Астанамыздың 20 жылдық мерейтойын мерекелеу аясында республика аймақтарының қатысуымен ауыл шаруашылығы жәрмеңкесін өткізу жоспарына сәйкес, осы жылдың 22-23 қыркүйегінде Астана қаласында Мұнайтпасов көшесі, 9 «Қазақстан» СК алаңында Ақтөбе және Түркістан облысы тауар өндірушілерінің ауылшаруашылық жәрмеңкесі өтеді, деп хабарлайды Астана қаласы әкімдігінің ресми сайты.

Жәрмеңкеге Ақтөбе облысының 12 ауданы мен Ақтөбе қаласынан 20-дан астам ауыл шаруашылығы тауар өндірушілері мен қайта өңдеумен айналысатын кәсіпорындары қатысады. Аталмыш облыстан бас қалаға келетін өнім көлемі 200 тоннадан астам.

Ал, Түркістан облысы ауыл шаруашылығы тауар өндірушілері жәрмеңкеге жалпы сомасы 201 млн теңгені құрайтын 496 тонна өнім шығарады.

Жәрмеңкеде Астана қаласының тұрғындарына келесі өнімдер ұсынылады: еттің барлық түрі, картоп және көкөністер, сүт өнімдері, өсімдік майы, жұмыртқа, балық, бал, шұжық өнімдері, ұн және ұн өнімдері, түрлі сусындар және басқа да өнімдер ұсынылатын болады.

Жәрмеңкедегі өнімдердің бағасы Астана қаласы базарларының бағасынан 15-20%-ға төмен болады.

22-23 қыркүйек күндері Елордада «Астана Бастау. Территория Бизнеса» атты кәсіпкерлердің ауқымды форумы өтеді, ол еліміздегі бизнес-қауымдастықты түбегейлі жетілдіруге бастау салады.

Форумды Астана қаласы әкімдігі, «Синергия» Бизнес мектебі және «Болашаққа бағдар: Рухани Жаңғыру» жобалық офисімен  бірлесіп өткізілуде. «Астана Бастау. Территория Бизнеса» тегін білім беру жобасы, оның мақсаты кәсіпкерлер мен бизнесмендер арасында жаңа бизнес-мәдениет қалыптастыру.

Форумның салтанатты ашылуына Астана әкімі Бақыт Сұлтанов  қатысады. Іс-шараның хэдлайнері болып «Бизнес в стиле фанк» бестселлерінің авторы, көрнекті экономист — Кьелл Нордстрем сөз сөйлейді.

Форум аясында бизнесті цифрлы болашаққа трансформациялау, инвестиция тарту идеялары және бизнесті ауқымдау, тиімді сату жүйесін құру сияқты тақырыптарды қамтитын болады. Сонымен қатар, инвесторлар форум аясында жаңа жобалармен танысуға, тәжірибе алмасуға және бірлесіп іскерлік бастамалар бастауға мүмкіндік алады. Үздік сарапшылар өз пікірімен бөлісіп, бизнес ашуға қатысты жаңа бағыттарды айтады.  

Семинарда спикерлер ретінде ҚР еңбек сіңірген спорт шебері, бокстан екі дүркін Әлем чемпионы Серік Сәпиев, Like холдингінің негізін қалаушы және иесі Аяз Шабутдинов, халықаралық дәрежедегі спорт шебері Марат Жыланбаев және ТМД-дағы №1 нетворкинг бойынша сарапшы Гил Петерсил т.б әлемдік сарапшылар сөз сөйлейді.

Форумға кел, өз бизнесіңді дамыту үшін жаңа мүмкіндіктерді аш!

Іс-шара 22-23 қыркүйек «Барыс-Арена» мұз сарайында өтеді.

Кәсіпкерлерге қатысу — тегін (онлайн-тіркеу кезінде БСН/ЖСН расталған жағдайда).

Толығырақ astanaforum.info

Бүгін Астана әкімі Бақыт Сұлтанов астанада көмірдің барысына ревизия жасады. Ол қатты отынды сататын негізгі нүктелерге барып, күн сайын түсетін көмір туралы есепті тыңдады және де халық арасында айқай-шуға жол бермес үшін нақты тапсырмалар берді.  

