Жарияланымдар

Сайлауға барасың ба?

Ақтау қаласынан шығатын Лада.ТВ газетінің интернет-бетінде “Сайлауға барасыз ба? Кімге дауыс бересіз?” атты сауалнама өтуде.

Қарап отырсам, сайлауға қатыспайтындар мен қатыса қалған күннің өзінде өзге емес “Нұр Отанға” дауыс беремін” деушілер қарасы көп-ақ. Оның ішінде менің және әйелімнің де дауысы жүр. Яғни, қалыс қалушыларданбыз. Ал дәлірек ақпаратты суреттен қараңыздар.

Дегенмен, бұл тек lada.kz сайтының өзіндегі ғана сауалнама ақпары. Ал олардың Вконтакте атты әлеуметтік желісіндегі бетшесінде тағы бір сауалнама жариялаған (екінші сурет). Ол жердегі халықтың да басым көпшілігі, яғни 43.7 пайызы “Сайлауға бармаймын” деп жауап берсе, сайлауға барамын деп шешкендердің 26.6 пайызы “Нұр Отанға” бүйректері бұратындықтарын жасырмаған. Айта кету керек, бұл басылымның негізгі контингенті Маңғыстаулықтар немесе мен сияқты өзге облыста, өзге елде гастарбайтерлетіп немесе оқып жүрген маңғыстаулықтар боп табылатындықтан, бұл сауалнама көрсеткіштерін тек қана болмағанмен, көп жағдайда Маңғыстауға тиесілі деп қарастыру керек. Демек, менің шығарып отырған қорытындым, халық не сайлауға сенбейді, не мен сияқты “Бәрібір Нұр-Отанға беремін даусымды, ал Нұр Отан мен бармасам да өзіне тиесілі дауысты алады” деген сенімдегі адамдар деп білемін.
Ал енді төмендегі сауалнама арқылы сіздер жауап беріп көріңіздерші? Сайлауға кім барады? Кім кімге дауыс береді?

Әрі қарай

Тегін домен, шексіз хостинг, $10 доллар

«Еріншектің ертеңі бітпес» Арнайы Тимур үшін халық мақалы

Тақырып айтып тұр.

Бұл хабарлама Siteground.com хостинu компаниясының жаңа жыл алдындағы мерекелік ұсыныстары туралы.

Уақыты шектеулі!

Арғы күнге дейін, яғни 31 желтоқсанда бұл жеңілдік тоқтайды. (Бізден 5 сағат кейін). Сондықтан, бар болғаны 10 АҚШ долларын төлеп, лимитсіз хостингке және шет елдік бір тегін доменге ие болғыңыз келсе, мына сілтемемен жүріңіз. Әрине, беретін домендері екінші деңгейде. Тек шет елдік яғни халықаралық. Қысқасы .kz домен емес.
Әрі қарай

Президент Құлыбаевты отставкаға жіберді!

Бүгін бір тосын жаңалықтарға толы болды.

Әуелі, Елбасымыз Нұрсұлтан Әбішұлы Маңғыстау облысына келіп, облыс басшысын ауыстырды. Бұрын ол Қырымбек Көшербаев болса, енді Бауыржан Мұхамеджанов атты әуелгі қызыл жағалы. Тенгриньюс.кз ақпараттық агенттігінің айтуынша, бүгінгі ауыс-түйістер кезінде Президент Көшербаевқа кінә қоймайтындығын, керісінше, осынша уақыт ереуілде тұрған мұнайшылармен келіссөзге келмеген "ҚазМұнайГаз" басшылығы кінәлі деп тапқан болатын. Соның нәтижесі ретінде "ҚМГ" басқарма бастығы етіп, сол Маңғыстау облысының тумасы, әрі сол өңірде облыс басшысы болған Ләззат Қиыновты тағайындады.
Әрі қарай

Назарбаев келді, Көшербаев кетті!

