ҚР Тұңғыш Президенті музейінде оқушылар арасындағы «Әлемді өзгертетін идеялар» байқауының жеңімпаздарын марапаттау салтанаты өтті. Байқауда «Күн сәулесі арқылы жарықтандыру құрылғысы» және «Ел экономикасының баламалы түрге – «Жасыл экономика» форматына ауқымды бетбұрысы» тақырыбындағы жобалармен Асхат Әбубәкіров пен Әсел Орынбекова көш бастады.

Еліміздің Тәуелсіздігінің 25 жылдығына орайластырылған шара «100 нақты қадам» Ұлт жоспары шеңберінде қоғамдағы өзекті мәселелерді танып-білуге және жүзеге асыруға бағытталған оқушылардың ғылыми-зерттеушілік және оқу-танымдық қызығушылығын ынталандырады.

Биыл байқау екінші рет өткізілді, оған 36 жобамен 46 бала қатысып, өздерінің ғылыми жобаларын қорғады. Байқау үш кезеңмен өткізілді. Бірінші тур қалалық мектептерде ұйымдастырылды, содан кейін жобалар сараптамадан өткізілді, ал үшінші кезеңде мектептер өзара жарысты.

Қазылар алқасының шешімімен байқау жеңімпаздары мен жүлдегерлері политехникалық және гуманитарлық бағыттар бойынша анықталды. Ғылыми жобалардың басым бөлігі қазақстандықтардың өмір сүру сапасын жақсартуға бағытталған жоғары технологияларға арналған.

– Байқау оқушылардың Мемлекет басшысының идеяларымен таныс болу деңгейін, Қазақстан тарихын қаншалықты білетінін анықтауға мүмкіндік береді. Жобаларда Президенттің идеялары көрініс тапқан. Қазылар алқасы гуманитарлық бағыттағы еңбектердің ішінен «Мәңгілік Ел» идеясының дамуына, қазақстандықтардың ынтымақтастығы мен бірлігінің нығаюына ықпал ететін адами құндылықтардың дамуына бағытталған ғылыми жұмыстарға баса назарына аударды: «Жыл сайынғы Қазақстан халқына Жолдауы», «Қазақстан халқы Ассамблеясы. Ұлттық бірлік», «Жастарға арналған қазақстандық әлеуметтік желілер»,- деді «Астана Дарыны» ӨҒПО ғылыми-техникалық зертханасының меңгерушісі Гүлбақыт Буралкиева.

Байқау дарынды жас зерттеушілерді анықтауға және оларға қолдау көрсетуге мүмкіндік береді, бұл елімізде дұрыс интеллектуалдық әлеует қалыптастыруға септігін тигізеді.

astana.gov.kz/kk/modules/material/10530

Жазда астаналықтарды керемет спорттық думан күтеді. 1-5 маусымда елордада стритболдан Әлем біріншілігі (FIBA 3х3 U18 World Championships) өтеді. Оған 30 астам мемлекеттің спортшылары қатыспақ. Ойындар «Астана Опера» театры ғимаратының жанындағы алаңда өткізіледі.

200 астам спортшы көше баскетболын ойнайды. Жарыс барысында ерлер мен әйелдер командалары төрт топта шеберлік байқасады. Қазақстанның ерлер құрамасы «С» тобында өнер көрсетіп, Румыния, Индонезия, Италия және Қатар команаларымен күш сынасатын болады. Еліміздің әйелдер құрамасы Нидерланды, АҚШ, Италия және Польша командаларымен «В» тобында кездеседі.

Әлем біріншілігін ұйымдастырушылар – Қазақстан Стритбол лигасы (SLK), ҚР Ұлттық баскетбол федерациясы және FIBA 3х3.

– Көше баскетболы немесе стритбол қазіргі заманғы урбан мәдениетінде – ең демократиялық спорт, оны жастар ойнайды. Стритбол адамдарды біріктіріп, оларға сенім береді, үлкен жетістіктерге қол жеткізуге құштарлықты оятады, – дейді SLK президенті Нұрлан Құсайынов.

Көрермендер назарына стритболдан 3х3 форматындағы кездесулер мен ойын-сауық бағдарламалары ұсынылмақ. Баскетбол мен стритворкауттан шеберлік дәрістері өткізіледі, чирлидерлер, брейкдансерлер мен урбан-мәдениетінің басқа да өкілдері өнер көрсетпек. Елордада алғаш рет баскетбол фристайлер және ұшатын акробат-баскетболшылар командалары өз шеберліктерін ортаға салады. Әртістер қала қонақтарын еліміздің ұлттық колоритімен таныстырады. Ал кішкентай астаналықтар үшін арнайы аймақ ұйымдастырылады.

