Блог құрылтай: Q&A



Керекинфо еркін блог жүйесінде «Блог құрылтай», «Блогкемп» деген алашапқынның басталғанына көп бола қойған жоқ. Алда болар шараға қатысты жарияланған, жарияланатын жазбалар «тақырып аясынан тыс жердегі» юзердің әуелі сұрау белгісін (не бұл?), содан кейін сұрау белгісі мен леп белгісін (не айтып кеттіңдер?!), соңынан тек леп белгісін (ой, немене, блогкемп, блогкемп деп бәрің, басқа әңгіме жоқ па!) туғызуы мүмкін. Қызықтың көкесі әлі алда, Құдай сәтін салса, наурыздың аяғына таман он жазбаның тоғызы құрылтай туралы болады, сол кезде «асанқайғылатқан» кейбіреулер болмаса, өзгеміз баяғы сауын айтқан қазақтың ар жақ-бер жағынан табылармыз деп үміттенемін.

Содан, не керек, ұзын сөздің қысқасы, жинақы сөздің нұсқасы, бұл постымды блогкемптың не екенін білгім келеді деген жанға арнаймын. Әрине, баз біреулеріңіздің, тіпті басым көпшілігіңіздің бұл тақырыптың жілігін шағып, майын ішкен, тісқаққан, кәнігі мамандары екеніңізге шүбәм жоқ, алайда кезекті сөз кеудеден итерілмес деген үміттемін.

Осы ресурста жүрген жақсымыз бар (VKM сияқты), жаманымыз бар (qisyq сияқты) блогкемп бойынша ауызбіршілік танытады деп имандай сенемін.

Сонымен, Блогкемп немесе блог құрылтай дегеніміз не?


Blogcamp.kz сайтында "BlogCamp — дүние жүзіне кең таралған жаңа медиа өкілдерінің жиыны. Ел ішінде түсінікті болуы үшін біз іс-шараны «Блогшылар құрылтайы» деп те атап отырмыз", — дейді.

Әрине, блогшылар мен жаңа медиа өкілдерінің айырмашылығы бар: жаңа медиа өкілінің блогшы болуы міндетті емес, алайда блогшы — жаңа медиа өкілі. Сондықтан, егер сіздің өз сайтыңыз болса, алайда блог жүргізбейтін болсаңыз, бұл шараның маған еш қатысы жоқ екен деп ойламаңыз.

Анықтама: жаңа медиа — жиырмасыншы ғасырдың аяғында пайда болған, ерекше қарқынмен дамып келе жатқан интерактивті электронды басылымдар мен тұтынушылардың (қолданушылардың) ресурстың (сайттың) контенттін (мазмұнын) түзуіне ат салысуы нәтижесінде пайда болатын жаңа қарым-қатынас формаларына қатысты термин. Жаңа медианың басты ерекшеліктері интерактивтілік пен сандық технология деп түсінемін өз басым.

Неге кемп (немесе кэмп, немесе camp)?


Ағылшын тілінде camp сөзінің лагерь, қала сыртындағы үй, табиғатқа шығу, шатырда өмір сүру секілді мағыналарға ие екенін білесіз. Міне, біздің кемп те осы маңайдан: мүдделес, тақырыптас адамдардың ӨЗ ЕРІКТЕРІМЕН бас қосып, бейресми түрде жиналуы кемп, нақтылап айтсақ баркемп деп аталады. Кемп міндетті түрде жаңа медиаға, әлеуметтік желілерге, Қазнетке, сайттарға қатысты болуы керек деген қате, мәселен, осы жұма күні patick , e_zhalgas үшеуміз бас қосып «Сенбисткемп» жасап жіберсек те болады.

Көтек, баркемпі несі тағы?


Баркемп (BarCamp)- ҚАТЫСУШЫЛАРДЫҢ ӨЗДЕРІ ұйымдастыратын жиын. Біздің тілге тиек, етке сүйек болып отырған блогкемпіміз, яғни блог құрылтайымыз осы баркемптің бір саласы.

Баркемп кезінде қатысушылар баяндамалар, презентациялар жасайды, тренингтер өткізеді, қандай да бір тақырыптарды талқылайды. Ұсынылатын материалдың бәрін ұйымдастырушылар, яғни қатысушылар өздері даярлайды.

Баркемптың (блогкемптың деп оқыңыз) тарихы мен өзге де ұңғыл-шұңғылы туралы өткен жылғы құрылтай алдында жариялаған жазбамнан үзінді келтіре кетейін.

