Қадір түні және Марс

Бисмилләһир Рахманир Рахим
1. «Әлбетте, Біз Құранды Қадыр түнінде түсірдік».
Бұл аятта айтылып жатқан Құранның түсірілуі Лаухул Махфуздан бұл дүние аспанына түсірілуі. Бұл мағына Ибн Аббас р.а-дан риуаят етілген. Міне осы оқиға Қадыр түнінде болғандығы осы аят ашық білдіріп тұр.
Құран бұл дүние аспанынан Пайғамбарымыз с.ғ.у-ға бөлек-бөлек болып, жиырма үш жыл ішінде түсірілген.
Демек, бұл аяттың мағынасы Біз Құранды Лаухул Махфуздан бұл дүние аспанына Қадыр түнінде түсірдік, дегені болады.
2. «Қадыр түні не екенін білесіз бе?».
Яғни, оның қадір-қасиетін, ерекшелігін толық түсіну қиын. Соның үшін оны Өзіміз айтып береміз.
3. «Қадыр түні мың айдан жақсырақ».
Өйткені, бұл түнде Құран түскен және бұл түндегі ғибадаттың сауабы мың айлық ғибадаттан артық.
Осы аяттың тәфсірінде ғұлама Ибн Кәсир былай деп жазған:
«Бір адам қолына қылыш алып, мың ай Аллаһтың жолында жиһад еткені риуаят етілді. Расулуллаһ с.ғ.у мен сахабалар бұған сүйсінді.
Расулуллаһ с.ғ.у үмметтеріне де осындай болуын сүйсініп сұрап:
«Ей, Раббым! Менің үмметімді басқа үмметтерден өмірі қысқа, амалын аз қылдың?», деп жалбарынды.
Сонда Аллаһ тағала:
«Қадыр түні — сізге және үмметіңізге сол адам жиһад еткен мың айдан жақсырақ», деді».
Қадыр түнінің тағы бір ерекшелігі төмендегі аятта айтылады:
4. «Ол түнде періштелер және Жебрейл ғ.с Раббыларыңның рұқсатымен барлық іс үшін түседі».
Қадыр түнінде Жебрейл ғ.с басшылығында періштелер Аллаһ тағаланың келесі жылға дейін тағдыр етілген істерімен түседі. Бұл да Қадыр түнінің абыройын арттырады.
Сол үшін келесі жылға дейінгі тағдырымыз жақсы болуы үшін шамамыз жеткенінше ұйықтамай дұға-тілек, құлшылықта болуымыз керек.
Қадыр түнінің үшінші ерекшелігі төмендегі аятта айтылады:
5. «Ол бейбітшілік түні таңға дейін жалғасады».
Яғни Қадыр түні таң атқанша бейбітшілік, тыныштық және амандық түні. Онда періштелер мүминдерге сәлем береді. Аллаһ тағала адамдарға тек тыныштық пен амандықты тағдыр етеді.
Пайғамбарымыз (с.ғ.у) хадисінде:
«Кімде-кім Қадыр түнін шын сеніммен және сауап үмітінде ұйықтамай өткізсе, оның бүкіл күнәлары кешіріледі», деген.
Бұл түнді ұйықтамай өткізу – намаз оқу, дұға ету, истиғфар айту және Құран оқумен болады.
Қадыр түнін ұйықтамай өткізу қалай болады? деген сұраққа ғұламаларымыз былай деп жауап берген:
«Әуелі, бұл түнді ұйықтамай өткеру үшін сол түні құптан мен таң намазын жамағатпен оқу керек. Өйткені хадисте: «Кім құптан намазын жамағатпен оқыса, түннің жартысын ұйықтамай өткізген болады», делінген. Тағы бір хадисте: «Кім таң намазын жамағатпен оқыса, түннің жартысын ұйықтамай өткізген болады», делінген. Түннің қалған бөлігінде де нәфіл намаз оқып, Құран оқумен және дұға-тілек, тәубе етумен өткізу керек».
Қадыр түнінің кейбір белгілері:
Аспан ашық бұлтсыз болады. Ауа-райы е суық, е ыстық болмайды. Бұл түні теңіз суларына дәм кіріп, зәмзәм суы көбейеді.
Муауия ибн Әбу Суфян р.а-дан риуаят Нәби (с.ғ.у) айтты:
«Қадыр түні жиырма жетінші түн».-деген.
Қадыр түні оқылатын нәфіл намаздың оқылу тәртібі:
Бұл түні «Қадыр түні» намазы оқылады:
Бірінші ракағатта: 1 рет Фатиха, 3 рет Қадыр сүресі.
Екінші ракағатта: 1 рет Фатиха, 3 рет Ыхлас сүресі.
Үшінші ракағатта: 1 рет Фатиха, 3рет Қадыр сүресі.
Төртінші ракағатта: 1 рет Фатиха, 3 рет Ыхлас сүресі оқылады.
Намаздан соң: «Аллаһу акбар. Аллаһу акбар. Лә иләһа иллаллаһу уаллаһу акбар. Аллаһу акбару уа лилләһил хамд» 1 рет.
100 рет Ишрах сүресі,
100 рет Қадыр сүресі,
100 рет «Аллаһумма иннака афуун кәримун тухиббу афууа фаъфу анни», дұғасы оқылады. Сосын тілек тілейді.
Аллаһу тағала баршаңыздың дұға-тілектеріңізді қабыл етсін! Келесі жылғы Қадыр түніне дейінгі тағдырымыз тек жақсылық пен қуанышқа, сәттілік пен бақытқа толы болсын! Әмин.