Баға дейтін бас білмейтін асаудың ырыққа көнетін түрі жоқ. Қысқа күнде қырық құбылған доллар бағамы 270 теңгеге (300 теңгеге дейін жеткен кезі де болған – ред.) тұрақтанып тұр әзірге. Ал ішер ас, киер киім, күнделікті тұтынатын заттар, дәрі-дәрмек бағасының шарықтауына етіміз үйрене бастағандай. «Ет үйрене бастады» деп жай өзімізді-өзіміз жұбату үшін айтамыз да, әйтпесе, үйдегі көңіл-күйді базардағы нарықтың бұзатыны бесенеден белгілі ғой. Күнделікті базар аралап, баға аңдып жүрмесек те, астаналық статистер мәлім еткен деректерге қарап бас шайқап қоюдан басқа амалымыз жоқ.

Сонымен, Аstana.stat.kz таратқан мәліметке сенсек, елордада қыркүйек айында азық-түлік бағасы біршама қымбаттады, арзандағаны да жоқ емес. Атап айтар болсақ, жұмыртқа – 14,5 пайызға, қант – 13,7 пайызға, тауық еті – 6,2 пайызға, пастерленген сүт – 1,5 пайызға, айран – 1 пайызға, сары май – 0,2 пайызға қымбаттаған. Ал бірінші сортты ұн (1,4 %) мен сиыр еті (0,4%) керісінше арзандаған. Көкөністерден қызанақтың бағасы – 9,3 пайызға көтерілсе, сәбіздің құны – 26,1 пайызға, картоп – 22 пайызға, орамжапырақ – 21,3 пайызға, қызылша – 17,8 пайызға, пияз – 13,3 пайызға, қияр – 4,4 пайызға төмендеген. Жалпы, күнделікті тұтынатын азық-түліктің Астанадағы орташа бағасы төмендегідей (2015 жылғы тамыз, қыркүйек айларындағы мәлімет):

Жоғары сортты ұн, кг: 154 тг. (тамыз), 154 тг. (қыркүйек).
Пастерленген сүт, литр: 196 (тамыз), 199 (қыркүйек).
Қаймақ, кг: 765 (тамыз), 771 (қыркүйек).
Сары май, кг: 1 651 (тамыз), 1 655
Күнбағыс майы, литр: 303 (тамыз), 303 (қыркүйек).
Сиыр еті, кг: 1 165 (тамыз), 1 160 (қыркүйек).
Жұмыртқа, 10 дана: 173 (тамыз), 198 (қыркүйек).
Қант, кг: 175 (тамыз), 199 (қыркүйек).
Картоп, кг: 82 (тамыз), 64 (қыркүйек).
Орамжапырақ, кг: 89 (тамыз), 70 (қыркүйек).
Пияз, кг: 75 (тамыз), 65 (қыркүйек).
Сәбіз, кг: 92 (тамыз), 68 (қыркүйек).

Қазанның екінші жұмасында Халықаралық Жұмыртқа күні аталып өтеді. Осыған орай Қазақстан Құс өсірушілер одағы Астана қаласы әкімдігінің қолдауымен елордада жәрмеңке ұйымдастырады.

9 қазан күні құс өсірушілер «Шапағат» базарында астаналықтарға отандық құс фабрикаларының өнімдерін төмендетілген бағада ұсынбақ. Атап айтсақ, Ақмола, Солтүстік Қазақстан, Қостанай, Қарағанды, Алматы және Шығыс Қазақстан облыстарының белгілі құс фабрикалары өнімдерін әкеледі. Сондай-ақ, Оңтүстік Қазақстанның «Ордабасы» құс фабрикасы түйетауық етін сатады.
Аталмыш жәрмеңке осымен үшінші рет өткізілмекші. Ал, тарихта жұмыртқа күні алғаш рет 1996 жылы Вена қаласында аталып өтілген.

