Құттықтау

Павлодар облыстық радиосында туған күн иелерінің құрметіне арналған құттықтау сазды бағдарламасының кезекті саны өтіп жатқан. Сазды әуен біткеннен кейін бағдарлама жүргізушісі сөзін әрі қарай сабақтады: “сонымен тыңдармандар назарларыңызды аудара отырайын. Ал тыңдаңыздар. Бүгіііін, яғнииии, біздіііің, кішкентай ғана “тыңдарманымыз”, Павлодар қаласының тұрғыны Әлішер 2 жасқа толып отыр. Оған ата-аналары Ерлан мен Гүлден (негізінде барлық туысқандарының аттары жеке-жеке аталады), атасы мен әжесі, нағашы атасы мен әжесі, мектепте оқитын оқу озаты ағасы, әпкесі, Астана мен Көкшетаудағы нағашы туыстары (облыстық радио облыс көлемінде ғана тарайды), Баянауылдағы құда-құдағилары (Әлішердің құдалары болғаны да) және басқа да ет жақын туыстары Әлішердің қуанышына ортақтаса отырып, өзі сүйіп тыңдайтын “Немерем” әнін “сазгер” Заттыбектің орындауында тарту етуді бірауыздан тілеп отыр. Ал кәне, Әлішер бұл музыкалық құттықтау саған арналады, қабыл ала ғой”. Әрі қарай музыкалық құттықтау жалғасып кетті.