Ұлттың арнасы

Жалпы телевидениенің "ішкі өмірін" бір көрсем деп жүргенмін. Күнделікті көретін жаңалықтар, түрлі бағдарламалар қалай дайындалатыны қызықтыратын. Ол тілегім қабыл болып, кеше Ұлттық арнаға блогтур жасап қайттық ;)
Алдымен арнаның өзінен бастасақ ;)

Алғаш рет 1958 жылы 5 сағаттық хабар тарата бастаған арна жыл сайын әлеуетін арттыра отырып 1987 жылы одақтас республикалар ішінде 4 орындағы үлкен телеканалға айналған. Жалпы ұйым қазіргі таңда Қазақстандағы ең ірі корпорация. Құрамында 3 телеарна (Қазақстан, Қазспорт, Балапан) мен 4 радио (Қазақ радиосын, «Шалқар» Ұлттық арнасын, «Астана», «Classic» радиолары) және он төрт облыста аймақтық телерадиокомпаниялары бар. Қазақстан арнасын ел тұрғындарының98,63 пайызы хабарларымызды көріп, тамашалай алса, Қазақ радиосын тұрғындардың — 88,74, «Шалқар» радиосын — 61,31 пайызы тыңдай алады. Хабарлардың 85 пайызы қазақ тілінде.


Қазақстан телеарнасы туралы әңгіме бастағанда Молдабек Әжібекұлы басқаратын Ұлттық арнаның бейнеқоры туралы айтпау күнә шығар :)
Молдабек аға телеарнаға алғаш рет 1986 жылы Қазақ теледидарының «Алатау» телеарнасының редакторы болып бастаған. Онан кейін түрлі хабарлардың редакторы, шеф редакторы секілді түрлі қызметтер атқарып келіп 2013 жылдан бері Бейнеқор бөлімінің басшысы қызметін атқарып келеді. Ол кісі басқарып отырған ұжымда 7 қызметкер бар.

Блогшылардың: «Бейнеқордағы өзіңіздің көңіліңізге ұнайтын материалды айта аласыз ба?»,-деген сұрағына Молдабек аға «1986 жылғы көтеріліс кезіндегі түсірілімдер»,-деп жауап берді.

Осы сөзден ақ арнаның өзі ғана емес, қызметкерлерінің де ұлтжандылығын байқауға болатын шығар.

Жалпы, Ұлттық арнаның бейнеқоры 2012 жылы қазан айында Алматы қаласынан Астана қаласына көшіріліпті. 1960-70 жж. бағдарламалардың көбі тікелей эфирден берілетіндіктен бейнеқор аз. 1980-90 жж. бастап таспаларды бейнеқорда сақтау қолға алынып, таспалар саны 30 000-ға жуықтаған. Бейнеқордағы тұрақты температура +17, +18 градус.

Теледидарда тікелей эфирда жымиып қана отыратын, бір қарағанда оңай секілді көрінетін жүргізушілердің жұмысы тіпті де оңай емес. Күнделікті болатын жаңалықтарды дайындауға гримеры бар, операторы бар, жарық қоюшылары бар 30-40 адам жұмылдырылады екен. Жаңа кезеңнің жаңалығы: kaznews‬ бағдарламасы. Арнаның ең қымбат өнімі "Қазақстан дауысы" ток-шоуы. Дəл қазір 3 кезеңі өтіп жатқан бағдарламаны осы кезге дейін 3 млн адам тамашалапты.
Қазақстан РТРК АҚ Басқарма Төрайымы Нұржан Жалауқызының айтуынша корпорация күшімен соңғы 1-2 жыл көлемінде жалпы саны 1000-ға тарта отандық сериал түсіріліпті. «Сырғалым» телехикаясының көрермендерге ұнағаны сонша, 2 бөлімі түсіріліп көрерменге жол тартқан. Сырғалымнан бөлек «Кешір мені», «Алғашқы махаббат», «Жас Ұлан», «Аяулы арман», "Қазына" «Көк тарландары» секілді ондаған телехикаялар бар.

Аптасына 5 рет болатын "Әйел бақыты" бағдарламасын білмейтін адам жоқ шығар ;) Біз барған кезде түсірілімі болып жатыр екен. Біткенін күтіп тұрдық. Аяқталған кезде Ләйлә Сұлтанқызымен 15 минуттай сөйлесіп, көкейіміздегі сұрақтарды қойдық. Алғашында 3 жүргізушімен бастаған бағдарламаның уақыт өте келе философиясы өзгеріп қазір Ләйлә апай өзі ғана жүргізеді. Ләйлә апайдың өзіне ғана тән бір керемет жағымды энергетикасы бар… Бір… адамды тартып тұрады. Өте сыпайы, қарапайым кісі. Мүмкін тағы бір барып қалармыз жақында ;)

12-лерде басталған блогтур бестен өте осылай аяқталды. Жаңа адамдармен таныстық, Ұлттық арнаның көлденең адам кіре алмайтын бейнеқорын көрдік, бағдарламалардың қалай дайындалатынын, шет елдік сериалдардың қалай дубляждалатынын көрдік. Әсер деген керемет. Блогтурды ұйымдастырған СММ бөлімінің басшысы Құрманәлі Қалмахан ағамызға, Ұлттық арнаның қызметкерлері Мадина мен Азаматқа зор алғыс.

PS: Кейбір фотолар Максим Рожинге, блогтурға барған блогшыларға тиесілі.