Абайдың қара сөздері - IV сөз

Әрбір байқаған адам білсе керек: күлкі өзі бір мастық екенін, әрбір мас кісіден ғафил көп өтетұғынын да, әрбір мастың сөйлеген кезінде бас ауыртатұғынын. Бұлай болғанда, күлкіге салынған кісі не шаруадан, не ақылдан, не бір ұят келерлік істен құр, ғафил көп өткізіп отырса керек. Осындай ғафилдік көп өткізіп, өлмеген кісінің не дүниеде, не ахиретте басы бір ауырмай қалмаса керек.
Әрбір уайым-қайғы ойлағыш кісі не дүние шаруасына, не ахирет шаруасына өзгеден жинақырақ болса керек. Әрбір жинақылықтың түбі кәніш болса керек. Енді олай болғанда, үнемі уайым-қайғыменен жүре аламыз ба? Үнемі күлмей жүруге жан шыдай ма екен? Жоқ, мен үнемі уайым-қайғыменен бол демеймін. Уайым-қайғысыздығыңа уайым-қайғы қыл дағы, сол уайым-қайғысыздықтан құтыларлық орынды харекет табу керек һәм қылу керек. Әрбір орынды харекет өзі де уайым-қайғыны азайтады, орынсыз күлкіменен азайтпа, орынды харекетпен азайт!
Шығар есігін таба алмай, уайым-қайғының ішіне кіріп алып, қамалып қалмақ, ол өзі де — бір антұрғандық. Және әрбір жаман кісінің қылығына күлсең, оған рахаттанып күлме, ыза болғаныңнан күл, ызалы күлкі — өзі де қайғы. Ондай күлкіге үнемі өзің де салынбассың, әрбір жақсы адамның жақсылық тапқанына рахаттанып күлсең, оның жақсылықты жақсылығынан тапқандығын ғибрат көріп күл. Әрбір ғибрат алмақтың өзі де мастыққа жібермей, уақытымен тоқтатады. Көп күлкінің бәрін де мақтағаным жоқ, оның ішінде бір күлкі бар-ау, құдай жаратқан орныменен іштен, көкіректен, жүректен келмейді, қолдан жасап, сыртыменен бет-аузын түзеп, бай-бай күлкінің әнін сәндеп, әдемішілік үшін күлетін бояма күлкі.
Адам баласы жылап туады, кейіп өледі. Екі ортада, бұ дүниенің рахатының кайда екенін білмей, бірін-бірі аңдып, біріне-бірі мақтанып, есіл өмірді ескерусіз, босқа, жарамсыз қылықпен, қор етіп өткізеді де, таусылған күнде бір күндік өмірді бар малына сатып алуға таба алмайды.
Қулық саумақ, көз сүзіп, тіленіп, адам саумақ — өнерсіз иттің ісі. Әуелі құдайға сыйынып, екінші өз қайратыңа сүйеніп, еңбегіңді сау, еңбек қылсаң, қара жер де береді, құр тастамайды.
Бөлісу:

11 пікір

meirzhan
Енді… өз пікіріңіз:…
PiaoLiang
Шынымды айтсам, онша тусінбедім… Негізі, Абай сөздерін оқығанда осы заманға сай келеме дегендей бір салыстырмалы турде қараймын… Кеше үшінші сөзін оқығанда ондай тым жаман ниетті адамдар біздің заманда жок шығар казір дер ойладым… Казіргі адамдардың менталитеті басқаша сиякты… Немесе “розовые очки» киіп жүретін шығармын… Сондай-ақ, мына төртінші сөзде айтылған адамдар тұрпаты жоқ сиякты.....Өйткені, қазіргі заманның адамдарының күлуге де, қайғыруға да уақыттары жоқ сияқты… Жұмыс істеу керек, ақша табу керек, бала-шаға асырау керек… көп қой тірлік))…
meirzhan
“розовые очки»
Қытайға 90 жылдары көшіп барған қандасымызсыз ба?
PiaoLiang
жоооқ… неге олай ойлаңыз?
satibaldi
Абайдың қара сөздері әншейін сөздер. Қазіргі заманда оқысаң да мәні кетпейді деп қорс-қорс жльайды табынушылары. Әлі мағынасы бар дейді.
Епті, экспериментке өткен ғасырдың адам туралы жазылған кез келген жазбасын алып оқып көр. Барлығы да осы заманға келеді. Жалпы, адам керісінше — мағынасыз әңгіме айта алмайды! Айтып көріңдерш ал?
KILYZAMAN
Жалпы, адам керісінше — мағынасыз әңгіме айта алмайды! Айтып көріңдерш ал?
— айтып жүрсің ғой.
Zhan
Жалпы, адам керісінше — мағынасыз әңгіме айта алмайды! Айтып көріңдерш ал?
Шынымен, бәріміз ақыл айтуға, мағыналы бірдеңені түртуге құмар екенбіз…
araika
«Күлкі адам өмірін ұзартады, сондықтан үнемі күліп жүр!» деп кеңес беретіндер бояма күлкіні насихаттаушылар ма? :)
meirzhan
Ғарифолла Есім Абайдың қара сөздерін жақсы талдаған еді. Соны оқып көруге рекомендеймін.