Жарияланымдар

«Жүрегімде Астана» композициясы Батырxан Шүкенов әндерінің ноталар жинағына енді

Шөмішбай Сариевтің сөзі мен Ренат Гайсиннің әніне жазылған «Жүрегімде Астана» атты композиция Батырхан Шүкеновтың репертуарындағы әндердің ноталар жинағына енді.


Бұл туралы танымал композитор Ренат Гайсин өзінің Instagram парақшасына жазды, деп хабарлайды елорда әкімдігінің ресми сайты.


«Батырхан Шүкенов әндерінің ноталық жинағы қазақ тілінде шығарылды. Батырхан Шүкенов атындағы қорға осындай бірегей музыкалық басылымды шығарғаны үшін үлкен рахмет!», – деп жазды Ренат Гайсин.


 Батырхан Шүкеновтың бауыры Бауыржан Facebook-тағы парақшасында аталмыш жаңалықпен қараша айының басында бөліскен болатын.


«Батырханның репертуарындағы әндер авторларының ноталар жинағы дайын. Тираждың бір бөлігі сауда орталықтарына берілді, тағы бір бөлігін авторлар мен олардың ұрпақтары алды, қалғаны кітапхана, мектептермен қатар музыкалық оқу орындарына таратылды. Барын салып, қол ұшын берген жандардың барлығына алғысымызды білдіреміз», – деді әншінің ағасы.


Астана полициясы азаматтардың жұмыстарын бағалағаны үшін алғыс білдірді

Астаналық полиция қала тұрғындары мен қонақтарына өздерінің кәсіби қызметіне жоғары баға бергені үшін алғыс білдірді, деп хабарлайды елорда әкімдігінің ресми сайты.


 «Біз Астана полициясы департаменті бөлімшелерінің қызметкерлеріне айтылған жылы сөздерге алғысымызды білдіреміз», — делінген хабарламада.


Баспасөз хабарламасында  электриктердің Астана тұрғынынан Ipad-ын ұрлап кеткені жазылған.


«Келесі күні мен Алматы аудандық ІІБ барып, арыз жаздым. Менің таң қалғаным, ертесіне бөлімге келуімді, IPad 2017 ұрлаған адамдарды тапқанын айтып хабарласты. Олар хабарландыру бойынша шақыртқан электриктер болып шықты. Құқық қорғау органдарын мақтан тұтамын», — деп жазды астаналық тұрғын өз хатында.


Қала тұрғыны әсіресе, полиция қызметкерлері Бекзат Ыбырай мен Олжас Данияровтың жұмысын ерекше атап өтті.

Қысқы демалыс әуесқойлары қауіпсіздік ережелерін естен шығармауы қажет

Құтқарушылар азаматтарды қыс мезгілінде балық аулау және аңға шығу кезінде қауіпсіздік ережелерін сақтауға шақырады, деп хабарлайды Астана әкімдігінің ресми сайты қаланың ТЖД-нің баспасөз қызметіне сілтеме жасап.


Температура төмендеп, алғашқы қар жауғаннан кейін аң мен балық аулау маусымы басталады. Қысқы демалыс барысында қарапайым қауіпсіздік ережелерін ұмытып кетіп жатамыз. Оның соңы орны толмас зардаптарға әкелуі мүмкін.  Төтенше жағдайларға жол бермеу мақсатында Астана қаласы Сарыарқа аудандық ТЖД Төтенше жағдайлар басқармасының қызметкерлері алдын алу шараларын жүргізуде.


Шара барысында елорда құтқарушылары аңшылық пен балық аулау саймандары сатылатын  Сарыарқа ауданындағы бірнеше дүкенге барып,  сатып алушыларға қауіпсіздік ережелерін түсіндірді. Сондай-ақ, мұнда келушілер мен сатушыларға жадынамалар таратылды.


«Дүкен басшылығына балықшылар мен аңшыларға қауіпсіздік ережелерін жеткізу міндеттелді. Сонымен қатар, WhatsApp желісіндегі балықшылардың «Рыбаки Астаны», «Рыбалка круглый год 54» топтарына хабарламалар жіберілді», — делінген таратылған ақпаратта.


7 қарашада "Мәскеу" БО бизнес-қауымдастық пен халықты ақпараттандыру аясында «Бизнестің жол картасы – 2020» бағдарламасының іске асырылу барысы туралы дөңгелек үстел өтеді

Кездесу барысында «Бизнестің жол картасы – 2020» бағдарламасы шеңберінде грант ұсыну шарттары туралы ШОБ субъектілерін ақпараттандыру төңірегіндегі мәселелерді талқылайды.

Шараны қалалық инвестиция және кәсіпкерлікті дамыту басқармасы «Даму» кәсіпкерлікті дамыту қоры, Астана қаласының кәсіпкерлер палатасы бірлесіп ұйымдастырмақ.

