Қазақстанның қазіргі мақсаты әлемдік аренада имиджін қалыптастыру. Осы орайда аламан спорттық жарыстардағы спортшыларымыздың жеңісі елімізді танытудың тиімді жолы деп тапты билік. Сол себепті де Олимпиада чемпиондары мен жүлдегерлеріне берілетін сыйдың, қаражаттың сомасы жылдан-жылға ұлғаюда. Ал, меніңше, спортшылардың мотивациясын жеңістен кейінгі қаражатпен арттырып емес, о бастан жағдайын жасағаны жөн сияқты. Еліміздегі спорт мектептері қажетті құрылғылармен жабдықталған, жақсы қаржыландырылады деп айта алмаймыз.
Қарағанды облысы, Абай қаласында орналасқан «Абай аудандық балалар мен жасөспірімдер спорт мектебі» мемлекетіміздегі үздік спорт мектебінің бірі. Мектеп ғимарат ретінде 1966 жылы ашылғанымен, негізі одан ертерек қаланған. Алдыңғы постта мектептің негізін салған Андрей Богданович Райш мектеп тарихы мен шәкірттері жайлы толыққанды әңгімелеп берген болатын.



Мектептің мықтылығын оның даңқты спортшыларынан байқауға болады. Еуропа чемпионы Серік Нұрқазов, Сидней олимпиадасына қатысқан халықаралық дәрежедегі спорт шебері Данияр Мұңайтпасов, екі дүркін әлем чемпионы, Лондон Олимпиадасының алтын медаль жүлдегері, Вэл Баркер кубогының иегері Серік Сәпиев, халықаралық дәрежедегі спорт шеберлері Александр және Виктор Зарочинцевтер осы мектептің тәрбиеленушілері. Сондай-ақ, бұл спорт мектебінің қабырғасынан Республикамыздың еңбек сіңрген бес бапкері шыққан. Ал қаншамасы Ресейдің үздік бапкерлері мен спортшылары атанды. Солардың бірі Наталья Рагозина, Олег Маскаев. Төрт жыл сайын ұйымдастырылатын Жазғы Олимпиада ойындарына да Абай спорт мектебінің түлектері жолдама жеңіп алады. Риода өткен Олимпиадада он тоғыз жасар боксшы Абылайхан Жүсіпов пен жеңіл атлет Флорида Миниянова өнер көрсетті.

Елу жылдан артық тарихы бар мектептің жағдайы қандай?



Бүгінде Абай спорт мектебінде 9 секция белсенді жұмыс жасайды. 722 тәрбиеленуші спортпен шұғылданады.



Ғимараттың алдыңғы бөлігі керамогранитпен қапталып, терезелері пластикке ауыстырылған демесеңіз, ішкі жағдайы мүлдем басқаша.









Боялған ескі едендер, тозығы жеткен грушалар, аядай киім шешетін бөлме, кеңес үкіметі кезінен қалған стендтер. Жалғыз бір залдан ғана жаңа құрылғылар көрдік.



Бұл тренажер залын Болат Алтынбеков есімді жеке кәсіпкер сыйға тартқан. Сондай-ақ Руслан Тушиев атты мектеп түлегі де талай мәрте қаржылай көмек көрсеткен екен. Серік Сәпиевтің Пекинде өткен Олимпиадаға қатысуына осы азамат демеушілік еткен. Тек Қарағанды облысы бойынша ғана емес, Республика деңгейіндегі ең мықты спорт мектебі болғанымен, ең аз қаржыландырылатын мемлекеттік мекеме. Мектеп тек жаттықтырушылардың ынтасымен ілгері жылжып келеді. Басшылық қолдан келгенше жөндеу жұмыстарын жүргізіп тұруға тырысады.



Тағы бір деректі назарларыңызға ұсынғым келеді. 2009 жылы Қарағанды облысының туризм, дене шынықтыру және спорт басқармасының жарылғысымен «Абай қаласының балалар мен жасөспірімдер спорт мектебі» «Абай ауданының балалар мен жасөспірімдер спорт мектебі» коммуналдық мемлекеттік мекемесі болып ауыстырылыпты. Осы мектептің негізін салып, талай жаттықтырушы мен спортшыны баптаған Андей Богданович Райштың аты неге берілмейді деген ой туындайды.

