Домбыра Party: Өш, домбыра қайда?

Домбыра Party-дің бесігі болған Астанада үш апта қатарынан ән шырқалмай қалды. Содан өткен бейсенбіде Нұржол бульварына жиналдық. Барсақ, ән айтуға келген, домбыра тыңдауға келген қалың көпшілік бар да, домбыра жоқ. «Ұяттың көкесі осы болды-ау» дей бергенім сол еді, арамыздан бір супержігіт табылып, домбыра әкелуге жүгіріп кетті.

Мына суретте арғы жағынан санағанда үшінші отырған ақ көйлекті жігіт сол. Атын да сұрамаппын. Сол жігіттің домбырасының арқасында біраз жаңа әндер мен жаңа әншілер тыңдалды.



Бұл кештің басты жаңалығы, сонау Алматыдан ат терлетіп жеткен dark_nazgul еді. Қонақ болғаны үшін емес, Назгүл болғаны үшін домбыраны бірден қолына бердік. Ол тартынатын ба еді?! Сайрай жөнелді.



Кәде сұрауым мұң екен, қара торы келген бозбала шыға келді. Есімі Таңнұр екен. Тоғызды бітіріп, «Шабыттың» колледжіне түскен жігіт халық әндерін сызылытты. Дауысы да бар екен, манадан құмығып тұрған домбыраны да сөйлетіп жіберді. Қысқасы, тіл-көзден аман болса, бұл баланы әлі талай биіктен көретінімізге сенімім кәміл.



Үнемі айтамын ғой, бұл домбыра қазақтың қанын қыздырмай қоймайды. Сәл іркіліп қалып едік, ортаға Назгүлдің апасы (атын ұмыттым) шыға келді. Біз де қызықтың енді басталғанын түсіндік. Апамыз қамшы салдырмайды екен, әнді де айтты, күйді де тартты. Респектті бәрі осы кісіге кетті.



Бұл пати көрерменді үш апта күттіргенін айттым ғой. Күткен еңбек ақталды. Патиға келген ақын біткенді шыдатпай жүрген MERmukhanov Олжас Отар ағамызбен сөз таластыруға мүмкіндік алды. Бағасын өзіңіз берерсіз.



Әдеттегідей Алмас пен Дәрия ән салды. Мен де аздап қылғындым. Бұрынғыдан көрі адам қарасы да, әншілер саны да аз болды демесеңіз, жоғарыда аталған өнерпаздардың арқасында бұл пати өте жақсы деңгейде өтті. Келесісінен қалып қоймаңыз енді.