Астанада ЭКСПО-2017 халықаралық көрмесіне орайластырылған 2016-2017 жылдарға арналған қысқы Универсиаданың салтанатты ашылуы өтті. Бағдарламаға шахмат, тоғызқұмалақ, баскетбол, волейбол, үстел теннисі, шағын футбол және т.б. спорт түрлерінен жарыстар кіреді.

Маусым бойы Астананың алдынғы қатарлы жоғары оқу орындарының студенттері өзара сайысқа түсетін болады, бұл жастарды белсенді өмір салтын ұстануға, оларды спортқа тартуға ықпал етеді. Универсиаданың ұйымдастырушылары: Дене шынықтыру және спорт басқармасы, Астана қаласының спорттық-бұқаралық шараларды өткізу дирекциясы.

Студенттердің арасында шахматтан жарыстар өткенін атап көрсету керек, онда елордадағы жеті ЖОО-ның командалары шеберлік байқасты. Сайыста Л.Н. Гумилев ат. ЕҰУ студенттері жеңіске жетті. Сондай-ақ, аталған шараның шеңберінде 2015-2016 жж. Универсиадасының жеңімпаздарын марапаттау рәсімі өтті, ол «Спорт — өмір көркі» ұранымен өтіп, Қазақ хандығының 550 жылдығына арналған болатын.

Астанада «Қауіпсіз жол қозғалысы апталығы» республикалық шарасы аясында автомектептер арасында конкурс өткізілді. Үш кезеңмен өткен конкурста курсқа қатысушылар сайысқа түсті: жол қозғалысы ережелерін білу, көлік жүргізу, жол көлік оқиғасы кезіндегі алғашқы медициналық жәрдем көрсету.

Конкурс қорытындысы бойынша Астана қаласының«Отан» автомектебінің курсанты Пфальсграф Ирина топ арды. Жеңімпазға «В» санатындағы жүргізуші куәлігі табысталды. «Нұр авто» автомектебінің курсанты Жәлімхан Абай 2-орын алды.

Еске салайық, 14 қарашада басталған «Қауіпсіз жол қозғалысы апталығы» республикалық шарасы жолдарда апаттар мен жарақаттануға назар аударуға, жолдағы қауіпсіздік ережесін сақтауға, жүргізушінің мәдениетін арттыруға, сондай-ақ жол апаттарының алдын алуға бағытталған.

17 қарашада Астанада «2016-2017 жылдардың қыс мезгіліндегі төтенше жағдайлардың алдын алу және жою бойынша әрекеттерге басқару органдары мен азаматтық қорғау жүйесінің мемлекеттік күштерін дайындау» тақырыбында «Қыс-2016» республикалық командалық-штабтық оқу-жаттығуы өтті.

Оқу-жаттығудың мақсаты қыс мезгіліндегі төтенше жағдайлардың алдын алу және жою үшін қалалық азаматтық қорғаныс жүйесінің дайындығы мен мүмкіндігінің деңгейін арттыру болып табылды.

Шара 5 оқу алаңында өтті. Ең бірінші оқу алаңы «Қаланың авариялық-құтқару қызметтері мен жасақтарының сап түзеуі» болды. Астана қаласының жедел әрекет ету жасағы апаттардың салдарын жою, жарақат алғандарға алғашқы медициналық көмек көрсетуге және Астана қаласының аумағындағы төтенше жағдай орындарынан оларды қауіпсіз жерге бір сағаттың ішінде көшіру үшін арналған. Астана қаласы ТЖ департаментінің бастығы азаматтық қорғау полковнигі Б.О.Дұзақбаев қызметтер техникасы мен қызметкерлерінің дайындығын өзі тексерді.

Оқу-жаттығудың жоспарына сәйкес, екінші оқу алаңында құтқарушылар алдында Көкшетау-Астана сапарлы автобусының жолаушыларын ЖКО салдарынан авариялық-құтқару жұмыстарын жүргізу барысында қауіпсіз жерге шығару міндеті тұрды. 112 құтқару қызметіне Көкшетау-Астана бағдарындағы автобус жолаушыларынан 39-шы шақырымда қалың қардың құрсауында қалғандары туралы қоңырау келіп түседі.

