Бүгін Алматы облысы әкімінің орынбасары Жақсылық Омар жастардың жобасына ақ жол тілеп, жетісулықтар «WELCOME to ZHETYSU» фильмін түсіруді бастап кетті. Бұл туынды Жетісу өңірінің көрнекті жерлерін кино тілімен насихаттайтын ерекше жоба болмақ. Бұл туралы Алматы облысының өңірлік коммуникациялар қызметі алаңында өткен баспасөз мәлихатында белгілі болды, — деп хабарлайды Алматы облысы әкімінің баспасөз қызметі.
Кино желісі өте қызықты, түрлі шытырманға толы, әзілмен әрленген. Жетісу өлкесінің тамаша жерлері де осы туындының ішінде көрсетіледі. Сценарий авторы Жұмабек Әділеттің айтуынша, кино қазақ тілінде түсіріледі, аталмыш туындыдағы негізгі рөлдерді Т.Жүргенов атындағы Қазақ ұлттық өнер академиясының ең үздік түлектері ойнамақ.
Фильмнің қысқаша мазмұны: жаңа танысып қосылған жолдастар Жетісу жерінен әсерлі бейнеролик түсіруді көздейді. Мақсаттарына жету жолында түрлі кедергілерге тап болғанына қарамастан, барлық қиындықты еңсеріп шығады.
«Елбасымыз айтқан рухани жаңғыру ең алдымен жастардың өз өлкесін танудан басталады. Сондықтан жетісулық жастар туған жердің топырағын насихаттауды кино тілімен жеткізуге талпыныс жасап отыр. Бұл орайда облысымыздағы қолға алынып отырған алғашқы тың жобаның маңызы зор деп есептеймін. Оны жүзеге асыру үшін біздің жастарда күш-жігер де, қуатты рух та, патриотизм де жеткілікті. Сондықтан тың жоба өзінің нәтижесін беретініне сенімдіміз», — деді облыс әкімінің орынбасары Жақсылық Омар.
Жалпы, кино түсіруге 13,8 млн. теңге бөлінген. Фильмнің ұзақтығы 90 минут болады деп межеленуде. Актерлер құрамында Ерболат Құдайберген, Рамис Кулаxметов, Рүстем Омаров, Мейірхан Шерниязов, Салтанат Құдайберген, Елдар Ташкенбай, Олжас Қасым, Райымбек Бекет бар. Фильм шамамен қараша айында көрерменге жол тартады деп жоспарланып отыр.

Тұңғыш рет Талдықорған қаласында облыстық прокуратурада Конституция күніне орай азаматтарды қабылдау орталығы салтанатты түрде ашылды. Бұл туралы облыстық өңірлік коммуникациялар қызметінің көшпелі баспасөз мәслихатында белгілі болды.
Азаматтарды қабылдау орталығы облыстық прокуратураның бақылау-өткізу пунктінің орнында бой көтерді. Орталықтың жұмысы «бір терезе» жүйесі бойынша жүзеге асырылады, яғни азаматтар барлық мәселелерін тек бір жерден шешу мүмкіндігіне ие болды. Осындай жаңа форматтағы жүмыстың арқасында жетісулықтар білікті заңгерлердің көмегіне тікелей жүгіне алады.
Жаңа орталық прокуратура мен халық арасында тығыз қарым-қатынасты орнатып, арадағы көп ресми рәсімдердің қысқаруына көмектеседі. Кезекші прокурорлар халыққа тікелей көмек көрсететін болады.
Орталықта азаматтар мемлекеттік мекеме басшыларына видео жазу арқылы сауалдарын қоя алады. Сондай-ақ, облыс тұрғындары прокуратураның барлық деңгейдегі басшыларының қабылдауына жазылуға мүмкіндік туғызылған. Азаматтар өтініштерінің қаралу барысы жайлы ақпарат пен жауаптардың көшірмелерін де ала алады.