Жұбанов 35-тегі сауда алаңы әкімнің бірінші барған жері болды. Көмірді сатушылар мұнда күн сайын Шұбаркөлден 10 вагон көмір және 5 вагон Майкөбе маркалы көмір келіп түсетінін айтты. Сұраныс көбіне таңертеңнен түске дейін қыза түседі. Ал кешкісін көмір жеткілікті болса да сатып алушылар келмейді екен, оның ішінде шұбаркөлдік көмірге сұраныс жоғары.  

Көктал 28/1 (ет комбинаты) мекенжайындағылар әкімге мұнда күн сайын Шұбаркөлден 10 вагон көмір келетінін, 5 вагон Майкөбеден, 3 вагон Қаражырадан келетінін түсіндірді. Күніне 200 КамАЗ көмір сатылады. Көмір тиеу таңғы сағат 7-ден басталып, кешкі 17.00-ге дейін жалғасады. Бір көлікке шамамен 10 минут уақыт кетеді. Соның өзінде кейбір ірі жүк көлік жүргізушілері кезекті сақтай бермегендіктен шу шығып жатады екен.

— Егер бәрі өз кезегімен тұрса тез жылжиды. Бірақ жүргізушінің бірі сәл «алға кезексіз» шыққысы келгенінен кептеліс туындайды. Тіпті төбелеске дейін барады. Сағат 17.00 жүк тиеу аяқталады. Сол себепті кім үлгере алмай қалады, ертеңге қалады. Тағы бірі мысал, алыпсатарлар жақын маңдағы халыққа көмірді қайта сату үшін күн сайын осында тұрады, — деді жүк көлігінің иесі. 

Көмір сатушылар алушылардың айқай-шу шығармай тыныш тұрса, барлық клиенттерді өз уақытымен жіберетінін айтуда. Көмір барлығына жетеді, ол жағынан проблема жоқ, — дейді олар.

Айта кетейік, көмірдің жалпы қоры 19 қыркүйектегі жағдай бойынша 7951 тонна.

Бұдан бөлек, астанаға 7-18 қыркүйек аралығында 197 вагон немесе 13 50 тонна көмір келіп түсті. Оның:

— 76 вагоны немесе 5266 тонна Шұбаркөл көмірі (тоннасы 13500 – 14500 тг);

— 32 вагон немесе 1804 тонна Қаражыра көмірі (тоннасы 14 000 тг);

— 5 вагон немесе 346 тонна Богатырь көмірі (тоннасы 8500 – 9500 тг);

— 67 вагон немесе 4 649 тонн Майкөбе көмірі (тоннасы 12000 — 12500 тг). 

Бұрынырақ хабарлағанымыздай, Астана отын-энергетикалық кешені және коммуналдық шаруашылық басқармасыкөмір өндірушілермен бағаны өсіруге жол бермеу туралы меморандумға қол қойған болатын. Нарықтағы ахуалға күн сайын астана әкімдігі  мониторинг жүргізуде. Қатты отынды сататын орындар мен бағасы туралы ақпаратты тәулік бойы 109 номеріне хабарласып білуге болады.

2018 жылы 22-23 қыркүйек күніАстана қаласындағы«Жерұйық» саябағында Астана қаласының қоғамдық даму істері  басқармасының тапсырысымен «Step Up» атты Астананың 20 жылдығына  арналған жастар арасындағы байқауы өтеді, деп хабарлайды елорда әкімдігінің ресми сайты.

Шараны Астана қаласының қоғамдық даму істері  басқармасы мен Қазақстан студенттер альянсы ұйымдастырып отыр.

Конкурстың мақсаты - Қазақстанның дарынды, талантты жастарын қолдау және таныту, жастар саясаты арасында саламатты өмір салтын насихаттау, өнерлік шеберлігін арттыру. Қазақстанның Тәуелсіздік жылдарындағы жетістіктерінің негізінде жас буынның патриоттық санасын қалыптастыру және өнерінің жоғары форумы идеясын іс жүзінде дамыту, Қазақстанның мәдени құндылығын сақтау және арттыру, жастарды төзімділік рухта тәрбиелеп, басқа да елдердің мәдениетіне деген қызығушылығын арттыру.