Үшінші оқу алаңында «Қарлы боранда азаматтарды іздеу» жоспарына сәйкес, төтенше жағдайлар саласының қызметкерлері қарлы бораннан жапа шеккен, адасқан адамдарға кинологтар көмегімен жәрдемдесті. Құтқарушылар жапа шеккендермен бірге «Қабылдау, жылыту және медициналық, психологиялық көмек көрсету пунктерінің дайындығы» деп аталатын оқу-жаттығудың төртінші алаңына барды.

Оқу-жаттығуға 37 техника және жеке құрамнан 120 адам жұмылдырылды.

2017-2022 жылдар аралығында Астана қаласында апатты үйлерді бұзу бойынша пилоттық жобаны іске асыру шеңберінде 635 мың м2 тұрғын үй пайдалануға беріледі, бұл — 10 000-нан астам пәтер.

Апатты үйлердің иелерін көшіру үшінтапсырылатын үйлердің жалпы көлемінен ауданы 63мың м2 болатын 1 386 пәтерді ақысыз негізде коммуналдық меншікке өткізу жоспарланған. Еркін нарықта ауданы 408 мың м2 болатын 8 010 пәтерді сату есебінен пилоттық жобаны қайта инвестициялау жоспарланып отыр.

Бұл туралы бүгін Астана қаласының әкімі Әсет Исекешевтің тұрғын үй құрылысын дамыту мәселесі бойынша құрылыс компанияларымен кездесуі барысында белгілі болды.

Анықтама үшін:

2017 жылдың соңына дейін елорданың тұрғын үй басқармасы апатты және ескі үйлерді бұзу бойынша пилоттық жобаны іске асыру шеңберінде 111 үй құрылысын бұзуды жоспарлап отыр.

2013 жылдан 2017 жылға дейін салынған мерзімі 1940 — 1970 жылдар аралығына жататын, негізгі құрылыс конструкциялары мен инженерлік желілерінің тозу пайызы жоғары 228 апатты үй құрылысын (3 367 пәтер) бұзу жоспарланған. Бұл — онда тұрып жатқан адамдардың өміріне және денсаулығына қауіп төндіретін үйлер.

Бүгінгі күні 117 апатты үйдің (1 555 пәтер) тұрғындары жайлы пәтерлерге көшірілді.

Қалған 111 апатты үйдің тұрғындары жоспарлы көшіру мерзімдері туралы ақпараттандырылды, оларды көшіру жұмыстары 2017 жылдың соңына дейін жүргізіледі.

«19 жыл ішінде Астанада 17 млн шаршы метр тұрғын үй пайдалануға берілді. Үстіміздегі жылы біз тағы 2 миллион м2 астам баспананы тапсыруды жоспарлап отырмыз. Тұрғын үй құрылысы көлемінің жыл сайынғы өсім қарқыны Мемлекет басшысы халықты тұрғын үймен қамту бойынша берген тапсырмалардың шеңберінде мемлекеттік қолдау бағдарламаларын іске асырудың арқасында сақталып отыр. Біз әлемнің жаһандық қалаларының даму тәжірибесін зерттеп, алдағы перспективаларының және негізінен қаланың бағдарламалық құжатында іске асыру жолдарының кешенді көрінісі әзірленді. Қаланың келешектегі дамуы экологиялық таза технологияларды және қоғамдық кеңістіктерді үйлесімді абаттандыруды өзара байланыстыру арқылы қарастырылуда», — деп атап көрсетті Астана әкімі Әсет Исекешев.

2016 жылғы 21 және 25 қарашада Өңірлерді дамытудың 2020 жылға дейінгі бағдарламасының «Қазақстанның тұрғын үй құрылыс жинақ банкі» акционерлік қоғамының тұрғын үйі» бағыты бойынша құжаттар қабылданады.

Өңірлерді дамытудың 2020 жылға дейінгі бағдарламасын іске асыру шеңберінде Астана қаласының әкімдігі және «Қазақстанның тұрғын үй құрылыс жинақ банкі» акционерлік қоғамы арасында Астана қаласы, Есіл өзенінің оң жағалауы, № 23- 31, 23-16, 23-17, 23-30, А98 көшелер (жобалық атауы), Лот 15 мекенжайы бойынша орналасқан көп пәтерлі тұрғын үй кешенінен тұрғын үйдің 1 шаршы метрі үшін құны 120 мың теңге болатын 125 пәтерді сату жөніндегі ынтымақтастық туралы келісімге қол қойылды, оның ішінде: ауданы 34,36 шаршы метр бір бөлмелі 3 пәтер; ауданы 57,68 шаршы метрден 60,69 шаршы метрге дейін екі бөлмелі 64 пәтер; ауданы 72,76 шаршы метрден 78,82 шаршы метрге дейін үш бөлмелі 58 пәтер.

