Арнайы "Үздік кино сыншысы" байқауы үшін.


Бұл фильмді мен алғаш рет 2003-2004 жылдары көрдім. Сюжеті түсінікті болса да, тым созылыңқы, қызықсыз деп таптым сол кезде. Одан бері оны тағы бірнеше рет қайталап қарап шығыппын. Әр көрген сайын жаңа бір ойды, тағы бір жасырулы түйінді байқай түсемін.

Биылғы жаз мен үшін ауырлау болды. Өзіме жақын санаған бірнеше адамнан айырылдым. Фильм осындайда о дүние туралы танымыңды позитивтендіре түсетін тәрізді. Позитив болғанда да енді, біз ойлағандай жайдары-жарқын көңіл-күй сыйлайды деген мағынада емес, сенің жақсы көретін адамдарыңның жаны өмірдің күйбеңінен азат болып, рухтары рахат тапқанына деген сенімің арта түседі.


«Армандар қайда апарады» («What Dreams May Come») — Винсент Уордтың 1998 жылғы фантастикалық драмасы. Басты рөлде — Робин Уильямс. Иә, жақында ғана өзіне қол жұмсап қайтыс болған Робин ата. Мына бір парадоксты қараңыз — фильмде Уильямстың кейіпкері өз-өзіне қол жұмсап тозаққа түскен сүйген жарын құтқару үшін күреседі, ал өмірде актер өзі-ақ тозаққа апарар жолды таңдапты. Еріксіз келесі ой келеді: Сені кім құтқарады, Робин???

Бұл дүниеде мүмкін емес нәрсе жоқ дейді ғой. Қажет болса заңды да бұзасың, адам өмірін де құрбан етесің, өз мақсатыңа жету үшін бәріне де баруға болады. Ал о дүние — бұлжымас заңдылықтар мекені. Құдайдың қарғысына ұшырадың ба — тозаққа! Одан ешқашан, ешқайда қашып құтылмайсың.


Бірақ мың тобырдың ішінде бір ерекше жан болады, ол өзгелердің көнген нәрсесіне мойынсұнбайды, бағынбайды. Робиннің кейіпкері сондай еді. Әйелін табу үшін тозаққа аттанады, жары үшін тіпті сол қарғыс атқан әлемде мәңгі қалып қоюға дайын. Сіз білесіз бе — қоғамның локомотивтері осындайлардан шығады. Бәріміз үйреншікті, өзіміз үшін қалыпты құбылысты мойындап жүре береміз, бірақ бір күні жүйеге бағынбайтын асау жүрек пайда болады. Келеді де стереотиптердің барлығын тас-талқан етіп қиратады.

Фильмдегі оқиғалардың басым бөлігі о дүниеде өрбиді. Жәннат пен тозақты режиссердің және автордың көзқарасымен көреміз. Картинада баяндалған керемет идея — адам бақилық болғанда о дүниені өзі ойлағандай формада көреді. Яғни, тірі кезіңде қалай елестетсең, сондай әлемге тап боласың. Бір қызығы сол — басты кейіпкерлер Крис пен Энни бірдей ойлайды екен. Екеуінің сезімдері мен қиялдары, армандары мен түйсіктері бір-бірімен үйлесіп сонша, екеуі енді екі әлемде болса да біреуінің әрекеті екіншісіне әсер етіп жатады. «Туыс жандар» деп осындайда айтылса керек.


Фильм арқылы махаббат үшін ауру мен қайғы да, уақыт пен кеңістік те кедергі бола алмайтынын көрдім. Сүйгенің үшін қайда болса да еріп баруға дайынсың, тек бірге қасында болсаң жетіп жатыр, басқасы маңызды емес. Бұл өмірде қанша қайғырмайық, тағдырдан қанша теперіш көрмейік, түбі жақсы көрген жандарымызбен қайта қауышып мәңгі бірге боламыз.

Фильм музыкасымен, арнайы эффектілерімен (эффект үшін «Оскар» алған) ерекше әсер береді, кейіпкер тап болған атмосфераны барынша шынайы қабылдауға ықпал етеді. Экрандағы тамаша көріністер жүріп жатқанда сенің жаның да денеңді тастап, қиял әлеміне шарықтап кеткендей күй кештірді.


Бәрімізді болашаққа жетелейтін арман-қиял екен. Ал, Робин Уильямс өлмес бұрын нені армандады екен? Мүмкін ол да өз қиялының жұмағында шаттыққа толы көңіл-күймен жүрген шығар?

Айтпақшы, «Армандар қайда апарады» драмасының басқаша бітетін нұсқасы да бар екен. Баламасы прокаттық нұсқадан да әсерлі аяқталады ма деп қалдым. Оны да тауып алып көруді ұсынамын.

P.S. Осындай кинотуындыларды үйде өзіңнің жақын адамдарыңмен бірге көргенге не жетсін. Әсіресе Samsung Electronics ұсынған саундбардың көмегімен тамашалау — фильм берер әсерді күшейте түседі деген ойдамын.

Өмірімнің өткен бөлігіне шолу жасасам, өз басымда да стереотиптердің сынғаны деп айта алатын оқиғалар жеткілікті екен. Бұл жерде нақты айту қиын — олар жалпыға ортақ стереотиптер ме, әлде жеке басымда қалыптасып, бұзылмас деп есептеген принцептер ме. Дегенмен, солардың бірнешеуімен бөлісіп көрейін.

Миф #1. Атырауда тудым, Атырауда тұрамын, Атырауда өлемін

Қалада тусам да, ауылда өскен мен секілді мәмбеттің болашағы белгілі еді. Өзімнің пайымым бойынша: «Ауылдың орта мектебін бітірген, грантта оқуға шамасы жоқ, әдеби кітаптарды сүйіп оқиды, романтик. Демек, Атыраудағы бір газеттің ортаңқол редакторы болып күнін кешеді. Әйелі көрші ауылдан, немесе университетте танысқан өзі секілді бір малшының, не балықшының қарапайым қызы болады. Екі-үш баласы болады, жасы қырыққа жақындағанда әупірімдеп баспанаға қол жеткізеді. Сөйтіп жүріп елеусіз өмірден өтеді де кетеді. Мүмкін артында 1-2 кітабы қалатын шығар».
Мен бұдан артығын күткен де емеспін, қалаған да жоқпын. Біреу тіпті маған Атыраудағы өмірің 1,5 жылмен шектеледі десе, қарқылдап бетіне күліп кетер едім. Не болды, ал? Бір күні заттарымды бір рюкзакқа тықтым да, қалтамдағы 30 мың теңгемен Алматыға тайып тұрдым. Барлығы әп-сәтте болғаны сонша, есімді қалтамдағы ақша таусылғанда ғана жидым. Атырауға оралуға намысым жібермеді. Алматыда 1-2 жыл жүре тұрайын деп шештім. Ол 2007 жылдың жазы болатын.

Миф #2. Мен танымал болмаймын

— Саламатсыздар ма! Эфирде жаңалықтар, микрофон алдында Ернар Бекенов.
Түсінесіздер ме — мен ауылдан бірнеше ай бұрын ғана келген баламын, бойымда мәмбеттігім әлі бар. Маған біреу 1-ші курстың соңында радио-диктор боласың десе, бетіне күле қарап тұрып, жерге «харқ» еткізіп бір түкіріп тастап, бұрылып кетіп қалар едім. Радиоға қайдан тап болдым? Білмеймін, әйтеуір басында өндірістік практика дедім, одан кейін стажировка дедім, тағы бір ай — мен штаттағы радиожүргізушімін.
— Сіз Ернар Бекеновсыз ғой жаңалықтар оқитын?!
Олар мені қайдан таниды? Қызық екен, қалалық «Тандем» радиосының өз фан-клубы бар екен және олар радиодағы барлық өзгерістерді бақылап отырады. Уау! Менің де фанаттарым бар!

Миф #3. Басшылық лауазым маған бұйырмаған

Сіз 19 жасар бас редакторды танисыз ба? Ол мен. Радиодағы 1 жылдық өмірімде бас редакторлыққа дейін көтерілдім. Екінші курста оқып жүрген кезім еді.
Әлгі газеттің ортаңқол редакторы туралы ойларым миф болып қалды. Бас редактор қайда, қарапайым газетші қайда?