Шараға Қазақстан Республикасының Парламенті мәжілісінің және Астана қаласы мәслихатының депутаттары, эстрада жұлдыздары, БАҚ өкілдері қатысады.

Қолдаушы: ҚР Астана қаласы бойынша саябақтар әкімшілігі.

Басталуы: 22қыркүйек 2018 жыл, сағат 10:00

Орны: Астана қаласы, «Жерұйық» саябағы (Б.Момышұлы көшесі) 

2019 жылы қалалық туризм бойынша 8-ші саммитті Қазақстан астанасында өткізуді жеңіп алғаны туралы Оңтүстік Кореяның астанасындағы ЮНВТО қалалық туризмі бойынша 7-ші жаһандық саммит барысында белгілі болды. Оған 57 елден мыңдаған қатысушылар келді.

Бұрын форум әлемдік көрсеткіші жоғары туризмі дамыған Стамбул, Москва, Барселона, Марракеш, Люксор, Куала-Лумпур, Сеул сынды ірі қалаларда өтетін.

Туризм саласында осындай ауқымды деңгейдегі шараны өткізу Тәуелсіз Қазақстанның тарихында бірінші рет болып тұр. Қала туризмі бойынша жаһандық саммит жылына бір рет (ЮНВТО) Бүкіләлемдік туристік ұйымының талаптарына сәйкес таңдалған қалада өтеді. ЮНВТО — бұл негізгі инициатор және әлем бойынша саммитті ұйымдастырушы. ЮНВТО 1975 жылдан бері туризмді дамыту саласындағы ең беделді ұйым. Ұйымның шығынын және бастамашы ретінде саммиттің барлық шығынын басқосуды өткізетін қаланың өзі көтереді.

Келесі жылы Астанада өтетін саммит біздің астананың туристік және МІСЕ-әлеуетін көрсетеді.

Анықтама:
MICE Meetings, Incentives, Conferences, Exhibitions) – ұйыммен байланысты іскерлік туризм индустриясы саласы және түрлі корпоративтік шараларды өткізу.

Аталмыш көрмені өткізудің тиімділігі шағын және орта бизнестің экономикалық көрсеткішін жақсарта түседі деп күтілуде.

Бүгінде қалада шағын және орта бизнеспен (ШОБ) 325 мың астаналық айналысады. 1 қаңтар 2018 жылы Астана халқының саны 1 млн адамды құрады, демек елорданың әрбір үшінші тұрғыны ШОБ-тың айналасында. Мысалы, соңғы мәлімет бойынша қалада 231 қонақ үй бар.

Бүкіләлемдік форумды өткізу – Астананы паш етудің, Орталық Азиядағы жаңа туризм орталығы мен қаланы дамытудағы жаңа бағытты, ірі халықаралық қауымдастық пен компаниялармен әріптестікті нығайтудың тағы бір мүмкіндігі.

Нәтижесінде қонақ үйлердің толуы, кәдесый өнімдеріне сұраныс, кафе мен ресторандарға келушілердің саны көбейеді деп күтілуде. Осылайша форумды өткізу халықаралық іскер және түрлі іс-шаралардың санын көбейтуге мүмкіндік береді, осы арқылы астанаға туристік ағын да көбейе түспек.

Бұдан басқа, жаһандық саммит Астанаға туризм саласындағы жетекші сарапшыларды тартуға, барлық сектордағы мемлекеттік және жекеменшік серіктестерді біріктіріп, қала туризмін дамытудың жаңа парадигмасында негізгі роль атқарады. Бұл жерде туризм әлеуметтік ұйымшылдық пен мәдениетті сақтаудың құралы болмақ және экономикалық қызметке де үлесін қосады.