Құжаттарды қабылдау 2016 жылдың 21 және 25 қараша (қоса алғанда) аралығында e.astana.kz веб-порталы арқылы өтініш берушінің электрондық цифлық қолтаңбасын қолдану арқылы жүзеге асырылады.

Порталдың ашылу уақыты 2016 жылғы 21 қарашада сағат 9.00-де, жабылу уақыты 2016 жылғы 25 қарашада сағат 24.00-де. Порталдық жұмыс істеу уақыты – тәулік бойы.

Бағдарламаға сәйкес аталған бағытта мына санаттар бойынша Астана қаласында коммуналдық тұрғын үй қорынан тұрғын үйге мұқтаждар есебінде тұрған (кезектегілер) азаматтар ғана қатыса алады:

жетім балалар, ата-анасының қамқорлығынсыз қалған балалар;

халықтың әлеуметтік жағынан әлсіз топтары (Ұлы Отан соғысының мүгедектері мен қатысушыларына теңестірілген адамдар; мүгедек балалары бар немесе оларды тәрбиелеушi отбасылары; жасына қарай зейнеткерлер; оралмандар; экологиялық зiлзалалар; табиғи және техногендi сипаттағы төтенше жағдайлар салдарынан тұрғын үйiнен айырылған адамдар; көп балалы отбасылар; толық емес отбасылар);

мемлекеттік қызметкерлер, әскери қызметкерлер, арнаулы мемлекеттік органдар қызметкерлері, бюджеттік ұйымдардың қызметкерлері.

Бағдарлама талаптары бойынша бұл бағытты іске асыруда тұрғын үйге мұқтаждар есебінде мына санаттар бойынша кезекте тұрған азаматтар қатыса алмайды: Ұлы Отан соғысының мүгедектері мен қатысушылары; 1 және 2-топтағы мүгедектер; Қазақстан Республикасының Үкіметі бекiтетiн аурулар тiзiмiмен бекітілетін кейбiр созылмалы аурулардың ауыр түрлерiмен ауыратын адамдар; мемлекеттiк немесе қоғамдық мiндеттерiн, әскери қызметiн орындау кезiнде, ғарыш кеңістігіне ұшуды дайындау немесе жүзеге асыру кезінде, адам өмiрiн құтқару кезiнде, құқық тәртiбiн қорғау кезiнде қаза тапқан (қайтыс болған) адамдардың отбасылары; жалғыз тұрғын үйі Қазақстан Республикасының заңнамасында белгіленген тәртіппен авариялық жағдайда деп танылған азаматтар.

Бағдарлама аясында құжаттарды қабылдау мерзімі кезінде өтініш бір рет қана берілуі мүмкін. Бұл ретте өтініш тікелей коммуналдық тұрғын үй қорынан тұрғын үйге мұқтаждар кезегінде тұрған адамнан ғана берілуі керек. Егер өтініш иесі кезекте тұрмаса, онда өтініш жоққа шығарылады. Портал арқылы өтініш толтырар алдында өтініш беру бойынша нұсқаулықпен танысу қажет.

Өтініш беру үшін:

өтініш иесінің ЭЦҚ куәландырылған электрондық құжат нысанындағы сұранысын;

неке қию (некені бұзу) туралы куәліктің (2008 жылдың 1 маусымына дейінгі), отбасы мүшесінің қайтыс болуы туралы (2007 жылдың 13 тамызына дейін), балалардың туу туралы куәліктерінің (2007 жылдың 13 тамызына дейін) электрондық көшірмесін;

өтініш иесінің жұмыс орнынан анықтамасының электрондық көшірмесін;

өтініш иесінің жұмыс орнынан табыс алатындығын растайтын анықтаманың электрондық көшірмесін ұсыну қажет.

