Тәжірибе алмасу мақсатында елорда стационаларында Түркістан облысының медбикелер делегациясы болып қайтты, деп хабарлайды Астана әкімдігінің ресми сайты.

Қонақтар үшін аурухана қызметі мен қала емханаларына енгізіліп жатқан TRIAGE-жүйесінің таныстырылымы өткізілді, деп мәлімдеді қоғамдық денсаулық сақтау басқармасында. № 1 қалалық ауруханада келушілерге диагноз қоюға және пациентті емді белгілеуге мүмкіндік беретін Chek-up орталығының жұмысы көрсетілді.

Ол, сондай-ақ, тексеру мен диагностикаға кететін уақытты да үнемдеуге көмектеседі. Ал № 2 қалалық көпбейінді ауруханада олар амбулаториялық қызметтің, аурухананың қабылдау-диагностикалық бөлімінің жұмысымен, пациенттерді ағындар бойынша (қызыл, сары, жасыл дәліздер) сұрыптау жүйесімен танысты. Медициналық көмекті босанатындар мен босанғандар қызмет көрсететін медбикелердің жұмысына ғана емес, ауруханадағы перзентхана блогының босандыру бөлімінде жұмыс істейтін медбикелердің қызметіне ерекше көңіл бөлінді.

15 қарашада Мәскеуде халықаралық және ресейлік авиакомпаниялардың, әуежайлар, қонақ үй бизнесі, өнеркәсіптік құрылымдар, банктер, корпорациялар, топ-менеджмент және ірі халықаралық компаниялардың басшыларын біріктірген жыл сайынғы Business Traveler Russia & CIS Awards 2018 сыйлығын табыстау рәсімі өтті, деп хабарлайды Астана әкімдігінің ресми сайты «Астана Конвеншн бюро» ЖШС сілтеме жасап.

Дауыс беру қорытындысы бойынша, Астана екі номинацияға лайық деп танылды. Олар – «Жылдың үздік бизнес-дестинациясы» және «Ресей мен ТМД-дағы іскерлік және оқиғалы туризмнің үздік қаласы».

Business Traveller Awards жүлдесі жыл сайын іскерлік туризм саласындағы көрнекті жетістіктер мен инновациялар үшін тарту етіледі. Оны іскер саяхатшыларға арналған жетекші журнал Business Traveler баспасы табыстайды.

Business Traveller Awards өзінің объективтілігі арқасында беделді марапат болып есептеледі. Себебі жеңімпаздарды қазылар немесе сарапшылар комитеті емес, оқырмандар дауыс беру арқылы анықтайды.  

Журналдың жазылушылары мен оқырмандары ең ірі MICE-агенттіктер, қауымдастықтар, корпорациялар және іскерлік және туристік туризм нарығының басқа да қатысушылары, сондай-ақ іскер адамдар, жетекші халықаралық және ресейлік бизнес мектептерінің бітірушілері, ірі ресейлік және халықаралық компаниялардың басшылары, банктер, мемлекеттік корпорациялар және жеке саяхатшылар.

Сыйлық номинанттарының арасында танымал халықаралық брендтер, сондай-ақ Ресей, ТМД және ТМД елдерінің аймақтық компаниялары, қонақ үйлер, авиакомпаниялар және басқалар ұсынылды.

Жиынға қатысушылар полиэтникалық қоғамның даму стратегияларын талқылады, деп хабарлайды елорда әкімдігінің ресми сайты.

«Полиэтникалық қоғам және заманауи мемлекет: даму стратегиялары» халықаралық форумы Қазақстан халқы ассамблеясының бастамасымен Орталық-Азия аймақтарына қатысты этникааралық және конфессияаралық қатынастарды зерттеу орталығы ҚР Президенті жанындағы мемлекеттік басқару академиясымен бірлесіп ұйымдастырды.

Кездесу шеңберінде ғалымдар мен сарапшылар жаһандану кезіндегі заманауи қоғамдық келісім мен жалпыұлттық бірліктің қазақстандық үлгісін талқылады.  