Миф #4. Менің әйелім нағыз қазақ болады

Мен тілімді сүйемін, мен ұлтымды сүйемін! Орыс тілділермен ешқашан, естисіз бе — ешқашан дос болмаймын. Астраханның бір ауыз қазақша білмейтін қызы? Ха-ха! Ондайлардан алыс жүр, сенің әйелің нағыз қазақ болуы керек.
2010 жыл 8-9 қазан. Атыраулық Ернар мен астрахандық Светаның үйлену тойларына қош келдіңіздер.
Кейде менен әйелім әзілдеп сұрайды:
— Бір ауыз орысша білмейтін, ұлтшыл, ашушаң, жағымды бір қылығы жоқ ауылбайды қалай сүйіп қалдым?
— Білмеймін, өзім де осы сұраққа жауап таба алмай талай таңды атырдым, — деп шын жауап беремін.

Миф #5. Қайын жұрт — жауың

Өзімді бөтен адамдармен жарасып кетуі қиын адам ретінде білемін. Оның үстіне қайын жұртпен жақын араласу күшік күйеулікке алып келеді деген сенімде едім. Мүмкін тәрбиеден шығар, әкем мысалы өз қайын жұртымен әлі күнге дейін жақын араласпайды. Әкем менің болашақ әйелімнің ауылына танысу үшін, келінге сырға салып, құда түсу үшін алғаш барып келгенде ашуланып келді:
— Құда қызық адам екен, әлі көрмеген болашақ күйеуді балам деп отыр!
Мен үшін де бұл біртүрлі қылық көрінді. Кейін таныса келе көп нәрсеге көзқарасым өзгерді. Жыл сайын жазда Ресейге қайын жұртқа барамыз. Атам құшақ жая қарсы алып, мен үшін алып қойған сыбағасын береді, сырасын құяды (ол жақта сыра ішімдік болып есептелмейді). Енем де «Балам, қарның ашпады ма?» деп күні бойы құрақ ұшып жүреді. Өмірімде бұндай құрмет көрмеген мен үшін бұл тосын көрінсе де, кейін үйреніп кеттім. Бажам марқұм тіпті бар жұмысын тастап, шекарадан келіп күтіп алатын. Сосын қайтқанша думанды демалыс басталады.

Қарап отырсам, өзгерістердің көпшілігі қазіргі әйеліме қатысты болыпты. Бірақ жеке мен үшін ғана, көпшілігіміз үшін қалыпты емес болып есептелетін тағы бір стереотипті бұзыппын: Ешқашан күйеуі әйелінен кіші болмайды. Иә, әйелім өзімнен 3 жас үлкен.

«Ешқашан ешқашан деме», — дейді ғой орыс халқы. Принциптер мен стереотиптер талай өзгереді екен. Осыдан бірнеше жыл бұрын өміріңде осындай оқиғалар болады десе сенбес едім. Әлі де талай нәрсе өзгерер, тек ең бастысы өзіңді жоғалтып алмау.

Бала кезімде есімде: теледидардан «Тамаша» көрсетілсе, үлкендердің бәрі шаруаларын тастай салып, үймелеп отырып алады да экранға үңіледі. Бұл жерде "қыңқ" етіп артық дыбыс шығарған бала — әлемдегі ең жексұрын адам. Кейін кассеталы видеомагнитафон, дискілі DVD-плеер пайда болғанда да ата-аналарымыздың буыны үшін жағдай көп өзгере қойған жоқ — жинала қалып теледидарға телміреді. Осындай «басқосулардың» талай рет куәсі болдым, жанама түрде болса да өзім де қатыстым, сонда байқағаным — ешкім шек-сілесі қатып күлмейді, жер тепкілеп, көзден жас шыққанша қарқылдаған бірде-бір жанды көрмейсіз. Тек езу тартып, мырс еткен әке-шеше мен «М-м-м, дұрыс айтады», "Өй, бәлем тауып айтты", «Тапқыр-ай осылар» деген мақұлдау стиліндегі ата-әженің сөздерін ғана естисің.

Әзіл-сықақ театрлары

Ол кезде «Тамаша» мен «Бауыржан шоудың» комедия театрлары екенін мен білмеппін де, білсем де мән бермеппін. Кеше ескілеу бір видеоны тағы бір қарап шықтым. Түсінгенім — бұл жерде юмордан гөрі, астары бар сөздермен көңіл көтеруге көбірек назар бөлінетін секілді.
Сіздерді білмеймін, мен күлкілі ештеңе көрмедім. Тіпті нені сараптау керек екенімді білмей қалдым.

Жарайды, бұл ертеректе болған жағдай ғой. Қазір мүмкін өзгерген шығар? Мысал үшін, халық көп мақтайтын Нұржан Төлендиевтің қатысуымен болған скетчке назар аударайықшы:
Артықшылықтардан сахнаның безендірілуі секілді техникалық қырларын атар едім. Қойылымды бірнеше әрекетпен (телефонның екі жағындағы оқиғалар) күрделендіре түскендері ұнады. Демек, бұдан он шақты жылмен салыстырғанда аздап болса да өрлеу бар. Нұржанның харизмасы мықты, әртістігі жоғары (әзіл-сықақ театры үшін) деуге болады. Бірақ скетчте күлкі шақырар әзілдер саны 0-ге жақын.

Әзіл мүлдем жоқ деген тым артық болар. Бірақ, әлгі бала кезімізде "Ә-ә-ә, ананы қараңдар — бұтына жіберіп қойды", — деп тарқылдап күліп, әжуа еткен секілді, келемеждің деңгейінде қалып қойған. Мектептің «Алтын күзі» үшін керемет скетч болар еді, бірақ республикалық дәрежеде емес.

Менің ойымша, театр деп өздерін атағаннан кейін, LED экранмен және 3 микрофонмен шектеліп қалмай, көрнекі құралдар жұпынылығынан арылу қажет. Бұл сахнадан да, теледидардан да қарағанда қойылымның визуалды қырын ажарландырып, тартымды болуға септігін тигізеді. Екіншіден, бала деңгейіндегі әжуа, орысша араластырып сөйлеу секілді тым арзан әзілдерден арылу керек. Бұндай халтурамен балалар айналыссын. Осы тұрғыда үлгі ретінде «Уральские пельмени» шоуын мысал ретінде ұсынар едім:

---

---

Стендап

Стендап юмор саласының ең танымал форматтарының бірі. Бізде стендаптармен жарқырап жүрген Тұрсынбек Қабатовтың театры бар.
Иә, тапқыр ойлар бар. Бірақ сөздер редакцияланбаған, дайындық жоқ па? Артық сөздер, орысша қоспалар көп. Егер сол арқылы юмордың сапасын арттыруға болады деп ойласа — автор ұзаққа бармайды. 6 минуттың роликтен 2-3 рет езу тартқан шығармын. Қалғандары бастауышынан баяндауышының қандай екенін алдын ала біліп алуға болатын тым қарабайыр әзілдер.

Сосын, әзіл-сықақ театрларында ұжымның фронтмені шығып, концерттің алдында 5-10 минут сөйлейтін дәстүр бар. Әдетте, олар да аса бір тапқырлықпен ерекшелене қоймайды. Қол шапалақтауға тұрарлық бірнеше әдемі ой айтылады, бірақ бұларды әзілден гөрі халықтың көкейінде жүрген бір мәселені дөп басып айтуға балар едім. Театрлардыкі қаншалықты стендап, оны нақты анықтау да қиын.

Маған ТНТ арнасының «Stand Up» шоуы ұнайды. Жалпы стендап болсын, басқа жанр болсын, әзіл айтқанда өзіңе күле білу қажет деп ойлаймын:
Стендаптың ең басты қағидасы мынау екен: «Алғашқы он секундта күлдірте алмасаң — сен комик емессің». Бізде осы талапқа сай комик бар ма? Мен кездестірмеппін.

---

---

КВН

Өз заманында атақты командалардың бірі болған «ТехАС» көрсеткен мына үзіндіге назар аударайықшы:
Қойылымдары әзіл-сықақ театры мен көңілді тапқырлардың гибриді істетті. «Тамашизмге» тән театрландырылған детальдар (киім-кешек, басқа да атрибуттар) мен КВН-ға тән әзілдер бар. Бірақ бәрібір таза әзілден гөрі, клоунада көп: бет-аузын қисайту, әжуалау. Жұрт қыран-топан әйтеуір, оған да рахмет.