«Жаңа орталықтың ашылуы халыққа сапалы қызмет пен қолжетімді заңға байланысты қызметтер көрсетіледі. Ең бастысы халық пен прокурорлар арасында ешқандай әкімшілік кедергілер болмайды. Бұл прокуратура қызметкерлерінің халықпен жұмыс жасаудың сапасын жақсартудағы маңызды қадамдарының бірі. Бұрынғы кездердегідей келушілер прокуратура алдындаңы ескте күтіп тұрмайды, себебі Тұрғындарға ыңғайлы болу үшін орталықта барлық жағдай жасалған. Сонымен қатар, кезектің электронды түрде жүруі де іске асырылған. Бұл екі жаққа да уақыт үнемдеу үшін тиімді», — деді Алматы облысының прокуроры Жылқыбаев Азамат.

Жыл соңына дейін Алматы облысында 35 мектеп, ал оның 24-і Білім күні пайдалануға беріледі. Бұл туралы бүгін облыс әкімі Амандық Баталов Талдықорғанда өткен ұстаздардың тамыз конференциясында хабарлады, — деп Алматы облысы әкімінің баспасөз қызметі ақпарат таратуда.
Қалыптасқан үрдіске сай жаңа оқу жылы қарсаңында өткізілген кеңес жұмысына облыс әкімі Амандық Баталов, Қазақстан Республикасының Білім және ғылым министрлігінің Ғылым комитетінің төрағасы Еркін Садықов және облыстың барлық аудан-қаласынан білім беру саласының қызметкерлері қатысты.
Облыс әкімінің орынбасары Жақсылық Омар конференцияны ресми түрде ашып, жүргізіп отырды.
Негізгі баяндаманы оқыған Алматы облыстық білім басқармасының басшысы Ләззат Базарқұлова, конференцияға қатысушыларға өткен оқу жылының, ҰБТ-ның қорытындысын баяндап, жаңа оқу жылында жүктелетін негізгі мәселелерге тоқталды.
Білім басқармасы басшысының сөзіне сүйенер болсақ, жаңа оқу жылына қойылар талаптардың негізгісі — білім деңгейін көтеру, педагогикалық ұжымның арасындағы тәртіп пен ұйымшылдықты арттыру, әрбір ұстаз бен мектеп әкімшілігінің жұмыс нәтижелілігіне қойылар талапты күшейту болып табылады. Баяндамада Мемлекет басшысы мен ҚР Білім және ғылым министрлігінің жаңадан енгізген талаптарын ұстаздар қауымының бұлжытпай орындауы қажеттігі жайында айтылды. Атап айтқанда, үш тұғырлы тіл саясаты, «Рухани жаңғыру» бағдарламасын жүзеге асыру, педагогтардың біліктілігін арттыру және өзге де маңызды тапсырмалар жүктелді.
Өткен жылдың жетістіктеріне тоқталған облыстың бас ұстазы проблемалық мәселелерге де көңіл аударды. Олардың ішінде ҰБТ-ның нәтижесікөңіл көншітпеді. Л. Базарқұлова осы іске жауапты тұлғаларға, соның ішінде облыстық білім басқармасына да кемшіліктерді алдағы оқу жылында қайталамаудың қам-қарекетін ойластыруға бүгіннен бастап кірісуді талап етті.
Конференеция барысында сөз сөйлеген Қазақстан Республикасының Білім және ғылым министрлігінің Ғылым комитетінің төрағасы Еркін Садықов, білім мен ғылымды дамытудың жаңа мемлекеттік бағдарламасы мен білімді дамытудың жаңартылған мазмұны туралы толықтай түсіндіріп берді.
Жарыссөзге қатысқан ұстаздар күн тәртібінде бүгінгі күннің өзекті мәселелеріне тоқталды. Олардың ішінде педагогтардың бәсекеге қабілеттілігі, жаңаша білім беру мазмұны, патриоттық тәрбие, дуалды оқыту, техникалық және кәсіби білім беруде еңбек нарығының сұранысына сай келетін білікті кадрлар дайындау мәселелері айтылды.
Педагогтардың тамыз конференциясын өңір басшысы Амандық Баталов қорытындылады.
Ұстаздар қауымын жаңа оқу жылының басталуымен құттықтап, жұмыстарына табыс тілей келе, жаңа оқу жылына қойылған тапсырмалардың басым бағыттарын айқындап өтті.