Айта кетейік, осы күндері бұқаралық турнирлер, соның ішінде Астана кубогы өткізіледі. Жарыстарда 10 жастан асқандардың барлығы бағын сынай алады.

Шаралар белгілі диджейлердің хиттерінің сүйемелдеуімен өткізіледі. Шараның ашылуында қазақстандық және ресейлік урбан-жұлдыздар өнер көрсетеді.

Жарыс 1 маусымда сағат 13:00 басталады. Спорттық додаларды Kazsport телеарнасынан және FIBA-ның Youtube-тағы ресми каналынан тікелей эфирден тамашалауға болады.

astana.gov.kz/kk/modules/material/10529

Конгресс-холлда қала тұрғындары мен қонақтарының назарына отандық жне шетелдік композиторлардың классикалық музыкалық шығармалары ұсынылады.

Сенбі күні, 14 мамырда «Көңіл толқыны» концерті өтеді. Кеш барысында ҚР еңбек сіңірген әртісі Секен Тұрысбековтың әндері мен күйлері орындалады.

Астана қаласы әкімдігі Мемлекеттік филармониясының XV концерттік маусымының жабылуы 26 мамырда сағат 19:00 Конгресс-холл концерт залында өтеді. Филармонияның үрмелі аспаптар оркестрі белгілі қазақстандық және шетелдік композиторлардың шығармаларын орындайды.

Шығармашылық ұжым репертуарында түрлі жанрдағы (классика мен джаздан бастап халық әндері, күйге дейін) 500 астам шығарма, 10-нан артық тақырыптық бағдарлама бар. «Солистер шеруі», «Кино музыкасы», «Вена музыкасы», «Жаңа Әлем музыкасы», «Дирижерлар шеруі» елордалық тыңдарманның құлақ құрышын қандырады.

Сонымен қатар, Балаларды қорғау күніне орай 28 мамырда сағат 17:00 Конгресс-холл концерт залында «Ғажайыптар әлеміне саяхат» мерекелік концерті өтеді.

ҚР еңбек сіңірген қайраткері Нұрлан Хамзин жетекшілігімен «Сарыарқа» халық аспаптары ансамблі эстрадалық вокал әртістерімен бірге сүйікті балалар әндерін орындайды.

Сахна төрінде М. Өтемісов атындағы Оқушылар сарайының ұжымдары: «Алтын дән» халық би ансамблі, «Джамбо» эстрадалық би тобы және «Гүлдәурен» вокалды студиясы өнер көрсетеді.

astana.gov.kz/kk/modules/material/10528

Қала тұрғындары мен қонақтары ҚР Ұлттық музейінде ашылған Қазақстан халқы Ассамблеясы және көп этносты Қазақстан көрме залында елімізде тұрып жатқан этностардың тарихымен етене таныса алады. Мұнда келушілер назарына түрлі халықтардың көне, тұрмыстық заттары мен музыкалық аспаптары ұсынылған. Ал әдемі ашық түсті ұлттық костюмдер киген қозғалатын фарфор мүсіншелер экспозицияның ерекшелігі болып табылады.

Залдағы саяхат «Қоныс аудару» атты үлкен диорамадан басталады, онда қазақ халқының қонақжайлылығы мен кішіпейілділігі көрініс тапқан. Сондай-ақ, алғашқы қоныс аударушылардың – өзге ұлт өкілдерінің нәрселерін тамашалауға болады.

Экспозициялар қатары Қазақстан аумағында тұрып жатқан 39 этностың музейлік маңызды заттарымен толықтырылған.

– Мұнда Қазақстан халқы этностарының қоныс аудару хронологиясы пайдаланылған, мысалы, бірінші болып ІХ ғасырдың 70-80 жылдары орыстар, украиндар көшіп келген. Содан кейін ұйғырлар, дүнгендер, корейлер, көрменің экспозициялық қатары да осы кезекпен құрылған. Жалпы, экспозицияда 500 экспонат ұсынылған, олардың басым бөлігі – ҚР Ұлттық музейінің қорынан алынған, музейлік маңызы бар заттарды ұсынуға «Келісім» бірлестігі де ниет білдірді, сондай-ақ, елшіліктермен, мәдени орталықтармен де жұмыс істедік, – дейді ҚР Ұлттық музейі экспозициялық-көрме жұмысы қызметінің жетекшісі Тоғжан Әділбекова.

