран даңғылы – Қорғалжын тасжолы – Қабанбай батыр даңғылы, одан әрі бұрынғы қозғалыс сызбасы бойынша;


№70 маршрут: Уәлиханов к-сі – Кравцов к-сі – Ташенов к-сі – Орынбор к-сі одан әрі бұрынғы қозғалыс сызбасы бойынша;


№100э бағдары: Республика даңғылы – Ташенов к-сі – Орынбор к-сі – Сарайшық к-сі – Қабанбай батыр даңғылы, одан әрі бұрынғы қозғалыс сызбасы бойынша;


№ 103э бағдары: Уәлиханов к-сі – Кенесары к-сі – Тұран даңғылы – Қорғалжын тасжолы, одан әрі бұрынғы қозғалыс сызбасы бойынша;


№127 маршрут: Уәлиханов к-сі – Кенесары к-сі – Тұран даңғылы – Қорғалжын тасжолы –Косманавтов к-сі, одан әрі бұрынғы қозғалыс сызбасы бойынша;


Айта кетейік, Астана қаласының көше-жол желісіндегі жөндеу жұмыстарының аяқталуына қарай қалалық
жолаушылар көлігінің қозғалысы қалпына келтіріледі.

astana.gov.kz/kk/modules/material/10637