— Құрметті жиынға қатысушылар, құрметті ұстаздар! Келер оқу жылында педагогтарымызға үлкен міндеттер артылады. Елбасының «Болашаққа бағдар: рухани жаңғыру» атты бағдарламалық мақаласында ұсынған қоғамдық сананы жаңғырту жоспарын іске асыру бойынша өскелең ұрпақпен түсіндірме жұмыстарын бірлесіп жүргізуіміз қажет.
Мемлекет басшысы Нұрсұлтан Әбішұлы Назарбаевтың қолдауының арқасында білім берудің қазақстандық үлгісі дамудың жаңа сатысына көтерілуде, белсенді түрде заманауи инфрақұрылым қалыптасуда. Сол себепті, күш-жігерімізді бір арнаға бұрып, барлық бағыттар бойынша бірлесе жұмыс жасаумыз қажет. Біздің мақсатымыз ортақ, ол еліміздің өскелең ұрпағына сапалы білім беру, ұлт жанды, еліміздің мақтан тұтар азаматтарын тәрбиелеп шығу, — деді А. Баталов.
Өз сөзін жалғасытар келе өңір басшысы білім саласының ақсап тұрған күн тәртібіндегі мәселелеріне ерекше көңіл бөлу қажеттігін ескертті. Солардың ішінде ҰБТ-ның нәтижесі, балаларды қосымша біліммен қамтудың аз үлесі, мектеп директорларының атымен байланысты орын алған келеңсіз оқиғалар, кадрларды жұмысқа қабылдау кезіндегі өз ісіне жауапсыздық мәселелері бар. Сондай-ақ облыс әкімі тәрбиелеу ісінің босаңсып кетуінің салдарынан уақытынан ерте жүкті болу, жасөспірімдер арасындағы қылмыстың арту деректерінің көбейіп бара жатқандығына да назар аударды.
Осы аталған мәселелерге байланысты Амандық Баталов аудан-қала әкімдеріне, облыстық білім басқармасының басшысына жұмыстарын қайта қарап, айтылған әрбір бағыт бойынша тиісті шара қолдануды жүктеді. Сонымен қатар облыс әкімі аудан-қала әкімдеріне физика пәнінің мұғалімдерін оқушыларымен бірге «Астана ЭКСПО-2017» халықаралық мамандандырылған көрмесіне барып қайтуын, оларды жатын орынмен және тамақтануын қамтамасыз етуді тапсырды.
Өңір басшысы үш тілде оқытуды жетілдіру, «Рухани жаңғыру» бағдарламасын жүзеге асыру, мектепке дейінгі, техникалық және кәсіптік білім беру мәселесімен қатар ата-ана қамқорлығынсыз қалған балаларды баспанамен қамту мәселесі ерекше бақылауда тұрғандығын ескертті.
Осыдан кейін өзінің кәсіби шеберлігін шыңдауға үлкен көңіл бөліп, ұстаздық етудің жаңа әдістерін тұрақты енгізіп жүрген бірнеше ұстаздардың есімін атап, өткен жылдың қорытындысы бойынша үздік деп танылған ұстаздарды марпаттау рәсімін өткізді. Олардың ішінде «Қазақстан Республикасының білім беру ісінің құрметті қызметкері» және «Ы.Алтынсарин» атындағы төсбелгілермен марапатталғандары да болды. Сондай-ақ ұстаздарға облыс әкімінің Құрмет грамоталары мен Алғыс хаттары берілді.
Естеріңізге салар болсақ, І.Жансүгіров атындағы Мәдениет сарайының фойесінде облыстың білім беру мекемелерінің атқарып жатқан жұмыстарының басым бағыттарын көрсететін көрме ұйымдастырылды.
Ағымдағы жылы Алматы облысының білім беру саласының бюджеті 153,7 млрд. теңгені құрады. Оның ішінде білім беру нысандарының құрылысына 27 млрд. теңгеден астам қаражат қарастырылған. Өңірде 48 білім беру нысанының құрылысы мен қалпына келтіру жұмыстары жүргізілуде. Жыл соңына дейін 44 мектептің 35-і пайдалануға беріледі. Білім күнінде 24 жаңа мектеп өзінің алғашқы оқушыларына есігін ашпақ. Осы мектептердің 23-і үш ауысымда оқыту мәселесін шешетін болады. Ал 2018 жылы тағы 10 мектеп салу арқылы үш ауысымда оқыту мәселесі толықтай шешілмек. Сонымен қатар, биылғы жылы 24 мектепте күрделі жөндеу жұмыстары жүргізілгендігін атап өткен жөн.

