"Айтуға оңайдан" кейінгі ой: қазақты біріктіріп тұрған нәрсе - Ән!
«Айтуға оңай» бағдарламасының Домбыра Party туралы түсірілімін қарап шықтым. Тақырыпты жақсы аша алған сияқты. Тек ДП-ның мақсаты туралы толық ашылмады ау деймін. Қысқаша өз ойымды айта кетейін. Былтыр тамыз айында Астанада Сол жағалаудың орталығындағы Керуен Сауда Орталығын таңдадық. Таңдау себебіміз Керуен — адам көп жүретін, жиналатын жер және Сол жағалау әлі орысша мекен. Домбыра арқылы тек домбыра емес қазақылықты, қазақ тілін, қазақты жарнамалағымыз келді. Домбыра арқылы қазақтың тірі екенін, оянатынын көрсеткіміз келді. Негізгі мақсат сол ғана. Ал қазір ДП сол мақсатты орындаудан бөлек жастардың кездесу орнына да айналды. Астана сияқты үлкен қалада адамдар жұмысбасты. Бір біріне уақыт табу қиын. Осы ДП кезінде бірталай адаммен кездесіп, сәлемдесіп қаламыз, жаңа адамдармен танысамыз. Бұдан бөлек жаңа таланттардың ашылуына да жақсы жол. Сол жағалауда жүретін шетелдіктер де қызығып қарайды. Өз жұмыстарындағыдай емес қазақтілді қазақтар бар екенін, олардың да өз өнер-мәдениеттері бар екенін көреді.
Қазақты қазір біріктіріп тұрған — ән, домбыра үні. Әншейінде саясатта, спортта, тұрмыста жерге, руға, жүзге бөлінетін қазақ әнге келген кезде бірігіп кететінін көріп жүрмін. Мынау Батыс мақамы, мынау Арқа әні, мынау Жетісу жыры деп отырып, сол әндерді сүйсініп тыңдаймыз, қосылып айтамыз. Маған осы ұнайды.
Бағдарламаның соңында Бейсен аға менің айтқым келіп отырған бір нәрсені айтты. Ауылдық жерлерге де жетсе екен деді. Иә, қалада белсенді жастарды жинау оңай. Бір қаладан бір қала іліп алып кетіп, тез тарап кетті. Ендігі кезек ауылдық жерлерде. Ауыл жастары да осылай жиналып жүретін болса онда қазақ даласы қазіргі ХХІ-ғасырда да ән салып тұрар еді.
P.S бағдарламадағы апайларға да ренжуге болмайды. Олар басқа кезеңнің адамдары, олардың құндылық түсініктері, өмірге көзқарастары бөлек. Мүмкін өздері бәленбай жыл мәдениет саласында жұмыс істеп, мұндай ерікті әрекеттер істей алмағандарына іштей қынжылатын шығар?
Бағдарламаны мына жерден қарай аласыздар: http://kaztrk.kz/kaz/telekanal/program_archive/36930.html#go
Ол апайлар болмаса, бағдарлама тұзсыз тамақ сияқты болып қалар еді. «Домбыра пати өткізіп жатырмыз», «Көрдім. Жақсы екен», «Осылай өткізе берейік», «Жарайсыңдар» деген секілді пікірлермен шектеліп қалар еді. Меніңше, ол апайларға әдейі сондай көзқарасты жақтау міндеті жүктелген. ))))