Блогиада #6: Спорт сусындары

Кәсіпқой спортшылар мен жаттығу залына тұрақты барып тұратындарға арналған сусындар: протеин коктейлдері, гейнерлер, аминқышқылдары, жаттығу кезіндегі кешен, энергетикалық сусындар болып бөлінеді. Бұндай сусындар ұнтақ түрінде болады және өңдірісі сәбилерге арналған қоспалар шығару технологиясына ұқсас.

Спорт сусындарын Венгриядан Қазақстанға әкелумен айналысып жүрген, «Scitec Nutrition» дүкенінің директоры, бодибилдинг бойынша еліміздің спорт шебері Евгений Акименко осы қоспалар туралы, олардың түрлері мен ерекшеліктері туралы баяндап берді:

Протеин коктейлдері
— Протеин коктейлдері жаттығудан кейін ағзадағы ақуыз (белок) алмасуын қалыпқа келтіруге септігін тигізеді. Адам тәні үнемі катаболизм жағдайында болады. Осы үрдіске қарсы тұру үшін, ағзада анаболизм әрекеттері жүруі үшін осындай сусындар ойлап табылған. Оның құрамында жоғары сапалы ақуыз бар және денсаулыққа ешқандай зияны жоқ. Коктейлді кез-келген уақытта — жаттығу алдында, жаттығуден кейін немесе күні бойы ішуге болады.

Дайындау әдісі өте оңай. Ыдыста болатын қасықпен ұнтақты стақанға саласыз да, үстіне су немесе сүт қосып араластырасыз. Фотосуретте: Жаттығудан кейін ішетін протеин коктейлі.

Гейнерлер
— Гейнерлерді де протеин коктейліне жатқызуға болады. Протеин негізінен ақуыздардан құралып, қант пен көмірсулар аз кездессе, ал гейнерде керісінше: оның құрамында қант пен күрделі көмірсулар көбірек. Гейнерлер бұлшықетті өсіру үшін қажет.

Аминқышқылдар кешені
— Аминқышқылдар — бөлшектелген ақуыздар. Сондықтан олар ағзаға тез сіңіп, қанға жылдам тарайды. Бұндай сусын жаттығу кезінде немесе жаттығудан кейін бұлшықет құрылымын тезірек қалпына келтіру үшін қолданылады.

Энергетикалық сусындар
— Энергетикалық сусындар жаттығу алдындағы, жаттығу кезіндегі және май жойғыштар болып бөлінеді. Жаттығуға келгенде кейді өзіңді әлсіз сезінетін кездер болады. Сондайда құрамында дәрумендері мен емдік шөптер қосылған сусын ішу ұсынылады. Жаттығу алдындағы сусындар адамның энергетикалық әлеуетін арттырады. Жаттығу кезіндегі сусындар қан құрамындағы қант деңгейінің түсіп кетпеуі үшін керек. Шынығу кезінде калория жойылатыны белгілі. Май жойғыш (немесе энергия жойғыш) энергетиктер бұл үрдістің үдемелі болуына септігін тигізеді.

Жалпы спорт сусындарының бірнеше постқа жетерлік әңгімесі бар. Егер оқырмандар қажет деп тапса, әрі қарай осы тақырыпты өрбітіп, сусынның әрбір түріне жеке тоқтала аламын. Ол үшін сұраныстың бар екенін пікір арқылы қалдырсаңыз болғаны.