Алматы облысы әкімінің баспасөз қызметі.

Талдықорған қаласында «Қазақстан Республикасы Мемлекет басшысының «Болашаққа бағдар: Рухани жаңғыру» мақаласының негізгі ережелері арнайы ұйымдастырылған ашық диалог алаңында түсіндірілді.
Шараға 15 жылдық тарихы бар Алматы облыстық ішкі саясат басқармасының негізі құрылғаннан бастап, бүгінгі күнге дейін басқарған жеті басшы, 16 аудан және 3 қала газеттерінің редакторлары және журналистер қатысты.
Алматы облысының ішкі саясат басқармасының негізі 2002 жылы құрылғаны тарихтан белгілі. Сол кезеңнен бастап әр жылдары ішкі саясат басқармасында еңбек еткен басшылар «Рухани жаңғыру» тақырыбында өздерінің ойларын өңірдің әр ауданы мен қаласынан келген бөлім басшылары және газеттердің бас редакторларымен бөлісті. Бұл Елбасы мақаласында көрсетілген қоғамның рухани жаңғыруындағы ұрпақтар сабақтастығының айқын көрінісі.
«Елбасы мақаласы бойынша біздің өңірде де атқарылып жатқан жұмыс шаш етектен. Ел мақтанышына айналған әйгілі тұлғалармен кездесу, тарих пен тіл тағдырын көтерген жиындар, әсіресе, латын қарпіне көшу міндетін талқылаған басқосулар «Рухани жаңғыру» бастамасы аясында өтуде», — деді ерекше дөңгелек үстелді ұйымдастырған облыстық ішкі саясат басқармасының басшысы Рустам Алпысбаев.
«Ең алғаш өңірлерде ішкі саясат департаменті құрылғанда Алматы облысының басында тұрып, идеология саласын дәл осы Жетісуда құрғанымды мақтан етемін. Талдықорған әрқашан менің жүрегімде», -деді облыстық ішкі саясат басқармасының негізін қалаған Гүлсаруар Жакубаева.
«Алматы облысында Ішкі саясат басқармасының даму қарқынына қарап отырсам, мерзім бойынша 7 жыл қызмет етіп, ең көп басқарған мен екенмін. Бұл факт мен үшін абырой. Біз басқарған уақыт ең бір күрделі, тарихи кезең болғанымен өзіндік қызықтары да болды. Ең алғаш облыста жастар мәселесін біз қолға алған едік. Биылғы Ұлт Көшбасшысы «Болашаққа бағдар: Рухани жаңғыру» атты бағдарламалық мақаласы жастарға арналғаны анық. Өйткені, болашақ — жастардың қолында. Қоғамдық сананы жаңғырудың басты басымдығы ұлтымыздың жаһандық қоғамдастықта бәсекеге қабілетті болуы екендігі сөзсіз. Бұл ретте өзіміздің бірегейлігімізді, құндылықтарымыз бен дәстүрімізді сақтауға тиіспіз. Отаныңды сүймей салт-дәстүріңді сақтай алмайтындығыңды да жете түсінген жөн», — деп 2008 — 2014 жылдардағы облыстық ішкі саясат басқармасының басшысы — Сүлейменова Гүлжиян атап өтті.
Ал, 2015-2016 жылдары облыстық ішкі саясат басқармасының басшысы болған, бүгінгі күні облыстық «Нұр Отан» партиясы төрағасының бірінші орынбасары Ғалиасқар Сарыбаев: «Білім – бүгінгінің басты қажеттілігі. Дүниетанымы кең адам ғана бәсекеге төтеп береді. Көшбасшымыздың өскелең ұрпақты білімге құштар болуға үндеуінің сыры осында. Білім алуды культке айналдыру, басымдыққа айналдыру біздің қоғам үшін өте қажет. Сауатты ел ғана дамыған 30 елдің қатарында болмақ. Сондықтан рухани бай адам – кез келген ақпаратты тез қабылдап, заман талабына сай жылдам меңгеріп, көш ілгері жүріп отырмақ», — деді.
