Қазақстандық патриотизм тұғыры – Отансүйгіштік

«Жастар Отанға» жастар лагерінің қатысушылары жоба аясында қазақтың белгілі қаламгері, талантты жазушы Мархабат Байғұтпен кездесті. Бұл басқосу Ел Тәуелсіздігінің 25 жылдығына арналды. Мақсат — жастар арасында ұлы тұлғалардың еңбегін насихаттау арқылы еліміздің 25 жылда жеткен жетістігін дәріптеу. Тағылымы мол кездесуде жазушы шығармаларын оқыту арқылы әдебиет құндылықтарын арттыру тілге тиек етілді.

Кездесу барысында жазушы жиналған жастарға Абылай хан заманы өткенсін-ақ дертті болған қазақтың тарихи жадысы мың соққыға ұшырап, аңсап қол жеткізген егемендігіміздің қадір-қасиеті туралы айтып өтті. Сонымен қатар, өзге өңірлерден келген студенттерге қаламгер киелі оңтүстік жері, соның ішінде Төле би ауданының тарихымен де таныстыра кетті.

Кештің соңында отырысқа қатысқан жастар өз тарапынан қызықты әңгімесі үшін Мархабат Байғұтқа алғыстарын жаудырып, өнерлерімен бөлісті. Бірі әдебиеттен жыр шертсе, енді бірі қара домбыраны қолға алып әндетіп берді.