Аршат: МЕН ЕРЕКШЕ БАЛАМЫН БА?

Блог - asaubota: Аршат: МЕН ЕРЕКШЕ БАЛАМЫН БА?Жақында "Ұлан" газетінің бір журналисінен хат алдым:

Сәлеметсіз бе, Аршат аға! Мен әл-Фараби атындағы Қазақ Ұлттық университетінің журналистика факультетінде оқимын. Республикалық балалар мен жасөспірімдерге арналған "Ұлан" газетіне мақала жазып тұрамын. Жақында ескі газет-журналдар ақтарып отырып, жақсы бір материалға көзім түсті. 1989 жылы «Пионер» журналында «Аршат: мен ерекше баламын ба?» деген сіз туралы мақала оқыдым. Қазір сіздің қазақ интернетіне қосып жүрген үлесіңізді балалық шағыңыздағы сол бір материалмен сабақтастырып мақала жазуға тапсырма берген еді газет ұжымы. Егер сұхбат беруге келіссеңіз, бір-екі күнде сұрақтарды почтаңызға жіберейін. Сау болыңыз!

1988 жылы шыққан мақаланы сканерлеп, маған салып жіберіпті. Сіздермен бөлісейін дедім:

***

Иә, Аршат Оразов шынында да ерекше бала ма? Ол қазір жеті жаста. Бірақ 3 класта оқиды. Сурет салуды жақсы көреді. Атасы мен әжесін керемет сағынады. Ауылды аңсайды. Ақтөбеде тұрады… Бір сөзбен айтқанда, бұл мақала ерекше баланың өмірі, өнері, таланты туралы сыр.

Үлкен үзілістің кезі болатын. Класқа Нұршагүл айқайлап кіріп келді.

— Балтұрсын апай пионерге өтуге дайындала беріңдер деді!
Оқушылар жан жақтан шу ете қалды:
— Алақай!
— Галстук тағамыз!
— Пионер боламыз!

Көптен күткен күн. Мереке. 3-ші класс оқушыларының қуанышында шек жоқ. Тек сабақты нашар оқитындардың ғана көңілдері пәстеу: «екіліктерін» ойлап алаң. Пионер қатарына тәртіпті, үлгілі, сабақ үлгерімі жақсы балалар ғана өтуі керек қой.

Ал Аршаттың «қайғысы» тіпті ала-бөле. Оның тәртібінде мін жоқ. Сабақтардан алып жүрген бағасы кілең «бестік» пен «төрттік». Бірақ 3-ші класта оқығанымен, жасы жетіде… қалай болар екен? Бәрі пионер қатарына өтіп, жалғыз өзі октябрят болып қала ма? Дружина советі қандай шешім қабылдайды? Қиын жағдай. Бәріне өзі кінәлі. Неге? Өз қатарынан озып, жеті жасында үшінші класта оқып жүргені үшін бе?

Иә, Аршат Ақтөбедегі мектеп-интернатқа шалғайдағы ауылдан – Ойыл ауданының «Жекенді» совхозынан келді. Атасы мен әжесінің қолында өсті. Кішкентайынан ерекше зеректігімен, алғырлығымен көзге түсті. Үш жасында әріп таныды. Төрт жасында кіиапты өздігінен жүргізіп оқитын болды. Біртүрлі. Тосын. Достары асыр салып ойнап жатқанда, ол үйде шұқшиып кітап оқып отыратын. Әсіресе сурет-кітапшаларға құмар, оқи-оқи бір сөзін қалдырмай жаттап алады. Ауылдағылар оны «кішкентай академик» деп атап кетті. Оның мұндай құрметті атаққа ие болуына Ораз атасының көп әсері болды. Ол немересін жанынан тастамай жүріп, ерте хат танытты. Әсіресе әжесінің еңбегі зор. Әжесі Аршатты сан алуан аңыз, ертегілермен сусындатты. Ол екі сөзінің бірінде «ертең мектепке барғасын, бұдан да қызық ертегілерді оқисың» деп отыратын. Аршат сол ертегілерді оқуға асықты. Кітаппен осылайша ерте достасты.