Ашық диалог алаңында Елбасының мақаласы қазақ халқын жарқын келешекке бастайтын білім, ғылым, руханият, туған жер, тіл мәселесіне қатысты айтылған нақтылы міндеттер елдің ұлттық кодын айқындап, ұлттық болмысын сақтап қалуға жол ашатыны жөнінде сөз қозғалды. Қатысушылар тарапынан «Рухани жаңғыру» қазіргі Қазақстанға қажет екені айтылып талқыланды.

Бүгін Талдықорған қаласында тұрғын үй кезегінде тұрғандар мен «Тұрғынүйжинақбанкі» АҚ-ның салымшыларына жаңа көпқабатты үйлердің 168 пәтері берілді. Мемлекеттік «Нұрлы жол» бағдарламасымен салынған несиелік тұрғын үйлердің кілтін облыс әкімі Амандық Баталов пен «Қазақстанның Тұрғынүйжинақбанкі» АҚ Басқарма төрайымы Ләззат Ибрагимова табыстады.
Қоныс иелерін құттықтаған облыс әкімі А. Баталов Талдықорған қаласын дамытудың жоспарына, соның ішінде 7-шағын ауданда салынатын құрылыс нысандарына қысқаша тоқталып, жаңа баспаналарына құтты болсын айтты.
— Халықты тұрғын үймен қамтамасыз ету туралы Елбасының тапсырмасына сәйкес облыста ауқымды жұмыстар атқарылып жатыр. Талдықорған қаласы да күннен күнге көркейіп келеді. Соның бір айғағы – бүгін жаңа пәтерлерге қол жеткізіп отырсыздар. Облыс орталығындағы жаңа баспаналарыңыз құтты болсын. Шаңырақтарыңыз шаттық пен қуанышқа, отбасыларыңыз бақыт пен ырысқа толсын! – деді А. Баталов. «Қазақстанның Тұрғынүйжинақбанкі» АҚ Басқарма төрайымы Ләззат Ибрагимова да көпшілікке ізгі тілегін жеткізіп, қуаныштарына ортақтасты. Жаңа қоныс иелері де оңды мемлекеттік саясаттың нәтижесінде баспаналы болу бақытына ие болып отырғандарын айтып, Президенттің атына ризашылықтарын жеткізді.
Кілт тапсыру салтанатының алдында облыс әкімі А. Баталов пен «Қазақстанның Тұрғынүйжинақбанкі» АҚ Басқарма төрайымы Ләззат Ибрагимова жеке тұрғын үй құрылысын дамыту туралы өзара ынтымақтастық меморандумына қол қойды.
Л. Ибрагимованың айтуынша, «Нұрлы жер» бағдарламасы шеңберінде қос тарап келісімі бойынша жыл соңына дейін Талдықорғанда банктің қатысуымен коттеджді қалашықта 48 жер үй салынып, пайдалануға беріледі деп жоспарланып отыр. Ал мұнан кейінгі екі жыл ішінде осындай жеке тұрғын үйлер санын 600-ге жеткізу межеленген.
«Нұрлы жер» бағдарламасы негізінде жеке тұрғын үйлер салынатын жер алаңдарының инженерлік инфрақұрылымын жасауға толық қолдау көрсетеміз. Ең бастысы оның нәтижесін халық көреді», — деді Амандық Ғаббасұлы.
Аталмыш банктің Алматы облысында 43 мыңнан астам салымшысы бар, яғни облыс республика көлемінде салымшыларының саны жағынан алдыңғы қатарда. Бұл — Алматы облысының орталық қаласында ғана емес, Қаскелең, Талғар сияқты шағын қалаларында да инфрақұрылымның жақсы дамығанының нәтижесі. «Тұрғынүйжинақбанкі» АҚ Өңірлерді дамытудың 2020 жылға дейінгі бағдарламасы шеңберінде облыста 74,1 мың шаршы метр тұрғын үй салған. Соның ішінде «Тұрғындардың барлық санатына арналған тұрғын үй» бағыты бойынша 41,1 мың шаршы метрлік 12 үй немесе 609 пәтер салынса, «Жас отбасыларға арналған тұрғын үй» бағыты бойынша 33 мың шаршы метрлік 7 үй немесе 593 пәтерді пайдалануға берілген. Жалпы 2017 жылы 6 үй салу жоспарланса, соның 4-еуі Талдықорғанда болмақ.