Тұрмыстық заттардан, ыдыс-аяқтан, музыкалық аспаптардан, әшекейлерден, киім кешек пен қару-жарақтан әр этностың ұлттық колоритін байқауға болады. Ұйғыр диаспорасы асқабақтан жасаған бірегей құмыра; шарап ішуге арналған грузин ритоны; Әзербайжандағы әйгілі қыздар мұнарасынан кішкентай кәдесыйы; корей желпуіштер және т.б. стендтерге қойылған. Қазақ мәдениетіне, көшпенділер өркениетіне арналған арнайы стенд жасалған.

Әлемнің түрлі мемлекеттерінің президенттері мен делегациялары құрмет пен ризашылықтың белгісі ретінде Мемлекет басшысына және елордаға тарту еткен сыйлықтарға жеке орын бөлінген. Көрме залындағы ерекше элемент – Нұрсұлтан Назарбаевтың «Оңшылдар мен солшылдарсыз» кітабы. Мемлекет басшысы бұл еңбегінде соғыстан кейінгі жылдары этникааралық өзара қарым-қатынасты құру туралы естеліктерімен және өмірлік тәжірибесімен бөліседі, халқы достық пен келісімде, тату-тәтті өмір сүрген «интернационалды» ауыл туралы айтады.

Үнемі қозғалыста болатын керемет фарфор мүсіндер келушілерді тәнті етеді. Фигураның көлемі – 70 см. Бұл ұлттық киім киген ерлер мен әйелдердің мүсіндері.

– Бұл жерде қазіргі кезде саны жағынан ең көп этностардан 9 жұп ұсынылған. Олардың ұлттық киімдерінің бейнесі Үлкен қазақ энциклопедиясынан алынған. Фарфор мүсіндер қою сияқты экспозициялық шешімді – осындай ерекше дизайн, витриналар, подиум жасап, олардың қол ұстасып айналып тұрғандай қозғалыста болуын біздің экспозиционер мамандарымыз ұсынған, – дейді Т. Әділбекова.

Мұнымен қоса, залда Қазақстанның барлық аймақтарын аралап шыққан Тайқазанды көруге болады. Бұған дейін ол тарих залында тұрса, енді осы экспозициядан өзінің лайықты орнын тауып отыр.

Музей қызметкерлері көрме залын басты залдардың бірі деп санайды және келушілерді қуантып, оларды түрлі этностардың мәдениеттерімен таныстыру үшін оның ұдайы жаңа экспонаттармен толықтырылып отыратынын атап өтті.

astana.gov.kz/kk/modules/material/10527

Үстіміздегі жылдың ІІ тоқсанында «Астананың тұрақ кеңістігін басқару» жобасын енгізу жоспарланған. Қазіргі кезде орталық көшелер мен даңғылдарда 9 мыңға жуық тұрақ орнын қамтитын 259 тұрақ орны белгіленді.

Көліктік талдау қорытындысы бойынша бүгінгі таңда елордада қарбалас уақытта тұрақ орындарына түсетін жүктеме 165% құрайды. Ал осы кездегі паркингтер жүктемесі — 64%.

Тұран, Қабанбай батыр, Сарыарқа, Республика, Жеңіс, Бөгенбай батыр даңғылдары мен Достық, Әуезов, Желтоқсан, Кенесары, Сығанақ, Сейфуллин, Бөкейхан, Түркістан, Бейбітшілік, Сарайшық және т.б. көшелердегі тұрақтар ақылы болады.

«Астананың тұрақ кеңістігін басқару» жобасы екі аймақтан тұратын болады. Бірінші аймаққа Республика даңғылы – Бөгенбай батыр даңғылы – Сарыарқа даңғылы– Есіл өзенінің жағалауы шегінде орналасқан тұрақтар жатады. Екінші аймақ Орынбор – Сарайшық – Тұран – Сығанақ көшелерінде орналасқан тұрақтарды қамтиды.

Тұрақ орындары жетпеген жағдайда күрделі көп деңгейлі паркингтер салу, сондай-ақ, автоматтандырылған тұрақтар жасау көзделген. Астананың бірыңғай тұрақ кеңістігін құру көше-жол желісіне түсетін жүктемені азайтып, жаяу жүргіншілердің, қоғамдық көліктер мен автомобильдердің қозғалысын жеңілдетеді.