Ол жасы әлі беске толмағанына қарамастан мектепте оқуды армандады. Ал бірінші класқа жеті жастан қабылдайды. Дегенмен Аршаттың арманы орындалды. Бір күні облыстық мұғалімдер білімін жетілдіру институтынан маман-педагогтар «Жекенді «мектебінің жұмысын тексеруге келді. Сәті түсті. Жергілікті ұстаздар Аршатты мамандардың сарабына салды. Олар баланың зерделілігіне таң қалды. Мәселе сол жерде шешілді. Аршат комиссияның шешімімен бірінші класқа қабылданды.
Дружина советі не істерін білмей дағдарды. Осы кезде пионер өмірін қайта құру ережелері шыққан-ды. Оларға әр жастағы пионер отрядын құру жөніндегі ұсыныс керемет ұнады. Несі бар. Жасы жетіде болса да, Аршат пионер болуға әбден лайық. Ал Аршат одан бейхабар еді.

Салтанатты сәт жақындаған сайын мазасы қашып, тіпті бір-екі рет жылап та алды. Ақыры бәрі жақсы аяқталды. Дружина советінің арнайы ұсынысымен Аршат пионер қатарына қабылданды. Сондағы оның қуанышын көрсең. Жүзі бал-бұл жанып: «сенімді ақтауға тырысамын», — деді. Бұл оқиға 1988 жылдың көктемінде болған еді.

Аршат Оразов туралы ұстаздары мен достары жоғары пікірде. Мектеп-интернат директоры Мақсат Құсайынов зерделі шәкірт жөнінде былай дейді:

— Менің ойымша Аршаттың қазіргі білім жолындағы аяқалысы оның болашағынан көп үміт күтуге болатындыңын көрсетеді. Оған аялы алақын, қамқорлық қажет. Оны оқыту – әр педагогтан ізденімпаздықты, білгірлікті, керек десеңіз сезімталдықты, тапқырлықты қажет етеді. Мақсатымыз оның талант-қабылет ұшқынын өшіріп алмау.

Отыз екі жылдан бері тәлім-тәрбие беріп келе жатқан тәжірибелі ұстая Сәуия Тұрмағамбетова да Аршат туралы мақтаныш сезімімен әңгімеледі:

— Аршат бірінші класқа оқу жылының жартысы артта қалғанда қабылданды. Үшінші тоқсанның сабақтары басталып кеткен-ді. Қауіптенгенім рас. Үлгеріп кете ала ма? Бірақ алғашқы күннен-ақ қаупіме орын қалмады. Көп жылғы педагогтық тәжірибемде мұндай зерек баланы алғаш рет көрдім. Өзінен жасы үлкен балалардан ой-өрісі кең болып шықты. Аршаттың ең басты ерекшелігі – оның тілі керемет дамыған. Сөздік қоры бай. Ана тіліміздің уыз дәмі сезіледі. Кітапты өте жылдам оқиды, әрі түсінігін мүдірмей айтып береді. Бейжайлық, селқостық жоқ. Бос қарап отырмайды. Жан-жақты. Өнерлі. Қолы қалт еткенде сурет салумен шұғылданады. Ауыл, дала туралы әңгімелегенді ұнатады. Сірә, бала емес пе, ауылдағы әжесі мен атасын сағынатын болса керек. Ерен қабылетінің арқасында бір жылда екі класты тәмәмдады. Күдіктенгендер де болды. Бірақ арнаулы комиссия құрылып, шәкірт білімінің мұндай «секіріске» лайық екенін дәлелдеді.

Аршаттың Рита, Римма, Майя есімді үш қарындасы бар. Рита бірінші класта оқиды. Тіпті үш жасар Римма да әріп таниды. Бәрінің ұстазы – Аршат. Үйге келсе болды, бауырларына білгенін үйретіп жүреді. Бәрі бірге «ұстаз-шәкірт» болып ойнайды. Ойындары кәдімгідей сабаққа ұқсайды.