Астана қаласының Табиғи ресурстар және табиғат пайдалануды реттеу басқармасының хабарлауынша, елордада «Жасыл технологиялар мен инновация» виртуалды байқауы жарияланды.

Байқауға қазақстандық компаниялар, жекеменшік мекемелер және жеке тұлғалар, сондай-ақ, Қазақстан аумағында қызметін жүзеге асыратын шетел компаниялар қатыса алады.

Байқау келесі салалық бағыттарда өткізіледі:

— энергия саласындағы инновация жолдары;

— энерготиімділік және технологияның ресурстарын сақтау;

— экожүйені басқару тиімділігі;

— ауылшаруашылық саласындағы жоғары өндірістік және тұрақты тәжірибе, басқарманың тиімді әдістері мен қоқыс-қалдықтарын өңдеу;

— су ресурстарын тұрақты пайдаланудағы тиімді технологиялар;

— зиянды қалдықтарды азайту.

Байқауға қатысушалыр мына аталымдар бойынша марапатталады: «Жасыл» технологияны өндіретін «Үздік өндіруші», «жасыл» технологияны «Үздік жеткізуші», «жасыл» технологияны пайдаланған «Үздік кәсіпорын».

Байқауға қатысу үшін ағымдағы жылдың 15 қазанына дейін www.gbpp.org, www.gt.greenkaz.org сайттарына тікелуіңіз қажет.

Технологиялық талаптар «жасыл» технология» тізімінде көрсетілетін болады және ЭКСПО-2017 Халықаралық мамандандырылған көрмесі форумында/алаңда орналастырылады.

Астана қаласының әкімі Әділбек Жақсыбеков кезекті аппарат жиналысында әкімдіктің баспасөз қызметіне жаңа басшы тағайындалғанын жария етіп, оны таныстырды. Елорда әкімінің баспасөз хатшысы болып Өтешева Жанар Әзірқанқызы тағайындалды.

Жанар Өтешева 2010 жылдан 2015 жылға дейін Астана қаласы Туризм, дене шынықтыру және спорт басқармасының баспасөз хатшысы болып қызмет атқарған, 2015 жылдан Спорттық жекпе-жек және күш қолданылатын спорт түрлері Конфедерациясының БАҚ-пен байланыс қызметінде жұмыс істеген. Үздік спорт журналисі ретінде С. Бердіқұлов атындағы премиясының лауреаты атанған (2011 ж.). Сонымен қатар, соңғы екі жыл жүзінде БАҚ жұмыс мәселелері бойынша Геннадий Головкиннің командасына көмектескен болатын.

2011-2015 жылдарға арналған «Саламатты Қазақстан» денсаулық сақтау саласының мемлекеттік жоспарын жетілдіру аясында Астанада 4 алғашқы медико-санитарлық көмек көрсететін мекеме және 2 көпсалалы стационар салынды.

Астанада «Мәңгілік ел — болашағы біртұтас ел» атты республикалық патриоттар форумы өтті. Форумға қатысуға барлық өңірлерден шамамен 2 мыңға жуық делегат келді. Олар өз ісінің үздік мамандары – дәрігерлер, әскерилер, өнеркәсіп жұмысшылары, ғалымдар, жас көшбасшылар, ауыл шаруашылығы қызметкерлері, қоғам қайраткерлері, спортшылар, талантты актерлер, мәдениет майталмандары.

Құрметті ұстаздар!

Сіздерді кәсіби мерекелеріңіз – «Ұстаздар күнімен» шын жүректен құттықтаймын!

Ұстаз – кез келген адам үшін қастерлі тұлға. Ол шәкірттерін білім нәрімен сусындатып, дүниетанымы мен көңіл көкжиегін кеңейтеді. Жақсылық жасауға үндеп, жалпыадамзаттық құндылықтарды бойға сіңіреді. Ұлы Абай «Ұстаздық еткен жалықпас, үйретуден балаға» деп жырлағандай, ең әуелі шәкіртіне тәлім мен тәрбие беріп, білім мен ғылымға баулыған ұстаздың қадірі қашан да биік. Мемлекетіміздің келешегі ұстаздар баулыған жастардың қолында. Сондықтан абыройлы мамандық иелерінің жұмысы жемісті, келешегіміз кемел болсын деп тілек білдіремін.

