Елордада кейбір көшелерде жол жабынын орташа жөндеу жұмыстарын жүргізуге байланысты кейбір көшелерде көлік қозғалысы шектеледі.

10-25 мамыр аралығында Қошқарбаев көшесінің Момышұлы даңғылынан Сарыкөл көшесіне дейінгі бөлігі жартылай жабылады.

Сонымен қатар, 10-17 мамырда Кенесары көшесінің Республика даңғылынан Ғабдуллин көшесіне дейінгі бөлігінде көлік қозғалысы жартылай шектеледі.

Елорда тұрғындары мен қонақтарынан жол бағыттарын алдын ала жоспарлауды сұраймыз.

Астанада әйелдер арасындағы бокстан Әлем чемионатында 64 мемлекеттен келген 300 жуық спортшы шеберлік байқасады. Дүбірлі додада Рио-де-Жанейрода өтетін жазғы Олимпиада ойындарына жолдамалар сарапқа салынады. Шараның салтанатты ашылуы 19 мамырға белгіленген, қазіргі кезде қыздар шаршы алаңға шығуға дайындық үстінде.

Төрт жылдықтың басты бәсекесіне лицензиялар үш салмақ дәрежесінде ұсынылады – 51 кг дейін, 60 кг дейін және 75 дейін. Әр санат бойынша төрт жолдама беріледі.

Қазақстандық құрама командаға астаналық спортшылар Римма Волосенко, Валентина Хальзова мен Ләззат Күнгейбаева енді. Сонымен қатар, жарыста Назым Қызайбай, Жайна Шекербекова, Дина Жоламан, Айжан Ходжабекова, Зарина Цолоева, Виолетта Князева менЮлдуз Маматкулова ел намысын қорғайды.

Қазақстан әйелдер құрамасының аға бапкері Вадим Присяжнюк жаттығулардың штаттық режимде өтіп жатқанын атап өтті.

– Шаршы алаңға шығып, үздік қасиеттерімізді көрсетуіміз керек. Оның үстіне өзіміздің трибуналар қолдау көрсетеді. Бокс әлемнің көптеген елдерінде дамып келеді. Сондықтан бүгінде бәрін де ескеруіміз қажет. Ресей, АҚШ пен Қытай командалары мықты. Астанада медаль алуды көздейтін басқа да құрамалар бар. Әрине, қазақстандық жанкүйерлердің қолдауы жақсы ынталандыру болмақ, бұған үлкен үміт артып отырмыз. Сондықтан елорда тұрғындары мен қонақтарын бізге қолдау көрсетуге шақырамын, ал қыздар, өз кезегінде жанкүйерлердің сенімін ақтауға тырысады, – дейді В. Присяжнюк.

Әлем біріншілігі 19-27 мамырда «Барыс-Арена» сарайында өтеді.

astana.gov.kz/kk/modules/material/10506

Астаналық ғалымдар қазақтың ұлттық сусындарынан қоспалар шығарды

30 сәуірде еңбек, спорт, шығармашылық, интеллектуалдық және ғылым салаларында жоғары жетістіктерге қол жеткізген отбасылар арасындағы конкурсқа қатысуға өтінімдер қабылдау аяқталды. Қала тұрғындары бір ай бойы конкурсқа қатысуға өтінімдерді жазбаша түрдк тиісті құжаттармен бірге арнайы нысан бойынша аудандық әкімдіктердің ішкі саясат бөлімдері мен Астана қаласының Ішкі саясат басқармасына тапсырды.

2014 жылы конкурсқа қатысуға 44 өтінім, өткен жылы 51 өтінім келіп түскен.

Өтінімдерді қарау барысында комиссия өкілдері отбасы мүшелерінің жетістіктерінің маңыздылығы мен санына, отбасылық дәстүрлер мен жәдігерлерге, рухани-адамгершілік құндылақтарға, арғы тектерін білуіне және т.б. назар аударатын болады.

«Мерейлі отбасы» ұлттық конкурсы 3 кезеңмен өтеді: бірінші кезең – аудандық (қалалық); екінші кезең – облыстық; үшінші кезең – республикалық.

astana.gov.kz/kk/modules/material/10509

Астанада 7 мамырда велоспорт маусымы ашылады. Осы күні Жеңіс күніне арналған бұқаралық велошеру өткізіледі.

