Домбыра Party: Алма жауған күн және Алмас Алтайдың жаңа домбырасы

«Біздің ауылда мен сияқтыларды әнші санамайды» — деп еді бірде Алмас. Рас шығар. Алайда өзін әнші атап жүрген кейбіреудің қасында, Алмасты тыңдаған құлақтың өкпесі жоқ. Дәлел керек пе? Міне! Кешегі Party-де Алмастың өнеріне тәнті көрермендері (Назарбаев университетінің ұстаздары мен студенттері) арнайылап әкеп, домбыра сыйға тартты. Алмасты білмеймін, мен мәз болдым!


Назарбаев университетінің ұстаздары мен студенттері де қаражаяу емес екен. Жанар деген апайлары бастап, кештің көрігін қыздырды. Естіп білгеніміз, бұл кісі қазақ тілі мен әдебиетінен сабақ береді екен, бірақ ән айтқанынан жақсы бір өнер мектебінен өткенін ұқтық.

Дәурен, Серікболсын деген жігіттер де суырылып шықты. Қызық осы Серікболсыннан басталды. Бұл өзі (танымағаныма кешірім сұраймын) әжептәуір аты бар ақын жігіт екен. Өзі ортамызға келіп тұрғанда қалай құр жіберейік, Домбыра Party-да бұған дейін бір рет айтысып үлгерген Мерейге қарсы шығардық.



Тақырыпта сөз болған алманы таппай отырсыздар ма? Бұл Алдекеңнің үйіндегі анамыздың сыйы ғой. Сөмкесін арқалай келген екен, ішінен әрбір әншіге (мен, Алмас және Алданның өзінен басқа) бір алмадан бұйырып отырды.