Мемлекет басшысы Н.Назарбаевтың «Болашаққа бағдар: рухани жаңғыру» атты мақаласының бағыттарын талқылау мақсатында Талдықорған қаласында дөңгелек үстел өтті. Оған Алматы облысының ішкі саясат басқарма басшысының орынбасары Сапарғалиев Ж., «Жетісу» газетінің бас редакторы Әміре Әрін, «Огни Алатау» газетінің бас редакторы Идигов Атсалим және саяси партиялар, Үкіметтік емес ұйымдар мен тәуелсіз БАҚ өкілдері қатысты.
Елбасымыздың мақаласында ұлттық сананы жаңарту арқылы рухани жаңғырудың қыр-сыры тізбектеліп көрсетілген. Рухани жаңғыру – кезең-кезеңімен атқарылып жатқан елдегі реформалардың жалғасы. Технологиялық жаңарумен шектеліп қоймай, адамның сана-сезімін қатар жетілдіруге мемлекет баса мән берген. Елбасы ұлттық сана мен ұшқыр ой, білім мен бәсеке, прагматизм мен ұлттық бірегейлікті сақтау қағидаттарын мақаласында тізіп берді.
«Бұрын техника мен экономика бәрін шешеді деп ойлаушы едік. Қазір бәрі өзгеріп жатқан заманда ұлттық сана бірінші орында. Егер халық өте білімді болса, ол кез келген нәрсеге аз уақытта бейімделіп, өнеркәсіп, экономика, саясат жөнінен сауатты болмақ. Сондықтан бірінші жетістікке тез жететін экономика емес, ұлттық сана болады. Сонымен қатар, таяудағы он жылда өмір салты түбегейлі өзгереді. Елбасы бұған дайын болу керектігін айтып, жаңа тұрпатты жаңғыртудың ең басты шарты – сол ұлттық кодты сақтай білу керектігін баяндаған», — деді Әміре Әрін.
Жиын соңында қатысушылар өзара пікір алмасып, жобаларға бастау болатын жаңа идеяларымен бөлісті

Талдықорған қаласында «National Geographic» ұсынған үздік 50 сурет» тақырыбында ұйымдастырылған фотокөрме өз жұмысына кірісті. Аталмыш көрме көрсетілімдерін өңірлер ішінен бірінші болып Жетісу жерінен бастады. Бұл туралы Алматы облысының өңірлік коммуникациялар қызметінің көшпелі баспасөз-конференциясында айтылды.
Шараға Облыстық Ішкі саясат пен Туризм басқарма басшылары, «National Geographic Қазақстан» журналының өкілдері мен осы кездесуге арнайы Қытайдан шақыртылған белгілі фотограф Екпін Хасенжан қатысты.
Оқушылар сарайында бір айға жалғасатын фотокөрмеде 128 жылдық тарихы бар суреттердің ішінен ең үздік 50 сурет іріктелініп алынды. Онда Стив Маккарридың дүниені шарлаған әйгілі «Ауған қызы» суретінен бастап, Джейн Гудоллдың таңғажайып кадрлары, Томас Аберкромбидің 1965 жылы түсірілген Мекке көрінісі және «National Geographic» тарихындағы басқа да танымал фототуындылар паш етілді.
«Көрмедегі мақтанышпен айта алатын суреттер өте көп. Соның бірі Эмори Кристоф тірілткен Титаникті 10 000 ваттық жарықпен 4022 метр тереңдікте түсірілген суреті. Бұл сурет барлық ұлы істерге бастау бола білді. Себебі, осы бір тамаша туындыдан кейін Титаник тарихы қайта зерттеліп, әйгілі «Титаник» фильмі түсірілді», — деді «National Geographic» журналының жауапты редакторы Әділханов Мақсат.
Шара соңында «National Geographic Қазақстан» журналының қызметкерлері Алматы облысының ең көрікті жерлеріне экспедицияға аттанады. Олар Әулие ағаш, Шарын каньондары, Көлсай көлдері, Қайыңды көлі, Торайғыр тауы, Есік қорғаны, Таңбалы мемориялдық кешені секілді тарихи-мәдени орындар.