Шеру сағат 9.00 «Салтанат Сарайы» аумағынан басталып, Қабанбай батыр даңғылының бойымен «Астана-Арена» алаңына дейін жалғасады және «Сарыарқа» республикалық велотрегі аумағында мәресіне жетеді.

Шара барысында велопрокат пунктері ұйымдастырылып, адамдар «Астана Bike» велосипедін пайдалана алады, ең жақын үш станция толық жасақталмақ. Қатысушыларды тіркеу сағат 8.00 басталады.

Шараға белгілі қазақстандық спортшылар да қатыспақ. Велоспортшылар болса, астаналықтарды шараға қатысуға шақырады:

«Құрметті достар, 7 мамыр күні Ұлы Отан соғысындағы Жеңіс күніне орай өткізілетін велошеруге қатысуға шақырамын. Маусымның ашылуын атап өтіп, ардагерлерге тағзым етейік. Қатысушылар 7 мамырда сағат 9.00 «Салтанат Сарайының» жанына жиналады, — деді Astana Pro Team велокомандасының бас менеджері Александр Винокуров. Айта кетейік, Astana Pro Team велокомандасы 6 мамырда «Джиро д'Италия» маусымның бірінші Гран турына қатысады.

«Елімізде велоспорттың жыл өткен сайын кеңінен танымал бола түсетіні қуантарлық жайт. Осындай бұқаралық велошерулер соның дәлелі. Астаналықтарды 7 мамырда өтетін Жеңіс күніне арналған велошеруге қатысуға шақырамын», — деді Astana Pro Team кәсіпқой спортшысы, Қазақстан құрамасының көшбасшысы Алексей Луценко, ол Рио-де-Жанейрода өтетін Олимпиада ойындарына дайындық үстінде.

Аталған шара адамдарды спорт пен салауатты өмір салтын белсенді ұстануға тартуға, экологиялық таза көлік ретінде велосипедті және жол қауіпсіздігін насихаттауға, Ұлы Отан соғысының ардагерлеріне тағзым етуге, сондай-ақ велоспорт маусымының ашылуына бағытталмақ. Шараны ұйымдастырушылар — Қазақстан велоспорт федерациясы және Астана қаласының әкімдігі.

astana.gov.kz/kk/modules/material/10459

2016 жылғы 4 мамырда азаматтардың жеңілдетілген санатына атаулы көлік карталары таратыла бастайды. Аталған шара елордалық қоғамдық көлікте «ASTRA PLAT» электронды жолақы төлеу жүйесін енгізу аясында жүзеге асырылады.

Фототіркеуден өткен азаматтардың жеңілдетілген санатына жататын адамдар атаулы көлік картасын күн сайын сағат 10.00-ден 18.00 дейін Республика даңғылы, 34 мекен жайы бойынша «Жастар» сарайы ғимаратында орналасқан пунктен ала алады. Дербестендірілген карталарды беру үстіміздегі жылдың мамыр айының соңына дейін жүргізіледі. Айта кетейік, жекелеген санаттар үшін карталар үйлеріне дейін жеткізіледі.

Қазіргі кезде елордада төменде көрсетілген азаматтардың санаттары қоғамдық көлікпен тегін жол жүреді:

— ҰОС ардагерлері мен оларға теңестірілген тұлғалар;

— жасына қарай және еңбек өтілі бойынша зейнетке шыққандар;

— жасына қарай және асыраушысынан айырылуы бойынша мемлекеттік әлеуметтік жәрдемақы алатындар;

— көп балалы отбасылар;

— мүмкіндігі шектеулі тұлғалар;

— 16 жасқа толмаған мүгедек балалар.

Еске салайық, 2015 жылы тамызда Астанада қоғамдық көлікпен тегін жол жүруге құқылы жолаушылардың суреттері мен жеке мәліметтер базасын құру мақсатында азаматтардың жеңілдетілген санаты суретке түсіріліп, тіркеуден өткен болатын. Осы мақсатта 25 пункт ашылды. Ал суретке түсіп үлгермегендер үшін процедура өткен жылғы желтоқсан айына дейін ұзартылды.

astana.gov.kz/kk/modules/material/10460

Балалардың жазғы демалысына ерекше назар аударылады. Дайындық жұмыстары қазірден-ақ қолға алынды.

