Керекинфоға керекпін бе?

Кеше ақылыма осындай бір сұрақ келді. Жалпы қолым бос кезде аударма мен шимай шатпақ жазумен айналысатыным бар еді. Ноутбугімнің түкпіріндегі сары папкаға жиналып қалған туындыларымды интернетке салғым кеп жүргеніне біраз болған еді. Сөйтіп кенеттен Керекинфоға кездестім. Әрине тіркеліп жазғандарымды салмас бұрын, біраз уақыт сайтты бақылап көрдім. Жазылған шығармаларды, пікірлерді оқыдым. Байқағаным бұл жерде нормативтіге жатпайтын лексика мен жаргон сөздерді қолданғанды жақсы көретін адамдар көөп екен. Очм, ырысбек, зайып алды, тігем, исчо деген сөздер алғашында құлағыма түрпі тікенегіндей тигені былай тұрсын, мағынасын түсіне алмай дал болдым. Артынша үйреніп кеттім. Осыған орай бір айтарым жаргондарды жинап арнайы Керекинфо сөздігі деген сөздік шығарса да болатын секілді. Жалпы айтқанда жақсы сайт. Адамдар тіркеліп, бастарынан өткендерін жазып, одан қалса Инекеңнің түкпір түкпірінен тірнектеп жинаған мәліметтерімен бөліседі екен. Бір бірімен пікір алмасады екен. Сонымен бірнеше меланхолиялық жазбаларым мен өлеңсымақтарымды арқалап мен де келіп қалдым араларыңызға. Бәлкім бұл жазғандарым балалықтың ауылынан ары аса алмай жүрген қыздың шатпағы болып көрінер. Шын мәнісінде де солай болуы мүмкін. Не де болса салып көрейін деп тәуекелге бел будым. Дей тұрғанмен кермек шындықты кедергісіз айтатын керекинфошылардың критикасына қаламын деп ойламадым. Сын пікірлеріңізді оқи отырып таңғалдым, таңырқадым, бір жағынан қуандым, бір жағынан мұңайдым.Қайтем енді тумысымнан қатты әсершілмін. Алайда жазғандарымды оқыған барлық адамдарға ризашылығымды білдіргім келеді. Пікір қосқандарға да жеке жеке алғысымды білдіремін. Оның ішінде
Zholantai (атыңызды дұрыс жаздым деп үміттенем) мырзаға кетш, оттамаш дегендері үшін рахмет, көктен жерге парашютсіз ақ түсірдіңіз.
Araika ханым мен Daniar Alan мырзаға да пробел жөнінде жазған сындарыңыз үшін алғыс айтам.
MERmukhanov мырзаға да бұл жазбада әсіре ештеңе жоқ деп шындықты айтқаны үшін үлкен рахмет.
Және басқа да пікір жазған адамдарға көптен көп рахмет. Пкірлеріңіз жақсы болсын жаман болсын мен үшін өте қымбат. Алдағы уақытта да сіздерден сын пікір күтетін боламын. Және де бұдан да жақсы жазбалармен қуантып тұруға тырысамын. Соңында керекинфошылардың тілімен айтатын болсам ОЧМ БАРЛЫҒЫНА ҮЛКЕН ЫРЫСБЕК КО.