Айта кетейік, астанада өткізілетін бұл шараны қабылдауда төмендегідей факторлар есепке алынды: қалалық туризмнің даму преспективасы, іске асырылған жобаларды сәтті өткізгені, шараларды өткізудегі тәжірибесі, тұрақты дамуы, экономика, әлеуметтік сала, экология мен астананың әкімшілік жүйесі електен өтті.

1-30 қыркүйекте Тәуелсіздік сарайында ҚР Өнер Академиясының «Астана – арман қала» атты қолданбалы және көркемсурет көрмесі, фотожурналист, жергілікті тарихшы Нұрмұхамат Имамовтың шығармашылығына арналған көрме, «Ақанаевтар әулеті» атты жеке көркем көрмесі, «Қасиетті жерлерге саяхат» Павлодар қаласының суретшілері көрмесі, «Ата заң – ел тірегі, Астана – ел жүрегі» ҚР Конституциясы күніне орай көрмесі, Ядролық сынақтарға қарсы халықаралық күніне арналған тематикалық көрмесі өтеді.

Сондай-ақ астаналық Жастар сарайында ең тәтті және пайдалы «Мир вкусного меда» көрмесіне барып үлгеріңіз. Жәрмеңке 17-сінен 23 қыркүйекке дейін созылады.
17 қыркүйекте стендтік атудан «Targetshootingclub» СК-де «TheInternationalYouthCup» және «GrandPrixofAstana» халықаралық турнирі өтеді, Ал «Алатау» спорт сарайында гандболдан әйелдер командасы арасында (1 тур супер лига) Қазақстан Республикасының чемпионаты өтеді.

18 қыркүйекте Назарбаев Спорт орталығы – Университетте «Жұлдызай» республикалық спартакиадасы өтеді. Хоккей жанкүйерлері «Барыс» аренада өтетін «Барыс» ХК – «Авангард» ХК командалары арасындағы 2018-2019 КХЛ маусымының чемпионатына келе алады.

19 қыркүйекте «Дәулет» СК Ұлттық ұлан Бас қолбасшының кубогы үшін қоян қолтық күрестен халықаралық турнир өтеді.

21-23 қыркүйекте Қарттар үйінде мүгедектер күніне орай шахматтан, шашкіден, тоғызқұмалақтан «Тіке-тірес» фестивалі өтеді.

21 қыркүйекте «Астана Арена» стадионында «Астана М» ФК – «Жетісу М» ФК Екінші лигасы клубтарының арасында футболдан ҚР Чемпионаты өтеді.

22 қыркүйекте Ұлттық ғылыми кардиохирургия орталығында қайырымдылық веложарысы өтеді, ал «Жастар» сарайында астана тұрғындары мен қонақтары «Тегін заңгерлік кеңес, құқықтық сауаттылық» республикалық акциясына қатыса алады.

23 қыркүйекте «Пикник» тобының фанаттары «Қазмедиа орталығында» «Левитация» концерттік бағдарламасын тамашалай алады. Іс-шаралардың толық тізімі www.madeniet.astana.kz сайтында жарияланған.

Мемлекет басшысының тапсырмасын орындау мақсатында, әкімдікпен Астана қаласының 2019-2023 жылдарға арналған жинақы құрылысы жөніндегі кешенді жоспардың жобасы әзірленіп, Үкімет отырысының қарауына ұсынылып отыр. Жоба мүдделі мемлекеттік органдармен келісілген.

Игеру аумағының шекаралары 25 мың жеті жүз гектардан 15 мың төрт жүз гектарға дейін оңтайландырылды және 5 перспективалы құрылыс салу аймағы анықталды (Мыңжылдық аллеясы мен «Нұрлы жол» темір жол вокзалы; Мәңгілік Ел даңғылы; Тұран даңғылынан батысқа қарай; Телман кентінен оңтүстікке қарай; Асан Қайғы көшесі ауданын жаңарту).

Халықтың көші-қон және туу көрсеткіштерінің өсуі есебінен халық санының жыл сайын орташа есеппен 2,5 процентке ұлғаюы күтіледі (2023 жылға қарай шамамен 1 млн 500 мың адам) және 2030 жылға қарай шамамен 2 млн адамға жету жоспарлануда.