Мемлекеттік электрондық ақпараттық ресурс болып табылатын мынадай құжаттар мәліметін өтініш беруші мемлекеттік органдардың уәкілетті тұлғасының ЭЦҚ куәландырылған электрондық құжаттар түрінде тиісті мемлекеттік ақпараттық жүйесінен алады:

өтініш иесі тұлғасын куәландыратын мәлімет;

неке қию немесе некені бұзу туралы (2008 жылғы 1 маусымнан кейінгі), қайтыс болуы туралы (2007 жылғы 13 тамыздан кейінгі), балалардың тууы туралы (2007 жылғы 13 тамыздан кейінгі) мәлімет;

өтініш иесінде және онымен бірге тұрақты тұратын отбасы мүшелерінде Қазақстан Республикасының аумағында меншік құқығында немесе кейіннен сатып алу құқығымен жалдамалы тұрғын үйі бар немесе жоқ болуы туралы мәлімет;

өтініш иесі және онымен бірге тұрақты тұратын отбасы мүшелерінің Астана қаласында тұратындығын растайтын тіркеу туралы мәлімет;

отбасы мүшелерінде мүгедектің бар болуын дәлелдейтін мәлімет;

Бағдарламаға қатысуға өтініш берген кезде кезек нөмірін көрсетумен тұрғын үйге мұқтаждар кезегінде тұрғаны жөнінде мәлімет.

Қажет болған жағдайда «Астана қаласының Тұрғын үй басқармасы» мемлекеттік мекемесінің (бұдан әрі – Басқарма) қызметкерлерімен азаматтар қосымша құжаттарды ұсыну үшін немесе өтініш иесімен берілген мәліметті анықтау үшін шақырылуы мүмкін.

Отбасы құрамы (отбасы мүшелерінің саны) өтініш берілген пәтер ауданына әсер етпейді, үміткерлер өз қалауы бойынша пәтер түрін көрсетеді.

Қатысушылар арасындағы алдын ала іріктеу Астана қаласы әкімдігінің жанындағы Тұрғын үй комиссиясымен (бұдан әрі – Комиссия) тұрғын үйге мұқтаждар есебі тізіміне және сол кезекке тұрған күніне сәйкес жүргізіледі.

«ҚТҚЖБ» АҚ-мен іріктелген өтініш иелерінің төлем қабілеттілігін бағалауы өткізілген соң, Комиссия Бағдарламаға қатысушылардың нақты тізімін бекітеді, олар Астана қаласы әкімдігінің және Басқарманың интернет-ресурсында жарияланады.

Бағдарлама шеңберінде жеке меншікке Бағдарламаның барлық бағыттары және Қазақстан Республикасының барлық өңірлері бойынша кейіннен сатып алу құқығымен 1 ғана бірлік тұрғын үй сатып алуға немесе жалға алуға болады.

Өнеркәсіп, байланыс және коммуникациялар, сервис және қызмет көрсету, медицина және білім салаларында кадрлардың жетіспеушілігіне байланысты келесі жылдан бастап колледждерде алты жаңа мамандық ашылады («Автомобиль көліктеріне техникалық қызмет көрсету, жөндеу және пайдалану» мамандығы бойынша мехатроник», «Көпірлер және көлік тоннельдері», «Электр станцияларының және желілердің құрал-жабдықтары», «Өнеркәсіптегі электр-механикалық құрал-жабдықтар», «Медициналық техниканы монтаждау, техникалық қызмет көрсету және жөндеу», «Кітапхана ісі»).

Астана қаласы Білім басқармасының хабарлауынша, осының алдындағы жылмен салыстырғанда сұранысқа ие техникалық мамандықтарға мемлекеттік білім гранты 10 пайызға артты. Үстіміздегі жылы жергілікті бюджеттен қаржыландырылатын 4025 орын бөлінді. Салыстыру үшін: 2015 жылы мемлекеттік тапсырыс бойынша 3636 студент білім алған.

Сондай-ақ, елордада қазір жұмыс істеп тұрған төрт ресурстық орталыққа тағы жаңа үш ресурстық орталық қосылады: 1) «Ингри Қазақстан» ЖШС-імен бірлесіп тұрғын үй-коммуналдық шаруашылық, өнеркәсіптік және азаматтық құрылыс, коттедждік және аз қабатты құрылыс салаларында мамандар дайындау бойынша; 2) «Техно Николь» — құрылыс инновациялары» ЖШС бірлесіп өнеркәсіптік едендердің құрылыс технологиясы, бетон жөндеу және құрал-жабдықтардың гидрооқшаулау бойынша; 3) «Локомотив құрастыру зауыты» АҚ-ымен бірлесіп токарьлық іс және металл өңдеу бойынша. Бұдан өзге, «Софи-Дент» стоматологиялық емханасымен бірлесіп медициналық және фармацевтикалық білімі бар кадрлардың біліктілігін арттыру бойынша оқу орталығы ашылады.