Қазақ КВН қазір қалай әзілдейді екен:

КВН-нің форматының ерекшелігі сол — әр айтылған ойдың соңы міндетті түрде күлкіге немесе тапқырлыққа алып келуі тиіс. Мен басқа да видеоларды қарап шықтым және бұл тұрғыда алға ілгерілеушіліктер бар секілді. Дегенмен, даурыға айқайлап сөйлеу, бір сөзді немесе сөз тіркесін бірнеше рет қайталап айту секілді кемшіліктер әлі де қалмапты. Неге екенін білмеймін, тартымдылығынан гөрі, көрерменді кері итеріп тұратын бірдеңесі бар: мүмкін атмфосферасы, мүмкін басқа да көркемдік ерекшеліктер. Езу тартқаным болмаса, есте қаларлық бір мықты әзілдер кездестірмедім. Кейбір айтылған сөздер мүлдем түсініксіз. Мүмкін, телевизиялық нұсқасы әдемі шығуы үшін техникалық моменттеріне (дыбыс, көрініс) көбірек көңіл бөлу керек шығар.

Экранға шығып жүрген осы бағдарламалардың бәріне ортақ бір нәрсені байқадым — барлығы әлеуметтік, отбасы төңірегіндегі әзілдерден әрі аса алмайды. Жоғары интеллектуалды, ақылды юморлар жоқ. Мысалы былай:


Юмор — жай адамдардың көңілін көтеріп қана қоймай, тәрбиелегіш, эрудициясын өсіру сипатына да ие болуы керек деп есептеймін. Қазақтың әзіл саласындағы кәсіпқойлар әзірге бұндай міндетті атқармақ түгілі, өздері жетілдіруді көп қажет ететін сияқты. Бір өкініштісі сол, мысалы жаңадан әзіл-сықақ театры ашылса, бұрынғылардан өзгеше болуды, ерекше бір жаңалық алып келуді мақсат етпейді. Шоу жасауға талпынбайды. Үйреншікті болып кеткен — бір қойылым, бір ән формасынан ауытқуды қажет деп санамайды. Мәселелердің ең бастысы да осыған келіп тірелетін тәрізді.

P.S. Мынау неге Ресейдің бағдарламаларын үлгі етіп отыр деп сөкпеңіздер, ана тілімнен бөлек тек орысша ғана түсінеді екенмін.

---

---

Халқымызда бірнәрседен ұтылып, немесе ойламаған жерден үлкен шығынға ұшыраса: «Бастан садаға, бас аман болсыншы», — деп шүкіршілік қылып жатады. Қазіргі «Садақа» ұғымымен тура сәйкеспесе де, түп-төркіні бәрібір бір негізден алынған шығар деп ойлаймын.

Өткен апта кіші-гірім болса да, осындай құрбандықтарға толы болды. Енді қайтейін, кеткен шығындардың барлығы өз еркімнен тыс болса. Бұндайда «Бастан садаға» дейсің амалсыздан.

Автомобилім Алматы облысында тіркеуде еді. Өзімнің ресми тұрғылықты жерім қалаға ауысқаннан кейін, машинаны да Алматыға «көшіру» керек болды. Автомобилестерге арналған ХҚКО-н қалай іздеп тапқанымды, одан жолым болмай кері қайтқанымды ежіктеп сөзді көбейтпей-ақ қояйын, қысқаша айтқанда — машинаны тіркеуден шығару үшін алдымен Өтеген батыр кентіндегі (Іле ауданының орталығы) жол полициясы бөлімшесіне бару керек болды.

#1 садақа
Көлік құралын тіркеуден шығару үшін бір төлемдер жасалады (ресми қалай аталатынын ұмытып қалдым). Жалпы сомасы 2-3 мыңның айналасы. Өтеген батыр кентінің маңайындағы жолполға барғанымда бұл жердегі төлемдер «БТА Банк» терминалы арқылы жасалатын болып шықты. Терминалға жақындағаным сол-ақ, бір жігіт жетіп келді: «Аға, былай төлейсіз, бүйтесіз, мынаны басасыз», — деп көмектесіп жатыр. «Жолы болар жігіттің...» деген мәтел есіме түсіп, шаруамның аздап жеңілдегеніне қуанып та қалдым. Сөйтсем, бұл жігітті ешкім кеңесші етіп тағайындамапты, сол маңайдағы ұсақ-түйек сататын дүңгіршектің сатушысы екен. Адамдардың аңқаулығын пайдаланып, осындай қызмет көрсетеді де, терминалға салынған ақшаның артылғанын өз телефонына лақтырып отырады. «Жә, енді көмектесті ғой», — деп өзімді жұбатып, үндемедім. Десек те, далаға кеткен 300-400 теңгеге ішім күйіп бара жатыр, әрі әлгінің қулығына аздап ашуым да келді. Бар айтқаным:
— БАСТАН САДАҒА!

#2 садақа
Көлігімді салыстырудан өткізіп, номерді ағытып, құжаттарымен қоса офицерге тапсырдым. Полицей:
— Квитанциялар қайда? — дейді.
Терминалдан төлем жасағанда 3 квитанция алған болатынмын. Ешбірі жоқ, шамасы әрлі-берлі сабылып жүргенде бір жерде түсіп қалған. Ғимаратты кезіп шықтым — жоқ. Офицердің алдына тағы бардым: «Аға, квитанцияларды жоғалтып алыппын. Көшірмелері бар, сонымен қабылдайсыз ба?». Ол құжаттарымды қабылдаудан бас тартты. Амал жоқ, терминалдың алдына тағы бардым. Бір төлемді екі рет жасағаным үшін өз-өзімді іштей балағаттан тұрмын. Енді қайтеміз:
— БАСТАН САДАҒА!

#3 садақа
Іле ауданының есебінен шыққаннан кейін, жұрт мақтаған — мамандандырылған халыққа қызмет көрсету орталығына тарттым. Бұл мекеменің қарапайым ХҚКО-нан ерекшелігі — тек қана автомобилистерге қызмет көрсетіледі. Барлық процедуралар бір жерге топтастырылған демесеңіз, қызмет көрсету жүйесі әлі де жетілдіруді қажет етеді. Дәлірек айтсақ — персоналдың білімін, тәрбиесін әлі де жақсарту керек. Жә, бүгінгі әңгіме ол туралы емес.
Мемлекет тарапынан жасалған бір жақсы бастама — өздігінен қызмет көрсететін ксерокөшірме автоматтары. Жұмыс принципі қарапайым: тиынды саласыз, көшірмені жасайсыз (Өтеген батыр кентінде бір бет үшін 30 теңге алып еді, оған да бір «Бастан садаға» деп кеткенмін ). Қуанып кетіп, автоматқа жақындағаным сол, бір қыз жетіп келді: өз қалтасынан 5 теңге салады да, сізден 30 теңге алады. Ұрысып жүруге уақыт қайда, тез-тез ақшаны ұстатып, қызмет көрсететін залға жүгірдім. Кезегім келіп қалған болатын. Ақшадан гөрі, көзіңді бақырайтып қойып бассыздыққа барып отырғандарына көбірек қынжылған сияқтымын. Не де болса:
— БАСТАН САДАҒА!

#4 садақа
Көлікті қайта тіркегенде келесі төлемдер жасау керек:
— Тіркеу үшін — 483 теңге.
— Техникалық паспорт үшін — 2164 теңге.
— Номер белгісі үшін — 4847 теңге. Барлығы 7494 теңге.
Қазір нақты айта алмаймын, бірақ «Qazaq banki» кассасында 8 мыңнан асатын соманы бергенім есімде. Демек, қалғаны не банктың комиссиясына, не кассирдің қалтасына кетті. Алданғанымды мен кейін, Egov-тың Call-орталығына хабарласқаннан соң біліп отырмын. Не дейміз енді:
— БАСТАН САДАҒА!

Бұлар тек Жол полициясына барған кездегі еріктен тыс садақаларым, одан бөлек үй жөндетуге, жиһаз алуға қатысты бірқатар желіну фактілерім бар.

