Қол қойылған құжат Астана қаласын және жақын аумақтарды дамытуға арналған, деп хабарлайды Астана қаласы әкімдігінің медиа орталығы.

Жобаны іске асырудың алғашқы кезеңінде қолданыстағы заңды жетілдіруге байланысты мәселелер шешіледі. Осыған байланысты Астана қаласы мен Ақмола облысы әкімдіктерінің арасында Астана агломерациясын дамыту жөніндегі бірлескен қызмет туралы меморандум бекітілді.

«Астана қаласы агломерациясына өзінің аумағынан басқа Ақмола облысына қарасты 123 ауылдық елді-мекен енген, олардың жалпы аумағы 21 770 км квадрат және осы жоба миллионнан астам адамның өмірінде өте маңызды тетік атқарады. Біз Астана тұрғындарын да және жақын маңдағы аудан тұрғындарын да алаңдатып отырған мәселелерді шешуде іс-әрекетті үйлестіруіміз керек. Бұл аумақтық жоспарлау, жер, көлік қатынасына байланысты т.б. сұрақтар. Сол себепті, қала және облыстың жауапты қызметтері жол картасын әзірлеуі керек, оған барлық сұрақтарды саралап, топтастырып, оған жауапты мекемелерді белгілеп, нақты мерзімін анықтап іске асыруға кірісуіміз керек», — деп атап өтті меморандумға қол қою барысында Астана әкімі Әсет Исекешев.

«Бүгінгі меморандумның Астана қаласы мен Ақмола облысының тұрғындарына қажет екенінде күмән жоқ. Ең бастысы біз екі аймақ арасында туындап отырған мәселелерді құқықтық база аясында шешуге және болашақта осы проблемалар қайта туындамау үшін әрекет етудеміз», — деді Ақмола облысының әкімі Мәлік Мырзалин.

Сондай-ақ, меморандум индустриалды аймақтарды дамытуды, жобалау бойынша ұсыныстар құруды және іске асыруға мүмкіндік береді. Ол өз кезегінде Ақмола облысының территориясына жататын бірақ Астана қаласына жақын орналасқан (Шортанды, Жайнақ, Аршалы) аудандардың дамуына серпін беруі тиіс және де осы аудандарда көптеп жұмыс орындарын, әлеуметтік-мәдени инфрақұрылымдар ашу. Аудандар бәсекеге қабілетті және тұрғындардың өмір сүру сапасы жоғары көпфункционалды аумақ құруға бағытталған, өмір сүру үшін тартымды және көші-қон ағындарын Астанадан өздеріне тартатын болады. Сөйтіп аудандар Астана маңайында ауылдардың ретсіз етек жаюына тосқауыл болуы тиіс. Сонымен қатар, екі жақ Астана маңындағы ауылдарды дамытуда инфраструктураны, қоғамдық көлік қатынасын және т.б. сұрақтарды шешуде нақты жоспар құруға келісті.

Апатты үйлерді күреу бойынша қанатқақты жоба «Нұрлы жер» мемлекеттік бағдарламасына сәйкес жүзеге асырылып жатыр, деп хабарлайды елорда әкімдігінің медиа орталығы.

Ағымдағы жылға елордада 111 апатты жағдайдағы үйлерде тұратын 1863 отбасыны жаңа баспанаға көшіру жоспарланған, деді медиа орталықтың тілшісіне Тұрғын үй басқармасының басшысы Руслан Ахметов.

Қазіргі таңда 98 төтенше жағдайдағы үйде тұрып жатқан 1425 отбасы көшіріліп жатыр.

«Елорада апатты үйлерді күреу бойынша қанатқақты жоба «Нұрлы жер» мемлекеттік бағдарламасына сәйкес жүзеге асырылып жатыр. Аталған жоба зор әлеуметтік маңызға ие және тұрғындардың тұрғынжайын жақсартуға бағытталған», — деді Р.Ахметов.