«Нәтижелі жұмыспен қамтуды және жаппай кәсіпкерлікті дамыту» мемлекеттік бағдарламасы шеңберінде Алматы облысында биылғы жылдың сәуір айынан бері 4275 жұмыссыз азамат қысқа мерзімдік оқытуға жіберілді. Бүгінгі бүнге 1730 адам оқуды аяқтап, соның 741-і жұмысқа орналастырылды, — деп хабарлайды Алматы облысы әкімінің баспасөз қызметі.
Облыстық жұмыспен қамтуды үйлестіру және әлеуметтік бағдарламалар басқармасының мәліметіне сүйенсек, қазіргі кезде Кәсіпкерлер палатасымен бірлесіп, жұмыссыз азаматтарға қысқа мерзімді курстарды кәсіпорындар жанындағы оқу орталықтарының базасында ұйымдастыру жүйесі енгізілуде. Бұл мақсатта 5 оқу орталығы іріктеліп алынды. Атап айтқанда, Талдықорған қаласында «ТАТЭК» АҚ, «Қайнар» ЖШС, «Байтұрғанов» ЖК, Қапшағай қаласында «КНАУФ Гипс Қапшағай» ЖШС, Талғар ауданында «Байсерке Агро» ЖШС. Аталмыш өндірістік базаларда курс тыңдаушылары электромонтер, электрослесарь, аккумуляторшы, ірі қараны қолдан ұрықтандыру технигі, нэйл стилист, визажист, шаштараз кәсіптері бойынша тәжірибелерін шыңдайды.
Биылғы жылы осы оқу орталықтарының базасында 200 адамға оқыту курсы ұйымдастырылмақ. Бүгінгі күні жергілікті жерлердегі жұмыспен қамту орталықтары тарапынан аталмыш мамандықтарға оқытуға деген жұмыс берушілердің сұраныс деңгейі анықталуда.

Алматы облысы әкімінің баспасөз қызметі

«Алматы — Бішкек» автожолының 786-790 шақырымы учаскесін, яғни «Алтын Орда» базары маңындағы 3,8 шақырымдық жол кеңейтілетін болады. Осы маңдағы көлік кептелісін шешу үшін облыс әкімдігінің ұсынысымен үкімет тарапынан қолдау тапқан ауқымды жоба биылғы жылы жүзеге асырыла бастайды. Күрделі жөндеу барысында жол үсті көпірлері мен жол бұрылыстары да қарастырылмақ. Бұл туралы кеше журналистерге берген сұхбатында облыс әкімінің орынбасары А. Байжанов айтты, — деп хабарлайды Алматы облысы әкімінің баспасөз қызметі.
«КазАвтоЖол» мекемесінің Алматы облыстық филиалы директорының орынбасары Нұрхат Ақылтаевтың айтуынша, «Алтын Орда» базары маңындағы автожол арқылы тәулігіне 50 мың автокөлік жүреді. Мұндағы кептіліс мәселесін шешу мақсатында аталмыш жолдың 16-19 шақырымдары аралығы 8 және 10 жолақты болмақ. Оның екі жолағы транзиттік көліктерге арналса, екі жолағы жергілікті маңға жүретін көліктерге, ал бір жолағы автобусқа, яғни қоғамдық көлікке арналады. 16-шы шақырымда бұрылыс эстакадасы қарастырылады.
«Алматы — Бішкек» автокөлік жолының 786-790 шақырым учаскесі бөлігін кеңейтудің бұған дейінгі жобасына биылғы жылы бірқатар толықтырулар енгізілген болатын. Атап айтқанда, жобаның екінші кезеңінде 18 мың тұрғыны бар «Асыл Арман» ТК тұрғындарының өтініші бойынша аталмыш кешеннен қалаға бұрылатын «Труба» типті жер үсті жолы салынса, сонымен қатар Райымбек ауылы тұсында тағы бір, жоба бойынша төртінші жер үсті жолы қарастырылатын болады. Екі кезеңінің де жобасын «АстанаСтройПроектСервис-М» ЖШС дайындауда. Тамыз айының соңына дейін «МемСараптама» мекемесінің оң қорытындысы шығады деп жоспарланған. Жобаны толық жүзеге асырудың алдын ала есептеу бойынша құны 12 млрд. теңгеге жуық деп жобаланып отыр. Биылғы жылға 800 млн. теңге бөлінген. Күрделі жөндеу жұмыстары 2019 жылы толығымен аяқталады деп күтілуде.