Аршаттың арманы – суретші болу. Қиял құсы ақ қағаз бетінде сан алуан бояулар тілінде сөйлейді. Көбіне ауылды, даланы салады. Оның суреттерінен шағаладай аппақ киіз үйлерді, кең дала төсінде өріп бара жатқан қойларды, құйғытып шапқан тұлпарларды көресің. Сонадайда таяғына сүйеніп шопан тұрады. Сайраған жол, соқпақтар. Ыстық суреттер…

Аршат кластың оқу секторы. Биылғы оқу жылында отряд советінің председателі Болат Абылаев оған пионерлік жауапты тапсырма берді. Ол – сабақ үлгерімі төмен оқушыларға көмектесуі керек. Қазір Аршат пионерлік тапсырманы ойдағыдай орындау үстінде, қамқорлығына алған балалардың оқу үлгерімі жақсарып келеді.

Ал, Аршат болса ауылды аңсап, атасы мен әжесін сағынып, мектеп-интернатта білім бұлағынан сусындап жүр.

Әмір ОРАЛБАЕВ
Ақтөбе қаласы

Блог - asaubota: Аршат: МЕН ЕРЕКШЕ БАЛАМЫН БА?

***

Қазір оқып отырсам, мақалада көп нәрсе қате жазылған екен. Сол кездің талаптарына сай пионер портретін жасауға тырысқан журналист. Яғни мені үлгілі, ауылдан шыққан, ата-әжесін сағынатын, пионер болуды сүйетін қылып көрсеткісі келген. Ал, шынында қалай еді? Мен мектепке қабылданған кезде ата-әжем марқұм болып кеткен еді, ал мақалада пионердің ата-әжесі бар болғанын қалаған сияқты автор. Пионерге өту туралы да қатты уайымдаған жоқпын, «сені алады» деді, болды. Нашар оқитындарға көмектескен жоқпын. Қарындастарыммен де мұғалім болып ойнамайтынмын, бұл өтірік енді :) Шалдың баласы болғасын оларға көп жолай бермейтінмін. Ауылда «кішкентай академик» атануым да өтірік, тек өзіміз және көршілеріміз болмаса ешкім біле бермейтін менің оқи алатынымды. Көршіміз мектепте мұғалім болғасын, үйіне методистер келген кезде көрсетіп жіберген, бестегі бір бала бар, судыратып оқып беред Бозінгенді деп. Үйде отырып, кітап оқи береді дегені де артықтау. Керісінше кітаптардан оқыған ойындарымды ойнататынмын үй жақтағы балаларға, ойындардың ұйымдастырушысы болдым. Ал мектепте жасым кіші болғасын көп әлімжеттік көрдім, айтатын ағам да болмағасын, өзіме өзім тұратынмын төбелестен қашпай. Талай рет бетім-көзім көгеріп жүрді.
Бөлісу:

77 пікір

sigma
Дегенмен, Арчи, порстой баласың ғо.
мына
Біртүрлі. Тосын. Достары асыр салып ойнап жатқанда, ол үйде шұқшиып кітап оқып отыратын
деген жерлерін оқығанда, әлгі бір нәрсені шұқып отырған фотон елестеп кетті көз алдыма.
Негі бала кезден шұқынып өскесін ғой қазір код (жаман сөз емес) шұқып жүргенің қодар кодер болып
nurbergen_makym
Гипер бала туралы мақалада гиперболаға көп орын берген, десейЧ. Ия, ондай-ондай болып тұрады. Журналистикаға мен сияқты қыртқиялилар келгенде, әсіресе. «Жазарман синдромы» деуші ме ед, ойдан қосып, «краскісін» қоюлататыны…
sigma
Гиперболоид болып кетпесе болар тегі
sigma
Шаш ал десе бас алатындар журналистикада да бар екен ғой.
Асыра сілтеушілікпен айналысуды қашан қоямыз осы
Erkekyz
Кішкентай кезіңізде сүйкімді де бала бопсыз ғой. :))
asaubota
қазір қорқынышты деп кім айтты? :)
sigma
Солай Арчи, админдерді ешкім сүймейді, соның ішінде сисадминдерді
Erkekyz
Жоқ а, админдерге дауым жоқ.:)))
blackbeard
Казір де сүп-сүйкімді:)
Gastarbaiter
Бұл жерде енді Аршат кішкене ұялып отырған соң, кішіпейілдік танытып «асыра-сілтеді» деп отыр. Қазіргі Аршат Оразовтың балалық шағы кемінде клюква сүйер журналисттің суреттегеніндей болуы керек.
aktobe88
мәәәәәә, админ ағай, жазбаның басын оқып бастағанда: қандай мақтаншақ едіңіз… деп коммент қалдырайын деп отырғам, соңына келсем бәрі басқаша:-))))
Malimetter
Мәссаған, міне қызық!
Аршат кластың оқу секторы
дегені мектептегі белсенділік дегенді еске салады екен. Тазалық секторы деген де бар еді тырнақ тексеретін :)
patick
… тіпті бір-екі рет жылап та алды.
админ ағай жылауық :)