Болжам бойынша экономика өсімінің жыл сайынғы қарқынының 4 проценттен 6 процентке дейін өсу салдарынан, 2023 жылға қарай елорданың Жалпы өңірлік өнімі 70% процентке ұлғайып, 10 трлн теңгеден асады.

Бұдан басқа, шағын және орта бизнес субъектілерінің саны 216 мыңнан асып, 37 проценттен астам өседі. Өңірлік жалпы өнімде шағын және орта бизнестің үлесі 2023 жылы 57 процентке дейін өседі (2018 жылы – 50,5%).

Экономика мен салық салынатын база өсімінің күтілетін қарқыны Жергілікті бюджет кірісінің 43,7 процентке, 355 млрд теңгеге дейін ұлғаюын қамтамасыз етеді.

Астана қаласынан республикалық бюджетке жыл сайынғы түсімдер 14 процентке, 2018 жылғы 823 млрд теңгеден 2023 жылы 940 млрд теңгеге дейін өседі.

Сонымен қатар, алдағы 5 жылдың ішінде елорданың дамуына шамамен 6 трлн теңге жеке инвестиция салынады. Осылайша, 1 теңге мемлекеттік инвестицияға 4-5 теңге жеке капитал салынатын болады. Өз кезегінде, бұл әлеуметтік және инженерлік инфрақұрылымның кеңеюіне, сондай-ақ тұрғын үй құрылысының өсіміне мүмкіндік туғызады.

Аумақтарда белсенді құрылыс салу 2023 жылға дейін шамамен 10 млн шаршы метр тұрғын үй енгізілімін қамтамасыз етеді. 

Көліктендіру деңгейінің 8-9 процентке дейін жыл сайынғы ұлғаюын ескере отырып, 2023 жылға дейін 121 км жол, 2 жол айрығын, 3 көпір, 1 жол өтпесін, 1 тоннель салу және 1 айналма жолды аяқтау жоспарлануда.

Көлік қаңқасын құру елорда жолдарында көліктік коллапстың туындауына жол бермеуді және қаланың негізгі магистральдарынан 50 процентке жүктемені төмендетуге мүмкіндік береді.

Нақты шешімді қажетсінетін Астананың өзекті мәселелерінің бірі — нөсерлі кәріз.

2019 жылдың соңына қарай нөсерлі кәріздің қолда бар тазалау құрылыстарын реконструкциялау және жаңаларын салу жұмыстарын өткізу жоспарланады. Бұл 17 мың гектар ауданды қамтуға (Жастар шағын ауданы, Ақбұлақ, Өндіріс тұрғын алаптары, Ш. Құдайбердіұлы даңғылы ауданы, Мыңжылдық аллеясы, «Нұрлы жол» темір жол вокзалы, Әскери қалашық) және жер үстіндегі сулардың кедергісіз кетуіне мүмкіндік береді.

Су жинаудың жалпы алаңы 13 мың гектардан 23 мың гектарға дейін өседі, бұл 2030 жылға дейін игеру алаңының 66 процентке (34,6 мың га) немесе 2020 жылға нөсерлі кәріз желісіне ағын сулар алаңның 96,5 процентін (23,8 мың га) құрайды.

Халыққа сапалы қызметтермен қамтамасыз ету үшін 150 км сумен қамту желілерін және 81 км су бұру желілерін салу күтілуде.

Екінші Жылу электр орталығын кеңейту және қайта жаңарту қосымша 2~2,5 млн шаршы метр тұрғын және коммерциялық алаңды орталықтандырылған жылу жүйесімен қамтамасыз етеді.

Үшінші Жылу электр орталығының бірінші кезегін салу қаланың батыс және солтүстік бөлігінің жылумен қамтамасыз етеді. Ал қуаттылығы сағатына 418 Гкал үшінші Жылу электр орталығының екінші кезегін салу Мемлекеттік-жекешелік әріптестік тетігі арқылы жоспарланады.