Бағдарламаның бірінші кезеңінде кешенді тексеру нәтижесінде қаладағы 228 нысан апатты болып танылды. Осы жылдың басында 117 апатты үй күрелді. Қазіргі күні98 үйде тұратын шамамен 1,5 мың отбасыны көшіру жұмысы жүргізіліп жатыр. Ал қалған тозығы жеткен 13 үйдің тұрғындары нысандардың тапсырылуына қарай жыл соңына дейін көшіріледі.

Қанатқақты жобаның шартына сәйкес Астана әкімдігі апатты үйлерді күреп, оның орнына баспананың ауданына сәйкес жаңа тұрғынжай береді. Көшіру кезінде пәтердің ауданымен бірдей баспана ұсынылады.

«Бұл жағдайда апатты үйлердің тұрғындары жаңа баспанаға көшіру кезінде отбасы мүшелерінің саны мен төтеншежағдайдағы үйдегі бөлме саны есепке алынбайтынын ескеруі керек», — деді Р.Ахметов.

Күреуге инжинерлік желілері мен құрылыс конструкторлары тозған, негізінен 1940-1980 жылдар аралығында салынған үйлер жатады.

Елорданың бас жоспары мен Астана әкімі Әсет Исекешевтің тапсырмасына сәйкес күрелген үйлердің орнына саябақ, гүлзар мен бульварлар құрылысын жүргізу көзделіп отыр.

2013-2016 жылдар аралығында 117 апатты үй күреліп, 1570 отбасы жаңа әрі жайлы баспанаға көшірілді.

Елордада көтергіштерді жаппай ауыстыру жұмыстары жалғасып жатыр деп хабарлайды Астана әкімдігінің медиа орталығы.

Жаңа лифтер төмендегі мекен-жайлар бойынша орналасқан тұрғын үйлерде пайда болды: Дүкенұлы көшесі 38 («Шаңырақ» ТК, 8 лифт), Б. Момышұлы көшесі 16 (4 лифт). Ал мына мекен-жайлар бойынша орналасқан көпқабатты үйлерде лифтерді орнату жұмыстары жүргізіліп жатыр: Сарыарқа көшесі 41 («Махаббат 1» ТК, «Махаббат 2» ТК, 10 лифт), Кеңесары көшесі 65 («Эдем Палас» ТК, 1 лифт). Жұмыстар қараша айының соңына дейін аяқталады деп күтілуде. Бұл 10, көп дегенде 15 жыл бұрын тұрғызылған үйлер.

Мердігерлердің проблемаларын, көптеген шағымдарды, тұрғындарға төнген қауіпті, көтергіштердің апаттық жағдайын ескере отырып, Астана әкімдігі лифтерді ауыстыру ісіне қолдау көрсетті.

Сондай-ақ, елордада өңірлерді дамыту бағдарламасы бойынша да лифтерді ауыстыру жұмыстары жалғасуда. Елордадағы барлық тұрғын үй кешендерінің тұрғындары өңірлерді дамыту бағдарламасы бойынша көмекақы ала алады.

Құжаттарды «Өркен қала» бағдарламасының операторы болып табылатын компанияға жолдау қажет. Бұдан кейін келісім жасалып, мердігер таңдалады. Үрдіс толығымен тұрғындардың бақылауында жүзеге асады. Көмек қарыз 15 жылға алынса, орташа есеппен әр пәтер (ауданына байланысты) 2 мың теңгеден төлейді.

Жыл соңына дейін аталмыш бағдарлама бойынша Астанада 63 лифт ауыстырылатын болады.

Астанада аз қамтылған отбасыларда тәрбиеленіп жатқан 1500 бала жабулы аквапаркте болып қайтты деп мәлімдеді білім басқармасының басшысы Әнуар Жанғозин аппараттық кеңес барысында. Бұл туралы елорда әкімдігінің медиа орталығы хабарлайды.