Маңғыстау облысын енді Бауыржан Мұхамеджанов деген кісі басқарады. Маңғыстау халқы зәрезап болған Көшербаевты орынтағынан алды. Негізі әуел естігенде қуанғандай болдым да артынан бірден басылдым. Эхх… Күрсінетінім сол, жаңа әкіміміз бұрынғы қызыл жағалы екен. Яғни экс Ішкі Істер Министрі. Осыған дейін сенатор болған. Жақсылықтың нышанын күтіп тұрған жоқпын. Әлбетте, бейбітгілік тілейміз. Алайда, ауылдағылар бұл жігітпен де ымыраға келе қояды деп ойламаймын… Бір Аллаһ қайырын берсін! Көрейік… Бәлкім оңалармыз…
Әрі қарай

Көшербаев кетсін, Назарбаев келсін!

Осының алдында жазған «Сыныққа сылтау немесе Маңғыстауға сабыр керек» атты постымды
Айтпақшы-4, Маңғыстау облысының әкімі Қырымбек Көшербаевты орнынан алу керек! 2006 жылы қалай облысқа басшы боп келді, солай көтеріліс басталды. Мәселені күшпен екіні бірі баса алады. Ал мәмілеге келіп шешетін лидер некен-саяқ. Міне, осы жерде біліктілік керек-ақ! Өзінің өкінішіне қарай, Қырекең ол межеден көріне алмады. Айта кететін тағы бір нәрсе, маңғыстаулықтар Көшербаевтың сөзін естіп, өзін көрсе, қан қысымы көтерілетін дәрежеге жеткен…

Айтпақшы-5, Өңірге жедел түрде Елбасы Нұрсұлтан Әбішұлы келуі керек! Мен білетін Маңғыстау болса, олардың тыңдатайтыны әрі күрделенген проблемаға жауап бере алатын тек қана сол кісі!

деп аяқтаған болатынмын. Сол тілек орындалатын секілді. Бүгін, яғни желтоқсанның 22-сі күні Елбасы НӘН Ақтауға ат басын бұрды. Дұрыс шешім күтеміз.

Айтпақшы: Бейресми көздер бойынша, жаңа ғана Көшербаевтың орнынан алынғаны туралы ақпарат алдым. Облысты енді Бауыржан Мұхамеджанов деген кісі басқарады.
Әрі қарай

Сыныққа сылтау немесе Маңғыстауға сабыр керек

Тәртіпке бағынған құл болмайды! (Бауыржан Момышұлы)

… Естіп жатырсыздар.

Тәуелсіздігіміздің 20 жылдығын міне тойлап бастағанда, Маңғыстау облысының Жаңаөзен қаласында бүлік бұрқ ете түсті. "Қалай болды, кім бастады, неден, неге?.." деген т.с.с. сұрақтарға жауап бермеймін. Бере де алмаймын. Өйткені, мәселенің түп-төркіні алыста жатыр. Ал оқиғаға себепші — әрі билік, әрі оппозиция және «адамның құқын қорғағыш» әміркандық һәм батыси ұйымдар мен сымақтар. Келіспессіздер, алайда бұл менің пікірім. Бірі бері тартса, бірі ары тартты. Енді қара халық зардап шегуде…
Әрі қарай

Тәуелсіздік тұғырлы болсын, қандастар!

Баршаңызды Ел Тәуелсіздігінің 20-шы жылымен шын жүректен құттықтаймын!

Мейлі, біреуден артта болайық, біреуден кем, бірақ қалай болғанда да тәуелсіз елде өмір сүріп жатырғанымыз әмбеге аян. Мұны тіпті радикалдығы асқынған қай оппозиционер болса да мойындауы керек!

Тәуелсіздіктің өлшемі не өзі?