Сондай-ақ, 110 кВ үш қосалқы станциясын салуды және кабельдік желіге қайта жайластырумен 110 кВ ауа желілерін қайта жаңартуды көздейді. Бұл ЛРТ, Мыңжылдық аллеясы, Железнодорожный кентін электрмен қамтуға, қаланың оңтүстік-батыс бөлігінде жүктемені төмендетуге мүмкіндік береді.

Газдандыру бойынша бірінші кезеңде 2021 жылға қарай Жылу электр орталықтарындағы су жылытқыш және шағын жеке қазандықтарды, сондай-ақ тұрғын-үй алқаптарын (Көктал, Оңтүстік-Шығыс, Шұбар, Family Village, Garden Village, Өндіріс, Агроқалашық, Железнодорожный, Пригородный, Тельман тұрғын алаптары) газ отынына ауыстыру жоспарланады. Бұл зиянды заттар шығарындыларын 30 процентке төмендетуге мүмкіндік береді.

Елбасының тапсырмасын орындау мақсатында Есіл өзенінің арнасын әрі қарай реконструкциялау жұмысын күшейту жоспарланады (12 учаскелер).

Бұдан басқа, тұрғындардың өмір сүру сапасын арттыру мақсатында, қаланың кез-келген тұрғын ауданынан 20 минуттық қадамдық қолжетімділікті қамтамассыз ететін саябақтар мен гүлзарлар салу жоспарланады.

Білім саласында 2023 жылға дейін келіп жатқан адамдардың есебінен контингенттік өсімі 124 мың жаңа оқу орындарын құрайды, оның ішінде тапшылықты 50% жеке-меншік мектептер арқылы, 50% республикалық және жергілікті бюджет қаражаты есебінен (24 мектеп пен 10 жапсаржай) жою жоспарланады.

2019-2023 жылдары шамамен 63 мың орынға 37 мектеп пен 10 жапсаржай салу жоспарланады. Бұл 2021 жылға қарай мектептердегі оқу орындарының тапшылығын жоюға мүмкіндік береді.

Мектепке дейінгі білім саласында 6 млрд теңгеге 6 балабақшаны мемлекеттік-жекешелік әріптестік тетігі арқылы салу жоспарланады.

Денсаулық сақтау объектілері бойынша мемлекеттік-жекешелік әріптестік тетігі белсенді түрде қолданылады.

44,1 млрд теңгеге 13 объект салу, мемлекеттік-жекешелік әріптестік/ республикалық бюджет қаражаты есебінен 30,4 млрд теңгеге тағы да 2 объект салу көзделеді.           

Кешенді жоспарды іске асыру үшін 1 трлн 473 млрд теңге қарастырылады, оның ішінде республикалық бюджет – 946 млрд теңге (мемлекеттік-жекешелік әріптестік/ республикалық бюджет 100 млрд теңге), жергілікті бюджеттен 527 млрд теңге (мемлекеттік бағалы қағаздар шығару – 72 млрд теңге, мемлекеттік-жекешелік әріптестік — 64 млрд теңге).

Сонымен қатар, Кешенді жоспарды іске асыру қаланың да, жалпы елдің де экономикасын дамытуда оң әсер тигізеді. 5 жылдың ішінде бюджетке 7 трлн теңге түседі (республикалық бюджетке – 5,2 трлн теңге, жергілікті бюджетке – 1,8 трлн теңге), сондай-ақ 6 трлн теңге жеке инвестиция тарту жоспарланады. Бұл 300 мың жаңа жұмыс орнын құруға және 3 млн турист тартуға мүмкіндік береді (негізгі жобалдардың іске асырылуында 5 млн турист тартылады).

Astana Innovations Challenge аясында үздік өткен инновациялық жобаны анықтауға арналған үш күндік байқау аяқталды, деп хабарлайды елорда әкімдігінің ресми сайты «Astana Innovations» АҚ сілтеме жасап.

Астананың интеллектуалдық әлеуеті ең маңызды стратегиялық ресурс ретінде қаралады. Оның экономикалық тиімділігі көбінесе тауар айналымынан түсетін кірістен асып түседі. Үш күн ішінде лайықты жұмыстар ұсынылды. Қазылар алқасының шешімімен жүлделі орындар келесідегідей бөлінді.