Аршаттың арманы – суретші болу.

Аха, қазір аса танымал суретші :))))))))))))))))))
asaubota
негізі әрі қарай жалғастырғанымда суретші болып кетуге болатын еді :)
Zere
Мен де кішкене кезімде зерек болдым деп мақтанып қояйыншы ))) 5 жасымнан оқи бастадым, бір оқығанда жаттап алатын едім. Бірақ жазуым жаман болды.)
Қарындастарыңның аттары күшті екен. Кім қойған? )
sammita
күшті! Аршат-үлгілі пионер:))
Nurgisa
Үйтіп қойыпты, бүйтіп қойыпты деп әрлі-берлі қотырды қаси беру жоқ. Әмір Оралбаев ағамыз асыра сілтеп жазса, өзің сияқты үлгерімпаз ұлды өзгелер өнеге тұтса деген шығар. Иә, іштей-сырттай қиқар да болған шығарсың. Бірақ эрудиция тұрғысында замандастарыңнан оза туғандығыңды паш етіп, тұлғауи портретіңді мейлінше жамап-жасқағаны шығар. Әдемі мақала. Иландым.
Marco
Воооот! Осы дұрыс пікір! Әмір ағайды, марқұм, жақсы танығандықтан айтып отырмын
akpatscha
Беу, бееееууу. Админ ағай потенциалын бес жасынан бастап көрсеткен екен…
Авторды жақсы білем, осыдан үш жылын бұрын марқұм болып кетті ол кісі. Ақтөбелк журналист. Біздің шалдың курстасы… Мына мақаланы "Ұланға" лаықты етіп қатырып жазыпты. Жас балдарға бояуын осылай бояуын қалыңырақ қып жазған қызыты болады емес пе?! (Бір-екі рет жылап алды дегеніне қатысты айтқаным ғо).
omarbirat
Мақаладан гөрі әдеби шығармаға көп ұқсайды екен. Қосып жазса, басқаларға үлгі болсын дегені шығар. Екінің бірі немесе үштің бір жарымы үш жастан әріп танып, бірден үшінші класқа секіре бермейді :)
TOTY
Несі бар, мақала да, сурет те тамаша шыққан :)
asaubota
марқұм Әмір ағайды танимын ғой. редакция солай тапсырғасын солай жазған болуы керек. журналды оқыған бала кейіпкердің ата-әжесі бар болғанын, пионерге өту үшін уайымдағанын, жылағанын, ауыл-кең дала суреттерін салғанын қалайтын болса керек. ал шын мәнінде олай емес еді. біздің ауылда ондай керемет дала, киіз үйлер болған жоқ әрине :)