 «Бұл – бүгінгі таңда өте өзекті әрі маңызды тақырып. Біздің кездесуіміздің тікелей міндеті жаңа идеялар табу және полиэтникалық қоғамды интеграциялау болмақ. Осы тұрғыда Қазақстан «Көпүлгідегі бірлік» қағидасын сәтті түрде жүзеге асырған жарқын мысал», — деді Қазақстан халқы ассамблеясы төрағасының орынбасары, ҚХА Қазақстан Республикасы Президенті Әкімшілігінің меңгеруші хатшысы Леонид Прокопенко.

Форум шеңберінде Қазақстандағы Өзбекстан жылының өту қорытындысы шығарылды. Өзбекстанның Қазақстандағы Төтенше және өкілетті елшісі Саидикрам Ниязходжаев 2019 жылы Өзбекстанда Қазақстан жылы өтетінін атап өтті.

 «Бүгін біз 2019 жылы Өзбекстанда Қазақстан жылын өткізуге байланысты үлкен бағдарлама дайындап жатырмыз. Жуық арада шараларды хабарлайтын боламыз. Тағы да айта кетер жайт, осы аталған форумда пікірлер мен ұсыныстар болашақта барлық Орталық-Азия аймақтарын көркейтуге және оның қауіпсіздігін қатайтуға арналған жобаларды әзірлегуе мүмкіндік береді», — деп атап өтті С. Ниязходжаев.

Форумның панельді сессиясы келесі тақырыптар бойынша өтеді: «Полиэтникалық қоғамды дамытудың ұлттық үлгісі: Қазақстандағы Өзбекстан жылы»; «Астанаға 20 жыл: Еуразия жүрегінде» және «Әлеуметтік сәтті даму – полиэтникалық қоғамның консолидациялық негізі».

Елордада заңсыз орнатылған жарнама маңдайшаларын жөндеу жұмыстары жалғасуда, деп хабарлайды Астана әкімдігінің ресми сайты.

Заңсыз орнатылған сауда баннерлері, билбордтар мен маңдайшалар қалыпқа келтіріліп жатыр. Өткен аптада Байқоңыр ауданының Ақжол, А. Иманов, А. Сембинов және Ш. Уәлиханов көшелерінде орнатылған 4 нысанға демонтаж жасалды. Сарыарқа ауданы аумағында жыл басынан 318 заңсыз жарнамалық нысан жөнделді.

«Сарыарқа ауданының аумағында орналасқан баннер, билборд пен маңдайшалар әрдайым заң шеңберінде орнатылмайды. Олар аймақтың көрінісін бұзып қана қоймай, кейде жүргізушілерге кедергі келтіреді. Күшті жел соққанда, маңдайшалар адамдар мен ғимараттарға қауіп төндіруі мүмкін. Заңды бұзушыларға Әкімшілік құқық бұзушылық туралы кодекстің 505-ші бабына сәйкес әкімшілік хаттама тағайындалады», – деді әкімдікте.

Қор бұл шараны екі жылдан бері дәстүрлі түрде әр тоқсан сайын ұйымдастырып келеді. Бұл жолы ол әдеттегіден ерекше болмақ – алғаш рет шараға салымшылар мен алушылармен қатар мектеп оқушылары мен студенттер арнайы шақырылып отыр. Бізге филиал директоры Шарипов М. әңгімелеп бергендей, Қор халықтың қаржылық мәдениетін қалыптастыруға үлкен мән береді. Оның айтуынша, бұл шараға жас ұрпақтың тартылуы кездейсоқ емес. Таяу болашақта жоғары сынып оқушылары мен студенттер жинақтаушы зейнетақы жүйесіне қатыса бастайды, ал олардың зейнетақылары қазіргі заманғы зейнеткерлер қамтылатын мемлекеттік бюджеттен емес, өздерінің аударған зейнетақы жинақтарына тікелей байланысты болады. Ашық есік күні барысында Қор қызметкерлері оқушылар мен студенттерді зейнетақы жүйесінің негіздерімен таныстырып, олардың арасында викторина ұйымдастырмақ. Ең белсенді қатысушылар алғыс хаттармен марапатталады.