"Өзгенің қателігінен сабақ алу" деген мәтел бар ғой. Мақсатым да сол, автоны бір жердің тіркеуінен шығарып, басқа мекенге есепке қойған кезде осындай ұтылулардан сақтандыру. Шығынның бәріне «Бастан садаға» дей бергенше, қайырымдылық қорына жіберген әлдеқайда тиімді болар ма еді. Айтпақшы, мен үшін азабы көп болған аптаны әлемдік шараға айналып кеткен Ice Bucket Challenge қайырымдылық акциясына қатысумен аяқтадым. Шарт бойынша, мүгедек балаларға арналған «Амир» қорының шотына 1 мың теңге аудардым. Бұл жолы бәрі менің еркіммен болды.

Интернет-журналистика — күрделі техникалық инфроқұрылымды қажет етпейтін ақпарат таратудың жаңа әрі тиімді үлгісі. Қазір Интернеттің арқасында кез-келген белсенді қолданушы өзінің БАҚ-ын ұйымдастыруға мүмкіндігі бар. Мысалға qisyq екеуміз ұйымдастырған Киностанды алсақ болады. БАҚ ретінде тіркелмеген, бірақ одан оның ақпараттық жауапкершілігі еш төмендемейді. Әйтсе де, бүгінгі әңгіме ол туралы емес.

Қазақ жастары Интернет-журналистиканы еркін меңгеріп, дәстүрлі БАҚ-пен бақталасып келеді деу әлі ертерек шығар. Дегенмен, бұл бағытта алғашқы қадамдар жасалып жатыр.

Қазақтың Интернет-журналистикасы дегенде, белгілі блогер Нұрлан Жанайдың бастамасымен іске асып жатқан жобалар туралы айтпай кету күнә болар еді. Өзім Нұрланның жігіттері атқарып жүрген істер туралы көбірек білуді көптен ойлап жүр едім, бүгінгі тақырып олардың кеңселеріне сапар шегуге қосымша себеп болды.


Интернет-басылымның редакциясы күрделі инфрақұрылымды қажет етпейтінін жоғарыда атап өттім. «Baikadam Media Group» компаниясының сайттарын жасап отырған жастар бірнеше бөлмелі шағын офисті уақытша мекендеп отыр екен. Мониторға үңілген жігіттерден басқа көзге түсер ерекше ештеңе жоқ.

— Интернет-журналистикада тек жалақы үшін жұмыс істеу азшылық етеді, — дейді Нұрлан, — адам өзіне ұнаған идеямен ауыруы керек. Тек ақша үшін жүретіндер болады, әдетте олардың орнын шын қызығушылығы бар, жобаны жоғары сүйрей алатын маманмен алмастыруға тырысамыз.

Нұрланның сөзінен байқағаным, қазіргі жобалармен айналысып жатқан азаматтарға өзінің көңілі толады. Бір қызығы — ешбірі кәсіби журналист емес екен. Мысалы, SportNews.kz жобасын жүргізіп отырған Мейірхан араб тілінің маманы. Бірақ болашақта өзін спорт журналисті ретінде көреді.

Мейірхан Амангелдиев, SportNews сайтының бас редакторы:
— Мектеп бітіргенде 10 арманым болған, қазір солардың үшеуі орындалды: араб тілі бойынша білім алу, «ХХІ ғасыр көшбасшысы» бағдарламасына қатысу және спортқа арналған сайт жүргізу.

Сайттың ашылғанына 45 күн болды (14.08.2014 ж. — автор), енді басталып жатқан жоба. Командада 5 бала бармыз. Қазір Қазақстанның түрлі спорт федерацияларымен байланыс орнатып жатырмыз. Әлемдік және жергілікті жаңалықтарды жедел түрде жариялаудан бөлек, сайтымызда сарапшылар блог жүргізеді. Сонымен қатар, қазір жүріп жатқан футболдағы трансферлерді онлайн-режимде хабарлап отырамыз. Қыркүйектен бастап видеоматериалдар шығарып тұруды қолға аламыз. Болашақта атақты спортшылардың әлеуметтік желілердегі парақшаларын сайтымызға интеграциялап, олардың жаңартуларын трансляциялайтын боламыз.

Қысқа-нұсқа: SportNews ресурсына ақпараттар Guardian, Daily Mail секілді ірі басылымдардан, сондай-ақ түрлі спорт командаларының ресми сайттарынан аударылып алынады. Қолданушылар санының ең ірі көрсеткіші — 400 адам.

Интернет-журналистика туралы айтқанда блогинг деген туыс құбылысты назардан тыс қалдыруға тағы болмайды. Жеке тұлғаны ақпарат таратушы ретінде қарастыратын бұл ұғым азаматтық журналистика деп те аталып жүр. Бұл үрдістен қазақ блогосферасы артта қалып жатқан жоқ тәрізді. Белгілі бір блогерлер ортасын топтастырған қазақ тілді платформалар бізде жеткілікті. Осыдан алты ай бұрын солардың қатарына Blogtime.kz тұғырнамасы қосылған еді.

Негізі осы жоба іске қосылғанда маған: «Неге тағы да блог-платформа? Олар онсыз да аз емес қой», — деген ой келген еді. Сол сұрағымды орайы келгенде қойып қалу керек болды.

Данияр Жаныс, Blogtime сайтының бас редакторы:
— Иә, қазақ тілінде блог-тұғырлар жетерлік. Бірақ олардың бәрін сапалы деп айтпас едім. Блогтаймды ашудағы мақсатымыз да сол — блогосфераның сапалық деңгейін көтеру. Мысалы, тіс пастасы бар екен деп басқа өндірушілер қарап тұрмайды ғой, олар да өз пасталарын ұсынып, бәсекелестен асып түсуге тырысады. Біз де қатарымыздың алды болуды мақсат етеміз.

Сайтымызға қолданушыларды көптеп тарту мақсатында «Блог-марафон» деген байқау өткізіп жатырмыз. Оған кез-келген ниетті қатыса алады. Жазған постына көп «like» жинаған, көп оқылған авторлар іріктеліп, желтоқсан айында ең үздігі миллион теңге алады.

Қысқа-нұсқа: Blogtime әлеуметтік блог-тұғырына күніне 10-30 аралығында пост жарияланады. Контентке цензура бар: анайы сөздерге, үлкендерге арналған егжей-тегжейлі баяндауларға тыйым салынады. Сайтқа күніне 400-500 адам кіреді.

Цензура демекші, Нұрлан Жанайдың жобаларына қатысты өз ұстанымы бар екен: «саясат пен дін туралы жазбаймыз». Оның айтуынша, негатив пікірлер мен түңілген жазбалар өмірімізде онсыз да жетеді және сол әңгімелердің басым бөлігі дін мен саясат төңірегінде өрбиді. Нұрлан өз қарамағындағы сайттарда жарияланатын материалдардың барынша позитивті түрде берілгенін талап етеді.

BusinessNews.kz сайты да бизнеске мемлекет тарапынан жасалып жатқан игі істерді насихаттауды көздейді.

Данияр Тәжімбет, BusinessNews.kz сайтының контент-менеджері:
— Жоба коммерциялық мақсатпен, болашақта табыс әкелетін сайт деген жоспармен ашылған. Әдетте тәуелсіз БАҚ дегенде бірден сынаушы, мемлекеттің кемшіліктерін баяндаушы деген ой пайда болады. Бізде керісінше — мемлекеттің атқарып жатқан істерін насихаттау, кәсіпкерлерді қолдауға арналған шараларын ашып көрсеткіміз келеді. Бірақ бұл бизнестің басқа салаларын назардан тыс қалдырамыз дегенді білдірмейді. Жеке компаниялармен, банкттармен де қарым-қатынас орнатып жатырмыз.

Бизнесньюстің тағы бір мақсаты бар — ол ағартушылық. Бизнес терминдермен, түсініктермен энциклопедиялық деңгейде таныстыру, солар туралы мәлімет беру және Қазақстанның белгілі кәсіпкерлерімен сұхбаттар жүргізу арқылы табысқа қол жеткізудің түрлі үлгілерін көрсету.

Қысқа-нұсқа: BusinessNews биыл наурызда ашылған, көрермендері енді қалыптаса бастаған жас сайт. Ақпараттарын Bloomberg, Times секілді ірі басылымдардан және отандық сайттардан алады. Күнделікті қолданушылар саны 100-ден асады.

