Баламның атын Аршат қойдым

Жақында әлеуметтік желілерде "ұлды болдым, ағайын" деп жар салғаным бар еді. Сол кезде осындағылардың көпшілігі мені құттықтаған болатын. Ал шынында менің ағам ұлды болған-тұғын. Алайда тұңғышы ата мен әженің баласы болатындықтан, әулетте әкемнің орнындағы маған бала болып есептеліп, ағайындарым мені құттықтады. Өйткені әкемнің орында әулеттің жиынында маған сөз сөйлетуші еді. Енді анам екеумізге бала болған бұл нәрестенің атын қою мәртебесі маған тапсырылған-ды. Ендеше неге менің балам деп атамасқа деп твиттерге жазып жібердім. Алайда құрметті адамдар құттықтау айтып, лебіздерін білдіре бастағанда, ыңғайсызданып қалғаным бар. Сөйтіп алғыс айтып отыра бердім. Бірақ үйленбегенімді білетіндердің бұл қалай десіп хабарласқан соң, осылай жеткізуді жөн көріп отырмын.
Әуелде Әбдірахман қоямын ба деген ой келген, алайда уақыттан кешіккен екем. Атыраудың қазіргі жағдайында… Мүмкін бірнеше ай бұрын… Қысқасы үлкендер қолдамады.
Одан соң маңайымдағы адамдардың есімдерін санамалап, ал кеп ізде. Содан соң таптым…
АРШАТ!!!
Кейбіреулер «бұл қалай» деп таңғалды, кебірі «мұнысы несі» деп қабағын керді. алайда әулет үлкені — әкемнің егізі қолдап, АРШАТ деген есім мақұлданды.
Өзімнің толып жатқан: «Ар-шат — яғни арлы әрі шат, ылғи қуанышта жүрсін деп...» деген арзанқол аргументтерімнен, анамның сөзі екпінді болды. Себебі тұқымымызда көпшілігінің есімі "-ат" деп аяқталатын еді. Сибағат, Бағдат, Ғибрат деген секілді. Ендеше неге «Аршат» қоймасқа?!..

Пы.сы. Ал сіздер бұл есімді қайдан тапқанымды біліп отырған шығарсыздар. Бұл «аттың» иесіне ұқсаса жаман адам болмас, сірә. Қазақ жастарының басын виртуалды өмірде қосып отырған адамның Атырауда да бір жаман інісі бар екенін біліп жүріңіз, Аршат ағасы .