Бұйрабас тотықұс күтімі

Өткен айда зоодүкенге аяқастынан жолым түсіп, осы бір өзіндік мінезі бар бұл тотықұсты ойланбастан сатып алдым. Менің тотықұсым бұйрабас тотықұстар (волнистый попугай) түріне жатады. Үйге келген соң ал енді қандай есім қоямын деп дал болдым. Үш күн ойландым ғой. Сосын Сатыбалды, Жулюлюм, Сүйінші деген үш есімді қатар таңдап, көңіл-қошыма қарай үш есімді кезектестіре атап, шақырамын.
Сүйінші, Сатыбалды, Жулюлюм
Негізінен бұйрабас түріне жататын тотықұстар басқа тотықұс түрлерінен көп сөйлегіштік, бәдіктігімен ерекшеленеді екен. Оған көзім әбден жетті. Менің Сатыбалдым таңғы бес жарым шамасынан бастап шықылықтап маза бермейді. Дамылсыз шиқылынан миым ашып кете жаздайды, ондай кезде ұйқылы-ояу күйімде «жоғал нақ» дей жүріп балконға шығарамын. Даланың құстарымен бірлесіп сайрап, жайраңдап қалады. Мауқы басылған соң мазасыздана тағы шиқылға басады. Бұл бөлмеге кірем дегені, қарнының ашқаны. Қолдан жем беріп, торына қайта жайғастырғаннан соң барып үні өшеді Бұйрабас тотықұсқты дұрыс бағып-қақсаңыз 15-20 жылдай өмір сүреді екен.

Тамақтандыру
Сапалы жем (корм) таңдау сіздің отбасыңыздың бір мүшесі — тотықұсыңыздың денінің саулығы. Сондықтан жем таңдауда абай болғаныңыз жөн. Өзім сол зоодүкендегі апай арқылы алып тұрамын. Сүйінші ерекше тәбетпен жейтін COLIBRI жемі Қазақстанда жасалған. Жулюлюмның қомағайлана жеуіне қарағанда бұл жем дәмді сияқты. Сонымен қатар ұсақ тотықұстарға арналған жем бағасы неғұрлым жоғары болса, соғұрлым сапалы келеді. Негізінен құрамына көз жүгіртіп және жемнің түрлі-түске боялмағанына назар аударыңыз. Күндізгі нормада тотықұсқа 1,5-2 шай қасық жем беруге болады. Әлбетте, тотықұсыңыздың жасы мен ауқымына, тәбетіне қарай өзіңіз орайластырғаныңыз жөн.
Дәрумендерге бай әртүрлі жеміс-жидектердің тотықұсыңыз үшін беруге болатын және болмайтын түрлері бар. Негізен құрамында майлылығы көп қоректерді беруге болмайды. Авокадо, жаңғақтар, қышқылы көп манго мен құрмалар осы қатарды толықтырады.
Беруге болады: алма (дәнегінсіз), өрік, шырғанақ, алмұрт, банан, мандарин, апельсин, құлпынай. Сонымен бірге сәбіз, қызылша, петрушка, капуста, қиярды да үккіштен өткізіп тотықұсыңыздың алдына қоя аласыз.
Торда үнемі әр түрлі минералға бай тастар сепия болуы керек. Мұны тотықұсыңыз кеміріп, мүжу арқылы өзіне пайдалы элементтерді бойына жинақтайды. Яғни тұмсық, тырнағының қатқылдануына,қанат-құйрықтарының әдемі болып өсуіне септігін тигізеді.
менің бұйрабасым дәл осындай
Жуындыру
Тотықұстарға арналған арнайы ванна болады. Тотықұс жуынғанда бөлмеде өкпек желдің есіп тұруынан салқын тиіп қалуы мүмкін, сондықтан есік-терезе жабық тұрғаны дұрыс. Жуынып жатқан суды құсыңыз ішуім мүмкін болғандықан, ішуге жарамды, таза сумен жуындырыңыз. Тотықұстарда да әрқилы мінез бар, талғам бар. Кейбіреулері жуынуды ұнатпауы да таңсық емес. Ондай кезде өзіңіз қолмен жуындыруға тура келеді. Бірақ қорқытып алып жүрмеңіз. Олар тым үркек, әрі нәзік қой.
Негізінен зоодүкендегі сатушылардан күтімнің анық-қанығын тәтпіштеп сұрап алсаңыз болады
Тотықұстарды сөйлеуге үйретуге төзім мен жақсы көру деген сезіміңіз болса жекілікті. Оны келесі бірде жаза жатармын.
Бөлісу:

25 пікір

Gulistan
Жаңа ермегің құтты болсын!
Sashok
Қалай ол сонда? Неге Мағауин емес?
Aya
Неге Мағауин болуы керек, Сәшөк?
Ispek92
Қаншаға алдыңыз?
Aya
Ispek92 тотықұстың өзі екі мың тг ғана тұрады. Басқа да түрлері көлеміне, әдемілігіне, түріне қарай қымбаттайды. Және торы, азық-түлігі, минералды тасы т.б керек қосымша заттары бар  Мен барған дүкенде Ара деген тоты үлкен, әдемі болды. Бағасы 7 мың тг. Бірақ оның жынысы қыз, әрі долы еді. Сондықтан ұнатқан жоқпын. Ал менің бұйрабасым нағыз жігіт))
Соңғы түзету:
Ispek92
Ал менің бұйрабасым нағыз жігіт))
ken
баяғыда бізде де болған екеуі. жаным ашитын, тар торда отырғандарына қарап. жібере салуға тағы болмайды, өліп қалады. бірақ аққыры өліп тынды.
Aya
жасы келген соң ажалы да жеткен шығар, мүмкін.
neoaskar
Жоқ, олар жастай кеткен. 15 жылдан кейін
ken
тордың ішіне айна орналастырып қой. сонда қасында тағы бір тотықұс бар екен деп ойлайтын болады.
ken
немесе тағы бір тоты сатып алғаның дұрыс
Aya
сіздің тотыңыз сөйледі ме?
ken
жоқ. екеу болса, сөйлету қиын.
Aya
Меңкі сөйлеген жоқ әлі, мағынасыз шиқылдап миымды ашытып жіберед. Айнадағы өз бейнесіне қарап, түсінбей басын алып қашып әуре болған тотыма әбден күлдім ғой))
zholantai
керектің сөздерін үйрет, «лібә»-дан бастап
Aya
)) сол үйрету үшін біраз уақыт керек, айтқанымды дым қайталамай мағынасыз шиқылдағанда жылағым келе жаздайды))
ken
Тотықұсың қалай? Сөйлейтін түрі бар ма?))
Aya
мен кино көріп отырғамын. Сосын ол бөлмеде жүрген әйтеуір шиқылдап. Киноға басыммен кіріп оны ұмытып кетіппін. Біркезде тыншып қалды. Неге үні өшіп қалды деп бөлмеден әбден іздедім. Жоқ. Терезе кішкене ғана ашық тұрған. Ұшпады-күйсіз жоғалып кетті әйтеуір. Қалай терезеден шығып кетті, білмеймін(((((((((( Енді жаңа бір тоты сатып алдым. Бірақ оны ана біріншісі сияқт жақсы көрмейм.
ken
Сатыбалдыңның ұшып кеткені жаман болған екен. Енді тордан шығарарда алдымен терезені жабатын боласың.
Жаңасының атын кім қойдың? Әбіләкім емес пе случайно?))
Aya
Әбіләкім емес. Сатыбалды 2!
Korkem
менің қолымнан келмес еді)) құштііі