Астана қаласы әкімдігі мен «Ailand» отбасылық демалыс орталығы арасындағы келісімге сәйкес аквапаркке барлығы 6 мың бала тегін барып қайтады.

Ағымдағы жылдың соңына дейін тағы да 4,5 мың бала аквапаркте болып қайтады. Бұл – оқу озаттары, аз қамтылған, көпбалалы отбасыларда тәрбиеленіп жатқан балалар.

Естеріңізге салайық, балалар мен ересектерге арналған жасанды су қоймасы ағымдағы жылдың жазында пайдалануға берілген болатын. Ғимараттың жалпы ауданы 8,5 мың шаршы метрді құрайды.

Ойын-сауық кешенінде аттракциондар, шешінетін бөлмелер, моншалар, демалыс және тамақтану орындары бар.

16 қарашадан бастап № 71 автобус бағдарының қозғалыс сызбасы өзгереді, деп хабарлайды Астана қаласы әкімдігінің медиа орталығы.

«Көктал-2» ТА – «METRO» гипермаркеті бағыты бойынша жүретін № 71 бағдарында жаңа ыңғайлы «Iveco» маркалы автобустар қызмет көрсететін болады.

Сондай-ақ, № 71 бағдары үлкен көлемді автобустармен қызмет көрсетілуіне байланысты, бағдардың жүру сызбасы өзгереді.

«Көктал-2» ТА бастапқы нүктесінен Жұмабаев пен Обаған көшелерінің қиылысына дейін өзгеріссіз, ары қарай Жұмабаев көшесімен тура — солға Балқантау көшесіне, одан ары ағымдағы сызбаға сәйкес.

Кері бағытта ағымдағы ұқсас қозғалыс үлгісі бойынша.

Сондай-ақ, 16 қарашадан бастап «Достык» ОДО – стела «Звезда Астаны» бағытындағы № 18 бағдары бойынша автобустар саны 16-дан 20-ға көбейеді, қатынау жиілігі 11 минуттан 9 минутқа дейін қысқарады.

Мұндай оң көрсеткіштерге қол жеткізуге «Сергек» фото және бейне тіркеу жүйесін енгізудің (Қазақстанда алғаш рет) нәтижесінде мүмкін болды. Астана ең қауіпсіз қалалардың біріне айналады. Енді зиянкестер қылмыс жасаудың алдында тәуекелге бара алмаса, даңғойлар жолда жүру ережелерін бұзбауға тырысатын болады.

Елорда әкімдігінің медиа орталығы сіздің назарыңызға «Сергек» жүйесінің жұмысы жайлы деректі фильмді ұсынады.

Отоларингология саласында әлемдік деңгейдегі маман Ашеш Бхумкар есту қабілетін қалпына келтіру үшін Астанада 11 балаға жоғары технологиялы операция жасамақ. Мұндай операция Қазақстан мен Орталық Азияда бірінші рет жасалынғалы жатыр, деп хабарлайды елорда әкімдігінің медиа орталығы.

Есту қабілетінен айрылған балалардың мүддесін қорғайтын «Микротия и атрезия» қоғамдық бірлестігі UMC корпоративті қорымен бірлесіп, табиғи есту қабілетін қайтара алатын үнді дәрігері Ашеш Бхумкармен шеберлік сыныбын өткізді.

«Дәрігер Ашеш Бхумкар адам қолына мұрын мен құлақ өсіріп шыққан ғалымдардың бірі. Дәрігер қазақстандық дәрігерлерді есту қабілетін қайта қалпына келтіру әдісі бойынша оқытады. Іс-шараға ресейлік дәрігерлер де қатысады. Операцияға дабыл жарғағы, протезден жасалған есту сүйегі, есту жолы т.б. жаңалықтар енгізіледі», — дейді «Макротия и атрезия» ҚБ төрайымы Малика Сұлтан.

