КерекИнфо қолданушысы, кім ол?

КерекИнфо қандай сайт?
КерекИнфо Livestreet CMS арқылы жасалған блог жүйесі. Бұл форматта коллективтік блог (қауымдастықтар) және жеке блог жүргізуге болады. Ешқандай техникалық білім қажет емес. Тіркелген қолданушы бірден өз блогына мақала жаза алады, сурет, сілтеме, аудио, видео қоса алады, сауалнама жүргізе алады. Сондай-ақ бұл жер еркін пікірталас алаңы. Пікірталас бар жерде әрине оффтоп та флуд та болады. Кейде мақаладан гөрі пікірлер қызықты болып жатады. Көпшілікке де ұнайтын нәрсе осы пікірталасу.

Қолданушылары кімдер?
Жас деңгейі әр түрлі. Басым көпшілігі 22-30 жас арасындағы контингент. Бірнеше адамнан құралған негізгі белсенді топ бар. Олар бұрынғы Керекинфо, Солай.де, Жастар, Кездесу.ком сайттарынан келе жатырған, бірін-бірі бұрыннан танитындар. Сондай-ақ көпшілігі дербес блогерлер.

Тақырыптар қандай?
Еркін блог жүйесі болғандықтан кез келген тақырыпты талқылауға болады. Тақырыптар барлық қолданушыларға ұнамауы да мүмкін. Бұл қалыпты жағдай. Әркім өзі қызыққан тақырыпты оқи алады.

Қандай тақырыптар "өтеді"?
Бұл сайтқа ренжитіндердің көбісі: тақырыптары "өтпей" қалғандар. Көп жағдайда БАҚта, басқа сайттарда әбден мезі болған тақырыптар мында келген кезде "өтпей" қалады. Себебі Керекинфошылардың басты қасиеті: шыншылдықтары. Ұнамай ма ұнамайды деп айтады, ұнаса ұнайды. Жақсыны жақсы, боқты боқ деп әр нәрсені өз атымен атағанды ұнатады. Адам қазақша сөйлесе демек ол қазақ. Ал қазақ онсыз да ұлтшыл халық. Сондықтан ұлттық тақырыптағы құр айқайлар мында "өтпейді". Тілін ойлаған адам алдымен сол тілде өзі сөйлеуі керек. Ал бұл жердегілер солай істеп жүр. Сондықтан ұлтшыл тақырыптарымыз өтпей қалды деп бұл жердегілерді ұлтшылдықсызбен кінәлау орынсыз. Біздің қазақ интернетті де газет-журнал сияқты "қасиетті" көреді. «Галстук киіп» жазу керек деп ойлайды. Керекинфошылар интернеттің олай емес екенін дәлелдеуде. Негізінде дәлел керек емес, онсыз да солай ғой? Керекинфошылардың бар «кінәсі» шынайылығы. Қоғамдағы екіжүзділікті бұл жерден көре алмайсыз.

Қандай қолданушылар шыдайды?
Базына айтып кеткен, айтпай кеткен, кірмей кеткен көп қолданушы бар. Бірақ, сайтты оқушылар саны күннен күнге өсуде. Демек сайт бұрынғыдан да қызықты болуда. Әлсіздер кетіп, күштілер қалуда. Кеткендер кімдер? Бұрын тек мақтау естіп үйренген, мында келіп өлеңдерінің шын бағасын білген ақындар. Абыройдан айрыламыз деп ойлайтын журналистер. Ұлтшыл сайттарда жүретін, мында келіп құсықтарын «пихаттайтын» "ұлтшылдар". Күтпеген пікір алып ренжитіндер.

Бір жерге жаңа адам келген кезде ол әрине басында жатырқайды, оған әрине бұрынғылар тиіседі. Бұл барлық жерде солай. Шыдайтындар шыдады, мойындататындар мойындатты.