(Мектеп туралы қысқаша ақпарат 2 минут 22 секундтық видеода)



Қажетті ақпаратты ұсынғаны үшін жетекші қызметін атқарушы Зейнешев Камараддин Рашидовичке алғысымызды білдіреміз.

Әбішева Дана Төлеубекқызы — Қарағанды облысы, Қарқаралы ауданының тумасы. 2010 жылы Е.А.Бөкетов атындағы Қарағанды Мемлекеттік Университетінің «Химия» факультетін тәмамдап, Абай қаласындағы Абай Құнанбаев атындағы №5 мектеп-гимназиясына химия пәнінің мұғалімі боп қызметке кіріседі. Болашақ чемпионмен осы қызметінде жүріп танысады…

Сабақтан шыққан соң, күнделікті әдетім бойынша өзіміздің университетте шығып тұратын «Жастар әлемі» газетінің редакциясына соғып, алдағы номерін дайындауға қолғабыс ету мақстанда, ҚарМУ-дың бас корпусына барған едім. Кіре берісте мына бір афиша көзге түсті.



Осы жерде жазылған номерге хабарласып, Адхам Самат есімді жігітпен кездесуге уағдаластым. Бейсенбі күні болатын кешкі дайындыққа келуіме рұқсатын берді. Сонымен уәделі уақыттан сәл ертерек, Серік Сапиев атындағы бокс орталығына келіп тұрмын.



Боксшылар бізді жылы қарсы алды, бірақ, дайындықтары аяқталғанша ешбірімен сөйлесуге мүмкіндігім болмады. Қолымнан бар келгені дайындықтарын сырттай бақылап, суретіме түсіру ғана болды. Сөйте жүріп біраз дүниені аңғарып қалдым. Бұрыннан бері бокспен шұғылданып келе жатқан жігіттер мен боксқа енді ғана келгендер жаттығу алдындағы тер шығарып, бой жазуда бірге дайындалып, жатықтырушының әр сөзін бұлжытпай орындайды екен. Бірақ, жеке дара дайындалған кезде жаңадан келген жаттығушылар груша ұрып, техниканы меңгеріп дайындалса, сақалары рингке шығып, бір-бірімен жұдырықтасу арқылы жаттығып жатты.



Жаңадан келгендерді жаттықтырып жүрген Галиманов Қуаныш әр жаттығудан соң, жігіттерге бірер минут тыныстап алуға мүмкіндік беріп отырады екен. Сол сәтті пайдаланып, жас жаттығушылардың бірінің пікірі алып үлгердім:

Біржан Туткушев:



Бокспен студент кезімде шұғылданғаным бар еді. Бірақ, танымал боксшы болған жоқпын. Бұл жерге келудегі мақсатым өзімнің физикалық нормамды сақтап тұру, және бос уақытымды тиімді өткізу. Өзім Қазақмыс кәсіпорнында жұмыс істеймін, қолым қалт еткен сәттерде осында келіп, жаттығып тұрамын. Бапкерлер жақсы, өзіміз қатарлы жас жігіттер болғандықтан тіл табысуға жеңіл және қарт бапкерлерге қарағанда не керек екендігін жақсы біледі. Біздің тілімізді тауып жүр. Зал үнемі таза, қатаң тәртіп орнаған.

Сонымен бұл жігіттің демалыс уақыты бітіп, алдындағы грушасын қайтадан төмпештей бастады, ал мен болсам, кім бос тұр екен деп аңдумен болдым. Сонымен сәті түсіп, басқа боксшылардын тысқары тұрған, екі жігітке жолықтым. Бұлар кикбоксшылар екен. Осы спортпен шұғылданып жүргендеріне біршама уақы болыпты. Нақтылап айтар болсам Руслан Баязит есімді жігітке тоғыз жыл болса Нүркен Джуматовқа он екі жылдың көлемі болып қалыпты. Екеуіде әлем чемпионы атағын алған екен. Қазір, осы бокс орталығында өтіп жатқан турнирге қатысып жатқан екен. Бүгінгі ойында Руслан 57 келі салмақта сынға түсіп жеңіске жетіпті. Нүркен ертең қатысатынын айтты. Екеуі де осы залдың бапкерлерінің жұмысына көңілдері толатындығын білдірді.