 Сонымен қатар шараға келушілер Қор қызметтеріне қалай жүгінуге болатындығын біле алады. Зейнетақы қызметтерінің қолжетімділігі Бірыңғай зейнетақы жинақтаушы қорының басым бағыттарының бірі. БЖЗҚ әрдайым хабарландыру тәсілдері мен қызметтердің сапасын жетілдіруді уақыт талабына сай дамытуға ұмтылады. Бүгінде Қор қызметтері еліміздің барлық тұрғындарына дерлік қолжетімді. Еліміздің аймақтарында 216 дербес қызмет көрсету орталықтары, көшпелі қызмет жұмыс істейді, мүмкіндігі шектеулі азаматтарға мобильді агенттер қызмет көрсетеді.

2018 жылдың көктемінде Алматы, Атырау, Қостанай облыстарында шалғай елді мекендерге қызмет көрсету үшін жылжымалы кеңселер іске қосылды. Келесі жылы көліктегі кеңселер еліміздің тағы 12 аймағында енгізілмек. Үстіміздегі жылдың 9 айында 18 мың көшпелі таныстырылым өткізіліп, оған 580 мың адам тартылды. 30 мыңға жуық адам әрбір тоқсан сайын барлық филиалдарда ұйымдастырылатын Ашық есік күндеріне қатысты.

— «БЖЗҚ қызметтерінің 80 пайызы қазір қашықтықтан электрондық түрде қолжетімді. Соның арқасында кеңсеге келіп, кезек күтпей-ақ интернет арқылы немесе ұялы телефондардың кез-келген операциялық жүйесіне бейімделген ENPF ұялы қосымшасы арқылы қызмет алуға болады. Бұл салымшылар мен алымшыларға уақытын үнемдеуге мүмкіндік береді»,- дейді филиал директоры.

Зейнетақымен қамсыздандыру мәселелері бойынша www.enpf.kz ресми сайты арқылы Қор төрайымының блогына сауал жолдауға немесе байланыс орталығының 1418 нөміріне хабарласуға болады (Қазақстан бойынша барлық ұялы және қалалық телефондардан қоңырау шалу тегін). Биыл БЖЗҚ танымал мессенджер Telegram арқылы өз ботын іске қосты. Бұл сервистің көмегімен тұрғындар өз жинақтары туралы шағын үзінді-көшірме алып, жеке кабинетінің құпиясөзін қалпына келтіріп, өзекті жаңалықтармен, қордың ағымдағы көрсеткіштерімен танысып, Қордың ең жақын бөлімшесінің мекенжайын білулеріне болады. Аталмыш ботты пайдалану үшін іздеу жолына «enpfbot» деп жазу керек.

Қор өкілдерінің айтуынша, электрондық тәсілмен міндетті және ерікті зейнетақы жарналарын есептеу жөніндегі жеке зейнетақы шотын ашуға, жеке зейнетақы шотының жай-күйі туралы хабарлама алуға, деректемелерді немесе ЖЗШ жай-күйі туралы ақпарат алу тәсілін өзгертуге, т.б. қызметтер алуға болады. Қор сайтында болашақ жинақтар мен төлемдердің шамалас мөлшерін есептеуге арналған зейнетақы калькуляторы да бар.

— «Зейнетақы мәселелері еліміздің барлық тұрғындарын толғандырады. Алайда барлық азаматтардың біздің бөлімшелерге келуге қолдары тие бермейді. Сондықтан біз салымшылар мен алушылармен байланыс жасаудың барлық мүмкіндіктерін қолдануға тырысамыз», -дейді қор қызметкерлері.

Қалада акушер-гинеколог, неонатолог, анестезиолог және реаниматолог сияқты мамандардың тапшылығы байқалады, деп хабарлайды Астана әкімдігінің ресми сайты.