1-орын мен 500 мың теңгелік сертификатты тұлғаны тануға арналған кросс платформасы бар FaceR командасы иеленді. 2-орын мен 300 мың теңгелік сертификатты Qaz Aqua командасы алды. Олар акваторий келушілеріне арналған қызметтері бар GPS білезік ұсынды: SOS түймесі, орнатылған қауіпсіздік жастығы. 3-орын мен 200 мың теңгелік сертификат Stop Вор командасына бұйырды. Қатысушылар бейнекамера арқылы қылмыскерлердің жеке тұлғасын танитын жүйе жасап шығарды.
Интеллектуалдық марафонды қорытындылай отырып, «Астана Innovations» АҚ басқарма төрағасы Олжас Сартаев Астана – бұл инновациялар қаласы және бүгінгі стартаптың оның дамуына қосылған тағы бір үлес екенін ерекше атап өтті.

«Мемлекет пен бизнес тек экономикалық қана емес, сонымен қатар әлеуметтік мәселелерді шешуде де толыққанды әріптеске айналуы тиіс. Кедергілерді жою, барлық кәсіпкерлік құрылымдармен жұмысты жандандыру, жас стартаптарды қолдау – бұл біздің негізгі міндеттеріміздің бірі»,  – деді Олжас Сартаев. А

Айта кетейік, 2017 жылдың басынан бері «Астана Innovations» АҚ тарапынан 7 стартап-байқау (4 стартап уикенд және 3 хакатон) өткізілді. Іс-шара Республиканың түрлі аймақтарынан келген 2500-ден астам адамның басын қосты. Стартап марафон барысында қазылар алқасының мүшелері 70 финалисті анықтады. Финалға 21 команда шықты. Жобаларды бағалауға әлемнің 10 елінен 100-ден астам халықаралық ұйым басшылары мен сарапшылары шақырылды. Бұл марафонның аудиториясы кең болды. 230-дан астам адам ресми сайтқа тіркелді. 26 командадан 11-і финалға шығып, 3 команда жүлделі орындарға ие болды.

Апта сайын өтетін аппарат мәжілісінде қала әкімі қаланы дамытудың жаңа үлгісін құруға тапсырма берді. 

«Мемлекет басшысы біздің алдымызға жақын арада орындалуы тиіс бірқатар басым міндеттерді қойып отыр», – деп мәлімдеді Бақыт Сұлтанов.

Қаланы дамытудың жаңа үлгісін енгізу және инновацияларды ілгерілету, креативті адамдар санын көбейту үшін қолайлы орта құру 2050 жылға дейін қаланы дамытудың ұзақ мерзімді стратегиясын әзірлеуді талап етеді. Жаңа стратегияны құру жөніндегі тапсырманы Мемлекет басшысы осы жылдың 11 қыркүйегінде берген болатын.   

Әкім қаладағы қазіргі ахуалға кешенді түрде талдау өткізіп, стратегиялық мақсатты анықтауды, болашақтың қандай болатынын болжауды тапсырды: яғни өмір сапасын арттыру, қалалық ортаның үйлесімділігі, тұрақты экономикалық өсім, ресурстарды тиімді пайдалану және т.б.

Елорданың жаңа стратегиялық даму үлгісі өзіне «Астана» халықаралық қаржы орталығы шеңберінде іскер қаржылық хабты қосуы керек. Бұл бағыт сонымен қатар туризм индустрия саласын кеңейту бойынша жұмысты күшейте түсуді талап етеді.

«Осыған байланысты іскер туризм саласында алдыңғы қатарлы халықаралық ұйымдармен халықаралық әріптестікті нығайтуды тапсырамын. Туризм саласында қызмет көрсету сервисінің сапасын халықаралық стандарттарға көтеру өте маңызды», – деді әкім. 

Әсіресе қалалықтардың қолайлы өмір сүруі үшін жасалатын игіліктерге ерекше көңіл бөліну керектігі тапсырылды: абаттандыру, әлеуметтік объектілерді салу, тұрғын үй құрылысы.

