Домбыра Party: Сағындырған Party

Араға екі апта салып, Астанада кезекті Домбыра Party өтті. Басқаны білмеймін, өз басым сағынып қалыппын. Тамақ бітіп қалған, қарлыққан дауыспен ән айтқан да болдым.

Party-дің арқасы
Ол әндер айтылмай қалуы да ғажап емес еді. Басында домбыра болмай қалды. Абырой болғанда, Астана Party-інің тұрақты әншісіне айналған Ғалымжан өзімен бірге аспабын ала келіпті. Оған тіпті қуандым. Бұл домбыраны Ғалымжан Party үшін арнайы сатып алыпты.

Сегіз қырлы бір сырлы

Абайды білесіз ғой бәріңіз. Иә, иә. Кәдімгі Отар ақсақалдың ұрпағы. Сол жігіт кеше аузымызды аңқайтып кетті. Әдетте, өнер көрсетушілер табылмай жатса, Абайға тиісіп, әзілдей бастайтын едім. Енді нысанаға басқа біреуді табуға тура келді. Өйткені, бұл брәтішкі кеше домбыра тарта алатынын көрсетті. Анау-мынау емес Құрманғазының «Кісен ашқан» күйін орындап берді. Біреуден ілгері, біреуден кейін. Бірақ, тайсалмай ортаға шыққанының өзі қандай. Кісен ашылды, енді қол шықсын, Абай! Қол шықсын деппін-ау, жолың ашылсын дегенім ғой! (Екеуі ұқсап кетті ме әлде?)

Музыка қайда болса мен де сонда

Профессионал деген осындай-ақ болсын. Сон Паскальді айтам. Қазақстанға әжептәуір танымал болып қалған әнші, осымен екінші Party-ге келді. Алғашқысына аяқ асты тап болса, осы жолы іздеп келіпті. Бізге дейін, жағалауда гитара тартып отырғандарға барып, олармен де қосыла шырқапты. Соңына дейін болып, бәрімізбен бірге тарқасты.

Түйін

Домбыра Party басталғанда, мұндай ауқымға жетеміз деген ой болған жоқ. Бүгін көз салсам, ауыз толтырып айтатындай іс екен. Тіпті, кей қалалар ресми түрде маусымды жауып жатыр. Қалай естіледі ә?! Біз әбден тоңғанша жалғастыра береміз деп шештік. Мүмкін, қыс кезінде open air форматын өзгерте тұрармыз.