Оның айтуынша, есту жолын әлемде тек кейбір дәрігерлер ғана аша алады. Сол себепті, есту қабілетін қайта қалпына келтіру операциясы өте қымбат тұрады, яғни бағасы 86 мың долларды құрайды. Ал дәрігер Бхумкар кішкентай балалардың операциясын 40 мың долларға жасауға келісіп отыр.

Шеберлік сыныбы барысында Ана мен бала ұлттық ғылыми орталығы базасында республика бюджетінен 11 балаға операция жасалады. Бұл операция Қазақстан мен Орталық Азияда бірінші рет жасалынғалы отыр.

«Бұрынырақ естуден мәселесі бар балаларға саңырау немесе нейросенсор болса – есту аппаратын импланттап беретін. Бұл шын мәнінде шығыны көп мәселе. Бхумкардың арқасында есту жолын ашып, құлақты қалпына келтірсе, бала табиғи түрде еститін болады. Қоғамдық бірлестіктің болашақ жоспарында дәрігердің бір жыл Қазақстанда болуын қамтамасыз ететін жоба жасамақшы. Ол бір жыл ішінде жүзден аса операция жасаудың мүмкіндігін қарастырады», — деді М. Сұлтан.

Қазақстанда «Микротия атрезия» диагнозымен 700 бала тіркелген.

«Осындай операцияның арқасында науқас балалар кәдімгі құлаққа ие болады. Ол табиғи тін, сондықтан қорқудың қажеті жоқ және ең бастысы құлаққа баланың өз құлақ терісін пайдаланады. Теріні ағзасындағы басқа жерінен алмайды», — дейді дәрігер Бхумкар.

Операциядан кейін барлық пациенттер ғылыми орталықтағы стационардан оңалтудан өтеді және алты аптадан кейін хирургтың кеңесін алуға келеді.

Астана қаласы «Сарыарқа» ауданының әкімдігі ерекше акцияны қолға алды. Енді кез-келген адам өз атынан сүйікті астанамызға орындық сыйлай алады және қаламыздың өзі қалаған кез-келген көрікті жеріне қоя алады, деп хабарлайды Астана қаласының медиа орталығы.

Бүгін «Сарыарқа» ауданы әкімдігі Урбанистика орталығымен бірлесе отырып «Астана тарихында өз есімінді қалдыр» атты қайырымдылық марафонын қолға алды.

Енді Елорда тұрғындары қалымыздың саябақтарына, скверлеріне және Есіл жағалауына өз аты жазылған немесе отбасылық атаулы күнге арналған ескерткіш тақтайшасы бар орындық сыйлай алады.

Акцияны ұйымдастырушылардың айтуынша, осылайша Астана тұрғындары өзінің сүйіктісіне, отбасылық атаулы күнге, жанұялық мерекелерге арнап осындай қоғамға пайдалы сыйлық жасай алады.

Бүгін «Сарыарқа» ауданының әкімдігі аталмыш акцияны қолдаған заматтарға атаулы сертификаттар табыс етті.

«Жолдасым екеуміз осы Есіл жағалауында таныстық. Ол орындықта телефонмен сөйлесіп отырды, мен келіп жанына жайғастым. Сүйтіп өмірлік серігімді осы Есіл жағалауындағы орындықта жолықтырдым. Қазір екі кішкентайымыз бар. Сол себептіде осы акцияны қолдадым. Және басқада жастар тура осы біздің атаулы орындығымызда өмірлік серіктерін жолықтырар деген ниетте бар», дейді сертификат иесі Әлібек Сисембин.

Қала көркін бұзбау үшін орындықтар белгілі бір стандартқа сай жасалуы тиіс. Егер Астанамызға осындай сыйлық жасағыңыз келсе Урбанистика орталығының сайтында орындықтардың онға тарта үлгісі және бағалары көрсетілген.

Электр қуатымен қамту қызметі шағын станциядағы қысқа тұйықталудың салдарынан орын алды. Апат толығымен жойылды деп хабарлайды елорда әкімдігінің медиа орталығы.