Дендеріңіз сау, жұмыстарыңыз берекелі болсын!

Құрметпен, Астана қаласының әкімі Әділбек Жақсыбеков

Астанадағы «Алау» мұз айдынында бұқаралық сырғанаудың жаңа маусымы ашылды. Мұз айдыны дүйсенбіден басқа күндердің барлығында жұмыс істейді. Жаңа маусымда қала жұртшылығының сұрауы бойынша күнделікті үш сағатқа созылатын кешкі сағат 19:00-ден басталатын бір сеанс қосымша енгізіліп отыр.

Бір айта кетерлігі, жаңа маусымда сырғау құны ескіше қалды. Сырғанаудың ең төменгі бағасы 250 теңге болса, ал кешкі сеанстың құны 1500 теңгеден аспайды. Сондай-ақ, студенттерге арналған жеңілдіктер қарастырылған күндер ұзартылды.
Бүгінгі таңда коньки спортының Ұлттық құрамасы өз жаттығу жұмыстарын бастап кетті, ал қазан айының соңында «Алау» мұз сарайында коньки тебуден Қазақстан чемпионаты өтеді.

Қаперіңізде жүрсін, шорт-трек пен коньки спорты секциясына балаларды қабылдау жалғасуда.

2016 жылы өтетін Еуропа чемпионатының іріктеу турниріндегі Қазақстан мен Нидерланды құрамалары арасындағы матч билеттері сатыла бастады.

Отандастарымыз Нидерланды футбол құрамасын «Астана – Арена» стадионында 10 қазан күні қабылдайды. Ойын сағат 22.00-де басталады.

Билеттерді «Тикетон» (www.ticketon.kz) жүйесі арқылы сатып алуға болады. Бағасы – 2 000 теңгеден 10000 теңгеге дейін. Бірінші санаттағы жұмсақ орындар құны – 20000 теңге.

Қазанның бірінші жексенбісінде елімізде Мұғалімдер күні аталып өтеді. Осыған орай бүгін Бейбітшілік және келісім сарайында ардагер ұстаздар, қалалық білім беру мекемелерінің басшылары және қоғамдық мекемелер өкілдерінің басын қосқан салтанатты жиын өтті.

Астана қаласының әкімдігі мұғалімдерді мерекелерімен құттықтап, дәстүр бойынша жыл сайынғы елорда әкімінің гранты табысталды. Үздік білім ордалары жеті аталым бойынша марапатталды.

Ең үздік балабақша: №35 «Ертегі» балабақшасы
Ең үздік мектеп: №40 орта мектеп
Ең үздік гимназия: №6 гимназия
Ең үздік колледж: Қоғамдық тамақтану және сервис колледжі
Ең үздік қосымша білім беру мекемесі: «Шығыс» Балалар орталығы
Ең үздік арнайы білім беру мекемесі: №1 психология-медико-педагогикалық кеңес беру орталығы
Жыл ұстазы: №66 мектеп-лицейінің бастауыш сынып мұғалімі – Бастемова Светлана

Мұғалімдердің ішінде мерейі үстем болған «Жыл ұстазы – 2015» байқауының жеңімпазы Светлана Бастемоваға Астана қаласынан пәтерге ие болды.

Мұғалімдер күніне арналған мерекелік шарада қазақ эсрадасының жұлдыздары Роза Рымбаева, Күміс Базарбаева, Алмас Кішкенбаев, Тұрсынбек Қабатов, Мәдина Сәдуақасова, Бақыт Шадаева, Алматы қаласының «Театр теней» және Оқушылар сарайының шығармашылық ұжымы өнер көрсетті.