мен сияқты ерте оқығандар көп шығар. тек маған сәт түсіп, жолым болып кеткен. ауылға келген методистер байқап қалған. кейін менде бәрі болды: атақ-даңқ, республикалық және мәскеулік Труд газетінде мен туралы мақала, қаланың жаңа микроауданындағы 3 бөлмелі үй, Артекке жолдама.
кейін Ақтөбеде гимназия ашылды. мені соған жіберді, жаңа ашылғасын ба еш ерекшелігі болған жоқ. керісінше оқуға қызықпай қалдым, ешкім дұрыс айналыспады. сурет те жайына қалды, оқу және мұғалімдерді мазақ қылып кеттім де дұрыс оқымадым. одан кейін жаңа ашылған қазақ-түрік лицейі. онда да білім әлі дұрыс қалыптаспағасын түк үйренбей шықтық.
бірақ өзімді жолым болғыш деп есептеймін. қалаған нәрселеріме еш жалынбай жетіп жатамын.
Nurgisa
Мұндайды селф мейд мән дейді. Лайым алар биігің бұдан да көп болсын, құрдас! Сен еңсерген биіктерді құдай қаласа бала-шағаң да еңсерсін. Өзің сияқты болса жаман болмайды.
asaubota
рахмет. үйдегі тентек менен асатын сияқты. мен сияқты еріншек емес жыбырлақ және памяты сұмдық! бейнелеу қабылеті де жақсы дамыған сияқты.
Nurgisa
Әминді балабақшаға берсеңдер, қатарластарымен тезірек ысылатын сияқты. Зерегіне зерек. Өткендегі «прасти миняя!» деуіне қарап лингист болады-ау деп топшылап ем… :)
sammita
оқуды қойШ, 3 бөлмелі үйді айтсиш:))
asaubota
1990 жылы болған оқиға. 4 балалы отбасы ғой деп 5 бөлмелі үй ұсынған екен, немесе жаңа үйден бір 2 және бір 3 бөлмелі ұсынған екен. әкем оның бәрін не істейміз, немен толтырамыз 3 бөлме жарайды депті :)

кейін айтып отырады "қайдан білейік заманның мұндай болатынын" деп :)
qisyq
лібәәә…
кезінде алмай кеткен, жүз долларлық жер телімдері есіме түсіп, қорс-қорс жыладым…
Zhan
кейін айтып отырады "қайдан білейік заманның мұндай болатынын" деп  
осылай қаншама өкінген отбасылар бар. Менің де біраз туысқандарым, әпшелерім қалада мүмкіндіктері бар болса да дүние, үй жинамай жүре бергендерін айтып отыратын. Мен сонда олардың үй мен дүниеден бұрын, соншалықты бейғамдығына, қанағатшыл, сенгіш болғандарына таң қалдым.
Ал, "Ұлан" газетінің жазғандарының кейбірін жоққа шығарыпсың. Оралбаевтың стиліндегі мақаламен ауыратындар, сондай мақаланы оқығысы келетіндер әлі де бар ғой. Адам не айтты, дәл солай газетке жазып берсең, «Тым қарабайыр, дұрыс емес, айтқанын айтқандай жазып әкелгенің не? Мә, қайтадан жазып ап кел» дейтін главредтер әлі көп. Сосын краскі қосып жазып әкелсең, ыржиып мәз болады. Әдебиет пен журналистиканы шатастыратындар…
KingBilly
Күшті-күшті))
Мен 4-тен бастап оқыдым, мектепке асықтым.
Бірақ біздің заманда пионер деген бітті))
gunner
Өзіңнен үлкендермен оқыған қалай екен? Мен өз баламды қанша вундербала болса да бермейтін едім жоғарғы классқа. Бұл балалық, жастық шақтан айырылғандай болады, меніңше. Бірақ бір екі жас білінбей кететін шығар. Он үш жасында универде оқитын балалар бар, вот солардың ата анасын түсінбеймін
omarbirat
Қатарластары «а», «бы»-ларды жаңадан өтіп жүргенде, оқу бағдарламасын ерте меңгеріп алған баланың сабақтан іші пысады, негізі.
akpatscha
Бес жасымда оқуды үйреніп алған едім. Ең бірінші рет әкем Махамбеттің «Ереуіл атқа ер салмай» деген кітабын сатып әперген. Сол кітаптан жаттағандарым, тіпті нешінші беттерін қайырып қойып оқығаным да әлі күнге дейін есімде қалыпты.
Кейін 1 сентябрьде әліппені алып келдім де, киімімді шешпей жатып басынан-аяғына дейін оқып тастадым. Негізі, мені құртқан осы болды. Мектепте басқалар әріп үйреніп жатқанда, ішім пысып отыратын. Үйде бір-екі сынып жоғары оқитын тәтелерімнің оқулығын оқып, тіпті есептерін де шығаратынмын. Содан дандайсып, жалқаулыққа ұрынған сияқтымын.
omarbirat
Бастауыш кластарды корридорда өткізгенмін. Ішім пысқанда, сұранбастан шығып кете беретінмін. Бетіммен кеткенмін ғой :)))
Zhan
Біздің кластың да жүгермектері осындай еді. Қалай мұғалімнен қорықпайтынын…
asaubota
өз қатарларымен оқығаны дұрыс деп ойлаймын. өйткені бала кезде балаға 1 жастың өзі кәдімгідей білінеді. естеріңізде болса алтыншы класта оқып жүрген кезде, жетіде оқитындардан қорыққан шығарсыздар?
үлкендердің арасында жүріп, басқа нәрселерді де ерте көре бастайды. мысалы өз жасымнан бұрын секс туралы біле бастаған бала психикасына дұрыс па? басында түсінбей жүресің, сосын үйрене бастайсың. бір рет апай тек ұлдарды жинап алып, жиналыс істеді. қыздардың неге арқаларын қолмен сызып жүрсіңдер? ұят емес пе, үйлеріңде апа-қарындастарың бар емес пе деді. мен түсінген жоқпын, сөйтсем енді лифчик киіп жүргендерді ұлдар сөйтіп мазақ қылады екен. ал кластағы екі отличница қыз ең артта отыратын, мен де артта қатарлас партада отыратынмын. ана екі қыз сабақта юбкаларын көтеріп, маған сандарын көрсетіп, тырқ-тырқ күліп отыратын, түсінбейтінмін басында :)