Педагогтар жетіспеушілігі мәселесін шешу үшін Еуразиялық гуманитарлық институттың (ЕАГИ) негізінде «Мектепке дейінгі тәрбие және оқу» мамандығы бойынша сырттай оқу факультетінде бір топ (25 адам) ашылды.

ЭКСПО-2017 көрмесі үшін кадрларды дайындау мақсатында сервис және қызмет көрсету мамандықтары бойынша оқыту жүргізілуде.

Елорда әлі ұйқыда болғанда, қала тұрғындары әлі төсекте жатқан уақытта бұл адамдар үшін жұмыстың нағыз қызған шағы. Олардың еңбек күні таңғы сағат бесте басталады. Дәл осы сағатта «Астана Тазарту» ЖШС-інің паркінен көліктер керуені шығып, елорда аумағы бойынша кетеді. Таңертең қоқыс контейнерлері бос, ал қала таза әрі жинақы болуға тиіс …

***

«Астана Тазарту» ЖШС — қатты тұрмыстық қалдықтарды (ҚТҚ) жинау және тасымалдау бойынша елордадағы ірі кәсіпорын, ол 24 учаскенің 23-іне қызмет көрсетеді. Тәулік бойғы режимде 57 дана техника біздің аулалардағы қоқысты жинайды.

Далада 25 градус аяз. Бұл ашық ауада жұмыс істеу үшін қолайлы күн емес. Алайда «Астана Тазарту» жұмыскерлерінің айтуынша, ауа райынан гөрі оларға тәртіпсіз тұрғындар көп қиындықтар тудырады: кейбіреулер контейнерлердің маңына құрылыс қоқыстары салынған қаптарды үйіп қойса (бір күні біреу осындай 100 (!) қап қалдырып кеткен), енбі біреулері ескі жиһаздарын шығарып қояды. «Астана Тазарту» серіктестігінің міндетіне кірмесе де, осындай ескі-құсқы да шығарылады.

Айта кетейік, осындай заңсыз қоқыс шығарғаны үшін салынатын айыппұл көлемі өте аз…

Бірақ ең өзекті мәселе – қоқыс контейнерлеріне өту. Жолдың онсыз да тар екені аздай, жәшіктерге өтетін жолды тұрғындар автокөліктерімен бөгеп тастайды. Бұл «Астана Тазарту» жұмыскерлерін бір алаңға 2-3 реттен кіруге мәжбүрлейді. Сондықтан, ауладағы қоқыстың уақытында шығарылмауына қатысты қалалықтардың шағымдануларына таңданудың қажеті жоқ. Бұған көбінесе тұрғындардың өздері кінәлі…

«Астана Тазарту» ЖШС-індегі жұмыс денсаулыққа зиян еңбек түріне жатады. Қауіп төндіретін жалғыз еңбек ету жағдайлары ғана емес (қоқыспен жұмыс істеу, ыстықта да, суықта да еңбек ету), кәсіпорын қызметкерлеріне тұрғындар да шабуылдайтын оқиғалар болып жатады. Жүргізушілер көліктерін басқа жерге қоюдан бас тартады, дау шығарады, кейде кәсіпорын жұмыскерлеріне жұдырық ала жүгіреді. Ал қатты ашуланған бір әйел кірпіш лақтырып, «Астана Тазарту» көлігінің терезесін сындырған.

«Біз өзіміз қақтығысқа бармаймыз, контейнерлердің қасына көлік қоюға болмайтынын түсіндіруге тырысамыз. Біреулер түсінеді, басқалары — жоқ», — дейді кәсіпорын жұмыскерлері.

Қоқыс жинау жұмыстарына ерлер ғана тартылады. Жұмыстың спецификасы сондай, бұл жерде қара күш пен төзімділік қажет. Қоқыс тасушы көліктің жүргізушісіне артылған жауапкершілік зор – ол кедергілерді орағытып жүріп, тұрған көліктердің ортасынан ақырындап өтіп, кейде жұмыскерлерге контейнерлерді босатуға көмектеседі.

«Қоқыс тасушы машинаның жүргізушісі болып жұмыс істегеніме 12 жыл болды. Аулаларда түрлі қиындықтар кездесіп жатады. Бірақ жұмысқа жақсы көңіл-күймен шығуға тырысамын, ал ауысым аяқталып, жұмыс күні сәтті өтсе, екі есе қуанамын», — дейді «Астана Тазарту» ЖШС жұмыскері Айдар Телғазиев.