Өзіңізді қызықтырған сауалдар бойынша мына телефон номеріне хабарласуыңызды сұраймыз: +7(7172)919087 немесе email D.montayev@atameken.kz

Digital Bridge алаңында 50-ден астам қазақстандық және халықаралық спикерлер сөз сөйлейді

Форумды «Зерде» холдингі мен Astana Hub IT-стартапшылары халықаралық технологиялар паркінің қолдауымен ҚР Ақпарат және коммуникациялар министрлігі ұйымдастырды, деп хабарлайды елорда әкімдігінің ресми сайты.

Форумға халықаралық IT қауымдастығының өкілдері, технология саласындағы танымал сарапшылар, кәсіпорын басшылары, технологиялық кәсіпкерлер, әртүрлі елдердің мемлекеттік сектор өкілдері, цифрлық даму саласындағы мамандар, ғалымдар, сондай-ақ венчурлық капиталистер мен инвесторлар қатысады.

Digital Bridge алаңында 50-ден астам қазақстандық және халықаралық спикерлер сөз сөйлейді. Олардың қатарында Startup Genome бас ди⁠ректоры Жан-Франсуа Готье, Hyperloop Transportation компаниясының бас ди⁠ректоры Дирк Алборн, Стартап академиясының кәсіпкері, кеңесшісі және жетекшісі, «Галактика» жеке ғарыштық компаниясының негізін қалаушы және меншік иесі Алия Прокофьева, Priceline Group негізін қалаушы Джефф Хоффман, Global Catalyst Partners халықаралық венчурлық капитал фирмасының төрағасы және тең құрылтайшысы Камран Элахиан бар.

Digital Bridge форумы цифрлық трансформация, электронды үкімет, технологиялық кәсіпкерлік және 4-ші өнеркәсіптік революция идеяларын ілгерілету үшін Еуропа мен Азия арасындағы диалог алаңын құратын жыл сайынғы іс-шараға айналады деп күтілуде.

Қосшығұлұлы көшесінде жолдың жаңа бөлігі пайда болды

«Қосшығұлұлы көшесінің жалғасы ретінде жолдың жаңа бөлігі пайда болды. Халық арасында Жаңа Сейфуллин көшесі деп аталатын көше ұзарып, тұрғындар үшін ыңғайлы бола түсті.

«Сәкен Сейфуллин көшесінің құрылысы» жобасының автокөлік жолдарын дамыту бағдарламасы аясында №167 және Земляничная көшелерінің аралығына жол төселді», – деп жазды Сарыарқа ауданының әкімі Арман Тұрлыбек өзінің Facebook-тегі парақшасында.

«Сарыарқа» ауданының әкімі, сондай-ақ №167 және Қосшығұлұлы көшелерінің қиылысында бағдаршам, жол белгілері мен таңбаларымен жабдықталғанын атап өтті.

«Жолдардың пайда болуымен құрылыс та қарқын алды. Сол себепті осы аумақтағы жер учаскелерін игеретін кез де алыс емес», – деп уәде берді аудан әкімі.

Астанада балалар шығармашылығының конкурсы басталды

Бүгін Оқушылар сарайында балалар шығармашылығының «LAULA -2018»  халықаралық байқауы ресми түрде ашылды, деп хабарлайды елорда әкімдігінің ресми сайты білім басқармасына сілтеме жасап.


Конкурстың мақсаты — шығармашылық әлеуетті дамытуға жағдай жасап, балалар мен жасөспірімдер арасындағы дарынды орындаушыларды анықтау.


Халықаралық байқауға қатысамын деушілер өз арыздарын бір ай көлемінде 1 қарашаға дейін жолдай алды.


Сайыс жеңімпаздары «Халық әні», «Эстрадалық ән», «Аспаптық өнер», «Халық аспаптары», «Эстрада – джаз аспаптары», «Балалар биі», «Эстрадалық би», «Халық биі» сынды аталымдар бойынша анықталмақ.


Байқауға 5-тен 17 жасқа дейінгі жеке орындаушылар мен шығаршылық ұжымдар қатысады. 

Астанада алғашқы халықаралық энергия үнемдеу форумы өтеді

Форум Қазақстандағы энергия үнемдеу күнінің он жылдығына орай өткізіліп отыр, деп хабарлайды елорда әкімдігінің ресми сайты.

2018 жылдың 9 қарашасында Қазақстан Республикасының Инвестициялар және даму министрлігі БҰҰ-ның Даму Бағдарламасымен бірлесіп, Астанада энергия үнемдеу бойынша бірінші халықаралық форумын өткізеді. Шара мақсаты – энергияны үнемдеу және энергия тиімділігін арттыру бойынша ашық демонстрациялық диалог алаңын құру.