«Бас бостандығы» десем, коммунизмнің салқыны қаққандар оныма келіспейді. «Жан тыныштығы» десем, «Күйттегенің сол?» ма дейтіндер табылар. "Ішкенім артымда, ішпегенім" алдымда десем, «тоғышардың тірлігі» дейтіні сірә белгілі. Сонымен? «Тәуелсіздік» деген не өзі?
Әрі қарай

Абайдың қара сөздері һәм EPUB

… Сонымен…

Барлығыңыз .pdf немесе .djvu секілді электронды құжат форматтарын білесіздер. Осы күні .mp3 дегенді жас та, кәрі де үйреніп алғандай, жаңағы айтқан .pdf секілді .epub деп аталатын электронды кітап форматтары күнделікті қолданысымызға еніп жатыр. Себеп, Apple шығаратын iPad бастаған планшеттер мен Amazon Kindle қостаған сан алуан электронды кітап оқу құралдарының пайда болуы. Бұл форматтың артықшылығы сол .pdf секілді салмағы ауыр емес және электронды құрылғыға салып оқығанда кітап өлшеміне байланысты қиындықтар туындамайды. Өйткені, оның белгілі бір өлшемі жоқ. Мұндай e-кітап құрылғыңыздың экран өлшеміне сай өзі мөлшерін келтіріп алады. Сондай-ақ, кітап оқу барысында сіз оны көлденең де, тікесінен де оқи аласыз. Әріптерді үлкейту, кішірейту немесе оқып жатқан бетіңізге қыстырма салу, мазмұны арқылы беттер немесе бөлімдер арасында жылдам ауысу жағы өте жақсы қарастырылған.
Әрі қарай

“Тумақ сүннет болғанда, өлмек парыз” һәм Стив Джобс бақилық



Инна лиллаһи уә иннә иләйхи раджиун
Алладан келдік және оған қайтамыз! (Бақара сүресі, 156-аят)

Тумақ сүннет болғанда, өлмек парыз (Майлықожа Сұлтанқожаұлы)

… Бүгінгі 2011 жылдың 5-қазаны ауа-райы ерекше болып тұр. Ал жұмысқа келіп естігенім, Стив Джобс қайтыс болыпты. Осының алдында ғана ол кісінің өз позициясын Тим Кукке тапсырып, денсаулығы сыр бергендіктен жұмыстан кететіндігін жазған болатынмын. Енді міне…

Ия, мұсылман ретінде бұл жағдай маған пәлендей қайғы болмауы тиіс. Өйткені, Пайғамбарымыз Мұхаммед (салаллаху әлейхи уәссалам) бізге “Иннә лилләһи уә иннә иләйхи ражиун” дегенді, яғни “Алладан келдік және оған қайтамыз” деп үйретіп кетті. Оның үстіне, тумақ бар жерде өлмектің де барлығы дәлел қажет етпейтін шындық. Майлықожа Сұлтанқожаұлы да “Тумақ сүннет болғанда, өлмек парыз” деп кетіпті ғой.

… Дегенмен! Сондай бір тұлғалар болады. Өмірі көрмегенсің, өмірі естімегенсің, ауқаттас болып, сырласпағансың, бірақ ол туралы естігеннен-ақ кәдімгідей қобалжып бастайсың. Бәлкім менің бұл жағдайымды Майкл Джексонның фанаттары түсінер. Ол кісі өлгенде мен анау айтқандай қайғыра қоймағам. “Адам болған соң өлед тағы?” деп. Енді міне, өзім солардың күйін кешіп отырмын. “Стив Джобс өлді” деген сөз ауыр естіледі екен…
Әрі қарай

Халал-депозит Атырауда

Ғайыптан тайып "Қазақстан қажылар қоырының" сайтына тап боп қалдым. Сөйтсем, осы сенбі, яғни Қазанның 8-і күні Атырау қаласында осы қордың ұйымдастыруымен көрме өтеді екен. Осынау қуанышты ақпаратты өздеріңмен бөліскенше асықтым. Төмендегі ақпаратты сол сайттан түгелдей көшіріп салып отырмын. Мұндай бастамаларды «еліміздің ислами қаржы нарығындағы сеңнің қозғалуы» десек артық айтқандық болмас…
Әрі қарай