Б. Сұлтанов осы жылы жоспарланған жалпы алаңы 2,3 млн шаршы метрден кем емес тұрғын үйлерді пайдалануға беруді тапсырды (Жыл басынан бері 1699,6 мың шаршы метр тұрғын үй пайдалануға берілді).

«Әкімдіктің жұмысы Мемлекет басшысы атап өткен бес әлеуметтік бастаманы жүзеге асыруға бағытталуы керек, – деп айрықша тоқталды Б. Сұлтанов. – Осы міндеттерді атқару жаңа жұмыс орындарын ашуға және қаланың ары қарай экономикасын дамытуға әсер етеді».

Бүгін Астанада жыл сайын өтетін халықаралық «Astana Marathon 2018» марафоны болып өтті.

Жүгіруге 5 мыңнан аса адам қатысты. Оның ішінде 800-дей қатысушы қашықтықты толық жүгіріп өтті, деп хабарлайды елорда әкімдігінің ресми сайты.

Бұқаралық спорттық шараға Қазақстаннан және шет мемлекеттің өкілдері қатысты, атап айтқанда, Германия, Ресей, Жапония, Италия, Өзбекстан, БАӘ, Швеция, Оңтүстік Корея, Ұлыбритания, АҚШ, Қырғызстан, Франция, Түркия, Аустралия, Кения, Грузия, Люксембург және Испания.

18-ден асқан қатысушыларға 42,2 км және 16-дан асқандарға 10 км қашықтықты бағындыру ұсынылды.

«Біздің клубта 30-дан аса адам бар. Бұл жаттықтырушылар, қызметкерлер. Бәріміз де жүгіруге қатысайық деп шештік. 10 км жүгірдік… Мұндай шаралар соңғы жылдары белсенді түрде көбейіп келеді. Бәріне қатысуға тырысамыз, осылайша салауатты өмір салтын насихаттаймыз», — дейді Астана қаласы әкімдігінің «Жігер» спорт клубы басшысының орынбасары Қуаныш Сейтмағамбетов.

Онымен дене шынықтырудың оқытушысы Олег Иванов та келіседі. «Мен бұрыннан жүгіремін. Бірақ марафондарға қатысуды 2011 жылдан бастадым. Бұған дейін 5, 10 км қашықтықта жүгіретінмін. Халықаралық марафондарға да қатыстым. Бүгін 10 км жүгіріп өттім. Трасса кең, ауа райы да жүгіруге қолайлы болды, ыстық емес. Барлығы жақсы ұйымдастырылған. Мұндай марафондар жаппай белең алып, салауатты өмір салтын сақтауға шақырады. Әлемнің барлық астаналарында өздерінің марафоны бар. Егер спортпен айналысуды әлі бастамағандар болса онда мен «кім алға баспайды, сол артқа кетеді» дегім келеді. Бір орында тұрып қалуға болмайды. Әрдайым шығып, әуелі жүруден бастау керек, сосын жылдам спорттық жүгіруге, сосын трусцамен, сосын уақыт өте келе марафонға қатысуға болады», — деді ол.

Естеріңізге сала кетейік, марафон басталар алдын Astana Marathon EXPO 2018 спорт көрмесі болып өтті. Көрме кезінде кәсіби жаттықтырушылардың жүгіруге арналған, коуч пен спортшылардың жүгіру мен салауатты өмір салтына арналған тақырыптық лекциясы өтті. Онда қатысушылар марафон туралы, оның бағдары, нәтижені санаудың жүйесін, сонымен қатар жүгірудің техникасы бойынша кеңестер алып, ұзақ қашықтыққа жүгірген кезде шыдамдылықты арттырудың құпияларына қанық болды. Бұдан бөлек, көрмеде марафонға дайындық бойынша өткен шарада «Astana Marathon-2018» қолдаған қайырымдылық қорлары мен жүгіруге қатысатындардың корпортативтік қолдаулары да ұсынылды.

astana.gov.kz/kz/news/news/15184