Көлік құралдары көп жүретін жерлерде ақылы тұрақтар жасау әлемдік тәжірибеде қолданылатын жол қозғалысы ережелерін бұзу жағдайларын азайту және кептелістерді болдырмау бойынша тиімді шаралардың бірі болып табылады.

astana.gov.kz/kk/modules/material/10525

Астанада Өзбекәлі Жәнібек көшесінің Айнакөл көшесінен Қошқарбаев көшесіне дейінгі бөлігінде жол жөндеу жұмыстары жүргізіледі. Осыған байланысты 14 мамырдан 5 маусымға дейін аталған жол учаскесінде көлік қозғалысы толығымен тоқтатылады.

Сонымен қатар, 13-23 мамыр аралығында Бөкейхан көшесінің Кенесары көшесінен Ағыбай батыр көшесіне дейінгі бөлігінде жол жөндеу жұмыстарын жүргізуге байланысты көлік қозғалысы шектеледі.

12-25 мамырда Кравцов көшесінің Уәлиханов көшесінен Балқаш тұйық көшесіне дейінгі бөлігі жөнделеді. Жол жөндеу жұмыстарына байланысты 12-30 мамырда Қабанбай батыр даңғылы Қорғалжын тасжолынан «Рамстор» дүкенінің жанындағы көпірге дейін көлік құралдарының қозғалысы шектеледі.

Еске салайық, 25 мамырға дейін Қошқарбаев көшесінің Момышұлы даңғылынан Сарыкөл көшесіне дейінгі бөлігі жартылай жабылады.

Сонымен қатар, 17 мамырға дейін Кенесары көшесінің Республика даңғылынан Ғабдуллин көшесіне дейінгі бөлігінде көлік қозғалысы жартылай тоқтатылады.

Елорда тұрғындары мен қонақтарынан жол бағыттарын алдын ала жоспарлауды сұраймыз.

Бүгін Астанада «Astana Mall» сауда, ойын-сауық орталығында өткен Бос орындар жәрмеңкесіне 40 жуық жұмыс беруші қатысты. Шара барысында қызмет көрсету, білім, денсаулық сақтау, құрылыс салаларынан 260 жуық бос жұмыс орны ұсынылды. Жәрмеңке барысында жұмыс іздеп келген 1386 адам тіркелді.



Бұл Жұмыспен қамту орталығы жыл басынан бері өткізіп отырған төртінші жәрмеңке. Аталған шаралардың қорытындысы бойынша 75 адам жұмысқа орналастырылды.

Бос орындар жәрмеңкесі жұмыс іздеушілерге әлеуетті жұмыс берушілермен әңгімелесуден өтіп, қайта оқыту мен жаңа мамандықты меңгеру мүмкіндігі туралы ақпарат береді.



Жыл басынан бері Астана қаласы әкімдігінің Жұмыспен қамту орталығына 4810 қала тұрғыны жүгінген, 2195-і жұмысқа орналастырылды, соның ішінде 63-і әлеуметтік жұмыс орындарына, 220-сі жастар практикасына жіберілді, 919 адам қоғамдық жұмыстарға қатысты, 307 адам қайта оқытылып жатыр.

Материал Астана қаласы әкімдігінің ресми сайты astana.gov.kz деректері бойынша әзірленді.

Егер де Сіз деструктивті діни ұйымдардан зардап шексеңіз немесе қандай да бір ұйым Сізді мазаласа сенім телефонына 8 (7172) 78-22-88 қоңырау шалу арқылы білікті психолог, дінтанушы және теолог мамандардың көмегіне жүгіне аласыз.

Толық ақпарат сенім телефоны арқылы немесе Астана қаласы әкімдігінің Дін проблемаларын зерттеу орталығынан КММ кеңес алсаңыз болады.

Құпия және тегін көмек беру – ол сенім телефонының негізгі қағидасы. Яғни, елордамыздың әр тұрғыны телефон соғу арқылы анонимді психологиялық кеңес алып, оның құпия сақталуына кепілдік алады.