2016 жылғы жазғы маусымда 6 шілде – 12 тамыз аралығында Ақмола облысының Ақкөл ауылындағы «Арман» спорттық-сауықтыру лагерінде 5 ауысым ұйымдастырылады. Үш ауысым жетім, тұрмысы төмен және көп балалы отбасылардан шыққан балалар үшін тегін өткізіледі.

Ақмола облысының Ерейментау ауданындағы «Батыр» палаталы лагері 14 маусым — 14 шілде аралығында жұмыс істейтін болады. Онда жетім және аз қамсыздандырылған отбасылардан шыққан 375 бала тегін демалады. Аталған лагерь спорт пен сауықтыру бағдарламасымен туристік және тарихи-өлкетану, экскурсиялық бағыттарды басшылыққа алған. Балалар үйлерінің тәрбиеленушілері Ақмола облысындағы «Боровичок» демалыс аймағына жіберіледі.

Айта кетейік, елордада 83 мектепте 1 маусым — 8 шілде аралығында мектеп жанындағы лагерьлер жұмыс істейді, оған бастауыш сыныптан 45 мыңға жуық оқушы барады. Мектеп жанындағы лагерьлердің басты міндеті — мектеп жасындағы балалардың шығармашылық әлеуетін дамыту, салауатты өмір салтын қалыптастыру, демалыс ұйымдастыру.

Сонымен қатар, Астанада 1-8 шілде аралығында мектептер жанынан 5-7 сынып оқушыларына арналған «Дидарлы жаз» спорттық-ойын алаңдары ашылады. Олардың басты міндеті топтық спорт түрлерінен қалалық мектептердің эстафеталық командаларының арасында спорттық-бұқаралық қызметті ұйымдастыру. Сондай-ақ, Астанада «Айбынды маусым» әскери-спорттық алаңдар жасалады. Бұл жоғары сынып оқушыларына тегін демалыс ұйымдастыруға бағытталған жоба.

Мұнымен қоса, Оқушылар сарайларының жанынан ақылы негізде жазғы шығармашылық мектептері ашылады. Мақсаты – балалардың демалуына қолайлы жағдай жасау, оларды сауықтыру және шығармашылық, танымдық, зияткерлік қабілеттіліктерін, бастамалары мен қызығушылықтарын іске асыру.

Бұдан басқа, мектептер мен қосымша білім беру ұйымдарының жанынан түрлі топтар ашылады: көгалдандыру бойынша бастамашыл топтар мен мектеп жанын абаттандыру бойынша жөндеу бригадалары; интеллектуалды, шығармашылық және тіл үйірмелері; пәндер бойынша республикалық және халықаралық олимпиадалар; шығармашылық байқаулар мен спорттық жарыстар.

astana.gov.kz/kk/modules/material/10458

Еліміздің түкпір-түкпіріндегі жас орындаушылар тағы да «Жас қанат — 2016» республикалық байқауында бас қосады. Биыл 25 жылға толатын фестиваль ерекше ұйымдастырылмақ.

Бейбітшілік және келісім сарайында өтетін байқауға санаулы күндер қалды. 16-22 мамырда еліміздің үздік жас орындаушылары өзара бәсекеге түседі. Қазіргі кезде байқауға қатысушылар дайындық үстінде. Іріктеу кезеңі аяқталды. Ең жас қатысушы 15-те, ал ең үлкені 28 жаста. Байқауға Ақтөбе, Орал, Семей, Өскемен, Алматы, Талдықорған, Шымкент, Жезқазған және Қарағанды қалаларының өкілдері қатысады. Сондай-ақ, үш орындаушы елордамыздың намысын қорғайтын болады.

25 жылдың ішінде түрлі қалалардың өкілдері фестиваль жеңімпазы атанып келді. Өткен жылы бас жүлде «Жас қанат» көкшетаулық Ринат Теміржанға бұйырған болатын. Ең алғашқы «Жас қанат» байқауы қазақстандық танымал әнші, 1992 жылы байқау лауреаты атанған Медеу Арынбаевтың шығармашылығында маңызды рөл атқарды.