Интернет-журналистиканың негізгі артықшылықтары туралы сұрағыма:
— Жеделдік, аз шығын жұмсалуы, — деп жауап берді.

Сөзсіз келісемін, бірақ дәстүрлі БАҚ-пен салыстырғанда бір олқы тұсын айтып өту қажет — ол жауапкершілік. Мысалы, газет баспаханадан шығып, халыққа тараған сәттен бастап атылған оқ секілді — бүкіл грамматикалық, орфографиялық, стилистикалық, т.б. қателіктер жіберілсе, сол күйінде таралып, қайтарымсыз кете барады. Ал сайтты кез-келген уақытта түзетіп, тіпті нысанаға іліккен материалды жойып жіберуге болады. Жанай мырза бұл мәселені ақпараттық сайттарды БАҚ ретінде тіркеу арқылы шешу керек деп есептейді (оның үстіне заң «позволяет» — автор.):
— Жауапкершілік мәселесіне келгенде біз мұқятпыз. Жуырда компанияның барлық сайттарын БАҚ ретінде тіркейміз. Заңды тұлға ретінде жұмыс істеу біздің басты мүддеміз, өйткені болашақта мемлекеттік сатып алуларға қатысқымыз келеді. Бұның тағы бір тиімді тұсы — тіркелген БАҚ салмақтылық береді, халық алдында беделің болады.

Интернет журналистика пайда болысымен дәстүрлі баспасөз өкілдері тарапынан біртүрлі теріс, тіпті менсінбеушілік пиғылды байқауға болады. Осындай іштей бәсекелестік қашанға дейін жалғаса бермек? Өйткені, зерттеушілер Интернет-журналистика мен дәстүрлі БАҚ арасында текетірес болмау керек, керісінші бір-бірінің кемшіліктерін толықтыруы тиіс деген пікірде екен. Десек те, Нұрланның ойынша болашақта бәрібір онлайн-басылымдар үстемдікке ие болады:
— Болашақта баспасөз бен Интернет-басылымдар арасында бәсекелестік болмайды. Интернет-журналистиканың үлесі жыл сайын арта түспек. Ақпараттың 80%-на дейінгі үлесі Интернет арқылы таралатын болады.

Осыдан келіп, қарапайым журналистпен салыстырғанда, Интернет-журналистке қойылатын талап та күшейе түседі. Ол жай контент жасаушы ғана емес, сонымен қатар smm-менеджер, seo-менеджер, редактор, корректор, жоба менеджері, дизайнер секілді мамандықтардан қосымша хабары болуы керек. Нұрлан да өз жобаларына тартылған адамдардың барынша әмбебап болғанын қалайды.

«Baikadam Media Group» директорымен әңгімелескеннен түйгенім, Жанай мырза салалық сайттарды дамытқысы келеді. Бұл жақсы да, өйткені ''ақпараттық-танымдық сайттар" қаншама! Ал тақырыптық контентпен айналысатын менеджерлер саны әлі көңіл көншітіп отырған жоқ. Қазір оларда сән әлеміне арналған Kazfashion.kz жобасы іске қосылды. Одан бөлек келешекте театр өнері және медицина туралы ақпарат тарататын жобалар ашылмақ.

Ескерту: Бұл материалды оқи отырып, өзіңіздің жасыңыз 21-ге толғанын автоматты түрде растайсыз және материалды оқу нәтижесінен туындауы мүмкін салдарына өзіңіз ғана жауап бересіз (енді мен емес қой), бақтың.

Ескерту #2: Бұл пост ешбір компанияның, ешбір брендтің мүддесін көздемейді, сәйкесінше — жарнамалық материал емес. Постты жазудағы мақсат — анағұрлым сапалы, анағұрлым жақсы (автордың ойынша) өнімді анықтау және өзіне сынақ жүргізу арқылы оқырмандар талғамының дұрыс қалыптасуына жанама түрде үлес қосу.

Іске кіріспес бұрын, мынаны анықтап алайықшы: Сыра дегеніміз не?

Сыра — арпа (немесе басқа да дәнді дақыл) жармасын ашыту арқылы алынған аз алкогольді сусын. Бұл жерде «аз алкогольді» және «сусын» дегенге баса назар аударсақ. Өйткені, сыра ешқашан, естисіз бе — ешқашан көп акогольді болмауы керек және сыра — ішімдік емес.

Менің жеке басымда сыра пайдалану… Жоқ, басынан бастайын: Иә, мен сыра тұтынамын. Иә, аз емес. Мен сыра тұтыну көздерімді 3 санатқа жіктей аламын: Өнімдерін өздері қайнататын «Pinta», «Бочонок» секілді пабтар, брендтелген шөлмектегі сыралар және «сыра нүктелерінде» сатылатын құйылмалы сыралар. Талғам қалыптастыруға жетерлік тәжірибемнен ұққаным — сыра неғұрлым аз алкогольді болса — сусындық мақсаты соғырлым тиімдірек, ал алкоголі көп болған сайын оның сусындық қасиеті де жойылып, ішімдікке бірден айналып шыға келеді. Сосын «бидайдың дәмі», «гардобтың дәмі» дегендей қоспалауыштардан ада болуы керек.

Сол себепті мен «Біз сыраны өзіміз қайнатамыз» деп мақтанатын пабтарға жоламауға тырысамын. Өйткені, олардың 0,5 литрлік саптыаяғынан кейін аяғығыңыз тәлтіректеп, тіліңіз күрмеліп масайып шыға келесіз. Отандық пабтар сыра қайнатуды білмейді — беттеріне айтайын! Сондықтан сыра барлары менің талқымнан бірден түсіп қалады. Құйылмалы сыраларды сынаудан да бас тартамын. Себеп: тауарлар ассортиментінің салыстыру экспериментін жасау үшін аз болуы. Мүмкін көп те шығар, бірақ өзім «Жигулевское», кейде «Шымкенттік» қана сатып алумен шектеледі екенмін. Сол себептен нысанамызды сыра зауыттарына бұрайық.

Алматыда мен білетін 3 сыра зауыты бар. Мен солардың негізгі өнімдерін салыстырып көрмекпін. Сондықтан алдын ала тағы ескерте кетейін: Бұл жерде брендтерді аттарын атап, түстерін түгендеп көрсетуге тура келеді (Тимурдың өзі кешірсін), бақтың. (Жоқ, онсыз болмайды Тимеке).

«Бір мезгілде әр түрлі сыраны ішуге болмайды», — дейді халық даналығы. Халық үшін бұндай құрбандыққа да дайынмын.

#1 КҮН. EFES KAZAKHSTAN.
Сынақ үшін ең танымал 3 брендті алу керек деп шештім. «Эфес-Қазақстан» маркетологы телефон арқылы өздерінің ең өтімді тауарларын атаудан бас тартты. Араға таныстарды салып (Жасасын ағайыншылдық!) бәрібір біліп алдым: қазақстандықтар «Кружка свежего», «Белый медведь» және «Bavaria» сыраларын ұнатады екен.


Мен үшін ең басты критерий — ішімділігі. Яғни, адам сыраны ішкенде жағымсыз дәмді сезбеуі керек және кем дегенде 1 шөлмекті қиналмай тауысуы керек. «Кружка свежего» — бір ұрттағаннан теріс ой туғызбады. Бастапқыда судың дәмі көбірек байқалады. Жұмсақ дәмінің арқасында жеңіл жүрді (қыздардың осы сыраға неге құмар екенін енді білдім).
Құрамындағы алкоголь мөлшері — 5 пайыз шамасында (ыдыста 4 пайыздан кем емес делінген).

Екінші ұртталғаны — «Белый медведь». Бір-екі жұтымнан ілік табу қиын. Дегенмен тіліңіз үйрене келе ащылықты сезе бастайсыз. Бірақ тым уытты деп те айтпас едім. Саптыаяққа толтыра құйып, ауыз толтыра ішкен сайын әлгі біртүрлі дәмнің әсері күшейе түседі. «Ақ аюмен» алысқа бармасыңыз анық — 1 шөлмектен кейін ішкіңіз келмей қалады.
Құрамындағы алкоголь мөлшері — 5 пайыз.