қысқасы, бала өз жасымен өскені дұрыс. миын дамытқан дұрыс, бірақ үйде мектеп программасынан асып кетпеу керек деп ойлаймын. балаға шынымен қызық болмай қалады.
Nurgisa
ана екі қыз сабақта юбкаларын көтеріп, маған сандарын көрсетіп, тырқ-тырқ күліп отыратын, түсінбейтінмін басында :)
Мен әлі де түсінбей отырмын. Дамуымда тежелу бар шығар, анығын қайдам… Қазір түсінген болсаң айта салсайшы, не үшін көрсетті екен сандарын? Өрімдей жас балаға екеулеп баса көктегендері несі екен-ей?!?!
qonyrbai
ана екі қыз сабақта юбкаларын көтеріп, маған сандарын көрсетіп, тырқ-тырқ күліп отыратын
monti
Э«польда асғыс. келесі жылы 3ке секірсем дейді :) қазір 6 жаста. Біраз бізде дұрыс көреміз 2 клас жоғары оқып жатқанын. неге? себебі. айналасы қызықсыз болып кетеді. даж кейде логопедке қатарларымен(0 клас) бара қалса. ауыздарын аша алмай отқандармен қайта/қайта „Р“ әрпін айтқызды деп келеді)))
қазір балқайлар бұрынғы біздің заман емес. 42 әріпті. әр күнде өтетін. қазір балақайлардың 80 пайзы. 3-4 жаста оқи/жаза біледі десем қате айтқан болмаймын ;)
Nurgisa
Статистикаңыз қызығушылық тудырардай бар екен. 3-4 жастағы бүлдіршіннің түгелін жазу-cызу сауатын бір біліп ап, оны білетіндер, білмейтіндер деп екі санатқа бөліп, пайыздық үлесін шығару үшін ұшан-теңіз еңбектену деген де қайда жатыр! Дегенмен, ерте бастан сауатты болғаны жақсы-ау. Теперіш көрмес онысынан.
monti
Ага :) негізі Э«польдаға қарап, іштей тамсанып жүретінмін. Тек біздің бала ғана ма деп. осын төңеріктің орыс балдары үйге ойнауға келген кезде олардыңда зерек екенін ұқтым. Надо же дедім. шын кәдімгідей таңқаларлық жағдай.