– Алғашқы «Жас қанат» байқауы қазақстандық эстрада үшін шынымен де маңызды оқиға болды, біз, жас орындаушылар үшін бұл шығармашылықтың даңғыл жолының бастауы болды. 1992 жылы өткен «Жас қанатта» орындаушыларға жоғары талаптар қойылған еді, бүгінгі таңда да «Жас қанат» қатысушылардан кәсіпқойлықты және үздік дайындықты қажет етеді. Байқауға қатысушыларға сәттілік пен ұзақ шығармашылық өмір тілеймін, – деді М. Арынбаев.

astana.gov.kz/kk/modules/material/10457

Елордада Қазақстан халқының бірлігі күні кеңінен тойланды. Ең негізгі халықтық серуен «Қазақ елі» монументінің алдындағы алаңда ұйымдастырылды. Қала тұрғындары мен қонақтары достық дастарқанынан дәм татып, 500-ге жуық әртістің өнерін тамашалады.

Этномәдени бірлестіктердің өкілдері өздерінің ұлттық тағамдарын әзірлеп, қолданбалы өнер көрмесін көпшілік назарына ұсынды. Мерекенің мұндай форматы астаналықтар мен қала қонақтарына ұнаған сыңайлы.

— Біз, Астана қаласындағы қазақстандық дүнген қоғамы, баршаңызды бірлік күнімен құттықтаймыз! Барлық ұлттар өздерінің бірдей екендігін сезінетіндіктен елімізде бейбітшілік пен келісім орнаған, — дейді Зүлфия Муханзаева.



Астаналық шығармашылық ұжымдар да жиналған қауымға керемет көңіл күй сыйлады. Елордалық өзбек этномәдени орталығының «Пойтахт» вокалдық ұжымы әр түрлі тілдерде әндер орындады.

— Біздің топ «Пойтахт» деп аталады, ол Қазақстанның елордасы – Астана деп аударылады. Астанада шығармашылықпен айналысып жүргенімізге сегіз жыл болды. Түрлі іс-шараларға қатысамыз. Баршаңызды мерекемен құттықтаймыз, бақыт, денсаулық тілейміз,- деді Ойбек Палванов.



Айта кетейік, Қазақстан халқының бірлігі күнін атап өту үшін елордаға өзге мемлекеттерден де қонақтар келген екен.

— Мен, Армениядан 1 мамыр мерекесіне арнайы келіп отырмын. Өте қуаныштымын, мұнда қонақтарды осылай қарсы алады деп ойламағам, бәрі қызық. Қазақстанды құттықтаймын, бейбітшілік тілеймін, — деді Анна Саркисян.

Қала тұрғындары мен қонақтары күні бойы Қазақстанда тұрып жатқан халықтардың мәдениетімен танысып, ұлттық тағамдардан дәм татып, дәстүрлі спорт түрлері бойынша сайысқа түсті.



Материал Астана қаласы әкімдігінің astana.gov.kz ресми сайты деректері бойынша әзірленді.

Астанада таңертеңнен бері халықтық серуен өтіп жатыр. Қала тұрғындары мен қонақтары, балалар мен ересектер елорданың басты алаңдарына жиналды.

Қазақстан халқының бірлігі күніне арналған негізгі шаралар әкімдік алдындағы алаңда, «Бәйтерек» монументінің алдындағы алаңда және «Студенттік» паркте өтіп жатыр. Мерекелік концерттер, қазақстандық әртістердің орындауындағы әндер мен билер көпшілікке мерекелік көңіл күй сыйлады.

Әдеттегідей, мерекеге орай спорттық жарыстар да ұйымдастырылды. Балалар арасында тоғызқұмалақтан, армрестлингтен және асық атудан сайыстар өткізілді. «Бәйтерек» монументінің алдындағы алаңда халықтың бірлігінің белгісі ретінде аспанға ақ шарлар ұшырылды. Барлық алаңдарда адамдарға тәтті-дәмділер ұсынылды.

Мерекелік бағдарлама сағат 23:00 дейін жалғасады.

astana.gov.kz/kk/modules/material/10444