Астанада қоқыс шығару үшін адам басына орта есеппен 260 теңгеден төлейді. Тарифтің өзгермегеніне бес жыл болды. Кәсіпорын жұмыскерлерінің жалақысы орта есеппен 165 мың теңгені құрайды. Ұжымдық келісімге сәйкес, жұмыскерлер ауқымды әлеуметтік пакетпен қамтамасыз етілген. Сыйақылар, демалу, сауықтыру жәрдемақылары қарастырылған, қызметкерлердің балалары жазғы демалыстарын лагерьлерде өткізеді. Жұмыскерлер жуу құралдарымен, арнайы киіммен міндетті түрде қамтамасыз етіледі. Сондай-ақ, оларға сүт беріледі.

Жұмыстың жақсы жақтары да жетерлік. Мысалы, кәсіпорынның бір жұмыскері контейнер алаңының қасынан ішінде қомақты көлемде ақшасы бар сөмке тауып алыпты.

«Сөмкені иесіне қайтарғанымызда, ол әйелдің қалай қуанғанын көрсеңіздер. Шексіз алғысын айтты», — дейді «Астана Тазарту» ЖШС-інің Алматы ауданы бойынша аға инспекторы.

Қала тұрғындарының олардың жұмысына көңілдері толса, «Астана Тазарту» қызметкерлері үшін зор қуаныш.

«Жақсы жинайды, менің осы ауданда тұрғаныма көп болды, күнде келіп, жинап кетеді, жас жігіттер, солардың арқасында ауламыз таза, жинақы», — дейді қала тұрғыны Галина Гребнева.

Елордадағы ПИК-тер де бригадалардың жұмысын назардан тыс қалдырмайды.

«Таңертең жұмысқа келсем, қоқыс алаңдары тап-таза, бәрі жиналған, қоқыс шығарылған. Қашан үлгеретіндерін, түсінбеймін! – дейді «Ақмола» ПИК-інің төрайымы Любовь Примачок – Әрине, өз тарапымыздан жігіттерге көмектесуге тырысамыз, автокөлік иелерімен сөйлесіп, машиналарын дұрыс қоюларын сұраймыз».

«Біздің кәсіпорын – Қазақстандағы бірегей кәсіпорын, біз қатты тұрмыстық қалдықтарды жинау және тасымалдау бойынша толық циклды орындап отырмыз. Қала аумағынан жиналатын қоқыс өңдеу кешеніне шығарылады. Жыл сайын зауытқа 200-ге жуық рейс жасалады. Бұл жерде тікелей сұрыптау, өңдеу, брикеттеу процесі өтіп, еуропалық технология бойынша полигонға көміледі», — дейді «Астана-Тазарту» ЖШС-інің бас директоры Иван Лавриненко.

Педагогтарға, дәрігерлерге, спортшыларға, құрылысшыларға, кәсіпкерлерге, студенттерге, көп балалы аналарға және еңбек ұжымдарына, жас республиканың дамуына елеулі үлес қосқан, Қазақстанды шетелге танытқан азаматтарға басымдық беріледі. Сонымен қатар, елорда тұрғындары мен қонақтары Тәуелсіздік күнін мерекелеуге арналған көрмелер мен концерттерді тамашалай алады.

Атап айтқанда, 13 желтоқсанда Оқушылар сарайында (Б. Момышұлы даңғ.) «Мәңгілік ел — Қуатты Қазақстан» мерекелік концерті өтеді; 22 желтоқсанда «Ақбұлақ» өзенінің жағалауында және «Жерұйық» саябағында «Мұз үстіндегі қала» мұз қалашықтары, мектептердің аумақтарында хоккей корттары ашылады; желтоқсанның 10-ынан 12-сіне дейін «Алматы» ауданының тұрғын алаптарында «Астана шаттық» автокеруені Қазақстан эстрадасы жұлдыздарының қатысуымен мерекелік концерт өтеді; 23 желтоқсанда «Қазақстан» спорт сарайында жетім балалар мен аз қамсыздандырылған отбасылардан шыққан балалар үшін тегін негізде мұзда коньки тебу шарасы ұйымдастырылады.