1. Көктемгі көрме-жәрмеңке — 12-17 мамыр 10.00-20.00 Конгресс-холл

2. Мемлекеттік академиялық филармонияның «Көңіл толқыны» концерті — 14 мамыр 19.00 Конгресс-холл

3. Л. Гумилев атындағы Еуразия ұлттық университетінің концерті — 15 мамыр Конгресс-холл

4. «Бабалар өнері — ұрпаққа мұра» көрмесі — 1 мамыр 2014 ж. – 31 желтоқсан 2016 ж. Тәуелсіздік сарайы

5. «Уақыт түсі» атты көрме — 25 қаңтар — 30 сәуір Тәуелсіздік сарайы

6. Р. Спунердің жеке коллекциясынан "Өнерді іздеуде" көрмесі — 1 сәуірден 14 мамырға дейін Тәуелсіздік сарайы

7. Қ. Ежембеков «Су перісі» спектаклі — 14-15 мамыр 12.00 — 14.00 Қуыршақ театры (Республика даңғылы, 3)

8. «Фортуна» жылжымалы хайуанаттар бағы — 26 сәуір — 26 маусым «Қазақстан» спорт сарайының жанындағы аумақ

9. «Джамбо» циркі (Ресей) — 14, 15 мамыр 16.00 Астаналық цирк

10. «Мусихиндер әулетінің бал әлемі» бал көрмесі — 09 — 15 мамыр 10.00 «Жастар» сарайы

11. «Ангиорс» вокалдық студиясының есеп беру концерті — 14 мамыр 13.00, 16.00 «Жастар» сарайы

12. В. Трегубенко «Домик для царя зверей», ертегі — 14 мамыр 11.00 М. Горький атындағы Мемлекеттік академиялық орыс драма театры

13. Премьера С. Баранова «Пробуждение», драма — 14 мамыр 18.00 М. Горький атындағы Мемлекеттік академиялық орыс драма театры

14. Г.-Х. Андерсен «Дюймовочка», ертегі — 15 мамыр 11.00 М. Горький атындағы Мемлекеттік академиялық орыс драма театры

15. Премьера С. Баранова «Пробуждение», драма — 15 мамыр 18.00 М. Горький атындағы Мемлекеттік академиялық орыс драма театры

16. «Опера без слов» /опера/ (камералық зал) — 12 мамыр 19.00 «Астана Опера» Мемлекеттік опера және балет театры

17. «Таң самалы» концерті (камералық зал) — 13 мамыр 19.00 «Астана Опера» Мемлекеттік опера және балет театры

18. «Ромео и Джульетта» балеті (үлкен зал) — 14-15 мамыр 18.00 «Астана Опера» Мемлекеттік опера және балет театры

19. «Sport Relief Mile 2016» қайырымдылық сайысы — 14 мамыр «Жерұйық» саябағы

20. Теннистен балалар арасындағы «Оранжевый мяч» турнирі — 14-15 мамыр «Дәулет» спорткомбинаты

Астанада әйелдер арасындағы бокстан Әлем чемионатында 64 мемлекеттен келген 300 жуық спортшы шеберлік байқасады. Дүбірлі додада Рио-де-Жанейрода өтетін жазғы Олимпиада ойындарына жолдамалар сарапқа салынады. Шараның салтанатты ашылуы 19 мамырға белгіленген, қазіргі кезде қыздар шаршы алаңға шығуға дайындық үстінде.

Төрт жылдықтың басты бәсекесіне лицензиялар үш салмақ дәрежесінде ұсынылады – 51 кг дейін, 60 кг дейін және 75 дейін. Әр санат бойынша төрт жолдама беріледі.

Қазақстандық құрама командаға астаналық спортшылар Римма Волосенко, Валентина Хальзова мен Ләззат Күнгейбаева енді. Сонымен қатар, жарыста Назым Қызайбай, Жайна Шекербекова, Дина Жоламан, Айжан Ходжабекова, Зарина Цолоева, Виолетта Князева менЮлдуз Маматкулова ел намысын қорғайды.

Қазақстан әйелдер құрамасының аға бапкері Вадим Присяжнюк жаттығулардың штаттық режимде өтіп жатқанын атап өтті.

– Шаршы алаңға шығып, үздік қасиеттерімізді көрсетуіміз керек. Оның үстіне өзіміздің трибуналар қолдау көрсетеді. Бокс әлемнің көптеген елдерінде дамып келеді. Сондықтан бүгінде бәрін де ескеруіміз қажет. Ресей, АҚШ пен Қытай командалары мықты. Астанада медаль алуды көздейтін басқа да құрамалар бар. Әрине, қазақстандық жанкүйерлердің қолдауы жақсы ынталандыру болмақ, бұған үлкен үміт артып отырмыз. Сондықтан елорда тұрғындары мен қонақтарын бізге қолдау көрсетуге шақырамын, ал қыздар, өз кезегінде жанкүйерлердің сенімін ақтауға тырысады, – дейді В. Присяжнюк.

Әлем біріншілігі 19-27 мамырда «Барыс-Арена» сарайында өтеді.

astana.gov.kz/kk/modules/material/10506