«Әйел денсаулығы – ұлт денсаулығы» тақырыбында өткен дөңгелек үстелде Қоғамдық денсаулық сақтау басқармасының басшысы Қамалжан Надыровтың келтірген мәліметтеріне қарағанда, Астанада бала туу жасындағы әйелдердің саны 20 жылда 4,6 есе өссе, акушер-гинекологтар саны 2,6 есеге артқан.

«1998 жылы Астана қаласындағы акушер-гинеколог мамандарының саны 119 болса, бүгін бұл көрсеткіш 320-ға жетіп, 2,6 есеге артқан. Бала көтеруге қабілетті әйелдер саны 1998 жылы 70 мыңды құраса, қазір олардың саны 325 мыңға дейін жетіп отыр. Көрсеткіш 4,6 есеге артқан. 

АМЖЖ-нің акушер-гинекологтармен қамтылу көрсеткіші штаттық кестенің 85% құраса, стационарлық деңгейде акушер-гинекологтардың штаты 90 % шамасында», — деді Қ. Надыров.

Кадр тапшылығы мәселесін шешу мақсатында қоғамдық денсаулық сақтау басқармасы кешенді шараларды қолға алды.

«Мамандардың тапшылығына әсер ететін факторлардың бірі – Астанада тұрғын үйдің жоқтығы. Тек биылдың өзінде тұрғын үй жағдайын жақсарту үшін квалификациялық босандыру қызметі мамандарына 10 пәтер бөлінді. Алдағы уақытта 1500 пәтері бар үш жатақхана салынады деп  жоспарлануда. Сондай-ақ, баспананы қолжетімді ету мақсатында тұрғын үй сертификаттарын беру мәселесі де қарастырылып жатыр», — деді К. Надыров.

Мұндай сертификаттар осы жылдың желтоқсанында беріледі. 

Диспетчердің күрделі жұмысы қысқа мерзімде алынған қоңыраулар саны бойынша бағаланады, деп хабарлайды елорда әкімдігінің ресми сайты.

Қалалық жедел жәрдем станциясының мәліметі бойынша, диспетчерлер «күні-түні-48» кестесі бойынша жұмыс істейді. Олар 24 сағат бойы үздіксіз науқастардан қоңырау қабылдайды.

«Егер ол бүгін он сағат жұмыс істесе, ертең кешке 14 сағат жұмыс істейді де, 48 сағат демалады. Олардың барлығында фельдшер немесе медбике медициналық сертификаты бар. Диспетчерлер — жоғары және бірінші санаттағы медицина қызметкерлері. Ең бастысы, олардың барлығы кем дегенде үш жыл жедел жәрдем бригадасында жұмыс істеген болуы тиіс. Содан кейін ғана біз оларды жұмысқа қабылдай аламыз. Себебі телефон арқылы олар науқастың жағдайын айыра білуі керек», — дейді қалалық жедел жәрдем станциясының бас дәрігері Гүлнар Тұяқова. Ол сондай-ақ диспетчерлерге артылатын психологиялық жүктемені де атап өтті. Сондықтан олар әр сағат сайын 15 минуттық демалысқа құқылы.

«Егер қоңырау 30 секундқа созылса да, жүктеме өте жоғары. Диспетчерлердің жұмысы эмоционалды түрде өте қиын, ол ауырып тұрған науқас адамдармен жұмыс істейді. Егер жедел жәрдемге қоңырау шалып отырған науқас есінен танып қалса, диспетчер екі есе алаңдай бастайды. Осы ретте дүйсенбіден бері коммуникативтік дағдылар бойынша курстар басталды», — деді Г. Тұяқова. Диспетчерлер әр ай сайын немесе тоқсан сайын коммуникативтiк дағдыларын арттырады. Себебі ол жұмыс барысында науқасқа псиxологиялық көмек көрсетуге міндетті. Сондай-ақ өзінің де денсаулығына мұқият болуы тиіс.

Руслан Айткаримов «VineFest» вайнер жастар фестивалінің жеңімпазы болып танылды, деп хабарлайды астана әкімдігінің ресми сайты. 