Баркэмптың (БлогКэмптың ағасы деп түсініңіз) тарихына аз-мұз тоқталсақ.
Ерте-ерте-ертеде, ерте болғанда 2005 жылы Тим О’Рейли дейтін веб 2.0 идеологы өз достарына арнап Foobar дейтін шара ұйымдастырады. Ал алғашқы баркэмп сол жылы тамылжыған тамыз айының 19-21 жұлдыздарында Калифорния штаты, Пало Альто қаласында Socialtext компаниясының кеңсесінде өтеді. Бас-аяғы бір аптаның ішінде ұйымдастырылған шараға 200-дей адам қатысады. Шара бейресми сипатта өтеді. Қатысушылар шатырларда жатқан. Шара форматының көптің көңіліне жаққаны соншалық, содан бері баркэмп әлем бойынша 350-ден астам қалада өткен. Ал ТМД шеңберінде аталған шара алғаш рет Украинада ұйымдастырылса (2007 жылы тамызда өткен Blogcamp), 2009 жылдың сәуірінде Алматыда қазақстандық баркэмп болды.

Жалпы Баркэмп Блогкэмп болмысынан мен қазаққа жақын бір қасиет байқадым (жалт еткенге жармаса кетер мінез емес бұл, блогкэмптың сырын ашамын дегендегі арам ойым ғой). Өзектілігі күйіп тұрған “ Төртеу түгел болса төбедегі келеді” деп басталатын мақалды осы шараға ұран қылып алса да болатын сияқты. Себебі, DIY (do it yourself) немесе Өзің Жасап ал идеясы – кэмп атаулының миға басылған девизі. Себебі, бастамашыл топтың болғанына қарамастан, Блогкэмпке келген әр азамат әлгі мысалдағы қарлығашқа ұқсап су тасып, қолы қалт еткен кезде көмегін беріп қалуы қажет. Сонда ғана [бей]конференция (кэмп жиындарын осылай да атайды) мақсатына жетеді, ойдағыдай өтеді, келгендердің көңілінен шығып, бір жерге бас қосқандардың бірлігін көрсетеді.

Блогкэмп ресми шара емес. Қылқына галстук тағып, қыдиып-қыдиып отырып қайтатын жер де емес. Блогкэмп – жауыр болған тіркеспен айтсақ, “бір терінің пұшпағын илеп жүрген” блогшылардың бас қосып, жиналып, бір-бірін тек аватардан ғана емес, анфасынан, профилінен, артынан, астынан, үстінен қарап, танысатын жері Тәжірибе, идея алмасып, пікір таластырып, достық сезіммен қимай-қимай қоштасатын орын.


Биылғы шара Екінші Блог құрылтай болмақ. Өткен жылы аман-есен Алматыда өткізген едік. Енді, Астанаға ат байламақпыз.

Кэмп қатысушыларының ережелері:

  1. байланыс мәліметтерімен алмасуды тоқтатпаңыз. Әңгіме барысында, ол жаңа танысқан жан болсын, ескі танысыңыз болсын, түрлі идеяларды, жобаларды талқылаудан қашқақтамаңыз.
  2. шара барысында қандай да бір проблемалар пайда болса, оны шешіп тастауға тырысыңыз. есіңізде болсын, блогкэмптың жақсы я жаман өтуі сізге (!) байланысты.

  3. көңіл-хошыңызды көтеріп, шараға көтеріңкі күймен келіңіз. Бұл басқаларға да жақсы әсер етеді.
  4. презентация жасаушыларға көмек көрсетіңіз, өз идеяларыңызды ұсыныңыз, балама ойлар айтыңыз, идеяларыңызбен, фактілеріңізбен алмасыңыз. Өз презентацияңызды жасап келуге қалай да болса тырысыңыз.
  5. барлық презентацияларды аудиоға, видеоға түсіріп алуға тырысыңыз, оның бәрін Интернетке салып отырыңыз.
  6. Ең бастысы: ашық болыңыз, қызығушылық танытыңыз, ойларыңызды ортаға салыңыз.

Менің сөзім осы. Егер қызықтыра алған болсам, қуанышымда шек жоқ. Ал егер мына сілтеме арқылы өтіп, құрылтайға (блог құрылтайға, блогкемпке, кемпке) тіркелсеңіз, онда Астанада қасиетті Наурыз мейрамында арқа-жарқа болып аман-есен көрісерміз.

Пайдалы сілтемелер:

BlogCamp деген не?

Блог Құрылтайдың 9 ережесі

Презентацияны қалай жасаймын?