Керек Инфо: көктен Индиго балдар көп түсіп жатыр дейді ғалымдар. солай дабыл қағып жатыр. солар ақыр/заман болдырмай өз аураларымен ұстап қалады/мыс :) Инш. көбейе берсін білікті сәбилер!
asaubota
индиго балалар туралы бір мақала оқығам, индиголардың ерекшеліктері:

1) Олар көбіне солақай келеді;
2) мінез-құлықтың құбылмалылығы;
3) шығармашылықпен ерте айналысуы;
4) шизо бел­гілері, жармақ, қызбалылық,
5) жаңа замандық технологияларға жоғары бейімділік;
6) бойындағы қуаттың молдығы;
7) аса сезімталдылық және интуитивті түйсіктің дамығандығы;
8) Индивидуализм. Авторитеттер мен стеоротиптерді мойындамау;
9) Мистикаға бейімділік;
10) Оқшаулану. Ұжымдық сананың жоқтығы;
11) Жауапкершілікті жоғары сезінушілік. Әділетсіздікті жек көру;
12) Кез келген істен тез жалығып кетушілік;
13) Өзін-өзі жоғары бағалаушылық. Эгоизм;
14) Бір орында отыра алмаушылық;
15) Жан-жануарлар мен өсімдіктерге ерекше жақындық;
16) Белгілі бір істерді істеуден түбегейлі бас тартушылық;
17) Оларға қалыптасқан дәстүрлі тәрбиенің әсер етпеуі.
www.dastan-studio.kz/?p=4073

ұлымды сондай ма деп ойлаймын, мындағылардың көбі бар ұлымда.
KingBilly
Менің ойымша индиго деген кәдімгі танымпаз, басқалардан шамалы ерте дамып кележаткан бала.
Қазіргі заман — информация асып-тасып жатқан заман. Бала оны тез сіңіреді, сондықтан ғой бір сиқыр сияқты көрінеді.
alisha
бұлар менің ұлымда да байқалатын қасиеттер екен… Оқшаулану — менің арпалысып жүрген ауруым осы қазір…
AKY
Сенің ұлыңа қатысты айтқаным емес, жалпы бір орысша журналдан оқып едім, «индиго» мен «гипербелсенділікті» шатыстырмаңыздар депті. Қазір балалардың көпшілігі — гипербелсенді, бәрін тез ұғып алғыш, және білмейтін бәлелері жоқ, соған қарап, «индиго» деп ойлап қалуға болады. Әйткенмен ерекше таланттары да жоқ, және өсе келе зейіні нашарлайды. Мұндағы кейбір пункттер (4, 5, 12,13, 14, 16, 17) «гипербелсенділікке» көбірек жататын сияқты.
Ағамның ұлы кішкентайынан пысық болды, ерте сөйлеп, ерте жүрді, 1 жасынан машиналардың маркаларын белгісіне қарап ажырата беретін, жарнамаларды жаттағыш, бір орында отыра алмайтын «гиперактивті», техниканың тілін әке-шешесінен жақсы біледі. Ойпырмай, бір жерден шығады-ау дейтінбіз. Мектепке 5 жасынан беріп едік, қазір сабақты жылатып оқытамыз))) Әрине, жерде қалмасы анық, бірақ «индигоның» ауылы алыс)))
Керісінше, екінші ұлы кеш жүріп, кеш сөйледі. Дыбысы шықпайтын, жымиып қана отыратын. Бәлендей белсенділігі де жоқ, өзімен-өзі. Бірақ компьютер десе ішкен асын жерге қояды. Балабақшадан келе сала, аяқ-киімін шешпестен соны қосады. Кейде жай сыртынан бақылап қараймын ғой, бейне бір көзінде ақыл тұнып тұрғандай көрінеді)))
omarbirat
Баламды қайдам, тармақтардың біразынан өзімді шырамытып отырмын. Әсіресе, бірінші тармақтан :)
AKY
Ол тармақ менде де бар)))
ErNur
Ия Аршат мынау мақаланы дұрыс бергенсің. Біз ауылда мектепте оқып жүрген балалық шағымызда жиі айтылатын сенің есімің. Өзбасым қатты армандап қызығушы едім сол кезде. Ал марқұм Әмір ағай мені жұмысқа алған азамат еді. Ол кісі редактор болды.
sammita
біз 7 оқып жүргенде Моңғолиядан менің класыма екі бала келді. (Ал мектеп бойынша 15 шақты оқушы). Ол жақта 1 класқа 8 жасынан барады екен. Сонда бізбен бірге 2-3 жас үлкен балалар оқыды.
Gastarbaiter
Оқшаулану жақсы емес негізі. Аутизм деген ауру бар. Балыққа кеттік! -десең қойшы дейд. Шақырғанға бармайды. Ешкіммен араласпайды. Социалды мүгедектік былайынша.
Эйнштейнде оқшауланғыш қасиет болған, бірақ аутисттердің бәрі Эйнштейн емес. 80 пайызы кәдімгі қарым-қатынас дағдылары жетілмей қалған олигофрен.
alisha
ұлым жалғыз жатақ өсіп келеді...әзірге… кейде себебін осыдан да іздеп көруге тырысамын…
manshukn
Әйгерімнің де көзіне түспейтіні жоқ екен))))) Болар бала…
konvict
Мен мынаны бірінші рет көріп отырмын. Керемет. Баланың ьолашақта қандай болатыны кішкентайынан білінеді екен
VKM
О, біздің админ аға маладес екен ғой. Амин да сізге ұқсаған зерек пе?
asaubota
а куда он денется? дейін ба? :)))