«Бавария» өзіне тән мінезін бірден танытты. Дәмі сондай жағымсыз көрінді. Көпшілік бұл сыраны неге көп таңдайтынын түсінбедім, бірақ мен екінші рет алмас едім.
Құрамындағы алкоголь мөлшері — 4,9 пайыз.

«Эфес-Қазақстанның» үш өніміне қатысты жалпы қорытпам:

Сыралардың әсері күштілеу болып шықты, масаңдау жағдайға жеткізді.

#2 КҮН. CARLSBERG KAZAKHSTAN
Компания өкілдері, менің қуанышыма орай — өте қағілез болып шықты. Қойған сауалдарыма барынша тез жауап алдым. Олардың айтуынша, «Жигулевское фирменное», «Большая кружка» және «Алма-Ата» ең көп өтімді тауарлар.


«Жигулевское фирменное» — дәмі жұмсақ, ішілуі тез болды. Шөл басатын қасиетке ие ме деп қалдым. Алкоголь мөлшері — 4,5%.

«Большая кружка» — өзінше бір тәтті дәмге ие екен. Жеңіл ішіледі. Дәмі аздап нан ба, әлде ашытқыны ма еске түсіреді, бірақ соншалықты көп емес. Алкоголь мөлшері — 4,4%.

«Алма-Ата». Дәмінен кінәрат табу қиын. Тек алкоголі азырақ болғанда — баға жетпес сыра болып шыға келеді екен. Бастапқыда білінбесе де, көбірек ішкеннен кейін болар-болмас күйікке ұқсас дәм сезіледі. Алкоголь мөлшері — 4,5%.

«Карлсберг Қазақстан» өнімдеріне қатысты былай деппін:

Видеодан байқаған шығарсыздар — бірінші күнгідей мас емеспін

#3 КҮН. ПЕРВЫЙ ПИВЗАВОД
Бұл компанияның ең танымал өнімдерін ресми ақпараттарға сүйене отырып таңдау мүмкін болмады. Зауыт кеңсесінен жауап ала алмадым, ортаға салатын таныстар да болмады. Сондықтан, өз тәжірибеме сүйеніп, көзге көбірек түсіп жүргендерін таңдадым. Таңдау кезінде тағы бір қиындық туындады — маңайдағы дүкендерден тек 2 өнімін ғана таба алдым. Барымен базар, бұл үшін мені ешкім қатты сөге қоймас деп ойлаймын.


Бірінші сыналғаны — «Пивзавод №1» (зауытпен аттас). Таза шөл қандыруға арналған, мен секілді рөлде көп жүретіндер үшін кешкі мезгілде теледидар сыздықтатып ұрттайтын, таңертең иісі шықпайтынына сенім беретін тауар екен. Тамақпен бірге жақсы жүрді.
Алкоголь құрамы — 4,4 пайыз.

Екіншісі — «Жигули барное». (Басқа «Жигулилермен» шатастырмаңыз, әр зауытта бір-бірден өз «Жигулиі» бар ма деп қалдым). Бірінші өніммен салыстырғанда ашқылтым, бірақ соншалықты қатты емес. Бұл да тез ішіледі. Дәмінен кінарат таба алмадым.
Алкоголь мөлшері — 4,5 пайыз.

Видеом не дейді екен:

Сонымен екеуі де бір деммен ішіліп кетті. Бастапқы екі күнде өткізген сынақтарда сыралар басқа тиіп, алкоголь уыты өзін сездіртсе, «Бірінші сыра зауытының» өнімдері тіпті алкоголь бар екенін байқатпады. Екеуін де ұнатып қалдым.

Қорытпамды әйелімнің сөзімен аяқтағым келеді: «Саған әйтеуір сылтау керек!». Жоқ, жаным — бұл да бір кішігірім өмірлік сынақ екен. Енді мен қандай сыра таңдау қажет екенін білемін. Бұрын бір үйреніп қалған көзтаныс бөтелкені ойланбастан ала беретін едім (мысалы «Балтика»). Енді үш күндік эксперименттің арқасында «Алма-Ата», «Жигули барное», «Пивзавод №1» секілді ішуге жеңіл, дәмі жағымды сыралардың бар екенін білдім. Сіздерге де бұл ақпарат пайдалы болады деп ойлаймын.

Айтпақшы, бірінші күні амалдың жоқтығынан фаворит санаған «Кружка свежего» — баққа кетті. Соңғы таңдаған сыралармен салыстыруға келмейді.

Ең бастысы, көшедегі ағалырымыздың мына дана сөзін ұмытпағайсыз: «Мас болу — мақсат емес». Мас болғыңыз келсе — арақ ішіңіз.

Әлеуметтік желілер тез ақпарат алмасуда, таныс-жақындарыңмен байланыс жасауда, өз өніміңді насихаттауда таптырмас құрал екені онсыз да белгілі. Бірақ әр нәрсенің өз даму жолы мен ақыры уақыты аяқталатын кезі болады ғой. Әлеуметтік желілердің болашағына үңіліп көрейікші. Әрине бұл жерде сарапшылардың көмегі қажет болады.

Жалғас Ертай, QazaqMedia интернет-агенттігінің жетекшісі:
— Әлеуметтік желі адамның контентті тұтыну талғамына әсер етіп жатыр. Әсер еткенде, оларды қызығушылығына қарай іріктеп жатқан сияқты. Мысалы, Facebook-та әркім өзіне қызық топтарға жазылып, адамдарды оқып, қызық емесін фильтрлеп, шығарып тастайды. Сондықтан, әлеуметтік желі болашақта осы бағытта жылжи беретін сияқты. Жалпыға бірдей контент азаяды, тек қызығушылықтары бойынша ғана топтасатын болады.

Ал, Twitter, тәжірибе көрсетіп отырғандай, ресми жаңалықтардың оперативті ортасына айналып келеді. Жобамен, әлеуметтік желі болашақта өз қатарына адамдарды тарта беріп, өмірдің барлық саласын өзіне кіргізе береді. Мысалы, сауда-саттық, танымалдық, өнерін тарату және т.б. Дегенмен, қазірдің өзінде осы құбылыстардың алғашқы қарлығаштарын байқауға болады.

Ал, ресейлік Вконтакте, Мой Мир желілеріне келсек, Вконтакте — негізі пираттық контенті арқылы танымал болып отыр: Сондықтан әлемдік деңгейге көтеріле алмайтын локалды желі күйінде қалады деп есептеймін. Дегенмен, кирилл қаріпті ортада өз танымалдығын ұстап тұрмақ. Мой Мирдің аудиториясы Вконтактеге көшіп жатыр, сондықтан бұл ӘЖ-нің болашағы бұлыңғыр.



Өмірбек Қабайұлы, уеб-программалаушы (Софтвермайнд):
— Әлеуметтік желілер тұтынушылардың қызығушылығына байланысты өзгерістер жасауы заңдылық. Сошиал медиа сайттар көптеген мүмкіндіктерге толы болады. Компаниялар білікті мамандарды табу үшін Social Network көмегіне жүгінеді. Әлеуметтік желілер түпнұсқасы анық емес контенттерге цензура қоятын арнайы бағдарламалар жасап, ақылы әлеуметтік желілердің саны артады.



Нұржол Табиғат, уеб-программалаушы (Quest company):
Жалпы әлеуметтік желілер бойынша, Google өзінің Google Plus сияқты сәтсіздеу жобасынан соң, ғаламторға бір жаңалық енгізеді екен. Оны өздері де құпия ұстап отыр, алайда әлеуметтік желі транспортпен байланысады деп күтілуде. Сонымен қатар, ол Қазақстан үшін қалай боларын елестету қиын.

Желілер естелік, уақыт белгілеу арқылы іс-шара ұйымдастыру, жылдам чат, карта т.с.с. басқа да мүмкіндіктерін жетілдіреді деген ойдамын.

Қазіргі кезде елімізде кең таралған әлеуметтік желілер Vkontakte, Mail.ru, Facebook, Twitter, Instagram, Одноклассники деп қарастырсақ, уақыт өте келе қазақстандықтардың сүйікті және көп қолданатын желілері шет елдік болады деген ойдамын. Бұлай ойлаудың басты себебі, алыс шетелдік әлеуметтік желілердің маркетингтік жоспары, зерттеу жұмыстары мен қаржылай көрсеткіші әлдеқайда жоғары. Оларды біздің елдің қолданушылары жыл санап пайдалануын арттыра бермек, себебі уақыт өте пайдаланушылардың білері мен талғамы өседі. Бұл табиғи заңдылық.