Блогкемпке тіркелу

Блогкемптің ресми сайты

Керекинфодағы Блогкемп қауымдастығы
Бөлісу:
  • 42

27 пікір

Nurgisa
Астанада пәтер жалдап тұрғысы келетіндер ақпарын тезірек берсе екен деген өтініш айтылып еді басқосулардың бірінде. Екеу, үшеуара болып ортадан жалға алу мәселесін алдын қарастырып алу керек. Одан соң, жалға алынатын үйді күнібұрын сөйлесіп қою қажеттігі туады: келгеннен кейін барып тауып алам деп жаңылмаңыздар. Пәтерді жалға беру нарығында сұраныс көп пе, басқа ма, кейде ұсыныс тапшы боп жатады.

Астанаға жетуді де мұқият ойластырып қою абзал. Қай қаладан болмасын, билет табу қиынға соғатынын заманның өзі көрсетіп жатыр.
e_zhalgas
мен анкетада пәтер жалдаймын деп көрсетіп едім. бірнеше адам бірігіп жалдаса, жеңілірек болар еді. маған қосылатын кім бар?
asaubota
қатын, бала-шағамды 1 күнге тастап, түнімен сенімен әңгіме айтып, пибі ішуге дайынмын!

(өйстіп қызықтырып қояйын, жарнама жасап)
e_zhalgas
ол онсыз да ғой
Daniar-Alan
… дәл осы жерде менің басымда "қыздар да бола ма араларыңда?" деген жымысқы ой жылтың ете қалды…
asaubota
егер біреулер «бырат мына жақта өзіміз отыр едік қыздармен, келшиш. ана кім Жалғас, Ернарларға айтпай технично шығып кет» десе сатып кетуім де мүмкін «жігіттер, давай жақсы ертең де күн бар ғой пибіге» деп
Daniar-Alan
ахаааааааа (бір арамышкааа бир нарсены естып-коргенде айтатын алеуметтык белги), ыхыыыыыыы (бұл да сол сипатта), хм (ойланватырм. осы маған намек емес па деген сұрағы бар әлеуметтік белгі).
manfan
қатырасыз ғой Аршат аға)))))))))))
qisyq
Жақсы, жақсы...)))
Nurgisa
Негізі, жалға© алу үшін сол жағалауды көздеу орынды. «Назарбаев Университет» сол жағалауда орналасқан, тиісінше, «арғы» беттен жету кейде қиынға соғуы мүмкін.
Baisaldy
Көп рахмет, енді менен бір сұрақ:
баяндамалар, презентациялар жасайды, тренингтер өткізеді, қандай да бір тақырыптарды талқылайды.
осылар міндетті түрдеме?
сосын, тақырып талқыламай жәйғана тыңдап отыруға болама?
qisyq
Тақырыпты талқыламай, жай ғана тыңдап отыруға болады. Бірақ! Блогкемп дейтін шараның өзі қатысушылардың белсенділігі мен бірлігіне тікелей тәуелді болғандықтан, әр адамның барынша ат салысқаны дұрыс. Тіпті, презентация жасай алмаймын, тренинг өткізбеймін, тақырыптарды талқылау ниетімде жоқ деген к.ннің өзінде табақ көтеріп бара жатқан AKY ға "Әкел, мен апарысып жіберейін" десеңіз, ол да болса, блогкемпке ат салысқаныңыз.
patick
табақ көтеріп бара жатқан AKY ға
«Мә, мына подносты да ала кетші» десеңіз, ол да болса, блогкемке ат салысқаныңыз

P.S. Бұл жерде басқа емес, именно AKY деген юзердің табақ көтеріп бара жатуы міндетті
qisyq
Айтпақшы, ия, онысы бар, егер табақты VKM көтеріп бара жатса, онда жоламаңыз.
zheniskaz
Сайттың логотипі 2011 деп қала береді ме? Әлде сол алғашқы басталған лого есебінде өзгеріссіз қалған ба?
qisyq
Білуімше, лого дайындалып жатыр. Жаңасы болмақ.
Daniar-Alan
еййй маған жіберсеңдерш оны
KILYZAMAN
Құдай сәтін салса, наурыздың аяғына таман он жазбаның тоғызы құрылтай туралы болады, сол кезде «асанқайғылатқан» кейбіреулер болмаса, өзгеміз баяғы сауын айтқан қазақтың ар жақ-бер жағынан табылармыз деп үміттенемін.
— қашанғы шайтан болмақпыз енді; Талаптарың тағалана түскей!!!
manfan
күштіі… Шай құятын адам керек болса, мен дайынмын…
TOTY
Кеше бір жерден "құрылтай жайлы түсінікті мағлұматты кім береді" деген пікірді көзім шалып қалып еді, қолды-аяқты тілалғыш бала деген осы, жарайсың,@qisyq!
meirzhan
Туған күн иесі, Блог-құрылтай туралы жақсы ағартушылық пост жазыпсың! Тағы құтты болсын, брат!
merekeee
Осы екен ғой Блогқұрылтай деген! )