Жастар фестивалі халықаралық студенттер күніне орай өткізілді. Ұйымдастырушылар айтқандай бұл сәйкестік емес, өйткені әлеуметтік желіні ең белсенді қолданушылар – ол студенттер.
Шараның басты мақсаты – креативті, шығармашыл жастарды қолдау. «VineFest» фестивалі астанада осымен екінші рет қалалық қоғамдық даму істері басқармасының бастамасымен өткізіліп жатыр. Биыл фестивальдің форматы бастауыш вайнерлер мен Instagram әлжелісінде жаңа танылған жұлдыздарды қолдау мақсатында өзгертілді.

Нұрлан Батыров, Kartop.tv және VineFest-2017 – T-jokers жеңімпаздарынан құралған әділқазылар финалға өткен 15 бейнероликке баға берді. Қысқа метражды конкурстық роликтер «Жастар саясаты», «Жас адамдар деген кім» және «Астананың 20 жылдығы» деген тақырыптарда түсірілді.

«Бүгінде вайнерлер шығармашылықтың, өнердің жаңа тармағына айналды. Өнерде осы жаңа бағыттың дамуы үшін, өзінің соңынан ерушілері мен қызықты бола түсуі үшін – ізін басатын ұрпақ керек. Фестивальда жаңа вайнерлер шығып, елімізде танымал болып, олар қажетті трендті беріп отырса дейміз. Танымал болу дегенің – бұл қоғам алдында жауапкершілік алу деген сөз, сол себепті біз вайнерлердің жаңа буыны мен қазіргі буыны – еліміздің дамуын дұрыс бағытта насихаттағанын қалаймыз», — деді қоғамдық даму басқармасының басшысы Данияр Есин.

Фестивальдің жеңімпазы 350 мың теңге алды. Екінші орын үшін ұйымдастырушылар 250 мың теңге, үшінші орын үшін 150 мың теңге табыс етті.

«Көріңіздер, жасаңыздар, ештеңеден қорықпаңыздар! Жасап көрдім – бірақ қолымнан келмеді десе, онда нашар жасап көрген. Егер жасайтын болсаң сол істі «есің кете» жасауың керек, оған салмақты түрде қарау керек. Себебі, көрермендер жасандылыққа төзбейді», — деді бастауыш вайнерлерге қарата айтқан сөзінде актер, вайнер әрі режиссер Нұрлан Батыров.

Кеш қонақтары өздерінің кумирлерімен суретке түсіп, табысты вайнерлерден қолтаңба алып, лотерея ойнауға қатысты. Соңынан қазақстандық эстрада жұлдыздары қатысқан мерекелік концертті тамашалады.

Астана әкімдігі тұрғын үй-коммуналдық шаруашылығына қатысты барлық сұрақтарды тәулік бойы iKomek орталығына жолдауға болатындығын еске салады, деп хабарлайды елорда әкімдігінің ресми сайты.

«Астана Тазалық» ЖШС мәліметінше, санитарлық тазалау жұмыстары әрбір ауданда жүргізілуде, бүгін көшені тазалауға 1814 жол жұмысшысы шықты.

Сарыарқа ауданында 33 мердігер ұйым жұмылдырылды.

18 қарашадағы жағдай бойынша жинау жұмыстарына 499 жол жұмысшысы қатысты, мамандандырылған техниканың 123 бірлігі шықты, оның 40 бірлігі – жүк түсіргіш, 16 бірлігі – жүк тиегіш техника, МТЗ-щетка – 11 бірлік, МКСМ – 5 бірлік, ПМ – 29 бірлік, құм сепкіш – 10 бірлік, автогрейдер – 6 бірлік, алақанды жүк тиегіштер – 6 бірлік.

17 – 18 қараша аралығында 185 текше метр құм-тұз қоспасы пайдаланылды. Қар полигонына 16 қарашадан – 18 қарашаға дейін 12426 текше метр қар шығарылды.

Алматы ауданында қар тазалау жұмыстарына 493 жол жұмысшысы қатысты. Жұмылдырылған техникалар:

Жүк түсіргіш – 55 бірлік, жүк тиегіш техника – 30 бірлік, МТЗ-щетка – 32 бірлік, ПМ – 54 бірлік, құм сепкіш – 9 бірлік, автогрейдер – 2 бірлік.