Жобаны іске асыру мақсатында мемлекет қажеттілігі үшін жер телімдерін алу жұмыстары жүргізілуде. Алуға жататын облыс аумағындағы 53 учаске болса, бүгінгі күнге соның 5-еуі мемлекеттік жер учаскесі, 30-ы алынған, 13-інде алу процесі жүріп жатыр, ал 5 жер учаскесінің иелерімен келіссөздер жүргізілуде.
Облыс әкімінің орынбасары А. Байжанов күрделі жөндеу жұмыстары кезінде сол маңдағы іргелі нысандардың жұмысына кедергі келтірмеуді, уақытша жолдардың бағытын келісіп жасауды тапсырды. «Бұл жоба өз кезегінде көлік кептелісін шешуге, жаяу жүргіншілердің қауіпсіздігіне оң ықпалын тигізетін болады», — деді А. Байжанов.

Алматы облысы әкімінің баспасөз қызметі.

Орталық коммуникациялар қызметі Алматы облыстық ішкі саясат басқармасымен бірлесіп Талдықорған қаласында «QazTalks – ашық әңгіме алаңы» жаңа жобасын өткізді. Жетісу жерінде болған ашық әңгімеге түрлі саланың көшбасшылары, қоғамға белгілі адамдар қатысты. Орталық коммуникациялар қызметінің Алматы облысы аймақтық бөлімі тұңғыш рет бейресми баспасөз шарасын өткізуде.
«Орталық коммуникациялар қызметі» РММ директоры Артур Нығметов өзінің алғы сөзінде: «QazTalks ашық әңгіме алаңы» ҚР Президенті Н.Ә. Назарбаевтың «Болашаққа бағдар: рухани жаңғыру» атты мақаласында көрсетілген бірқатар идеяларды жүзеге асыруға арналған жиын екенін атап өтті. Сонымен қатар, Орталық коммуникациялар қызметінің мемелекеттің ақпараттық саясатын дұрыс бағытта жүргізетін іс-шаралары туралы айтты.
Саясат майталмандары «Астана» халықаралық қаржы орталығының атқарушы директоры Нұрбек Саясат, «Сакралды Қазақстан» ғылыми-зерттеу орталығының басшысы Берік Әбдіғали өз ойларын ортаға салды.
Ал ғылым-білім саласын сараптаған ҚР ҰҒА корреспондент-мүшесі, А.Байтұрсынұлы атындағы Тіл білімі институтының директоры Ерден Қажыбек болды. Ерден Қажыбек аудитория алдында латын қаріпіне көшу тиімділігі жайлы ой бөлісті. Спикердің айтуынша, 1926 жылы Қазақстанда қайтадан Жаңа әліпбешілер қоғамы құрылып, оның құрамында Ж.Чомбалов, Т.Рысқұлов, Т.Шонанов, А.Байсейітов, Б.Майлин болған. 1927 жылы 19 қарашада Қызылордада латын әліпбиін қолдайтын «Жаңа қазақ» әліпбиінің орталық комитеті құрылады. Алайда, қызыл саясаттың құрбаны болған бастама аяқсыз қалған.
Бүгінде ҚР Президенті Н. Ә. Назарбаевтың «Болашаққа бағдар: рухани жаңғыру» атты мақаласында көрсетілген міндеттердің бірі − латын әріпіне көшудің тиімділігін өз баяндамасында түсіндіріп берді. Сонымен қатар, белгілі журналист-жүргізуші, «Жетісу» телеарнасының директоры Бейсен Құранбек пен аталған арнаның «Жаңалықтар» қызметінің жетекшісі Есболат Айдабосын «QazTalks» алаңына шықты.
Спикерлер ақпараттық кеңістіктегі жаңа коммуникациялар туралы өз тәжірибе- идеяларымен бөлісті.