Атап өтерлігі, зейнеткерлер, көп балалы және тұрмысы төмен азаматтар 18, 19, 24, 25, 26 қараша күндері М. Горький атындағы Мемлекеттік академиялық орыс драма театрында және 29 қарашаға дейін Қ. Қуанышбаев атындағы мемлекеттік қазақ музыкалық драма театрында қойылымдарды тегін тамашалай алады.

Күннің күрт бұзылуына байланысты қаланың шұғыл әрекет ету қызметтері күшейтілген жұмыс режиміне көшті. Атап айтқанда, елорданың ТЖ департаменті, Астана қ. ІІД ӘПБ қызметкерлері және «Астана Тазалық» ЖШС мамандары қыс кезіінде халықтың қауіпсіздігін қамтамасыз етуге бағытталған шаралар кешенін жүргізуде. Бұл туралы журналистерге бүгін жедел қызметтердің өкілдері қала әкімдігінде өткен арнайы баспасөз мәслихатында хабарлады.

«Қаланың коммуналдық қызметтерінің қыс маусымына дайындығын тексеру шеңберінде қарашаның 16-сынан 18-іне дейінгі аралықта елордада «Қыс-2016» командалық-штабтық оқу-жаттығуы өтеді, оның барысында қыс уақытында халықты және аумақты төтенше жағдайлардан қорғауды ұйымдастыру тексеріледі. ТЖД ауа райының бұзылатындығы немесе басқа төтенше жағдайлар туралы ескерту үшін барлық әдістер мен жаңа технологияларды пайдаланады», — деп мәлім етті Астана қ. ТЖД басшысы Барат Дұзақбаев.

Б. Дұзақбаев қар жинау жұмыстарын өткізу кезінде Астананың Әкімшілік полиция басқармасының және Жергілікті полиция қызметінің қызметкерлері күшейтілген режимде жұмыс істеуге көшкенін атап көрсетті. Әкімшілік полиция қызметкерлерінің мәліметтеріне сәйкес, 1999 жылы елордада тіркелген автокөліктердің саны 40 мыңды құраған, 2010 жылы 209 мыңға жеткен, ал 2016 жылы — 343 мыңды еңсерген.

«Транзиттік көліктерді және еліміздің басқа өңірлерінен келген автокөліктерді есептемегенде, жыл сайын Астанада 25-30 мың көлік құралы тіркеледі. Осыған байланысты автокөлік құралдарының үлкен ағыны және автокөліктерді дұрыс қоймау қаланың коммуналдық қызметтерінің жұмысына кедергі келтіреді. Жол қозғалысының барлық қатысушыларын қар тазалау жұмыстарына кедергі келтірмеу мақсатында көлік құралдарын қараусыз қалдырмауға шақырамыз», — деп атап көрсетті Астана қ. ІІД ӘПБ айрықша тапсырмалар жөніндегі аға инспекторы Алтыбай Бақытжан.

Сонымен қатар, елорда әкімдігі қар жинау бойынша 16 бағытты бекітті, қалаға кіре берісте және қаладан шыға берісте көлік қозғалысын шектеуге бағытталған 6 блок-бекет жұмыс істейді. Жалпы, соңғы күндері Астанада көктайғаққа байланысты 100-ден аса жол-көлік оқиғасы тіркелген, қаза тапқандар мен зардап шеккендер жоқ.

Өз кезегінде, «Астана Тазалық» ЖШС мамандары соңғы үш тәулік ішінде елордада қардың бір айлық мөлшері түскенін хабарлады. Соңғы бір тәуліктің өзінде 120 мың текше метр қар шығарылды, 2285 жол жұмыскері және 1698 арнайы техника тартылды. Қала көшелері мен жаяу жүргінші жолдарын тиімді тазалау үшін үстіміздегі жылдың 11 қазанынан бастап «Айсмелт» жаңа реагенті қолдануға енгізілді.

2016 жылдың 17 қарашада таңғы сағат 9-да Астана қаласының ақпараттандыру жүйесін тексеру жүргізіледі, оның барысында теле және радиоарналарға («Хабар», «Қазақстан», Бірінші канал «Евразия», «Астана», КТК, НТК, «Астана» радиосы, «Шалқар» радиосы, Ретро ФМ, Авторадио, Қазақ радиосы) қосылу арқылы С-40 электр дабылдары беріледі.

Астана қаласының Төтенше жағдайлар депатаменті тұрғындардан тыныштық сақтап, әбігерге түспеулерін, және алып-қашпа сөздерге сенбеулерін сұрайды.