Жоғарыда аталған сарапшылардың сөздерінен түсінгенім, әлеуметтік желілердің қолданушылары өздеріне жақын тақырыптар бойынша біріге бастайды, әлеуметтік желілер да тұтынушылардың қызығушылықтарына бейімделіп, солардың қажеттіліктерін қамтамасыз ету үшін жұмыс істейтін болады. Сонымен қатар, цензура күшейе түседі екен. Ал, қандай технологиялық өзгерістер болады екен?

Ербол Серікбай, Сұрақ-Жауап сайтының иесі:
Адамдар зомби секілді өмір сүретін болады. Қазірдің өзінде Google Glass өзінің өнімін аяқтап, нарыққа шығаруда. Бұл дегеніміз 4-5 адам бір дастарханның басында тамақтанып отырып, әлеуметтік желіде сөйлесіп отыруы деген сөз. Брюс Уиллис басты рөлде сомдайтын «Суррогаты» киносындағыдай өмірді бастан өткізуіміз ғажап емес. Көзілдірік арқылы әлеуметтік желіде отыру, қайда бардың, кіммен отырсың, не жеп отырсың — осының барлығы оңтайландырылған көзілдірік арқылы жүзеге асатын болады. Оған Google-ден басқа қазіргі таңда Samsung, Apple және де Қытайдың жаңа технологияларын жасап шығаратын компаниялар бәсекелестік танытатын болады.

Facebook-тың қолданушылар саны артады. Facebook қазіргі таңда ұялы телефонға арналған бағдарламаларды жаппай сатып алып, өзінің өнімімен интеграция жасауда. Олардың қатарында WhatsApp, Instagram және де тағы да басқа ұялы телефон бағдарламалары бар.

Қазіргі кезде барлық әлеуметтік желілер адамға қатысты жеке бас мәліметтерін құзырлы мекемелерге қажетінше бере алады. Бұған қарсылық ретінде персоналдық мәліметтер қорғалуына баса мән беретін ӘЖ ашылады. Оны ерте ма кеш па бір компания жасап шығарады.

Нұрлан Құлымбетов, Ұлттық Интернет ассоциациясының вице-президенті
Болашақта әлеуметтік желілер адамды фотосуреті арқылы танып алатын болады. Бұл қазір де істеп тұр, бірақ қолданысқа әлі толық енген жоқ. Сондай-ақ талғамыңызды танитын болады (әзірше жасырын түрде істеп тұр): қандай жаңалықтарды қалайсыз, не ұнатасыз, т.с.с. функциялар. ID мәселесіне де шешімдер табуы мүмкін. Яғни сіз тек өз атыңызбен ғана тіркелетін боласыз. Фейк аккаунттар болмайтын болады немесе ақылы функция болады. Онлайн төлемдер функциясы да енгізілуі мүмкін. Ұялы операторларды да осы әлеуметтік желі шығарып жіберуі мүмкін. Мысалы Facebook, Google, Yahoo, Apple не болмаса Amazon өздерінің смартфондарын шығарып, өздері провайдер ретінде болады. Ал сіз оны жәй телефон немесе видеобайланыс арқылы сөйлесе алатын боласыз. Ал интернеті біршама арзан, не болмаса тіпті тегін ұсынатын болады.

Пікір білдірген азаматтардың арқасында, болашақ туралы менің де өз болжамдарым қалыптаса түскен тәрізді. Қазіргі кезде адамдар тірілей қарым-қатынасты ұмытты, бәрі әлеуметтік желілерде отырады, Интернет құралдардың көмегімен ғана хабар алмасады дегендей пікірлер айтылып жүр. Менің ойымша, адамдар болашақта әлеуметтік желілерді шектен тыс пайдаланудан шаршай бастайды, жүзбе-жүз кездесудің мәнін түсіне бастайды. Сол себепті таймлайнға фото жүктеу, пост жазу, лайктау және бөлісу деген функцияларды толықтай автоматтандырып тастайды. Сонымен қатар, клавишпен әріп теру, файл мен хабар алмасу секілді уақыт пен іс-қимылды қажет ететін әрекеттер аудиокомандалар арқылы орындалатын болады.

Кейбіріміз күмән келтірерміз, ал кейбіріміз тіпті сенбеспіз. Алайда қазақ әдебиетіндегі кейбір көркем шығармалардың негізінде керемет фильмдер жасауға болар еді. Әйтеуір мектеп жасында әдебиетке үйір болған менің түйсігім солай дейді. Сонымен, қазақ әдебиетінің кейбір өкілдерін экранға шығарсақ, қалай болар еді?

Біздің кинода көп жағдайда махаббат, тарихи бағыттағы шығармалар қойылып жүр. Менің ойымша, басқа да жанрларда фильм түсіру үшін біздің әдебиетте материал жеткілікті.

---

Иллюстрация / алынған жері: dubanimation.com














Шығарма: Әбу Сәрсенбаев, «Толқында туғандар».
Синопсис: Қызыл революция қарсаңындағы қазақ балықшыларының өмірі, Каспий жағалауындағы халықтың тұрмыс-тіршілігі. Болып жатқан өзгерістер мен оқиғалар 6-7 жасар баланың атынан баяндалып, беріледі.
Несімен ерекше: Қазақ әдебиетінде революцияға арналған шығармаларда әдетте малшылардың өмірі көп баяндалады. Бұл шығарма әдебиетімізде жаңа бетбұрыс жасады: теңізден балық аулап-өңдейтін балықшылар, жағадағы қым-қуыт тірлік, жүзбелі зауыттар, итбалық аулау кәсібі — осылардың барлығы қазақ халқына қатысты көз алдымызға мүлдем басқа картиналар алып келеді. Тіпті Еуропаны аздап еске түсіргендей болады.

Бұл шығарманың ауқымды кино жасауға әлеуеті толық жетеді. Минимум — Қазақстан киносында төңкеріс жасауға болады, максимум — шетелдік көрермендер жатсынбайтындай бұқаралық өнім шығаруға болады.

Егер мен режиссер-сценарист болсам, шығарманы барлық кейіпкерлерімен қоса түгелдей экранға шығармас едім. Маған басты кейіпкер — баланың хикаясы қызығырақ. Сондықтан баланың итбалық аулауға кеткен әкесін іздеп теңізге аттанатын тұсынан бастап, небір қызықты да қорқынышты оқиғаларды бастан өткізгеніне, теңіз толқындарынан аман қалып, жағаға оралуына дейінгі аралықты кесіп алып, соған акцент қояр едім.

Жанры (жобамен): қызық оқиғалы драма (приключение).
Ұқсас фильмдер: Дәлме-дәл дей алмаймын, бірақ кейбір көріністері «Пидің өмірі» (2012), «Кон-Тики» (2012) секілді шедеврлерді еске түсірер еді.

---

Иллюстрация. Суретші: Александр Дегтев / алынған жері: worldart.uol.ua














Шығарма: Мұхтар Мағауин, «Шақан Шері».
Синопсис: Повесте басты кейіпкердің әйелі мен баласы жолбарыстың құрбанына айналады. Өшіккен шаруа қолына қару алып, бүкіл жолбарыс атаулының көзін құртпайынша тоқтамауға бел байлайды.
Несімен ерекше: Сюжеті экшн-драмаға сұранып-ақ тұр. Оның үстіне кейіпкердің ішкі ойын, қайғысы мен толғанысын шебер жеткізе білсе — кішігірім шедевр жасауға болады. Бұл жерде жолбарыстарды көрсету үшін «Motion capture» технологиясы (адам қимылын пайдаланып жануарларды анимациялау) таптырмас тәсіл болар еді.

Кезінде «Бірінші сәуір — алдау күніне» арнап осы туралы фейк жаңалық етіп жазғанымызды Киностан оқырмандары әлі ұмытпаған шығар. Көпшілік соны шын қабылдап, кейбір басылымдар көшіріп басқаны бар. Қанша әзілдесек те, мен «Шақан Шеріні» киноға бейімдеуге болатынын ешқашан естен шығарған емеспін.