«Форумға мемлекеттік органдар, бизнес құрылымдар, халықаралық, қоғамдық ұйымдар мен шетелдік сарапшылар қатысады», – делінген министрліктің баспасөз қызметі таратқан ақпаратта.

Басқосуда, сондай-ақ, энергияны үнемдеудің өзекті мәселелері талқыланады деп күтілуде. Атап айтқанда, өнеркәсіп, қалалық қоршаған орта және тұрғын үй-коммуналдық шаруашылық пен стандарттау мәселелеріндегі энергия тиімділігі жан-жақты сараланып, «Энергия үнемдеу және энергия тиімділігі мәселелері бойынша өзгерістер мен толықтырулар енгізу туралы Қазақстан Республикасының заң жобасы» түсіндіріледі.

«Алай Базарында» 3 қараша мен 3 желтоқсан аралығында күн сайын "Алтын күз" атты әлеуметтік азық-түлік жәрмеңкесі өтеді

Павлодар мен Ақмола облыстарының шаруа қожалықтары жәрмеңкеде ет және сүт өнімдерін, сондай-ақ көкөністер, жемістер мен жармалар ұсынады.

Қой етінің бағасы 1230 теңгеден басталса, жылқының еті 1400-ге дейінгі аралықта сатылады. Әлеуметтік жәрмеңкеде картоптың бағасы келісі — 55 теңге.

Айта кетейік, Павлодар облысынан 150 тонна картоп жеткізілген. Сондай-ақ сәбіздің бір келісін 45 теңгеге ала аласыздар. Ақмола облысынан 30 тонна ірі қара мал мен 7 тонна қойдың еті жеткізілді. Ірі қара малдың еті келісіне — 1300 теңге. Ал қой еті — 1250 теңге. Жұмыртқаның бағасы С-1 санаттық — 23 теңге, С-2 — 24 теңге. Сонымен қатар, мұнда кондитерлік және макарон өнімдері, шұжық пен бал да ұсынылған.

Жәрмеңкенің мекенжайы: Алаш тасжолы, С 316 көшесі, 5-ші ғимарат, «Магнум» гипермаркетінің артында.
«Алай базарына» № 39, 41, 53, 307 және 317 автобустары баратынын естеріңізге саламыз.
Анықтама телефондары: +7 (7172) 738087, +7 771 180 0006, +7 702 000 0390.

Онлайн-форум қорытындысы: Елорда тұрғындарын не толғандырады

E.gov.kz электронды үкімет порталында Астана қаласының әкімі Бақыт Сұлтановтың қатысуымен өткен интернет-конференция қорытындыланды, деп xабарлайды елорда әкімдігінің ресми сайты.


 Онлайн-форум барысында қатысушылар келесі мәселелерді талқылады: «Сыбайлас жемқорлыққа қарсы күрес және мемлекеттік қызметтердің сапасын арттыру бойынша қабылданған шаралар», «Мемлекеттiк қызметкерлердiң жалпыға бірдей моральдық-этикалық нормаларын сақтауы», «Құрылыс индустриясын дамыту және Астана қаласының архитектуралық келбеті», «Жолаушылар тасымалы мәселелері мен автокөлік жолдарының жай-күйі», сондай-ақ «Жергiлiктi бюджет пен елорданың коммуналдық меншiгі».


Қала тұрғындары «Абу Даби Плаза» көпфункционалды кешені құрылысының аяқталуы, аумақтарды көгалдандыру, «жылы аялдамаларды» орнату, нөсерлі кәріз желісін жаңғырту, жылдам тамақтану дүңгіршектерін орналастырудың заңдылығы мәселелеріне қызығушылық танытты.


Форумға қатысу e.gov.kz порталына (электрондық-цифрлық қолтаңба арқылы «Ашық диалог» – интернет-конференциялар бөлімі) өту арқылы мүмкін болды.


Келіп түскен өтініштерді талдау барысында төмендегі мәселелерді айрықша атап өтуге болады. Көлік және жол инфрақұрылымы бойынша — 19, құрылыс және тұрғын үй — 10, тұрғын үй-коммуналдық шаруашылығы — 3, кәсіпкерлік — 3, Астана әкімдігінің қоғаммен байланысы — 3, сәулет және жер қатынастары — 3, мәдениет — 3, денсаулық сақтау — 1, экономика — 1, мемлекеттік қызмет бойынша – 1 сұрақ келіп түскен.


Астана қаласының әкімі Бақыт Сұлтановтың қатысуымен өткен алғашқы интернет-конференция алты сағатқа созылды. Барлығы 47 сауал келіп түсті. Олардың барлығына мардымды жауап беріліп, мәселелердің мән-жайы түсіндірілді.