Қаражорға феноменінің құпиясы ашылды

Қытай қазақтарының «Сен қазақ» сайтында Ділмән атты қолданушы өзінің жеке бұрышында қызық мәлімдеме жасады. Дәлмән өз жазбасында қазір танымал болып үлгерген Қаражорға биінің құпиясын ашқан. Ділмән Жақайұлының айтуынша бұл би негізінде қазақтың ұлттық биі емес. Көптеген халықтарда бар би элементтерін досы Алтайбек екеуі біріктіріп, Құмыл қаласындағы тойларда билеп жүрген екен. Кейін қытайлардың Ютюбы саналатын Youku сайтына осы бидің видеосын салып жіберіпті. Қаражорға биі осылайша біздің елімізге де жетіпті.

Ділмән Жақайұлы:
Бұлай танымал болып кететінін болжамап едік. Досым Алтайбек екеуіміз жастайымыздан бимен айналысамыз. Құмылдағы тойларда асабамен келісіп, «1-2 би билейікші» деп аз болса да қаражатымызды шығарушы едік. Әр түрлі халықтардың би элементтерінен құралған би еді біздің шығарғанымыз. Атын кім Қаражорға деп қойғанын білмедім. Біз торапқа шығарғанан кейін танымал болып кетті. Қазір Қазақстандағы жаңалықтарға қарасақ бүткіл ел көлемінде биленеді екен. Гинес рекордтар кітабына да кіріпті деп естідік. Біз тек әзіл үшін видеоға түсіріп, торапқа шығардық. Мұны шын қабылдап қалғандары қызық екен. Қазір жаңа би ойлап шығардық. Аты Самғашы-ай. Латын Америка би элементтерінен құралып, қазақиландырылған би бұл. Самба, танго, ча-ча билерін араластырдық. Жұппен биленетін би. Тек алдын ала ескертейік, келешекте танымал болып кетіп жатса айтпады демеңіздер. Ұлттық биіміз емес бұл би де. Өнерде фантазияның болуының сөлекеттігі не? Тек қорқатынымыз Қазақстан тағы да бұл биді ұлт атына иемденіп алмаса дейміз. Асыра сілтеушілік көп қой арғы бетте.