Жанры (жобамен): эшкн-драма, қызық оқиғалы.
Ұқсас фильмдер: Атмосферасы Лиам Нисон ойнаған «Сұр» (2011), Даррелл Рудттың «Жемтік» (2007), Майкл Дуглас пен Вэл Килмер ойнаған «Елес және Қараңғылық» (1996) фильмдеріне ұқсас болар еді.

---

Иллюстрация / алынған жері: bioware.ru












Шығарма: Медеу Сәрсекеев, «Жетінші толқын».
Синопсис: Повесте оқиға Қайсар есімді журналисттің атынан баяндалады. Ол Ұлы Отан соғысы кезіндегі Шынтас деген қазақ өнертапқышы туралы біліп, сол туралы кітап жазбақ болады. Ізденіп жүріп, оның ауылын табады. Кейін анықтағандай, Шынтас соғыс кезінде жауынгер жолдастарымен жаудың тұзағына түседі. Сол кезде ғалым электр энергиясын талқын түрінде қабылдайтын құрылғы ойлап тауып, соның көмегімен жартасты балқытып, тесіп шығады.
Несімен ерекше: Бұл повесті мен мектеп жасында оқығанмын. Сондықтан көп деталдары ұмыт болды. Бірақ күшті әсер еткені әлі есімде. Шығарманың әдеби эффектісін сезіну үшін міндетті түрде оқу керек, оны сіздерге әсерлі етіп баяндауға тіл байлығым жетпейді.

Жанры (жобамен): фантастика, экшн.
Ұқсас фильмдер: Бұл жобаны суперқаһармандық кино санатына да қосып жіберуге болады. Ал сюжеті ұқсас фильмдерден Даррен Аронофскидің «Пи» (1997), Марвелдің «Капитан Америка: Бірінші кек алушы» (2011) секілді жобаларды атауға болады.

---

Иллюстрация: Еркін Рақышевтің «Тұрар Рысқұлов» деректі фильмінен кадр






Шығарма: Шерхан Мұртаза, "Қызыл жебе".
Синопсис: Белгілі саяси тұлға Тұрар Рысқұловтың өмір жолын баяндайды. Бала кезінде әкесімен бірге түрмеде отырған кезінен бастап, Түркістан автономиясын басқарғанға дейінгі өмірі хронологиялық ретпен айтылады. Қазақстанға теміржолды алып келген, бірқатар одақтас республикалардың дамуына еңбегі сіңген, ашаршылық жылдары Сталинге шындықты жазып, елін аман алып қалу үшін жанын салған тұлға жайында.
Несімен ерекше: Бізде саяси тұлғаларға (Елбасы туралы трилогияны айтпағанда) арналған өмірбаяндық картиналар жоқ. Ал Тұрар Рысқұловтың күрделі өмірі мен саяси жолы кино желісіне сұранып тұрғандай. Бала кезінен қиындық көріп өскен, қылмыскер малшының баласы ат қора тазалаушыдан ел басқарушыға дейінгі жолды жүріп өтеді. Менің ойымша, Тұрар Рысқұлов — қазақтың Абрахам Линкольны.

Жанры (жобамен): өмірбаяндық, саяси драма
Ұқсас фильмдер: Мен Тұрар Рысқұлов туралы фильм түсіруді ойласам көз алдыме бірден Стивен Спилбергтің «Линкольны» (2012) келе қалады.

---

Иллюстрация / алынған жері: stylefavor.com













Шығарма: Батырлар жыры.
Синопсис: «Алпамыс», "Қобыланды", «Ер Тарғын», "Қамбар батыр", т.б. Бұларды біз бала кезден білеміз. Эпостардың бәріне ортақ кейбір қасиеттері бар: қаһарманның жаратылысы ерекше, өте әділ, жауынгер болып келеді. Сюжетте батыр елін жаудан, немесе құдіретті күш иесінен қорғап, ұрланған қалыңдығын құтқарады. Қаһарманның әлсіз тұстары болмайды және астындағы арғымағы жеке спин-оффқа татырлық ақылды болады.
Несімен ерекше: Бұлар халықтың арманындағы жиынтық образдар ғой, сонысымен де батырлар жыры өте идеал. Отбасы болып көретін фэнтези боевиктер үшін таптырмас материалдар. Грек аңыздарын сәтті экрандап жүрген Голливудтың үлгісін бәріміз білеміз. Неге өзіміздің аңыздардан фильм жасамасқа?

Жанры (жобамен): фэнтези, экшн
Ұқсас фильмдер: Сэм Уортингтон ойнаған «Титандардың шайқасы» (2010), «Титандардың қаһары» (2012), «Троя» (2004), «300 спарталық» (2007), т.б.

---

Бонус
Кино туралы әңгіме қозғала қалған екен, жоғарыда айтылған шығармаларға бонус ретінде өз ойымда жүрген бір идеямен бөлісе кеткім келеді. Мүмкін біреудің керегіне жарап қалар.

Қазір жануарлар әлемі туралы мультфильмдер өте өтімді өнімдер саналады. Авторлар жабайы хайуандардың өмірін күлкілі, қызық оқиғалы формада бере отырып, олардың қазіргі мүшкіл хәлдеріне де жұртшылықтың назарын аудартады. Сондықтан, анимациялық туындыларды экологиялық мәселелерді жеткізудің ең ұтымды амалы деп те қарастыруға болады. «Рио», «Мадагаскар», «Мұз дәуірі», «Көңілді аяқтар» — соның мысалы.

Қазақстанда популяциясы құрыған Балқаш жолбарыстары жайында («Шақан Шеріні» айтпағанда) көркем туынды бар ма, жоқ па — мен нақты білмейді екенмін. Менің анимациялық ауқымды жоба жасауға мүмкіндігім болса — осы жолбарыстардың аянышты тағдырына толықметражды анимациялық фильм арнар едім. Концепциясын адамдар келгенге дейінгі олардың бақытты өмірін суреттей отырып, екі аяқтылар келіп, төңіректегілердің бәрін қырып-жоя бастаған кездегі ахуалды бір жолбарыс-кейіпкердің көзімен беруге болады. Толық сценарийін әлі ойластырған жоқпын, бірақ ақырғы эпизодын «хэппи-энд» стилінде көрсетер едім: Іле өзенінің бойында, адам аяғы жете бермейтін жерде, қалың бытқыл арасынан жолбарыстың көзі жарқ етеді (Титр).

Меніңше, «Арыстан патша» (1994) секілді халықаралық деңгейдегі жоба жасауға әбден болады.

Кім біледі, мүмкін батыл, амбицияға толы режиссерлердің бірі осы идеяларды оқып, біреуін іске асыруға шындап кірісіп кетер. Егер ондай азамат табылса — мен тек сәттілік пен ақ жол ғана тілеймін.

2011 жылдан бастап Голливудтың 8 фильмі қазақ тіліне дубляждалып, прокатқа жіберіліпті. Сол кезден бері оның халыққа насихатталу деңгейі мен экранға шығару жиілігіне қатысты наразылықтар айтылып-жазылып жүр. Атап айтқанда: шыққалы жатқан кино жарнамасының жеткіліксіз болуы, кинотеатрлардың қазақша фильмді прайм-таймға қоюға құлықсыздығы, репертуардан себепсіз алып тастау, т.б. Осыдан келіп, оның кассалық табысына, дубляжға кеткен шығынды ақтап алуға қатысты сұрақ туындайды. Ал жауабы онсыз да белгілі — табыстары көңіл көншітерлік емес. Мен де осы мәселеге өзімше бас ауыртып көрдім.

Қарқынды жаттығумен айналысатын, жаттығу залдарын белсенді пайдаланатын адамдар үшін энергетикалық сусындардың пайдасы көп. Энергетикалық сусынды ішу арқылы шынығу уақытын ұзартуға болады. Бұндай қоспалардың құрамында кофеин болады. Ал кофеин төзімділікті арттыруға, шыдамды болуға септігін тигізеді. Дегенмен кофеинді шамадан тыс қолдануға да болмайды, оның денсаулыққа кері әсері жоқ емес. Сондықтан энергетикалық сусынды пайдалану үшін де мамандардың кеңесі керек.