Мен осылай әр боксшының жанына бір барып, суретке түсіріп жүрген кезімде уақыт зырлап өте шықты. Сағат түнгі 21/30 болған кезде жаттығу аяқталып, жұрт суға түсуге кете бастады. Шәкірттерінен босаған бапкерлермен тілдесудің сәті түсті.

Адхамов Самат:

Серік Сапиев атындағы бокс орталығында осы залды жалға алып, жастарға бокс өнерін үйретіп жүргенімізге бір айдың көлемінде уақыт болып қалды. Мақсатымыз қала жастарын еркектер кәсібі саналатын бокс өнеріне баулу. Жаттығамын деушілерге қоятын талабымыз аса көп емес. Басты талап дайындыққа кешікпеу және өткізіп алмау. Аптасына үш күн жаттықтырамыз. Егер бір күнді өткізіп алса, онда кері қарай бір қадам басқандары болып саналады. Және біздің ең басты талабымыз, осы жерде үйренген өнерін, техникасын сыртқа көрсетпеу. Біреуге күш қолдану мақсатында емес біреуді қорғау немесе өзін қорағай алуды меңгеру. Егер біздің орталықтың бір баласы өзінен әлсіз жанға жәбір көрсеткен болса онда дайындыққа қатысу құқығынан айырамыз. «Бокс төбелес өнері емес, бокс шахмат тәрізді, бірақ жылдамдықты талап ететін өнер.» Бұл пікірді Серік Нұрғазы ағам айтқан болатын.
Біздің орталыққа келушілердің көпшілігі өздері үшін дайындық жасайды. Жүгіріп, шынығып, күнделікті өмірдің күйбең тірлігін бір сәтке ұмытып, тек спортты ғана ойлайды. Күн ұзағына бойда жиналып қалған зиянды энергияларды сыртқа шығарады. Бір есептен бос уақытын тиімді өткізіп салауаттылығын арттырса, екінші жағынан қиын-қыстау күн туа қалғандай жағыдай болса өзін қорғай алатын болады.

Расында клубта қатаң тәртіптің бар екендігі байқалып тұр. Жаттығу аяқталған соң әр қатысушы өздері пайдаланған спорт құралдарын әп-әдемі етіп жинап қойды да суға түсуге аттанды. Бұл жерге жазылу бағасы бір айға 10 000 теңге көлемінде. Себебі жоғарыда аттарын атап өткен екі жігіт дайындық залын өз қаражаттарына жалға алып отыр. Бағасы қымбат болғанымен бұл жерде үйренеріңіз де көп болмақ. Екі жаттықтырушы да Қазақстанның спорт шеберлері. Талай турнирдің жүлдегерлері.

Қарағандының сырт жағына қарай орналасқан Серік Сәпиев атындағы бокс орталығына 011; 29; 7; 146 автобустармен қатынай аласыз. Түсетін аялдамаңыз «Орбита». "Қарағанды Арена" мен «Теннис орталығы» ғимараттарының арт жағында орналасқан. Адаспай тауып бара аласыздар.

Бүгін Алматыдағы «Достық» спорт кешенінде бокстан «Төртеудің турнирі» аяқталды. Бұл турнирге Қазақстан, Ресей, Үндістан және Франция қатысқан. Басты мақсат — Олимпиада алдындағы дайындықты бір пысықтап алу. Бокс мен барсам басталып кетіпті. Аңдатпада бесте басталады деген. Қайта ертерек барғаным жақсы болыпты. Дәл, Серік Сәпиев пен Андрей Замковойдың жекпе жегіне тап болдым.