Сенбі күні Астананың сол жақ жағалауындағы бірқатар тұрғын үй мен әлеуметтік нысандарда электр қуатымен қамту қызметінің уақытша ажыратылуына қысқа тұйықталу себеп болған деп мәлімдеді елорда әкімдігінің медиа орталығына қалалық энергетика басқармасында.

«11 қарашада сағат 12:13-те Есіл ауданының «Левобережная» шағын станциясына қарасты кабель желілерінде орын алған қысқа тұйықталудың нәтижесінде қаланың сол жақ жағалауындағы бірқатар нысанда электр қуатымен қамту қызметі ажыратылған болатын. Сағат 12:27-де «Керуен» СОО мен «Изумрудный квартал» БО аралығындағы апатты-кабельдік желілер ажыратылды. Кабельді арнада өрттің шығуы жөніндегі ақпарат келіп түскен соң, жұмыскерлер жедел түрде қорғаныс министрлігі, Ұлттық кітапхана мен «Изумрудный квартал» БО (екінші қуат көзі) ғимараттарын, сондай-ақ, «Бәйтерек» монументін электр қуатымен қамтамасыз ететін кабельдік желілерді ажыратты», — деп атап өтті басқармада.

Дәл осы уақытта республиканың қорғаныс министрлігінің қызметкерлері өрт сөндіруші топты шақыртты. Кабельді арнада шыққан өрт сағат 13:20-да өрт сөндіру тобының күшімен ауыздықталды.

«Апатты жоюға «Астана –АЭК» АҚ техникасының 6 бірлігі мен жөндеу және жедел әрекет ету бригадалары, барлығы 23 адам жұмылдырылды. Сағат 18:25-те Ұлттық кітапхана, «Бәйтерек» монументі, «Изумрудный квартал» БО жарықпен қайта қамтамасыз етілді. Қорғаныс министрлігінің ғимаратына жарық сағат 21: 58-де берілді», — делінген хабарламада.

Апат жексенбі күні сағат түнгі 0:16-да толығымен жойылған болатын.

Астанада жергілікті атқарушы органдар өкілдерінің қатысуымен азаматтарға консультациялық көмек көрсетуге бағытталған іс-шара өтті деп хабарлайды елорда әкімдігінің медиа орталығы.

Астана қаласы әкімдігінің «Астана жастары» КММ-нің мұрындық болуымен өткен шараның мақсаты азаматтарды қазіргі уақытта жүзеге асырылып жатқан мемлекеттік бағдарламалармен таныстыру, қала тұрғындарын жеке сұрақтары бойынша қабылдау, оларға консультациялық кеңес беру болып табылады.

«Big Шанхай» базарының жұмыскерлері мен келушілері үшін ұйымдастырылған шара барысында «Тұрғын үй басқарамасы», «Жұмыспен қамту, еңбек және әлеуметтік қорғау басқармасы», «Жұмыспен қамту орталығы», «Тұрғынүйқұрылысжинақбанкі», Халыққа қызмет көрсету орталығының және басқа да мемлекеттік мекемелердің өкілдері азаматтарды қабылдаған болатын.Мемлекеттік қызметшілерден бөлек олар заңгер, психолог сияқты маман иелеріне жолықты.

«Тұрғындар көбіне белгілі бір жерге арнайы барып кеңес алуға уақыт таппайды. Сондықтан осындай көшпелі қызмет көрсету шарасын қолға алдық. Мәселен, сауда орталығынан зат алуға келген адамдар мамандардың консультациялық көмегіне жүгініп, бүгінгі таңда іске асырылып жатқан мемлекеттік бағдарламалар туралы толық мағлұмат ала алады», — дейді Астана қаласы әкімдігінің «Астана жастары» КММ-нің жұмысқа орналастыру және кәсіби бейімдендіру бөлімінің жетекшісі Айдана Мұсатаева.

Шара барысында мемлекеттік мекемелердің консультациялық кеңесін жүзден астам астаналық алды.