қазіргі заман балалары зерек қой, әзірге топастығын байқамадық :)
edige
Әріп танымайтыны контрдың кодтарын біледі…
Әйтеуір жанашыр, қолғанат болсын деп тілейміз!!!
asaubota
менікі А мен М әріптерін біледі. еркек үшін өте маңызды әріптер ғой, МАМА сөзін жазады ғой! :)
KILYZAMAN
«Болар бала — боғынан», дегенді айтқан бабам көреген екен :-)
meirzhan
Сізге құрметті археолог атағын берсем қарсы мессіз бе?
Zhan
Мейіржан сен сол кезден атақ, номинация үлестіргіш екенсің ғой.  Робинге «Ең таза сананы» қиып едің…
dark_nazgul
Ой, "Ұлан" әсерлі әңгіме шығарудан алдына жан салмайды.
Мектеп бітіретін жылы, соңғы қоңырауда бір фотограф суретке түсіріп алып кеткен. Бір аптадан кейін "Ұланда" «Нәзігүлдің» соңғы қоңырауға қандай көңіл күймен келгені туралы «розовый» мақала жарияланыпты ))))
Пікір түзетілген: 8 тамыз 2011, 22:37
Nurgisa
Аршаттың қатарластарынан оза туған бала болғанына шек келтірмеңіз  Бәріміз түрлі басылымда бір рет те болса шыққан шығармыз, бірақ «глубинкадағы» Аршат бала тәрізділер кемде-кем шығар. "Ұланға" рақмет, қайта балаларды талпындырады, жетелейді осындай болуға.
dark_nazgul
шек келтірген жоқпын. Қатарынан озып туған замандасым болса, шыркін, қазақтың әр баласы сондай болса ғой деген ой туғызады.))
Мен жай, журналистердің әсерлеп жазуға деген құштарлығы туралы айтқаным ғой.))
Мақсат мақтану емес. Естелік айту да емес. )))
nurjanbay
мен баланың әріпті ерте танығанынан ешқандай керемет көріп тұрған жоқпын. білім басқа бітсе залым болады. білім жүрекке бітсе ғалым болады. «мен көп білем, мен бәрін білем, мен ..., мен ..., мееееен» дейтін тәкәппар болып кетсе ол баладан еш пайда жоқ. супер-бупер білім алса да қызың "қазіргі заманда мода солай", немесе ұлың «батя, демал» дейтін болады. балаға тәрбие беру деген сөз оған көбейту кестесін жаттату, ағылшынша жүзге дейін санауды үйрету, компьютер сатып әперу емес.
Пікір түзетілген: 9 тамыз 2011, 16:40
Maya
Ареке, керемет екен. Жарайсың, тасың өрге домалай берсін!!!
asaubota
рахмет, саған да бар жақсылықты тілеймін.
Aya
Түстен кейін маңырап отыру деген жаман ғой, енді көріп отырмын))) Күшті естелік екен мына мақала
asaubota
кешегі Апта.кз сюжетіне арқау болған материал