Есіл ауданында қар тазалау жұмыстары күшейтіле түсті. Бірінші кезекте магистралды көшелер тазартылды, аялдама кешендері, ішкі орамның жолдары және денсаулық, білім объектілеріне кіре беріс жолдар күрелді. Қазіргі таңда қар тазалауға 322 бірлік арнайы техника және 534 жол жұмысшысы шықты. Таңғы сағат 6-дан 12.00-ге дейін 1753 текше метр қар шығарылып, 243 текше құм-тұз қоспасы себілді. Жұмыстар жалғасуда.

Байқоңыр ауданының санитарлық тазалау жұмысына 16 мердігер ұйым кірісті, тазалауға 288 жол жұмысшысы және 117 мамандандырылған техника қатысты: жүк түсіргіш – 44 бірлік,  жүк тиегіш техника – 26 бірлік, МТЗ-щетка – 22 бірлік, ПМ – 16 бірлік, құм сепкіш – 5 бірлік, автогрейдер – 3 бірлік, Ас-машина – 1 бірлік.

13-17 қараша аралығында 1119 м3 құм-тұз қоспасы үлестірілді. 7059 текше метр қар шығарылды.

13 қарашадағы жағдай бойынша қар полигонынан 573 текше метр қар шығарылды. 

Астана әкімдігі Тұрғын үй-коммуналдық шаруашылығына қатысты барлық сұрақтарды 109 нөмірі бойынша Астананың iKomek мониторинг және жедел әрекет ету орталығының call-орталығына тәулік бойы жолдауға болатындығын еске салады. Сондай-ақ, iKomek орталығына келесі әдістер бойынша хабарласуға болады.

Telegram-дағы: https://t.me/astanaikomek109_bot чат-боты

Әкімдіктің astana.gov.kz сайты

Әлеуметтік желілердегі жарияланымдарды #astana109 хештегімен белгілеу:

Facebook www.facebook.com/astana109/

Instagram www.instagram.com/astana109/

Telegram-канал https://t.me/astana109112.

Қазақстан біріншілігіне барлығы 437 дзюдошы қатысты, деп хабарлайды Астана қаласы әкімдігінің ресми сайты. 13-16 қараша аралығында елорданың «Дәулет» спорт кешенінде дзюдодан Қазақстан Чемпионаты өтті. Төрт күнге созылған байрақты бәсекеге еліміздің 14 облысы мен Астана, Алматы, Шымкент қалаларынан 437 дзюдошы қатысты. Нәтижесінде, Қазақстанның жекелей Чемпионатында Алматы облысының дзюдошылары 4 алтын, 1 күміс және 1 қола медальмен жалпы командалық медаль кестесінде көш бастады. Ал Маңғыстау облысының құрамасы 3 алтын, 2 күміспен екінші орынға жайғасса, Қызылорда облысының құрамасы 2 алтын, 3 күміс, 5 қола жүлдемен үздік үштікті түйіндеді, деп хабарлады Қазақстанның Дзюдо федерациясында. Жарыстың соңғы күнінде Қазақстанның аралас командалық Чемпионаты өтті. Халықаралық дзюдо федерациясының ережесіне сәйкес дзюдошылар аралас командалық сайыста бір командада 6 салмақ дәрежесі (әйелдер: -57 кг, -70 кг, +70 кг, ал ерлер -73 кг, -90 кг және +90 кг) бойынша белдесті. Аралас командалық сайыста Атырау облысының құрамасы жеңімпаз атанса, Ақмола облысының татами шеберлері күміспен күптелді. Ал Жамбыл облысы мен ШҚО дзюдошылары қола жүлдені қанағат тұтты.

Материалдарды қандай да бір жолмен пайдалануға – Астана қаласының ресми сайтына белсенді гиперсілтеме болған жағдайда жол беріледі astana.gov.kz/kz/news/news/16701